上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
馬太福音
莫得批評人
7:1 ( 路 6:37-38,41-42 )
「莫得批評人，才免抵著批評。
批判人
7:1 ( 路6:37-38，41-42 )
「通批判人，才免受上帝審判。
7:2 因為恁用甚麼批評來批評，亦欲按呢受批評；恁用甚麼量來量，亦欲按呢量互恁。
7:2 因為恁用什麼標準批判人，上帝嘛會照按呢給恁審判；恁用什麼量量互人，上帝嘛會照按呢量互恁。
7:3 閣你怎樣看見兄弟目睭內的草仔幼，亦無想你目睭內的楹仔柴啊？
7:3 你哪干單啲看兄弟目睭內的柴幼仔，亦無注意著家己目睭內有柴箍？
7:4 欲怎樣給你的兄弟講：『你目睭內的草仔幼互我給你提起來』，亦你目睭內竟然有楹仔柴啊？
7:4 你家己目睭內有柴箍，哪會當對兄弟講『你目睭內有柴幼仔，我給你提出來』？
7:5 假好的人啊！代先提去你目睭內的楹仔柴，才會明明看見，通提去兄弟目睭內的草仔幼。
7:5 假好的人，家己目睭內的柴箍著先提出來，才會當看清楚通給兄弟目睭內的柴幼仔提出來。
7:6 莫得用聖的物互狗，亦莫得用恁的真珠㧒佇豬的頭前，驚了𪜶用腳踏伊，越輪轉來咬恁。」
7:6 「通提神聖的物互狗，𪜶會越過來咬恁；嘛通將恁的珍珠㧒佇豬的面前，𪜶會用腳踐踏。」
求、尋、拍門
7:7 ( 路 11:9-13 )
「求，就互恁；尋，就抵著；拍門，就給恁開。
求，尋，拍門
7:7 ( 路11:9-13 )
「求，會得著；尋，會尋著；拍門，會給恁開。
7:8 因為見若求的，得著；尋的，抵著；拍門的，就給伊開。
7:8 因為求的，就得著；尋的，就尋著；拍門的，就給伊開。
7:9 恁中間有甚麼人，伊的子給伊討餅，豈欲用石頭互伊？
7:9 恁中間豈有人，𪜶子給伊討麵包，會提石頭互伊？
7:10 抑是欲揲魚，豈欲用蛇互伊？
7:10 給伊討魚，會掠蛇互伊？
7:11 恁諸個雖然歹，猶久會曉得用好物互恁的子兒，何況恁佇天裡的父，豈無欲用好物互求伊的人嗎？
7:11 恁雖然歹，猶會曉提好物互恁的子兒，何況恁的天父，伊一定會提好物互對伊祈求的人！
7:12 所以，恁見若愛人款待恁的，恁亦著按呢款待人，因為這是律法及先知。」
7:12 「所以，恁愛人按怎對待恁，嘛著按呢對待𪜶。這就是律法及先知的教示。」
狹門
7:13 ( 路 13:24 )
「恁著對彼個狹門入。因為透到滅無的，彼個門闊，彼個路大條，對遐入的人多；
狹的門
7:13 ( 路13:24 )
「恁著對彼個狹的門入去；因為透到滅亡彼個門闊，彼條路好行，入去的人真多。
7:14 透到活的，彼個門狹，彼個路細條，尋著的人少。」
7:14 透到活命彼個門細，彼條路狹，尋著的人真少。」
二種果子樹
7:15 ( 路 6:43-44 )
「謹慎持防假的先知。𪜶就近恁，外面是羊羔，內面是兇惡的豺狼。
樹及果子
7:15 ( 路6:43-44 )
「著防備假先知。𪜶來恁遮，外表親像綿羊，內面卻是兇惡的豺狼。
7:16 恁欲對𪜶的果子來識伊。豈對莿帕挽葡萄？對蒺蔾挽無花果嗎？
7:16 恁會當對𪜶的果子來識𪜶。豈會當對莿(17.16「莿」是一種樹枝有刺的木本植物。)挽葡萄？抑是對蒺藜(27.16「蒺藜」是一種有刺的草本植物。)挽無花果？
7:17 按呢，見若好樹結好果子，歹樹結歹果子。
7:17 按呢，好樹結好果子；歹樹結歹果子。
7:18 好樹𣍐結歹果子；歹樹𣍐結好果子。
7:18 好樹𣍐結歹果子；歹樹嘛𣍐結好果子。
7:19 見若樹無結好果子的就剉伊，㧒落火。
7:19 𣍐結好果子的樹攏著剉起來，㧒落火。
7:20 所以，恁欲對𪜶的果子來識伊。」
7:20 按呢，恁會當對𪜶的果子來識𪜶。」
我識恁
7:21 ( 路 13:25-27 )
「見若稱呼我講：『主啊，主啊』的，無一盡入天國；獨獨行我佇天裡的父的旨意的才會。
我識恁
7:21 ( 路13:25-27 )
「稱呼我『主啊，主啊』的人，𣍐攏入天國；只有實行我的天父的旨意的人才會。
7:22 當彼日多多人欲給我講：『主啊，主啊，阮豈是用你的名傳教，用你的名趕鬼，用你的名行多多權能嗎？』
7:22 佇彼日，有真多人會對我講：『主啊，主啊，阮豈是曾奉你的名傳信息，曾奉你的名趕鬼，曾奉你的名行真多神跡？』
7:23 就彼時我欲明明給𪜶講：『我攏識恁，做不法的，著離開我去！』」
7:23 彼時我會明明對𪜶講：『我攏識恁。恁諸個做歹的人，攏離開我！』」
二種起厝的人
7:24 ( 路 6:47-49 )
「所以，見若聽我諸個話來行的，欲比並智識的人，起伊的厝佇石磐頂；
兩款地基
7:24 ( 路6:47-49 )
「所以，聽我諸個話閣去實行的人攏親像聰明的人給厝起佇石磐頂，
7:25 雨落，大水到，風吹，沖著彼間厝，亦無倒，因為地基佇石磐頂。
7:25 雨潑，大水來，風掃，沖著厝，厝嘛𣍐倒，因為起佇石磐頂。
7:26 見若聽我諸個話無行的，欲比並戇人，起伊的厝佇沙頂；
7:26 「聽我諸個話無去實行的人親像戇人給厝起佇沙頂，
7:27 雨落，大水到，風吹，沖著彼間厝，就倒，閣伊的倒是傷重。」
7:27 雨潑，大水來，風掃，沖著厝，厝就倒，閣倒甲真厲害。」
7:28 耶穌講諸個話息，眾人奇怪伊的教示；
耶穌的權威
7:28 耶穌諸個話講煞，群眾對伊的教示感覺非常希奇，
7:29 因為伊教示人，親像有權能的，無親像𪜶的經學士。
7:29 因為伊的教示真有權威，及𪜶的經學教師無仝款。
上一章 下一章 [ 條列 | 表格 | 整段 ] 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 3.1) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型3.1版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。