上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
列王紀上
所羅門的祈禱
3:1 ( 代下 1:3-12 )
所羅門及埃及王法老結親，娶法老的查某子做某；佇伊家己的宮殿，上主的聖殿，及耶路撒冷四圍的城牆猶未起好以前，伊互法老的查某子住佇大闢城。
3:2 當時猶未為著上主的名起聖殿，所以人民猶佇山頭壇獻祭。
3:3 所羅門疼上主，遵行伊的老父大闢的命令，毋拘猶佇山頭壇獻祭燒香。
3:4 所羅門王去基遍獻祭，因為遐有上大的山頭壇；伊佇壇頂獻一千隻牲生做燒化祭。
3:5 佇基遍，有一暝上主佇眠夢中對所羅門顯現；上帝講：「你愛我賜你什麼，通對我求。」
3:6 所羅門應講：「你曾施大恩互你的僕人，我的老父大闢，因為伊用誠實、公義、正直的心佇你的面前生活。你閣賞賜伊不變的疼，就是賞賜伊一個子坐伊的位，抵親像今仔日按呢。
3:7 上主 — 我的上帝，今你互你的僕人續接我的老父大闢作王；毋拘我猶少年，毋知著按怎治理國家。
3:8 你的僕人住佇你所揀選的子民中間，諸個人民多到𣍐算得，嘛算𣍐了。
3:9 所以，求你賜你的僕人明辨的心，通判斷是非治理你的子民；若毋是按呢，啥人會當治理你即多的人民？」
3:10 主真歡喜所羅門按呢求。
3:11 上帝對伊講：「你既然按呢求，無為家己求長歲壽，無求好額，嘛無求消滅你對敵的性命，只有求明辨的心，會曉分別是非公正治理。
3:12 今，我照你所求的互你。我賞賜你聰明智慧的心；佇你以前無人親像你，佇你以後嘛無人會親像你。
3:13 你無求的，我嘛欲互你，就是富足、尊榮；互你佇世間的日子，無一個王會當及你比。
3:14 你若行我的道路，遵守我的規例及誡命，學你的老父大闢的所做，我就欲互你長歲壽。」
3:15 所羅門睏醒，知是上主佇眠夢中對伊講話，就去耶路撒冷徛佇上主的約櫃前，獻燒化祭及平安祭；閣辦宴席請伊的人臣。
所羅門聰明的判斷
3:16 有一日，兩個妓女來王遐，徛佇王的面前。
3:17 一個婦仁人講：「我的主啊，我及此個婦仁人住仝間厝；我生子的時，伊嘛佇厝內。
3:18 我生了第三日，此個婦仁人嘛生子；阮兩人以外，無別人及阮做夥住。
3:19 暝時，此個婦仁人啲睏的時給伊的子硩死。
3:20 伊半暝起來，趁你的女婢啲睏，對我的身邊給我的後生抱去下佇伊的胸前，將伊死去的後生下佇我的胸前。
3:21 天光，我起來欲互我的後生食奶；無拍算，囝仔已經死；我詳細看，發見毋是我生的子。」
3:22 另外彼個婦仁人講：「毋是，活的是我的子，死的才是你的。」
第一個婦仁人講：「無，死的是你的子，活的是我的。」𪜶佇王的面前按呢相諍。
3:23 王講：「此個婦仁人講：『活的子是我的，死的是你的。』彼個婦仁人講：『無，死的子是你的，活的是我的。』」
3:24 王閣講：「給我攑刀來。」侍衛就攑刀來王的面前。
3:25 王講：「將活的囝仔破做兩旁，一旁互彼個，一旁互此個。」
3:26 活的囝仔的老母為著疼家己的子，心親像火啲𤏸，就對王講：「我的主啊，將活的囝仔互彼個婦仁人，千萬毋通給伊刣死。」
另外彼個婦仁人講：「給伊破開！此個囝仔毋免互伊，嘛毋免互我。」
3:27 王就下令：「毋通刣！將活的囝仔互第一個婦仁人，因為伊才是囝仔的老母。」
3:28 全以色列人民聽著王的判決，就攏敬畏伊，因為𪜶看見伊判斷的時有對上帝來的智慧。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。