上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
約翰一書
基督 — 咱的辯護人
2:1 少年人，我寫諸個是欲互恁𣍐去犯罪。若有人犯罪，咱有義人耶穌基督佇父的面前做咱的辯護人。
2:2 伊為著咱的罪，毋若咱的罪，嘛為著全世界的罪，作贖罪祭。
2:3 咱若有啲遵守上帝的誡命，就知咱真正識上帝。
2:4 若有人講「我識上帝」，毋拘無啲遵守伊的誡命，此個人是白賊，伊內面無真理。
2:5 毋拘人若遵守上帝的道，上帝的疼就真正佇伊身上完全實現。人若講伊𫢶佇上帝內面，應該照耶穌基督的言行生活。按呢就知咱有佇上帝內面。
2:6 併於上節
新的命令
2:7 親愛的朋友，我寫互恁的毋是新的誡命，是恁對起頭就領受彼個舊的誡命，是恁曾聽著的信息。
2:8 總是我寫互恁的誡命嘛通講是新的，這對基督及對恁攏是真的；因為烏暗啲過去，真光已經啲照。
2:9 人若講伊佇光明中，毋拘怨恨兄弟抑是姊妹，事實伊猶久佇烏暗中。
2:10 疼兄弟抑是姊妹的人是佇光明中啲生活，𣍐致到互人跋倒犯罪。
2:11 毋拘怨恨兄弟抑是姊妹的人是佇烏暗中，佇烏暗中啲生活，毋知欲去叨位，因為烏暗互伊的目睭無看見。
2:12 少年人，我寫批互恁，
因為靠基督的名恁的罪已經得著赦免。
2:13 父老序大，我寫批互恁，
因為恁認識對起頭就存在彼位。
青年人，我寫批互恁，
因為恁已經有贏過彼個邪惡者。
2:14 細子，我寫批互恁，
因為恁認識父。
父老序大，我寫批互恁，
因為恁認識對起頭就存在彼位。
青年人，我寫批互恁，
因為恁勇壯，上帝的道𫢶佇恁內面，
閣恁已經有贏過彼個邪惡者。
2:15 毋通貪愛世間抑是世間的物。若有人貪愛世間，伊就無疼父。
2:16 因為一切屬世間的，親像肉體的慾望、目睭的慾望、展家己的財富等，攏毋是對父來，是對世間來的。
2:17 此世間及世間的慾望攏啲過去，總是實行上帝旨意的人永遠生存。
基督的敵對者
2:18 細子，這是終末的時。恁有聽著基督的敵對者啲欲來，現在已經有真多基督的敵對者出現；對按呢，咱知這是終末的時。
2:19 𪜶離開咱，因為𪜶毋是咱的人；𪜶若是咱的人，會繼續及咱做夥。毋拘𪜶離開，表示𪜶攏毋是咱的人。
2:20 恁已經有領受聖神，恁攏知。
2:21 我寫批互恁，毋是因為恁毋識真理，是因為恁識真理，閣知一切的虛假毋是對真理來。
2:22 什麼人是白賊的？一定是拒絕耶穌是基督彼個人！拒絕父及子的就是基督的敵對者。
2:23 拒絕子的無接納父；宣認子就是接納父。
2:24 著堅守恁對起頭所聽著的信息。恁若堅守對起頭所聽著的信息就會繼續活佇子及父的內面。
2:25 這就是基督互咱的應允，是永遠的活命。
2:26 我寫諸個互恁，是關係想欲迷惑恁的人的事。
2:27 對恁來講，恁對基督領受的聖神𫢶佇恁內面，就無需要別人給恁教示，因為此位聖神欲教示恁逐項代誌；伊的教示是真的，毋是假的。按呢，著照聖神教示恁的，𫢶佇基督內面。
2:28 今，少年人，著𫢶佇基督內面，按呢佇伊顯現的時，咱佇伊面前才會好膽，𣍐因為伊的來臨感覺見笑。
2:29 恁若知伊是公義，應該知實行公義的人才是上帝的子兒。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。