上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
啟示錄
9:1 第五個天使歕伊的喇叭，我有看著對天頂落落來地面彼粒星；此粒星有領受無底深坑的鎖匙。
9:2 伊開無底深坑，就有大火爐的煙淐起來。日頭及太空因為深坑的煙就變烏暗。
9:3 草蜢對煙的內面出來歇佇地面；𪜶領受權柄親像地上的蝎仔蟲有的權柄。
9:4 𪜶受交代毋通傷害地上的草、逐種的樹木，及一切青翠的物，只有通傷害頭額無蓋上帝的印的人。
9:5 草蜢無得著權通刣死諸個人，只有通互𪜶受痛苦五月日久；𪜶的痛苦親像人互蝎仔蟲咬著的痛苦。
9:6 諸個日的中間，人會求死嘛𣍐得死，愛死嘛死𣍐去。
9:7 草蜢的形狀親像準備欲出戰的馬；𪜶的頭殼頂戴親像金的花冠；𪜶的面親像人的面；
9:8 𪜶的頭毛親像婦仁人的頭毛；𪜶的牙親像獅的牙；
9:9 𪜶的胸坎穿親像鐵的護胸甲；𪜶的翼發出的聲親像真多戰馬拖車奔跑欲去交戰的聲。
9:10 𪜶有尾溜親像蝎仔蟲的尾溜有刺；𪜶的尾溜有能力通傷害人五月日久。
9:11 𪜶的王是管轄無底深坑的天使；伊的名希伯來語叫做亞巴頓，希臘語叫做亞玻倫，意思是毀滅者。
9:12 頭一個災禍已經過去；猶有兩個災禍啲欲來。
9:13 第六個天使歕伊的喇叭，我聽見有聲對上帝面前的金祭壇彼四支角出來，
9:14 給攑喇叭的第六個天使講：「你著將關佇幼發拉底河彼四個天使放出來。」
9:15 此四個天使受解放，是早就安排好勢，佇定著的年、月、日，及時欲殺害人類的三分一。
9:16 我有聽講馬兵的數目攏總有兩億。
9:17 佇異象中，我所看見的馬及騎馬的人是按呢：𪜶穿有火焰、藍寶石，及硫磺的色緻的護胸甲。𪜶的馬的頭親像獅的頭，對𪜶的嘴吐出火、煙，及硫磺。
9:18 人類的三分一互馬的嘴吐出來的火、煙，及硫磺此三項災害毀滅。
9:19 諸個馬的能力是佇𪜶的嘴及尾溜；𪜶的尾溜親像蛇有頭，用諸個頭傷害人。
9:20 其他所賰的就是諸個無受災禍殺害的人。𪜶猶無反悔，無放拺𪜶的手所造的偶像；𪜶照常拜諸個鬼，及許個𣍐看，𣍐聽，𣍐行，用金、銀、銅、石、柴造的偶像。
9:21 𪜶嘛無反悔，無放拺𪜶凶殺、邪術、淫亂、偷提的行為。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。