上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
彼得前書
活石及聖潔的國度
2:1 所以，著棄拺一切的歹，一切的詭詐、假好、怨妒，及一切的誹謗。
2:2 著親像抵出世的嬰仔真愛純的屬靈的奶，互恁通成長到得著救；
2:3 因為恁已經有啖著主的仁慈。
2:4 著親近主，伊是活石，雖然互人棄拺，毋拘受上帝揀選看做寶貴。
2:5 恁嘛著作活石，互上帝用來起造屬靈的殿，閣作聖潔的祭司，通過耶穌基督獻上帝所歡喜屬靈的祭物。
2:6 因為聖經有記載：
看咧，我欲佇錫安下一塊石，
是受揀寶貴的厝角石；
信伊的人絕對𣍐失望。
2:7 此塊石對恁諸個信的人是寶貴的，毋拘對毋信的人，
起厝師傅所棄拺的石，
已經成做上重要的基石！
2:8 佇別位有記載：
此塊是絆腳石，
是互人跋倒的石。
𪜶毋順趁道理來跋倒是上帝的安排。
2:9 毋拘恁咧，恁是受揀選的種族、王家的祭司、聖潔的國度、上帝的子民，欲互恁通宣揚上帝偉大的作為；此位上帝有召恁出烏暗來入佇伊燦爛的光明。
2:10 聖經講：
恁前毋是上帝的子民，
現在是伊的子民；
恁前無得著上帝的憐憫，
現在得著伊的憐憫。
上帝的僕人
2:11 親愛的兄弟姊妹，恁佇世間作僑民，作寄居的，我勸恁毋通放縱肉體的情慾；此個情慾不時啲攻擊靈魂。
2:12 恁佇未信者的中間著有好行為，互許個誹謗恁是歹人的人通看見恁的好行為，佇主來臨的日歸榮光互上帝。
2:13 為著主的緣故，恁著順趁人一切的制度，無論是對最高的統治者君王，
2:14 抑是對君王所派來獎勵做好的人，刑罰做歹的人的官長攏著按呢。
2:15 因為這是上帝的旨意；伊愛恁做好，互無智識的戇人無話通講。
2:16 恁作自由的人，毋通用自由做邪惡的藉口，著作上帝的僕人。
2:17 恁著尊重所有的人；著疼兄弟姊妹，敬畏上帝，尊敬君王。
基督受苦的模範
2:18 恁作僕人的，著恭敬順趁恁的主人，毋若對善良溫和的主人，連刻薄的嘛著按呢。
2:19 抵著無應該受的痛苦，若了解是上帝的意思來忍受是通稱讚的。
2:20 恁若做毋著互人拍來忍受痛苦，有什麼體面？毋拘恁若作好來忍受苦難，這是上帝所稱讚的。
2:21 為著此個，上帝呼召恁；因為基督嘛有為著恁受苦，留模樣互恁，欲互恁通隨伊的腳步。
2:22 伊無犯罪；
伊的嘴嘛無詭詐。
2:23 伊受詈罵，無罵倒轉；受虐待，嘛無給人威脅；只有將家己交託互彼位公義的審判者。
2:24 基督佇十字架頂親身擔當咱的罪，互咱向罪死，向義來活；對伊的受傷，恁得著醫治。
2:25 恁以前親像羊迷路，現在已經轉來歸佇恁靈魂的牧者及監護者。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。