上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
啟示錄
天頂的敬拜
4:1 後來我閣看，看見天頂有一個開開的門。我有聽見彼個頭一遍對我講話的聲，親像喇叭啲響，講：「起來遮，我欲指示你以後一定會發生的代誌。」
4:2 我就隨時受聖神感動，看見天頂有一個寶座，有一位坐佇寶座。
4:3 伊的面貌親像碧玉及紅寶石；寶座的周圍有虹，看起來親像綠寶石。
4:4 寶座的周圍有二十四個座位，有二十四個長老坐佇座位，𪜶穿白衫，頭殼戴金的花冠。
4:5 對寶座有發出熠爁、響聲，及雷；佇寶座前有七支點𤏸的火把，就是上帝的七個神。
4:6 寶座前有親像水晶赫呢透明的玻璃海。寶座的周圍有四個活物，𪜶的身軀前後攏有目睭。
4:7 頭一個活物親像獅，第二個活物親像牛仔，第三個活物的面親像人的面，第四個活物親像啲飛的鷹鳥。
4:8 此四個活物逐個攏有六支翼，周圍及內面歸身軀有真多目睭。𪜶暝日無停啲唱：
聖哉！聖哉！聖哉！
全能的主上帝；
過去存在，現在存在，將來嘛存在。
4:9 逐遍活物將榮光、尊貴、感謝，歸互坐佇寶座、永永遠遠活啲彼位的時，
4:10 二十四個長老就仆落去敬拜坐佇寶座、永永遠遠活啲彼位。𪜶將花冠㧒佇寶座前，講：
4:11 阮的主，阮的上帝！
你應該得著榮耀、尊貴，及權能，
因為你創造萬有；
對你的旨意，萬有受造，生存。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 3.1) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型3.1版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。