| 章節 | 現代台語漢字2021版經文 |
| 39:1 | 巴比倫來的使者 ( 王下 20:12-19 ) 彼時，巴拉但的子巴比倫王米羅達‧巴拉但聽著希西家破病，嘛已經好起來，就差使者提批及禮物去探訪希西家。 |
| 39:2 | 希西家真歡喜接待𪜶，將伊的財寶庫內面的金、銀、香料、貴氣的油，及伊所有的軍器，以及府庫內的一切攏互𪜶看。伊的王宮及全國所有的物件無一項無互𪜶看。 |
| 39:3 | 後來先知以賽亞來見希西家王，問伊講：「諸個人對你講什麼？𪜶對叨位來見你？」 希西家講：「𪜶對一個真遠的國家巴比倫來探我。」 |
| 39:4 | 以賽亞講：「𪜶佇你的王宮有看著什麼？」 希西家回答：「𪜶有看著我王宮內逐項物。我所有的財寶無一項無互𪜶看。」 |
| 39:5 | 以賽亞給希西家講：「著聽上主 — 萬軍的統帥的話： |
| 39:6 | 日子啲欲到，王宮內一切你的祖先積聚到今仔日的物件，攏會互人搬去巴比倫，無留甲半項。上主按呢宣告。 |
| 39:7 | 閣你親生的、你的子孫，有的會互人掠去巴比倫王的王宮做太監。」 |
| 39:8 | 希西家心內想講「我在生的時有太平安全就好」，就對以賽亞講：「你所傳達上主的話真好。」 |