上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
尼希米記
尼希米克服阻擋
4:1 參巴拉聽見阮啲重建城牆，就真受氣，非常憤怒，恥笑猶太人，
4:2 佇伊的同伴及撒馬利亞的軍兵面前講：「諸個無路用的猶太人啲做什麼？𪜶欲重建此個城噢？欲獻祭噢？欲一日就完成噢？欲對土堆中提出燒過的石頭來閣起噢？」
4:3 亞捫人多比雅徛佇伊的身邊講：「𪜶所起的石牆，若有一隻狐狸𬦰起去，就會崩落去。」
4:4 我祈禱講：「阮的上帝，求你聽，因為阮互人恥笑，求你互𪜶對阮的侮辱歸佇𪜶身上，互𪜶成做戰利品受掠去外國；
4:5 求你毋通遮蓋𪜶的罪，毋通擦消𪜶佇你面前所犯的罪過；因為𪜶侮辱諸個重建的人。」
4:6 按呢，阮繼續重建城牆；無偌久，城牆就攏接做夥，到一半高，因為人民專心做工。
4:7 參巴拉、多比雅、阿拉伯人、亞捫人、亞實突人，聽見重建耶路撒冷城牆的工程順利進行，開始修補破隙的所在，就真受氣；
4:8 大家做夥計謀欲攻擊耶路撒冷，製造混亂。
4:9 阮向阮的上帝祈禱，閣因為𪜶的緣故，派人守望，暝日防備。
4:10 毋拘猶太人講：
作工的人氣力盡，
石頭土沙歸大堆，
城牆完工到何時？
4:11 阮的對敵閣講：「趁𪜶毋知，看𣍐著的時，咱入去𪜶中間，刣死𪜶，互𪜶的工程停止。」
4:12 許個住佇對敵附近的猶太人，一遍閣一遍給阮警告，講：「對敵會對逐所在來攻擊恁。」
4:13 所以我互人民照𪜶家己的宗族攑刀，攑槍，攑弓，徛佇城牆後面低閣曠闊的所在。
4:14 我巡視了，就起來對貴族、官長，及其他的人民講：「毋免驚𪜶！著會記得主是至大通驚畏的上帝；著為著恁的同胞、恁的子、查某子、恁的某、恁的厝宅交戰。」
4:15 對敵聽見阮已經知𪜶的計謀，閣上帝嘛破壞𪜶的計謀，就無來攻擊阮，阮就攏倒轉來城牆遐，逐個人繼續做家己的工作。
4:16 對彼日起，我的部下一半的人做工，一半攑槍，提盾牌，攑弓，穿戰甲；官長攏全力支持許個重建城牆的猶太眾人。
4:17 擔物件的，一手做工，一手攑武器。
4:18 建造的人，逐個揹刀照常工作；歕喇叭的佇我的身邊。
4:19 我給諸個貴族、官長，及其他的人民講：「此個工程真大，咱佇城牆頂分開真遠；
4:20 恁無論佇叨位聽著喇叭的聲，著隨時聚集來阮遮；咱的上帝欲為咱交戰。」
4:21 逐日對天昲光到星出現的時，阮一半的人做工，一半的人攑槍守衛。
4:22 彼時，我閣對人民講：「逐個人及伊的僕人著佇耶路撒冷城內歇暝，通暝時徛衛兵，日時做工。」
4:23 按呢，我及我的親族、部下，及衛兵，無一個褪衫睏；逐個人去汲水嘛攏攑武器。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。