聖經閱讀

上一章下一章 [ 條列 | 表格 | 整段 ] 著作權聲明使用授權書PDF版使用授權書Word版
約翰福音

19:1 所以，彼拉多下令鞭打耶穌。
19:1 Só-yî, Pí-lâ-tô ha-lin piên-tá Yâ-sû.
19:2 兵仔用竻仔編一頂冕旒，戴在佢个頭那頂，又㧯佢著紫色个長袍。
19:2 Pîn-é yung net-è phiên yit-táng miên-liù, tai chhai kì ke thèu-nà-táng, yu lâu kì chok chṳ́-set ke chhòng-phàu.
19:3 佢等進前對佢講：「猶太人个王萬歲！」然後用巴掌乸搧佢。
19:3 Kì-têu chin-chhièn tui kì kóng: “Yù-thai-ngìn ke vòng van-soi!” Yèn-heu yung pâ-chóng-mà sân kì.
19:4 彼拉多又出來對眾人講：「你等看，𠊎帶佢出來到你等面前，俾你等知，𠊎查毋出佢有麼介罪。」
19:4 Pí-lâ-tô yu chhut-lòi tui chung-ngìn kóng: “Ngì-têu khon, ngài tai kì chhut-lòi to ngì-têu mien-chhièn, pûn ngì-têu tî, ngài chhà-m̀-chhut kì yû má-ke chhui.”
19:5 耶穌就出來，戴等竻仔个冕旒，著等紫色个長袍。彼拉多對佢等講：「看啊，這個人！」
19:5 Yâ-sû chhiu chhut-lòi, tai-tén net-è ke miên-liù, chok-tén chṳ́-set ke chhòng-phàu. Pí-lâ-tô tui kì-têu kóng: “Khon â, liá-ke ngìn!”
19:6 祭司長㧯聖殿个衛兵一看到耶穌，就大聲喊講：「將佢釘十字架！將佢釘十字架！」彼拉多對佢等講：「你等自家帶佢去釘十字架。𠊎查毋出佢有麼介罪。」
19:6 Chi-sṳ̂-chóng lâu sṳn-thien ke ví-pîn yit khon-tó Yâ-sû, chhiu thai-sâng hêm-kóng: “Chiông kì tâng sṳ̍p-sṳ-ka! Chiông kì tâng sṳ̍p-sṳ-ka!” Pí-lâ-tô tui kì-têu kóng: “Ngì-têu chhṳ-kâ tai kì hi tâng sṳ̍p-sṳ-ka. Ngài chhà-m̀-chhut kì yû má-ke chhui.”
19:7 猶太人講：「𠊎等有一條法律，照該條法律，佢係該死个，因為佢自稱係上帝个孻仔。」
19:7 Yù-thai-ngìn kóng: “Ngài-têu yû yit-thiàu fap-li̍t, cheu ke-thiàu fap-li̍t, kì he kôi-sí ke, yîn-vi kì chhṳ-chhṳ̂n he Song-ti ke Lai-é.”
19:8 彼拉多聽到佢等恁樣講，就越驚；
19:8 Pí-lâ-tô thâng-tó kì-têu án-ngiòng kóng, chhiu ye̍t kiâng;
19:9 再倒轉去總督府。佢問耶穌講：「你到底係對㖠位來个？」總係耶穌無應佢。
19:9 chai to-chón-hi chúng-tuk-fú. Kì mun Yâ-sû kóng: “Ngì to-tái he tui nai-vi lòi ke?” Chúng-he Yâ-sû mò en kì.
19:10 彼拉多對佢講：「你毋應𠊎嗎？你愛知噢，𠊎有權好放你，也有權好將你釘十字架。」
19:10 Pí-lâ-tô tui kì kóng: “Ngì m̀ en ngài mâ? Ngì oi tî ô, ngài yû khièn hó piong ngì, ya yû khièn hó chiông ngì tâng sṳ̍p-sṳ-ka.”
19:11 耶穌講：「若毋係上帝將這權柄交給你，你就無權好判𠊎。所以，將𠊎交給你个人，佢个罪還較重。」
19:11 Yâ-sû kóng: “Na m̀-he Song-ti chiông liá khièn-piang kâu-pûn ngì, ngì chhiu mò khièn hó phan ngài. Só-yî, chiông ngài kâu-pûn ngì ke ngìn, kì ke chhui hàn-kha chhûng.”
19:12 彼拉多聽到這個話，越想愛放耶穌。總係猶太人盡喊講：「你若係放佢，就毋係皇帝个朋友！麼人自稱係王，麼人就係皇帝个敵人。」
19:12 Pí-lâ-tô thâng-tó liá-ke fa, ye̍t sióng-oi piong Yâ-sû. Chúng-he Yù-thai-ngìn chhin-hêm kóng: “Ngì na-he piong kì, chhiu m̀-he Fòng-ti ke phèn-yû! Má-ngìn chhṳ-chhṳ̂n he vòng, má-ngìn chhiu-he Fòng-ti ke thi̍t-ngìn.”
19:13 彼拉多聽到佢等恁樣講，就帶等耶穌出來，在「石階」(希伯來話安到「枷巴他」)个所在開庭審問(4019:13「開庭審問」抑係譯做「喊佢坐審判个座位」。)。
19:13 Pí-lâ-tô thâng-tó kì-têu án-ngiòng kóng, chhiu tai-tén Yâ-sû chhut-lòi, chhai “Sa̍k-kâi” (Hî-pak-lòi-fa ôn-to “Kâ-pâ-thâ”) ke só-chhai khôi-thìn sṳ́m-mun( 40 19:13 “khôi-thìn sṳ́m-mun” ya-he yi̍t-cho “ham kì chhô sṳ́m-phan ke chho-vi”.).
19:14 該日係𨃟過節个預備日，臨當晝，彼拉多對猶太人講：「看啊，你等个王！」
19:14 Ke-ngit he Phàn-ko-chiet ke Yi-phi-ngit, lìm tông-chu, Pí-lâ-tô tui Yù-thai-ngìn kóng: “Khon â, ngì-têu ke vòng!”
19:15 佢等就盡喊講：「除掉佢！㓾死佢！將佢釘十字架！」彼拉多問佢等講：「愛𠊎將你等个王釘十字架嗎？」祭司長應講：「皇帝正係𠊎等个王！」
19:15 Kì-têu chhiu chhin-hêm kóng: “Chhù-thet kì! Chhṳ̀-sí kì! Chiông kì tâng sṳ̍p-sṳ-ka!” Pí-lâ-tô mun kì-têu kóng: “Oi ngài chiông ngì-têu ke vòng tâng sṳ̍p-sṳ-ka mâ?” Chi-sṳ̂-chóng en-kóng: “Fòng-ti chang he ngài-têu ke vòng!”
19:16 因為恁樣，彼拉多將耶穌交給佢等去釘十字架。
19:16 Yîn-vi án-ngiòng, Pí-lâ-tô chiông Yâ-sû kâu-pûn kì-têu hi tâng sṳ̍p-sṳ-ka.

耶穌被人釘十字架

19:17 ( 馬太27:32-44 馬可15:21-32 路加23:26-43 )
耶穌出來，擎等自家个十字架，來到名安到「頭那殼个山頭」(希伯來話安到「各各他」)。

Yâ-sû Pûn-ngìn Tâng Sṳ̍p-sṳ-ka

19:17 ( Mâ-thai 27:32-44 Mâ-khó 15:21-32 Lu-kâ 23:26-43 )
Yâ-sû chhut-lòi, khià-tén chhṳ-kâ ke sṳ̍p-sṳ-ka, lòi-to miàng ôn-to “Thèu-nà-hok ke Sân-thèu” (Hî-pak-lòi-fa ôn-to “Kok-kok-thâ”).
19:18 在該位，佢等將佢釘在十字架頂；另外還釘兩個人，一片一個，耶穌在中央。
19:18 Chhai ke-vi, kì-têu chiông kì tâng chhai sṳ̍p-sṳ-ka-táng; nang-ngoi hàn tâng lióng-ke ngìn, yit-phién yit-ke, Yâ-sû chhai tûng-ông.
19:19 彼拉多又寫一垤牌仔，喊人釘在十字架頂高。該牌仔寫等：「拿撒勒人耶穌，猶太人个王。」
19:19 Pí-lâ-tô yu siá yit-te phài-è, ham ngìn tâng chhai sṳ̍p-sṳ-ka táng-kô. Ke phài-è siá-tén: “Nâ-sat-le̍t-ngìn Yâ-sû, Yù-thai-ngìn ke vòng.”
19:20 有盡多猶太人看到這牌仔所寫个，因為耶穌釘十字架个所在離開城無幾遠；這牌仔係用希伯來、拉丁，㧯希臘三種字寫个。
19:20 Yû chhin-tô Yù-thai-ngìn khon-tó liá phài-è só siá ke, yîn-vi Yâ-sû tâng sṳ̍p-sṳ-ka ke só-chhai lì-khôi sàng mò kí-yén; liá phài-è he yung Hî-pak-lòi, Lâ-tên, lâu Hî-lia̍p sâm-chúng sṳ siá ke.
19:21 猶太人个祭司長對彼拉多講：「莫寫『猶太人个王』，愛寫『這人自稱係猶太人个王』。」
19:21 Yù-thai-ngìn ke chi-sṳ̂-chóng tui Pí-lâ-tô kóng: “Mo̍k siá ‘Yù-thai-ngìn ke vòng’, oi siá ‘Liá ngìn chhṳ-chhṳ̂n he Yù-thai-ngìn ke vòng’. ”
19:22 彼拉多講：「𠊎所寫个，做毋得改！」
19:22 Pí-lâ-tô kóng: “Ngài só siá ke, cho-m̀-tet kói!”
19:23 兵仔釘耶穌在十字架頂以後，就將佢个外衫分做四垤，一儕一垤。佢等又拿佢个內衫；這內衫毋係用線合起來个，係歸垤布仔刺成个。
19:23 Pîn-é tâng Yâ-sû chhai sṳ̍p-sṳ-ka-táng yî-heu, chhiu chiông kì ke ngoi-sâm pûn-cho si-te, yit-sà yit-te. Kì-têu yu nâ kì ke nui-sâm; liá nui-sâm m̀-he yung sien kap-hí-lòi ke, he kûi-te pu-é chhiak-sṳ̀n ke.
19:24 所以，兵仔彼此商量講：「𠊎等毋好將它扯開；來抽籤仔，看麼人得到。」這應驗聖經所講个：
佢等分𠊎个外衫，
為𠊎个內衫抽籤。
該兜兵仔正經就恁樣做。

19:24 Só-yî, pîn-é pí-chhṳ́ sông-liòng kóng: “Ngài-têu m̀-hó chiông kì chhá-khôi; lòi chhû-chhiâm-é, khon má-ngìn tet-tó.” Liá yin-ngiam Sṳn-kîn só-kóng ke:
Kì-têu pûn ngài ke ngoi-sâm,
vi ngài ke nui-sâm chhû-chhiâm.
Ke-têu pîn-é chṳn-kîn chhiu án-ngiòng cho.

19:25 企在耶穌个十字架堘頭个，有耶穌个阿姆㧯厥姆个老妹，還有革羅罷个𡜵娘馬利亞，㧯抹大拉个馬利亞。
19:25 Khî chhai Yâ-sû ke sṳ̍p-sṳ-ka sùn-thèu ke, yû Yâ-sû ke â-mê lâu kiâ-mê ke ló-moi, hàn-yû Kiet-lò-pha ke pû-ngiòng Mâ-li-â, lâu Mat-thai-lâ ke Mâ-li-â.
19:26 耶穌看到厥姆㧯佢所惜个學生企在塍頭，就對厥姆講：「阿姆(4119:26「阿姆」原文係「婦人家」。)，你看，若孻仔。」
19:26 Yâ-sû khon-tó kiâ-mê lâu kì só-siak ke ho̍k-sâng khî chhai sùn-thèu, chhiu tui kiâ-mê kóng: “Â-mê( 41 19:26 “Â-mê” ngièn-vùn he “Fu-ngìn-kâ”.), ngì khon, ngiâ lai-é.”
19:27 佢又對該學生講：「你看，若姆。」對該時開始，該學生就接耶穌个阿姆到自家个屋下去住。
19:27 Kì yu tui ke ho̍k-sâng kóng: “Ngì khon, ngiâ mê.” Tui ke-sṳ̀ khôi-sṳ́, ke ho̍k-sâng chhiu chiap Yâ-sû ke â-mê to chhṳ-kâ ke vuk-hâ hi he̍t.

耶穌个死

19:28 ( 馬太27:45-56 馬可15:33-41 路加23:44-49 )
耶穌知一切个事已經成就，為到愛應驗聖經个話，就講：「𠊎嘴燥了。」

Yâ-sû ke Sí

19:28 ( Mâ-thai 27:45-56 Mâ-khó 15:33-41 Lu-kâ 23:44-49 )
Yâ-sû tî yit-chhiet ke sṳ yí-kîn sṳ̀n-chhiu, vi-tó oi yin-ngiam Sṳn-kîn ke fa, chhiu kóng: “Ngài choi-châu lé.”
19:29 在該位，有一隻罐仔，裝等酸葡萄酒；佢等就拿海綿浸酸葡萄酒，䌈在牛膝草个莖頂高，送到厥嘴唇。
19:29 Chhai ke-vi, yû yit-chak kon-é, chông-tén sôn phù-thò-chiú; kì-têu chhiu nâ hói-mièn chim sôn phù-thò-chiú, thak chhai ngiù-chhit-chhó ke káng táng-kô, sung-to kiâ choi-sùn.
19:30 耶穌一下，就講：「完成了！」跈等，佢个頭那攋下來，就斷氣死掉。
19:30 Yâ-sû tâm yit-ha, chhiu kóng: “Vàn-sṳ̀n lé!” Thèn-tén, kì ke thèu-nà lài-hâ-lòi, chhiu thôn-hi sí-thet.

用槍刺耶穌个脇下

19:31 該日係𨃟過節个預備日，第二日个安息日係神聖个大日仔。猶太人个領袖毋愛安息日有身屍留在十字架頂，就要求彼拉多喊人打斷受刑人个腳，將身屍解下來。

Yung Chhiông Chhiuk Yâ-sû ke Hia̍p-hâ

19:31 Ke-ngit he Phàn-ko-chiet ke Yi-phi-ngit, thi-ngi-ngit ke Ôn-sit-ngit he sṳ̀n-sṳn ke thai ngit-è. Yù-thai-ngìn ke liâng-chhiu m̀-oi Ôn-sit-ngit yû sṳ̂n-sṳ̂ liù chhai sṳ̍p-sṳ-ka-táng, chhiu yêu-khiù Pí-lâ-tô ham ngìn tá-thôn su-hìn ngìn ke kiok, chiông sṳ̂n-sṳ̂ kié hâ-lòi.
19:32 兵仔奉命就去，將該同耶穌共下釘十字架个頭一儕㧯另外一儕个腳打斷。
19:32 Pîn-é fung-min chhiu hi, chiông ke thùng Yâ-sû khiung-ha tâng sṳ̍p-sṳ-ka ke thèu-yit-sà lâu nang-ngoi yit-sà ke kiok tá-thôn.
19:33 佢等行近耶穌，看到佢已經死掉，就無打斷佢个腳。
19:33 Kì-têu hàng-khiûn Yâ-sû, khon-tó kì yí-kîn sí-thet, chhiu mò tá-thôn kì ke kiok.
19:34 總係，有一個兵仔用槍刺佢个脇下，黏時血㧯水就流出來。
19:34 Chúng-he, yû yit-ke pîn-é yung chhiông chhiuk kì ke hia̍p-hâ, ngiàm-sṳ̀ hiet lâu súi chhiu liù chhut-lòi.
19:35 (看到个人就做見證，愛使你等也信。佢知佢所見證个係確實个，因為係佢親眼看到个。)
19:35 (Khon-tó ke ngìn chhiu cho kien-chṳn, oi pûn ngì-têu ya sin. Kì tî kì só kien-chṳn ke he khok-sṳ̍t ke, yîn-vi he kì chhîn-ngién khon-tó ke.)
19:36 因為這兜事愛應驗聖經所講个話：「佢个骨頭連一支也毋會被人打斷。」
19:36 Yîn-vi liá-têu sṳ oi yin-ngiam Sṳn-kîn só kóng ke fa: “Kì ke kut-thèu lièn yit-kî ya m̀-voi pûn-ngìn tá-thôn.”
19:37 聖經又有一句話講：「佢等愛仰望自家用槍所刺个人。」
19:37 Sṳn-kîn yu yû yit-ki fa kóng: “Kì-têu oi ngióng-mong chhṳ-kâ yung chhiông só chhiuk ke ngìn.”

耶穌个埋葬

19:38 ( 馬太27:57-61 馬可15:42-47 路加23:50-56 )
這兜事以後，有一個亞利馬太人約瑟請求彼拉多，准佢將耶穌个身屍領去。(約瑟係耶穌个學生；佢因為驚猶太人个領袖，毋敢公開。)彼拉多答應佢个請求，約瑟就將耶穌个身屍領去。

Yâ-sû ke Mài-chong

19:38 ( Mâ-thai 27:57-61 Mâ-khó 15:42-47 Lu-kâ 23:50-56 )
Liá-têu sṳ yî-heu, yû yit-ke Â-li-mâ-thai-ngìn Yok-sit chhiáng-khiù Pí-lâ-tô, chún kì chiông Yâ-sû ke sṳ̂n-sṳ̂ liâng-hi. (Yok-sit he Yâ-sû ke ho̍k-sâng; kì yîn-vi kiâng Yù-thai-ngìn ke liâng-chhiu, m̀-kám kûng-khôi.) Pí-lâ-tô tap-yin kì ke chhiáng-khiù, Yok-sit chhiu chiông Yâ-sû ke sṳ̂n-sṳ̂ liâng-hi.
19:39 該識在暗晡時來見耶穌个尼哥德慕同約瑟共下去。佢帶等沒藥㧯沉香合个香料，約有三十公斤。
19:39 Ke sṳt chhai am-pû-sṳ̀ lòi-kien Yâ-sû ke Nì-kô-tet-mu thùng Yok-sit khiung-ha hi. Kì tai-tén mu̍t-yo̍k lâu chhṳ̀m-hiông kap ke hiông-liau, yok-yû sâm-sṳ̍p kûng-kîn.
19:40 佢兩儕用抹等香料个麻紗將耶穌个身體纏好；這係猶太人葬禮个規矩。
19:40 Kì lióng-sà yung mat-tén hiông-liau ke mà-sâ chiông Yâ-sû ke sṳ̂n-thí chhàn-hó; liá he Yù-thai-ngìn chong-lî ke kûi-kí.
19:41 在耶穌釘十字架个地方有一垤園仔，底背有一隻毋識葬過人个新墳墓。
19:41 Chhai Yâ-sû tâng sṳ̍p-sṳ-ka ke thi-fông yû yit-te yèn-è, tî-poi yû yit-chak m̀-sṳt chong-ko ngìn ke sîn fùn-mu.
19:42 因為該日係猶太人个預備日，該墳墓又盡近，佢等就將耶穌葬在該位。
19:42 Yîn-vi ke-ngit he Yù-thai-ngìn ke Yi-phi-ngit, ke fùn-mu yu chhin khiûn, kì-têu chhiu chiông Yâ-sû chong chhai ke-vi.

上一章下一章 [ 條列 | 表格 | 整段 ] 重新查詢

經文由台灣聖經公會提供，不超過500節經文的使用權無須預先獲得批准，但請註明版權所屬。檢索技術與程式由 CBOL計畫提供，網站與資料庫資源由信望愛資訊中心提供。
Fonts(Version 3.1) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative. 漢字字型3.1版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。