上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
彼得後書
請安
1:1 我西緬‧彼得是耶穌基督的僕人及使徒，我寫批互許個靠咱的上帝及救主耶穌基督的義，及阮做夥領受仝款寶貴信仰的人。
1:2 願恁通過認識上帝及咱的主耶穌得著上帝所賜豐豐富富的恩典及平安！
上帝的呼召及揀選
1:3 上帝有用伊的能力將敬虔的生活所需要的一切賜互咱；這是通過咱認識召咱來分享伊的榮光及良善彼位上帝來的。
1:4 按呢，伊有將極大閣寶貴的應允賜互咱，互恁通過諸個應允通脫離世上的慾望所造成的腐敗來分享上帝的本性。
1:5 為著此個，恁著盡力拍拼，互恁有信心閣有德行，有德行閣有智識，
1:6 有智識閣有節制，有節制閣有忍耐，有忍耐閣有敬虔，
1:7 有敬虔閣有手足之情，有手足之情閣有仁愛。
1:8 諸個是恁所需要的品德。諸個恁若攏有，閣愈充實，會互恁閣較積極，閣較有效認識咱的主耶穌基督。
1:9 人若無諸個德行，是短視，是失明，𣍐記得伊以前的罪已經有洗清氣。
1:10 所以，我的兄弟姊妹，恁著閣較勞力來證明上帝對恁的呼召及揀選是確實的；恁若按呢做就𣍐墮落。
1:11 按呢，上帝會大大賜福互恁通進入咱的主 — 救主耶穌基督永遠的國度。
1:12 所以，雖然恁已經知諸個代誌，閣堅定執守恁所領受的真理，我猶久欲不時給恁提醒諸個代誌。
1:13 我想，我猶活啲的時，著給恁提醒。
1:14 咱的主耶穌基督已經有清楚給我指示，互我知無久就會脫離此個會敗壞的身軀。
1:15 我欲盡力想辦法，互恁佇我離開世間以後不時會記得諸個代誌。
見證基督的榮光
1:16 阮對恁所講主耶穌基督大權能來臨的事，毋是根據人捏造出來虛假的傳說；阮有親目看見伊的尊榮。
1:17 伊對父上帝領受尊貴及榮耀的時，彼位尊嚴的榮光 — 上帝出聲講：「此個是我所疼的子，伊，我真意愛。」
1:18 伊佇聖山的時阮嘛佇遐，有親身聽見對天頂出來此個聲。
1:19 所以阮對先知所宣布的信息閣較有確信。恁著注意聽，因為此個信息親像一葩燈佇烏暗的所在啲照，照到天光，到啟明星出現佇恁心內的時。
1:20 上要緊的著知，聖經所有的預言毋通照家己的意思解說。
1:21 因為預言毋是出佇人的意思，是人受聖神感動講出對上帝來的信息。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。