上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
民數記
無清氣的人
5:1 上主命令摩西講：
5:2 「你著吩咐以色列人，將所有致著嚴重的皮膚病、下消，及摸著屍體致到無清氣的人送出去營外。
5:3 無論男女，恁攏著給𪜶送出去營外，才免𪜶拍垃墋此個營地，因為我住佇遮。」
5:4 以色列人就照按呢，給無清氣的人送出去營外；上主按呢命令摩西，以色列人就照按呢做。
賠償
5:5 上主吩咐摩西
5:6 對以色列人宣布：若有人剋虧人得罪上主，無論男女，彼個人就有罪。
5:7 伊著認罪，賠全部的損失閣加五分一互受害的人。
5:8 彼個受害的人若無親人通接受賠償，給人剋虧彼個人著將賠償的錢還互上主，歸佇祭司；另外，伊著閣獻一隻羊為家己贖罪，嘛歸互祭司。
5:9 以色列人帶來祭司遐奉獻的聖物中間，所有攑高獻互上主的，攏著歸互祭司。
5:10 人分別作聖的禮物，攏著歸互祭司；人無論用什麼送互祭司，攏著歸互祭司。
懷疑某不忠的處理辦法
5:11 上主吩咐摩西
5:12 對以色列人宣布：若有人懷疑伊的某對伊不忠，暗中及人發生性關係，拍垃墋家己，伊毋知，代誌嘛無暴露，無人作證，閣無互人掠著；不管伊的某有拍垃墋家己，引起伊懷疑怨妒，抑是伊的某無拍垃墋家己，毋拘伊懷疑怨妒；
5:13 併於上節
5:14 併於上節
5:15 彼個人著導伊的某去祭司遐，閣帶一公斤無濫油及乳香的大麥粉做禮物，這是為著懷疑怨妒所獻的素祭，欲互人會記得罪過。
5:16 祭司著互彼個婦仁人倚來，徛佇上主的面前。
5:17 祭司著用聖的水貯佇粗瓷，閣對會幕的土腳提一點仔土粉，摻佇水中。
5:18 祭司著互彼個婦仁人徛佇上主的面前，拍鬖婦仁人的頭毛，將互人會記得罪過的素祭，就是懷疑怨妒的素祭，下佇婦仁人的手；祭司著捧咒詛的苦水，
5:19 叫婦仁人咒誓，對伊講：「你已經嫁互你的丈夫，若無及別人發生性關係，拍垃墋家己，你就𣍐受著此個苦水的咒詛。
5:20 毋拘你若對你的丈夫不忠，及丈夫以外的人發生性關係，
5:21 願上主互你的大腿消瘦，腹肚漲起來，互你成做人民咒詛的話柄。
5:22 閣此個咒詛的水欲入去你的身軀，互你的腹肚漲起來，大腿消瘦。」婦仁人著應講：「阿們，阿們。」
5:23 祭司著將諸個咒詛的話寫佇冊卷，囥入去苦水內面洗掉。
5:24 彼個婦仁人若飲此個咒詛的苦水，此個水入去伊的身軀，會互伊痛苦。
5:25 祭司著對婦仁人的手接懷疑怨妒的素祭，佇上主的面前搖搖咧，帶去祭壇前；
5:26 閣著搣一把大麥粉，代表所獻的素祭，下佇壇頂燒，然後互婦仁人飲此個水。
5:27 彼個婦仁人飲此個咒詛的苦水，伊若真正有拍垃墋家己，對丈夫不忠，此個水入去伊的身軀，會互伊痛苦，腹肚漲起來，大腿消瘦；彼個婦仁人會互同胞咒詛。
5:28 毋拘伊若無拍垃墋家己，實在是清白，就𣍐受此款災禍，會閣懷孕。
5:29 以上是懷疑某不忠的處理辦法。某已經嫁互丈夫，若對丈夫不忠拍垃墋家己，
5:30 抑是丈夫怨妒懷疑伊的某，就著互伊的某徛佇上主的面前；祭司著照此個辦法處理。
5:31 按呢，查甫人無罪，婦仁人著對家己的罪負責任。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。