聖經閱讀

上一章下一章 [ 條列 | 表格 | 整段 ] 著作權聲明使用授權書PDF版使用授權書Word版
約翰福音

章節	現代客語譯本漢字經文	現代客語譯本羅馬字經文
18:1	耶穌被人捉去 ( 馬太26:47-56 馬可14:43-50 路加22:47-53 ) 耶穌恁樣祈禱以後，就同學生共下出去，過汲淪溪。該地方有一個橄欖園，耶穌㧯學生攏總入去。	Yâ-sû Pûn-ngìn Chok-hi ( Mâ-thai 26:47-56 Mâ-khó 14:43-50 Lu-kâ 22:47-53 ) Yâ-sû án-ngiòng khì-tó yî-heu, chhiu thùng ho̍k-sâng khiung-ha chhut-hi, ko Khi̍p-lùn-hâi. Ke thi-fông yû yit-ke kám-lám-yèn, Yâ-sû lâu ho̍k-sâng lûng-chúng ngi̍p-hi.
18:2	出賣耶穌个猶大也知該所在，因為耶穌常常㧯厥學生聚集在該位。	Chhut-mai Yâ-sû ke Yù-thai ya tî ke só-chhai, yîn-vi Yâ-sû sòng-sòng lâu kiâ ho̍k-sâng chhi-si̍p chhai ke-vi.
18:3	猶大帶一隊羅馬个兵仔，湊等祭司長㧯法利賽人所派聖殿个衛兵，共下入園去。佢等帶等武器，也拿等燈籠㧯火把。	Yù-thai tai yit-chhui Lò-mâ ke pîn-é, chheu-tén chi-sṳ̂-chóng lâu Fap-li-soi-ngìn só phai sṳn-thien ke ví-pîn, khiung-ha ngi̍p-yèn hi. Kì-têu tai-tén vú-hi, ya nâ-tén tên-lùng lâu fó-pá.
18:4	耶穌知會發生在厥身上个一切事情，就進前問佢等講：「你等尋麼人？」	Yâ-sû tî voi fat-sên chhai kiâ sṳ̂n-song ke yit-chhiet sṳ-chhìn, chhiu chin-chhièn mun kì-têu kóng: “Ngì-têu chhìm má-ngìn?”
18:5	佢等應講：「拿撒勒人耶穌。」耶穌講：「𠊎就係。」該時，出賣耶穌个猶大也同佢等企共下。	Kì-têu en-kóng: “Nâ-sat-le̍t-ngìn Yâ-sû.” Yâ-sû kóng: “Ngài chhiu-he.” Ke-sṳ̀, chhut-mai Yâ-sû ke Yù-thai ya thùng kì-têu khî khiung-ha.
18:6	耶穌一講「𠊎就係」，佢等就打亂退，橫在地上。	Yâ-sû yit kóng “Ngài chhiu-he”, kì-têu chhiu tá-lon-thui, vang chhai thi-song.
18:7	耶穌又問講：「你等尋麼人？」佢等應講：「拿撒勒人耶穌。」	Yâ-sû yu mun-kóng: “Ngì-têu chhìm má-ngìn?” Kì-têu en-kóng: “Nâ-sat-le̍t-ngìn Yâ-sû.”
18:8	耶穌講：「𠊎㧯你等講過，𠊎就係。假使你等係尋𠊎，就俾這兜人走。」	Yâ-sû kóng: “Ngài lâu ngì-têu kóng-ko, ngài chhiu-he. Ká-sṳ́ ngì-têu he chhìm ngài, chhiu pûn liá-têu ngìn chéu.”
18:9	耶穌恁樣講，係愛應驗佢以前講過个話：「阿爸啊，你所交給𠊎个人，𠊎連一個也無失落。」	Yâ-sû án-ngiòng kóng, he oi yin-ngiam kì yî-chhièn kóng-ko ke fa: “Â-pâ â, Ngì só kâu-pûn ngài ke ngìn, ngài lièn yit-ke ya mò sṳt-lo̍k.”
18:10	西門‧彼得帶等一支刀仔；佢將刀仔挷出來，對大祭司个僕人馬勒古劈過去，將佢右片个耳公削下來。	Sî-mùn-Pí-tet tai-tén yit-kî tô-é; kì chiông tô-é pâng-chhut-lòi, tui thai-chi-sṳ̂ ke phu̍k-ngìn Mâ-le̍t-kú phiak-ko-hi, chiông kì yu-phién ke ngí-kûng siok-hâ-lòi.
18:11	耶穌對彼得講：「將刀仔收起來！吾爸交給𠊎个苦杯，你恅到𠊎毋願意啉嗎？」	Yâ-sû tui Pí-tet kóng: “Chiông tô-é sû-hí-lòi! Ngâ Pâ kâu-pûn ngài ke khú-pî, ngì láu-tó ngài m̀ ngien-yi lîm mâ?”
18:12	耶穌在亞那面前該隊羅馬兵㧯隊長，連猶太人聖殿个衛兵就將耶穌捉起來，䌈等，	Yâ-sû Chhai Â-nâ Mien-chhièn Ke-chhui Lò-mâ-pîn lâu chhui-chóng, lièn Yù-thai-ngìn sṳn-thien ke ví-pîn chhiu chiông Yâ-sû chok-hí-lòi, thak-tén,
18:13	先將佢解送到亞那个面前去；亞那係該年个大祭司該亞法个丈人老。	siên chiông kì kié-sung to Â-nâ ke mien-chhièn hi; Â-nâ he ke-ngièn ke thai-chi-sṳ̂ Kâi-â-fap ke chhông-mîn-ló.
18:14	這該亞法識對猶太人个領袖建議講，一個人代全國个人死係最有利益个事。	Liá Kâi-â-fap sṳt tui Yù-thai-ngìn ke liâng-chhiu kien-ngi kóng, yit-ke ngìn thoi chhiòn-koet ke ngìn sí he chui yû li-yit ke sṳ.
18:15	彼得毋認耶穌 ( 馬太26:69-70 馬可14:66-68 路加22:55-57 ) 西門‧彼得㧯另外一個學生跈等耶穌；該學生㧯大祭司相識，佢就跈等耶穌入去大祭司个庭院肚。	Pí-tet M̀ Ngin Yâ-sû ( Mâ-thai 26:69-70 Mâ-khó 14:66-68 Lu-kâ 22:55-57 ) Sî-mùn-Pí-tet lâu nang-ngoi yit-ke ho̍k-sâng thèn-tén Yâ-sû; ke ho̍k-sâng lâu thai-chi-sṳ̂ siông-sṳt, kì chhiu thèn-tén Yâ-sû ngi̍p-hi thai-chi-sṳ̂ ke thìn-yen-tú.
18:16	彼得留在門外。該㧯大祭司相識个學生又出來，㧯掌門个使女講，就帶彼得入去。	Pí-tet liù chhai mùn-ngoi. Ke lâu thai-chi-sṳ̂ siông-sṳt ke ho̍k-sâng yu chhut-lòi, lâu chóng-mùn ke sṳ́-ńg kóng, chhiu tai Pí-tet ngi̍p-hi.
18:17	該掌門个使女對彼得講：「你也係該人个學生，敢毋係？」彼得講：「𠊎毋係！」	Ke chóng-mùn ke sṳ́-ńg tui Pí-tet kóng: “Ngì ya he ke-ngìn ke ho̍k-sâng, kám m̀-he?” Pí-tet kóng: “Ngài m̀-he!”
18:18	該時天氣盡寒，該兜僕人㧯衛兵用火炭起火，大家企等焙火；彼得也行前，同佢等共下企等焙火。	Ke-sṳ̀ thiên-hi chhin hòn, ke-têu phu̍k-ngìn lâu ví-pîn yung fó-than hí fó, thai-kâ khî-tén phoi-fó; Pí-tet ya hàng-chhièn, thùng kì-têu khiung-ha khî-tén phoi-fó.
18:19	大祭司盤問耶穌 ( 馬太26:59-66 馬可14:55-64 路加22:66-71 ) 大祭司盤問耶穌關係厥學生㧯佢个教訓。	Thai-chi-sṳ̂ Phàn-mun Yâ-sû ( Mâ-thai 26:59-66 Mâ-khó 14:55-64 Lu-kâ 22:66-71 ) Thai-chi-sṳ̂ phàn-mun Yâ-sû koân-he kiâ ho̍k-sâng lâu kì ke kau-hiun.
18:20	耶穌應講：「𠊎㧯人講話從來都係公開个。𠊎常常在會堂㧯聖殿，就係猶太人聚會个所在教訓人，毋識在暗中講麼介。	Yâ-sû en-kóng: “Ngài lâu ngìn kóng-fa chhiùng-lòi tû he kûng-khôi ke. Ngài sòng-sòng chhai fi-thòng lâu sṳn-thien, chhiu-he Yù-thai-ngìn chhi-fi ke só-chhai kau-hiun ngìn, m̀-sṳt chhai am-chûng kóng má-ke.
18:21	你做麼介盤問𠊎呢？去問該兜聽過𠊎講話个人，佢等知𠊎識講麼介。」	Ngì cho-má-ke phàn-mun ngài nè? Hi mun ke-têu thâng-ko ngài kóng-fa ke ngìn, kì-têu tî ngài sṳt kóng má-ke.”
18:22	耶穌講了這個話，塍頭一個衛兵就搧佢个嘴角，講：「你恁樣應大祭司嗎！」	Yâ-sû kóng-liáu liá-ke fa, sùn-thèu yit-ke ví-pîn chhiu sân kì ke choi-kok, kóng: “Ngì án-ngiòng en thai-chi-sṳ̂ mâ!”
18:23	耶穌講：「𠊎若係講毋著，你指證，毋著在㖠位！若係無毋著，你打𠊎做麼介？」	Yâ-sû kóng: “Ngài na-he kóng-m̀-chho̍k, ngì chṳ́-chṳn, m̀-chho̍k chhai nai-vi! Na-he mò m̀-chho̍k, ngì tá ngài cho má-ke?”
18:24	這時，耶穌還被佢等䌈等；亞那就將佢解送到大祭司該亞法該位去。	Liá-sṳ̀, Yâ-sû hàn pûn kì-têu thak-tén; Â-nâ chhiu chiông kì kié-sung to thai-chi-sṳ̂ Kâi-â-fap ke-vi hi.
18:25	彼得再三毋認耶穌 ( 馬太26:71-75 馬可14:69-72 路加22:58-62 ) 這時，西門‧彼得還企等焙火。有人對佢講：「你也係該人个學生，敢毋係？」彼得否認講：「𠊎毋係！」	Pí-tet Chai-sâm M̀ Ngin Yâ-sû ( Mâ-thai 26:71-75 Mâ-khó 14:69-72 Lu-kâ 22:58-62 ) Liá-sṳ̀, Sî-mùn-Pí-tet hàn khî-tén phoi-fó. Yû ngìn tui kì kóng: “Ngì ya he ke-ngìn ke ho̍k-sâng, kám m̀-he?” Pí-tet féu-ngin kóng: “Ngài m̀-he!”
18:26	大祭司个一個僕人，就係被彼得削掉耳公該儕个親戚，佢講：「𠊎看到你同該人共下在橄欖園底背，敢毋係？」	Thai-chi-sṳ̂ ke yit-ke phu̍k-ngìn, chhiu-he pûn Pí-tet siok-thet ngí-kûng ke-sà ke chhîn-chhit, kì kóng: “Ngài khon-tó ngì thùng ke-ngìn khiung-ha chhai kám-lám-yèn tî-poi, kám m̀-he?”
18:27	彼得又否認。該時，雞仔就啼。	Pí-tet yu féu-ngin. Ke-sṳ̀, kiê-é chhiu thài.
18:28	耶穌在彼拉多面前受審判 ( 馬太27:1-2，11-14 馬可15:1-5 路加23:1-5 ) 佢等對該亞法該位將耶穌帶到總督府。該時天曚光。猶太人个領袖毋入總督府去，因為佢等愛在節期中保持淨浰，正做得食𨃟過節个筵席。	Yâ-sû Chhai Pí-lâ-tô Mien-chhièn Su Sṳ́m-phan ( Mâ-thai 27:1-2, 11-14 Mâ-khó 15:1-5 Lu-kâ 23:1-5 ) Kì-têu tui Kâi-â-fap ke-vi chiông Yâ-sû tai-to chúng-tuk-fú. Ke-sṳ̀ thiên-mùng-kông. Yù-thai-ngìn ke liâng-chhiu m̀ ngi̍p chúng-tuk-fú hi, yîn-vi kì-têu oi chhai chiet-khì-chûng pó-chhṳ̀ chhiang-li, chang cho-tet sṳ̍t Phàn-ko-chiet ke yèn-si̍t.
18:29	所以彼拉多出來見佢等，問講：「你等用麼介罪名告這人？」	Só-yî Pí-lâ-tô chhut-lòi kien kì-têu, mun-kóng: “Ngì-têu yung má-ke chhui-miàng ko liá ngìn?”
18:30	佢等應講：「佢若係無做壞事，𠊎等就毋會將佢交給你。」	Kì-têu en-kóng: “Kì na-he mò cho fái-sṳ, ngài-têu chhiu m̀-voi chiông kì kâu-pûn ngì.”
18:31	彼拉多對佢等講：「你等將佢帶轉去，照你等自家个法律審判佢就好了。」猶太人个領袖應講：「𠊎等無權好判人死刑。」	Pí-lâ-tô tui kì-têu kóng: “Ngì-têu chiông kì tai-chón-hi, cheu ngì-têu chhṳ-kâ ke fap-li̍t sṳ́m-phan kì chhiu hó lé.” Yù-thai-ngìn ke liâng-chhiu en-kóng: “Ngài-têu mò khièn hó phan ngìn sí-hìn.”
18:32	(這應驗耶穌所講過、佢會樣般死个話。)	(Liá yin-ngiam Yâ-sû só kóng-ko, kì voi ngióng-pân sí ke fa.)
18:33	彼拉多就入總督府去，喊耶穌來，問佢講：「你係猶太人个王麼？」	Pí-lâ-tô chhiu ngi̍p chúng-tuk-fú hi, hêm Yâ-sû lòi, mun kì kóng: “Ngì he Yù-thai-ngìn ke vòng mò?”
18:34	耶穌應講：「這係你自家愛問个，抑係因為有人對你講過，你正恁樣問呢？」	Yâ-sû en-kóng: “Liá he ngì chhṳ-kâ oi mun ke, ya-he yîn-vi yû-ngìn tui ngì kóng-ko, ngì chang án-ngiòng mun nè?”
18:35	彼拉多講：「你恅到𠊎係猶太人嗎？係你本國个人㧯該兜祭司長將你交給𠊎。你到底做麼介事啊？」	Pí-lâ-tô kóng: “Ngì láu-tó ngài he Yù-thai-ngìn mâ? He ngì pún-koet ke ngìn lâu ke-têu chi-sṳ̂-chóng chiông ngì kâu-pûn ngài. Ngì to-tái cho má-ke sṳ â?”
18:36	耶穌講：「𠊎个國毋係這世間个國；假使𠊎个國係這世間个國，𠊎个子民一定會為𠊎相㓾，𠊎就毋會落在該兜猶太人个手中。總係，𠊎个國毋係這世間个國！」	Yâ-sû kóng: “Ngài ke koet m̀-he liá sṳ-kiên ke koet; ká-sṳ́ ngài ke koet he liá sṳ-kiên ke koet, ngài ke chṳ́-mìn yit-thin voi vi ngài siông-chhṳ̀, ngài chhiu m̀-voi lo̍k chhai ke-têu Yù-thai-ngìn ke sú-chûng. Chúng-he, ngài ke koet m̀-he liá sṳ-kiên ke koet!”
18:37	彼拉多講：「恁樣講，你係王囉？」耶穌應講：「係你講𠊎係王。𠊎為到這個出世，也為到這個來到世間，係愛為真理做見證。凡係屬真理个人一定會聽𠊎个話。」	Pí-lâ-tô kóng: “Án-ngiòng kóng, ngì he vòng lô?” Yâ-sû en-kóng: “He ngì kóng ngài he vòng. Ngài vi-tó liá-ke chhut-se, ya vi-tó liá-ke lòi-to sṳ-kiên, he oi vi chṳ̂n-lî cho kien-chṳn. Fàm he su̍k chṳ̂n-lî ke ngìn yit-thin voi thâng ngài ke fa.”
18:38	彼拉多講：「真理係麼介？」耶穌被人判死刑 ( 馬太 27:15-31 馬可 15:6-20 路加 23:13-25 ) 彼拉多就出來，對猶太人講：「𠊎查毋出這人有麼介罪。	Pí-lâ-tô kóng: “Chṳ̂n-lî he má-ke?” Yâ-sû Pûn-ngìn Phan Sí-hìn ( Mâ-thai 27:15-31 Mâ-khó 15:6-20 Lu-kâ 23:13-25 ) Pí-lâ-tô chhiu chhut-lòi, tui Yù-thai-ngìn kóng: “Ngài chhà-m̀-chhut liá ngìn yû má-ke chhui.
18:39	總係你等有一個慣例，愛𠊎在𨃟過節為你等放一個囚犯。你等愛𠊎為你等放猶太人个王嗎？」	Chúng-he ngì-têu yû yit-ke koan-li, oi ngài chhai Phàn-ko-chiet vi ngì-têu piong yit-ke siù-fam. Ngì-têu oi ngài vi ngì-têu piong Yù-thai-ngìn ke vòng mâ?”
18:40	佢等就大聲喊講：「毋愛佢！𠊎等愛巴拉巴！」(巴拉巴係一個強盜。)	Kì-têu chhiu thai-sâng hêm-kóng: “M̀-oi kì! Ngài-têu oi Pâ-lâ-pâ!” (Pâ-lâ-pâ he yit-ke khiòng-tho.)

上一章下一章 [ 條列 | 表格 | 整段 ] 重新查詢

經文由台灣聖經公會提供，不超過500節經文的使用權無須預先獲得批准，但請註明版權所屬。檢索技術與程式由 CBOL計畫提供，網站與資料庫資源由信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative. 漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。