上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
約書亞記
以色列人過約旦河
3:1 隔日，約書亞透早起來，及所有的以色列人離開什亭，來到約旦河邊；𪜶佇遐紮營，聽候過河。
3:2 過三日，官長到營中逐所在，
3:3 吩咐人民，講：「恁若看著利未人做祭司的扛上主 — 恁的上帝的約櫃，著起身離開恁的所在，隨佇約櫃的後面，
3:4 互恁知著行叨一條路，因為恁猶毋曾行此條路；毋拘恁及約櫃大約著離一公里遠，毋通倚傷近。」
3:5 約書亞對人民講：「恁著給家己分別作聖，因為明仔載上主欲佇恁中間行奇事。」
3:6 約書亞閣對祭司講：「恁扛約櫃起來，行佇人民的頭前。」𪜶就將約櫃扛起來，行佇人民的頭前。
3:7 上主對約書亞講：「對今仔日起，我欲互你得著所有以色列人的尊敬，互𪜶知我及你同在，親像以前及摩西同在仝款。
3:8 你著吩咐扛約櫃的祭司，講：『恁到約旦河邊的時，就停佇遐。』」
3:9 約書亞對以色列人講：「恁徛進前，聽上主 — 恁的上帝的話。」
3:10 約書亞閣講：「伊欲佇恁的頭前將迦南人、赫人、希未人、比利洗人、革迦撒人、亞摩利人、耶布斯人趕出去；按呢恁就會知永活的上帝佇恁中間。
3:11 全地的主的約櫃欲佇恁的頭前行入約旦河。
3:12 現在恁著對以色列支族中揀十二人，每支族一個。
3:13 扛全地的主 — 上主約櫃的祭司的腳一下踏著約旦河的水，約旦河上流的水會成做水牆，𣍐閣流落來。」
3:14 人民離開布棚，欲過約旦河的時，祭司扛約櫃行佇𪜶的頭前。
3:15 彼時是收成的期，約旦河的水常常流過溪岸。祭司扛約櫃來到約旦河，𪜶的腳一下搵著水，
3:16 上流的水就無閣流落來，佇離真遠的撒拉旦附近的亞當城成做水牆；無閣有水流入亞拉巴海，就是鹽海。人民就對耶利哥的對面過約旦河。
3:17 扛上主約櫃的祭司佇約旦河的焦地徛定定；以色列全體人民攏行焦地過約旦河。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。