上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
民數記
無清氣的人
5:1 耶和華吩咐摩西講：
5:2 「你著命令以色列人，互一切患著癩𰣻的，患著下痟症的，及因為死屍無清氣的，攏出去營外。
5:3 無論男女恁攏著互𪜶出去就是出去到營外，免得拍垃墋𪜶的營盤；因為我徛起佇𪜶的中間。」
5:4 以色列人照按呢行，互𪜶出去營外。耶和華按呢吩咐摩西，以色列人就按呢行。
賠償剋虧者
5:5 耶和華吩咐摩西講：
5:6 「你著給以色列人講：無論男女，若行人所行的罪，致到干犯耶和華，彼人就有罪。
5:7 𪜶著認𪜶所犯的罪，照數額賠伊，另外加五份的一份，歸互伊所剋虧的人。
5:8 總是彼人若無親人通領受因為罪所賠的，就彼個因為罪所賠的著還互耶和華來歸祭司；論彼隻贖罪的羊牨就是用來給伊贖罪的是算在外。
5:9 以色列人一切的聖物中，所奉互祭司的舉祭攏著歸互祭司。
5:10 見若人所分別做聖的物著歸互祭司，人用甚麼互祭司的，攏著歸佇伊。」
僥疑某拍垃墋的案件
5:11 耶和華吩咐摩西講：
5:12 「你著吩咐以色列人對伊講：人的某若行錯，得罪伊的丈夫，
5:13 有人及伊行淫，事情秘密，伊的丈夫知，也無露出，總是伊受拍垃墋，也無人做干證，也無掠著伊，
5:14 伊的丈夫生起僥疑的心，僥疑伊的某，伊的某是拍垃墋，抑是伊的丈夫生起僥疑的心，僥疑伊的某，伊的某並無受拍垃墋，
5:15 彼個人著導伊的某到祭司遐，也為著伊帶大麥的麵粉伊法十份一做伊的禮物，通斟油，也通參乳香；因為這是僥疑的素祭，是記得的素祭，互人會記得罪。
5:16 「祭司著互彼個婦仁人近倚來，互伊徛佇耶和華的面前。
5:17 祭司著用聖的水貯佇磁的器具內，閣對會幕的土腳提一點仔土粉，下佇水中。
5:18 祭司著互彼個婦仁人徛佇耶和華的面前，拍散婦仁人的頭毛，將記得的素祭，就是僥疑的素祭，下佇伊的手中。祭司的手著提致到咒詛的苦水，
5:19 祭司著教婦仁人咒誓，對伊講：『若無人及你行淫，你已經受丈夫的約束無行錯致到拍垃墋，你就及此個咒詛的苦水無干涉。
5:20 總是你已經受丈夫的約束若有行錯受拍垃墋，佇你的丈夫以外有人及你行淫，
5:21 （祭司就互婦仁人用咒詛來咒誓），祭司對婦仁人講，耶和華互你的大腿爛，腹肚脹的時，願耶和華互你佇你的百姓中成做咒詛，成做咒誓的話柄；
5:22 閣此個致到咒詛的水欲入你的腸仔內，互你的腹肚脹，大腿爛。』婦仁人著應講：『阿們，阿們。』
5:23 「祭司著寫諸個咒詛的話佇冊裡，用許個字抹入佇苦水裡，
5:24 閣互婦仁人飲此個咒詛的苦水；致到咒詛的水入伊的內面成做苦。
5:25 祭司著對婦仁人的手提僥疑的素祭，搖彼個素祭佇耶和華的面前，帶到壇前；
5:26 祭司著對素祭中提出一把，做紀念，燒佇壇頂，然後互婦仁人飲此個水。
5:27 已經互婦仁人飲彼個水，伊若受染垃墋，得罪伊的丈夫，此個致到咒詛的水欲入伊的內面成做苦，伊的腹肚就欲鼓脹，大腿就欲爛，彼個婦仁人就欲佇伊的百姓中成做咒詛的話柄。
5:28 若婦仁人無受拍垃墋，實在是清氣，就免受災禍，閣欲懷孕。
5:29 「某已經受丈夫的約束若有行錯染著垃墋，這就是僥疑的例，
5:30 抑是人生出僥疑的心，來僥疑伊的某。就著互伊的某徛佇耶和華的面前，祭司就著給伊盡此個例來行。
5:31 按呢查甫人就無罪，婦仁人著擔當家己的罪。」
上一章 下一章 [ 條列 | 表格 | 整段 ] 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。