上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
歷代志下
示巴女王訪問所羅門
9:1 ( 王上 10:1-13 )
示巴的女王聽見所羅門的名聲，就到耶路撒冷，欲用得解明的事試所羅門；隨伊的人真多，有駱駝載香料，及黃金真多，也有寶石。伊見所羅門的時，就將心內一切所存的及伊講。
示巴女王來拜訪
9:1 ( 王上 10:1-13 )
示巴的女王聽見所羅門的名聲，就來耶路撒冷欲用難題考驗所羅門。伊導真多跟隨來，閣有駱駝載香料、真多黃金及寶石。伊見所羅門的時，就將心內所有的難題給伊問。
9:2 所羅門照伊所問的攏應伊，無一項所羅門𣍐曉得通給伊講。
9:2 所羅門照伊所問的一一給伊回答，無一項困難甲所羅門𣍐曉應。
9:3 示巴女王看見所羅門的智慧及伊所起的厝，
9:3 示巴女王見識著所羅門的智慧，看著伊起的宮殿、
9:4 桌頂的食物，人臣排列啲坐，奴僕跟隨服事，以及𪜶的衣服，及伊的酒政以及𪜶的衣服，閣看見伊上耶和華殿的崎仔，就魂不附體，
9:4 桌頂的食物、排列坐啲的人臣、跟隨服事的奴僕及𪜶的衣服，斟酒的奴僕及𪜶穿的衫，閣看著伊佇上主的聖殿所獻的燒化祭，就歸個人攏愣去。
9:5 伊對王講：「我佇本國聽見你的代誌及你的智慧攏是真實！
9:5 示巴女王就對王講：「我佇阮本國所聽著你的事蹟及你的智慧攏是真的！
9:6 總是我信𪜶的話，到我來親目看，看啊，你的智慧的大；人所給我講的，猶無一半；你贏過我所聽見的名聲。
9:6 本來我毋信𪜶的話，到我親目看著才相信。人給我講的猶無事實的一半；你的智慧及你的富足超過我所聽著的。
9:7 福氣啊，你的人，福氣啊，你的奴僕，常常徛佇你的面前聽你的智慧。
9:7 你的部屬真有福氣！你的人臣真有福氣！𪜶不時佇你的面前聽你智慧的話。
9:8 耶和華──你的上帝是應該謳咾的！伊歡喜你，互你坐伊的位，通為著耶和華──你的上帝做王；因為你的上帝疼以色列，愛永遠堅固伊，所以設立你做𪜶的王，互你秉公行義。」
9:8 上主 — 你的上帝應該受稱讚！伊意愛你，互你佇上主 — 你的上帝面前坐位作王；因為你的上帝疼以色列，愛伊永遠堅立，所以選立你做𪜶的王，互你通秉公行義。」
9:9 女王用一百二十他連得的金，及多多香料及寶石送王；未曾有香料親像示巴女王送所羅門王的。
9:9 示巴女王將大約四千公斤的金、真多香料，及寶石送互王；前到今毋曾有人親像示巴女王送赫多香料互所羅門王。
9:10 希蘭的奴僕及所羅門的奴僕對俄斐帶金來的，閣帶檀香柴及寶石來。
9:10 希蘭的船員及所羅門的船員對俄斐運金來，閣帶檀香柴及寶石來。
9:11 王用檀香柴為耶和華的殿及王宮做欄杆，閣為唱歌的人做琴及瑟；佇猶大地前未曾看見親像此號。
9:11 王用諸個檀香柴為上主的殿及王宮做砛仔，嘛為唱歌的人做琴及瑟。佇猶大地，前到今毋曾有人看見按呢。
9:12 所羅門王佇示巴女王所帶來送王的以外，閣照伊一切所愛所求的，攏互伊。對按呢女王及伊的人臣倒轉去伊的本國。
9:12 所羅門王送互示巴女王的回禮，超過女王帶來的禮物，閣照伊所意愛、所要求的攏送互伊。女王及伊的人臣就倒去𪜶本國。
所羅門的財富
9:13 ( 王上 10:14-25 )
所羅門逐年所得著的金共六百六十六他連得，
所羅門的財富
9:13 ( 王上 10:14-29 4:26 )
所羅門逐年收著的金共兩萬三千公斤。
9:14 以外猶有生理人及客商所帶來的，閣亞拉伯列王以及國內的首領攏帶金銀來互所羅門。
9:14 以外，伊有對生理人及貿易商收稅金；國內的省長及阿拉伯諸個王，攏進貢金銀互所羅門。
9:15 所羅門王用過拍的金做大牌二百面，每面大牌的金六百舍客勒；
9:15 所羅門王拍大盾牌兩百面，每一面用金七公斤；
9:16 閣用過拍的金做屏牌三百面，每面用金三百舍客勒，王下伊佇黎巴嫩樹林的厝。
9:16 閣拍小盾牌三百面，每一面用金三公斤。王將諸個盾牌下佇黎巴嫩林宮。
9:17 王閣用象牙做一個大寶座，用好金安伊。
9:17 王閣用象牙做一個大寶座，用純金貼啲。
9:18 寶座有六層的崎仔，閣有金的腳踏椅，及寶座相連。雙旁有靠手，靠手邊有二隻獅徛啲。
9:18 寶座前有六層崎仔，閣有金的腳砧，及寶座相連；雙旁有手按，手按的邊仔各有一座獅徛啲；
9:19 閣有十二隻獅徛佇六層崎仔的此旁及彼旁；別國攏無製造親像按呢。
9:19 閣有十二座獅徛佇六層崎仔逐層的雙旁邊；別個王國攏毋曾按呢做。
9:20 所羅門王一切飲的器具攏是金的，黎巴嫩樹林的厝一切的器具也是好金的。所羅門的年間，人看銀做無物。
9:20 所羅門王所有飲的器具攏是金的；黎巴嫩林宮一切的器具嘛是純金的；佇所羅門的時代，銀無互人看做真有價值。
9:21 因為王的船隻及希蘭的奴僕相及去他施；諸個他施的船載金、銀、象牙、猴、孔雀，三年倒來一擺。
9:21 王的船隊及希蘭的船員做夥去他施；諸個他施的船隊運金、銀、象牙、猴、孔雀，每三年倒來一遍。
9:22 所羅門王的好額及智慧贏過天下列王。
9:22 所羅門王的財富及智慧贏過天下諸王。
9:23 天下列王攏來愛見所羅門的面，聽伊的智慧就是上帝賞賜佇伊的心的。
9:23 天下諸王攏想欲來見所羅門的面，聽上帝賜互伊的智慧。
9:24 𪜶逐個帶進貢的物，就是銀器、金器、衣服、軍器、香料，馬及騾，逐年有定著的例。
9:24 𪜶逐個帶進貢的禮物，就是金器、銀器、衣服、軍器、香料、馬，及騾；逐年攏有一定的數量。
9:25 所羅門為著馬及車有馬四千，閣有馬兵一萬二千，安置𪜶佇許個囤車的城也及王佇耶路撒冷。
9:25 所羅門有馬椆四千間，閣有馬兵一萬兩千名，閣安置戰車佇許個囤戰車的城，及耶路撒冷王遐。
9:26 所羅門管轄列王，對大河到非利士地，到埃及的交界。
9:26 所羅門管轄所有的王，對幼發拉底河，到非利士人的地，直到埃及邊界。
9:27 王佇耶路撒冷互銀做親像石頭，互柏香樹親像平洋的桑材樹，是因為真多。
9:27 王統治的期間，耶路撒冷的銀親像石頭赫多，柏香柴親像山埔的桑材樹赫多。
9:28 有人帶馬對埃及對逐所在來互所羅門。
9:28 有人對埃及，對逐所在，進口馬互所羅門。
所羅門政績簡述
9:29 ( 王上 11:41-43 )
所羅門其餘的事，對頭到尾，豈無記佇先知拿單的冊及示羅人亞希雅先知的冊，及先見易多默示的冊，論尼八的子耶羅波安的嗎？
所羅門死
9:29 ( 王上 11:41-43 )
所羅門其他的事蹟，對頭到尾攏記載佇《先知拿單史》，示羅人亞希雅的《預言書》，及先見易多論尼八的子耶羅波安的《異象書》。
9:30 所羅門佇耶路撒冷做以色列全國的王共四十年。
9:30 所羅門佇耶路撒冷做以色列全國的王，共四十年。
9:31 所羅門及伊的列祖同睏，埋葬佇伊的老父大衛的城。伊的子羅波安續接伊做王。
9:31 所羅門轉去伊的列祖遐了後，埋葬佇伊的老父大闢的城。伊的子羅波安續接伊作王。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 3.1) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型3.1版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。