上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
列王紀上
所羅門準備起造聖殿
5:1 ( 代下 2:1-18 )
泰爾王希蘭聽著所羅門續接伊的老父大闢，受選立作王，就派人臣去見伊；希蘭一直是大闢的好朋友。
5:2 所羅門嘛派人去見希蘭，講：
5:3 「你知我的老父大闢𣍐當為著上主 — 伊的上帝的名起聖殿，因為伊及四圍的對敵交戰，著等到上主互𪜶攏降服。
5:4 今上主 — 我的上帝已經賜我天下太平，無對敵，無災禍。
5:5 所以，我欲為上主 — 我的上帝的名起聖殿，是照上主對我的老父大闢的應允，講：『我欲互你的子續接你，坐你的位，伊欲為我的名起聖殿。』
5:6 所以請你命令人，去黎巴嫩為我剉柏香樹；我的工人欲及你的工人做夥做工；我嘛欲照你定的工錢互你的工人；你知，阮無人親像恁西頓人赫呢𠢕剉樹。」
5:7 希蘭聽見所羅門的話，真歡喜，就講：「今仔日上主應該受稱讚，因為伊賞賜大闢一個有智慧的子，治理真多的人民。」
5:8 希蘭派人去見所羅門，講：「我有聽見你傳達互我的話。我會照你的需要提供柏香樹及松樹的柴料互你。
5:9 我的工人會對黎巴嫩運木材落海，縛做歸排浮佇海裡，拖到你指定的所在，佇遐拆開了後，交互你。請你嘛照我的需要供給糧食互我的家。」
5:10 希蘭就照所羅門的需要供給柏香樹及松樹的柴料互伊。
5:11 所羅門互希蘭兩千公噸的小麥，四十萬公升純的橄欖油，做伊家內的食物。所羅門逐年攏照按呢互希蘭。
5:12 上主照伊的應允賜智慧互所羅門。希蘭及所羅門彼此立約，和平相處。
5:13 所羅門王對以色列人民強制召人工三萬。
5:14 逐月日輪流派一萬人去黎巴嫩；𪜶一個月佇黎巴嫩，兩個月佇厝裡；亞多尼蘭做監督。
5:15 所羅門有運搬的工人七萬，佇山裡拍石的有八萬。
5:16 另外，所羅門有督工的官員三千三百人，監督許個工人。
5:17 𪜶照王的命令，拍大閣貴重的石頭，運來下做殿的地基。
5:18 所羅門的師傅及希蘭的師傅，以及迦巴勒人，做夥拍石，準備柴料及石材，來起聖殿。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。