上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
列王紀下
14
猶大王亞瑪謝
( 代下 25:1-24 )
約哈斯的子以色列王約華施第二年，約阿施的子亞瑪謝開始做猶大王。
2 伊坐位的時二十五歲，佇耶路撒冷作王二十九年；伊的老母叫做約耶但，是耶路撒冷人。
3 亞瑪謝做上主看做好的事，毋拘無親像伊的祖先大闢；伊猶原照伊的老父約阿施的所做去做，
4 無拆毀山頭壇；人民繼續佇遐獻祭燒香。
5 亞瑪謝的王權一下堅固，就將刣死伊老父猶大王許個人臣處死。
6 毋拘伊無刣死許個人臣的子兒，是照摩西律法的冊所記載上主的命令：毋通因為子兒的所做給老父處死，嘛毋通因為老父的所做給子兒處死；逐個人著因為家己的罪死。
7 亞瑪謝佇鹽的山谷刣死以東人一萬，閣攻取西拉，給伊改名做約帖，到今仔日。
8 彼時，亞瑪謝派使者去見耶戶的孫，約哈斯的子，以色列王約華施，講：「來，咱來戰場拼輸贏。」
9 以色列王約華施派使者去給猶大王亞瑪謝講：「黎巴嫩的草刺差使者去見黎巴嫩的柏香樹，講：『你的查某子互我的子做某！』後來黎巴嫩有一隻野獸經過，給草刺踐踏。
10 你已經刣贏以東，心就驕傲聳勢。你𫢶恁兜享受你的榮光就好，哪欲惹災禍，互你本身及猶大國做夥滅亡？」
11 毋拘亞瑪謝聽𣍐落去。以色列王約華施就上來，佇猶大的伯‧示麥及猶大王亞瑪謝交戰。
12 猶大互以色列拍敗，逐個人走倒去𪜶兜。
13 以色列王約華施佇遐掠著猶大王亞瑪謝，閣來拆毀耶路撒冷的城牆，對以法蓮門到角門，約兩百公尺。
14 約華施將上主聖殿及王宮的府庫所有的金銀及器具攏提去，閣掠人做人質，才倒去撒馬利亞。
15 約華施其他的事蹟、伊的所做及成就，以及及猶大王亞瑪謝交戰的事，攏記載佇《以色列列王史》。
16 約華施轉去伊的列祖遐，及以色列諸個王做夥安葬佇撒馬利亞；伊的子耶羅波安二世續接伊作王。
猶大王亞瑪謝死
17 ( 代下 25:25-28 )
約哈斯的子以色列王約華施死了，約阿施的子猶大王亞瑪謝閣再活十五年。
18 亞瑪謝其他的事蹟，攏記載佇《猶大列王史》。
19 佇耶路撒冷有人計謀欲害亞瑪謝，伊就逃走去拉吉。𪜶派人趇到拉吉，佇遐給伊刣死。
20 人用馬將伊的屍體載倒來耶路撒冷，將伊安葬佇大闢城，列祖的墓地。
21 猶大的人民設立烏西亞續接伊的老父亞瑪謝作王，彼時伊十六歲。
22 亞瑪謝王轉去伊的列祖遐了後，烏西亞收回以拉他歸屬猶大國，閣給伊修建。
以色列王耶羅波安二世
23 約阿施的子猶大王亞瑪謝第十五年，約華施的子耶羅波安二世佇撒馬利亞做以色列王；伊作王共四十一年。
24 伊做上主看做歹的事，無離開尼八的子耶羅波安的路，互以色列人陷落罪。
25 伊收回以色列邊界的地，對哈馬隘口到死海，抵抵照上主 — 以色列的上帝通過伊的僕人，迦特‧希弗人亞米太的子先知約拿所講的話。
26 上主看見以色列人，無論是自由的抑是無自由的，攏受極大的苦難，嘛無人幫贊𪜶。
27 上主決意無欲對天下擦消以色列的名，就通過約華施的子耶羅波安二世解救𪜶。
28 耶羅波安二世其他的事蹟、伊的所做及成就，以及伊按怎交戰，按怎將以前屬猶大的大馬士革及哈馬收回歸屬以色列，攏記載佇《以色列列王史》。
29 耶羅波安二世轉去伊的祖先以色列許個王遐，伊的子撒迦利亞續接伊作王。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。