| 章節 | 現代台語漢字2021版經文 |
| 13:1 | 有關痲瘋病的條例 上主對摩西及亞倫講： |
| 13:2 | 人的皮膚若腫，抑是生癬，抑是變色，可能變做痲瘋病，著給伊導去祭司亞倫，抑是亞倫的子孫中做祭司的遐。 |
| 13:3 | 祭司著驗彼個人皮膚的症頭；有症頭的所在，毛若已經變白，症頭深入去肉內，這就是痲瘋病；祭司給伊檢查了，著宣布伊無清氣。 |
| 13:4 | 彼個人的皮膚若有白色的斑，看起來無深入去肉內，伊的毛嘛無變白，祭司著將彼個人隔離七日。 |
| 13:5 | 到第七日，祭司著閣給伊檢查；若症頭無湠開，祭司著閣給伊隔離七日。 |
| 13:6 | 到第七日，祭司著閣驗伊；若症頭較消，無閣湠開，祭司著宣布伊清氣，是癬若定。彼個人著洗家己的衫，就算做清氣。 |
| 13:7 | 毋拘伊互祭司驗過，宣布清氣了後，癬若湠開，伊著閣去互祭司檢查。 |
| 13:8 | 祭司給伊檢查，發見癬已經湠開，就著宣布伊無清氣，是痲瘋。 |
| 13:9 | 若有人已經有痲瘋的症頭，就著導伊去祭司遐。 |
| 13:10 | 祭司著給伊檢查；皮膚若有所在腫閣白白，毛嘛變白，佇腫的所在生新的肉； |
| 13:11 | 這就是慢性的痲瘋。祭司著宣布伊無清氣，毋免閣給伊隔離觀察。 |
| 13:12 | 痲瘋若湠開，祭司看會著的所在攏湠開， |
| 13:13 | 祭司著給伊詳細檢查；若發見伊全身的皮膚攏變白，就著宣布伊清氣。 |
| 13:14 | 伊的身軀若一下出現新的肉，伊就無清氣。 |
| 13:15 | 祭司若驗著彼個人有新的肉，著宣布伊無清氣，因為新的肉是無清氣，是痲瘋。 |
| 13:16 | 毋拘，新的肉若復原變白，彼個人著來見祭司。 |
| 13:17 | 祭司著給伊檢查；若發見感染的所在已經變白，祭司就著宣布彼個人做清氣；彼個人就清氣。 |
| 13:18 | 人若生粒仔有醫好， |
| 13:19 | 後來生粒仔的所在腫閣白白，抑是變粉紅仔色，就著互祭司驗。 |
| 13:20 | 祭司著給伊檢查；若發見症頭湠入肉內，毛變白，祭司著宣布伊無清氣，是痲瘋生佇粒仔內。 |
| 13:21 | 祭司給伊檢查，若發見彼頂面的毛無變白，嘛無湠入肉內，閣有較消，祭司就著給伊隔離七日。 |
| 13:22 | 祭司若發見病有佇皮膚湠開，祭司著宣布伊無清氣，伊有致病。 |
| 13:23 | 粉紅仔色的斑若無湠開，是粒仔的跡，祭司就著宣布伊清氣。 |
| 13:24 | 若有人皮膚互火燒著，燒著的所在生新的肉，肉有變色，無論是白色帶粉紅仔色，抑是全部白色， |
| 13:25 | 祭司就著給伊檢查；若發見變色的皮膚的毛變白，閣深入去皮膚內，這是痲瘋佇火燒著的所在發起來，祭司著宣布伊無清氣。 |
| 13:26 | 祭司檢查了，若變色的所在無白毛，嘛無深入去皮膚內，閣有較消，祭司就著給伊隔離觀察七日。 |
| 13:27 | 到第七日，祭司著閣給伊檢查；若已經湠開，是致著痲瘋，祭司就著宣布伊無清氣。 |
| 13:28 | 白色的斑若猶佇原來的所在，無湠開，閣有較消，是互火燒著腫起來的，不過是火燒著的跡，祭司著宣布伊清氣。 |
| 13:29 | 無論男女，若佇頭殼抑是下頦有致症頭， |
| 13:30 | 祭司著給伊檢查；症頭若深入去肉內，彼位的毛較黃較疏，祭司著宣布伊無清氣；這是癬，就是頭殼抑是下頦的痲瘋。 |
| 13:31 | 祭司檢查彼個癬，若無深入去肉內，彼所在嘛無烏的頭毛抑是嘴鬚，祭司著給彼個人隔離觀察七日。 |
| 13:32 | 到第七日，祭司著閣檢查症頭，癬若無湠開，彼個所在無黃色的頭毛抑是嘴鬚，癬閣無深入去肉內， |
| 13:33 | 彼個人著剃頭毛抑是嘴鬚，毋拘毋通剃著癬；祭司著閣給伊隔離七日。 |
| 13:34 | 到第七日，祭司著閣檢查彼個癬；若無湠開，嘛無深入去肉內，祭司就著宣布伊清氣；彼個人著洗家己的衫，伊就清氣。 |
| 13:35 | 毋拘伊清氣以後，癬若湠開， |
| 13:36 | 祭司著閣給伊檢查；癬若已經湠開，毋免閣尋黃的頭毛抑是嘴鬚，因為彼個人已經無清氣。 |
| 13:37 | 照祭司的觀察，癬若無湠開，彼所在有發烏的頭毛抑是嘴鬚，癬已經好，彼個人是清氣的；祭司就著宣布伊做清氣。 |
| 13:38 | 無論男女，皮膚若起白斑， |
| 13:39 | 祭司著給伊檢查；白斑若是火灰色，這是白癜，彼個人是清氣的。 |
| 13:40 | 若有人落頭毛，無論是禿頭抑是禿額，猶是清氣。 |
| 13:41 | 併於上節 |
| 13:42 | 禿頭抑是禿額的所在若出現粉紅仔色，是痲瘋生佇頭殼。 |
| 13:43 | 祭司著給伊檢查；若發見伊的頭殼無毛的所在出現粉紅仔色閣腫腫，及痲瘋的症頭仝款， |
| 13:44 | 彼個人就是致著痲瘋，是無清氣；祭司著宣布伊無清氣；伊的症頭生佇頭殼。 |
| 13:45 | 致著痲瘋的人，衫著拆裂，頭毛著拍鬖，掩嘴，喝講：「無清氣！無清氣！」 |
| 13:46 | 伊的身軀若猶有症頭，伊就是無清氣；既然無清氣，伊著佇營外家己住。 |
| 13:47 | 有關生菇的條例 衫若生菇，無論是羊毛刺的，抑是麻紗織的，抑是皮及用皮做的物件， |
| 13:48 | 併於上節 |
| 13:49 | 若生青色抑是紅色的菇，著互祭司驗。 |
| 13:50 | 祭司著給伊檢查，將生菇的物件另外收囥七日。 |
| 13:51 | 到第七日，祭司著閣給伊檢查；菇若佇諸個物件湠開，是生惡性的菇，攏是無清氣。 |
| 13:52 | 許個生菇的衫，無論是羊毛刺的、麻紗織的、皮做的，抑是用皮做的物件，攏著燒掉；這是惡性的菇，一定著用火燒掉。 |
| 13:53 | 祭司閣給伊檢查；菇若無佇羊毛刺的衫、麻紗織的衫、皮做的衫，抑是佇用皮做的物件湠開， |
| 13:54 | 祭司著吩咐人洗許個生菇的物件，閣給𪜶分開收囥七日。 |
| 13:55 | 生菇的所在洗了後，祭司著閣給伊檢查；若生菇的所在色無變，雖然無湠開，許個猶原無清氣；無論惡性的菇生佇內面抑是外面，歸個物件攏著用火燒掉。 |
| 13:56 | 毋拘洗了後，祭司給伊檢查；若色有較淺，祭司著將生菇的所在對衫，無論是羊毛刺的抑是麻紗織的，抑是皮做的，給拆起來。 |
| 13:57 | 若衫猶有菇，無論是織的、刺的，抑是皮做的物件，著用火燒許個生菇的物件。 |
| 13:58 | 你洗過的衫，無論是織的抑是刺的，抑是皮做的物件，若菇已經無去，著閣再洗，就清氣。 |
| 13:59 | 以上是有關用羊毛刺抑是麻紗織的衫，抑是用皮做的物件生菇的條例，用來判斷清氣抑是無清氣。 |