上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
使徒行傳
掃羅的轉變
9:1 ( 22:6-16 26:12-18 )
掃羅猶久一味哄喝愛刣主的學生，去見祭司頭，
9:2 對伊求批互大馬色諸個會堂，若抵著趁此個路的人，無論男女，伊就通缚𪜶帶到耶路撒冷。
9:3 行近大馬色的時，忽然對天有光，圍纍照伊；
9:4 伊就跋倒佇地裡，聽見聲給伊講：「掃羅！掃羅！啥事窘逐我？」
9:5 伊講：「主啊！你是是誰？」講：「我就是你所窘逐的耶穌。
9:6 總是你著起來，入城，你所應該做的，欲給你講。」
9:7 同行的人靜靜徛啲，聽見聲，也無看見人。
9:8 掃羅對地裡起來，目睭展開，𣍐看見甚麼。人牽伊的手，導伊入大馬色；
9:9 歷過三日𣍐看見，無食也無飲。
9:10 佇大馬色有一個學生，名亞拿尼亞。主佇異象中給伊講：「亞拿尼亞啊。」伊講：「主啊，我佇遮。」
9:11 主對伊講：「起來！去彼條街路叫做直的，佇猶大的家，尋大數人，名掃羅。因為伊抵抵啲祈禱，
9:12 閣有看見一人，名亞拿尼亞，入來給伊按手，互伊會看見。」
9:13 若是亞拿尼亞應講：「主啊，我聽見多多人講，此人佇耶路撒冷曾怎樣大歹款待你諸個聖徒，
9:14 閣伊佇遮有諸個祭司頭的權通來縛見若求叫你的名的人。」
9:15 獨獨主給伊講：「做你去！伊是我揀選的器具，欲報揚我的名，佇外邦及國王，以及以色列子孫的面前。
9:16 我也欲互伊知，伊著因為我的名受偌多的艱苦。」
9:17 亞拿尼亞就去，入伊的厝，手按伊，講：「兄弟掃羅，主就是你來的時路中出現互你看的耶穌，差我來，互你會看見，閣得著聖神充滿。」
9:18 連鞭對伊的目睭有物磕落，親像魚鱗，伊就看見。起來受洗禮；
9:19 已經食就勇健。
掃羅佇大馬色傳道
掃羅及大馬色的學生相及住幾若日，
9:20 連鞭佇諸個會堂宣傳耶穌，講伊是上帝的子。
9:21 聽見的人攏卬愕，講：「此人豈是彼個佇耶路撒冷殘害凡若求叫此個名的嗎？閣來遮，刁持欲縛，來拖𪜶交互諸個祭司頭。」
9:22 獨獨掃羅益發有能力，駁倒住佇大馬色的猶太人，辯明此個是基督。
未受猶太人的謀害
9:23 過多多日，猶太人相及計謀欲刣伊，總是𪜶的計謀掃羅知。
9:24 𪜶亦日暝佇城門裡當等，欲刣伊。
9:25 若是伊的學生透暝將掃羅用籃對城牆給伊縋落去。
掃羅佇耶路撒冷
9:26 已經到耶路撒冷，欲及學生交陪，𪜶攏驚伊，信伊是學生。
9:27 獨獨巴拿巴導伊就近使徒，將伊佇路中怎樣看見主，主及伊講話，以及伊住大馬色怎樣好膽佇耶穌的名來傳，攏總講起。
9:28 就佇耶路撒冷及𪜶出入，好膽佇主的名來傳，
9:29 亦及講希利尼話的猶太人講話辯論；獨獨許個人圖謀欲刣伊。
9:30 兄弟知就送伊落該撒利亞，互伊倒去大數。
9:31 對按呢，遍猶太、加利利、撒瑪利亞的教會有平安，得著建立；行代誌敬畏主，也受聖神的安慰，人額愈加添。
以尼雅得醫治
9:32 彼得遍行四方的時，也落去就近𫢶佇呂大的聖徒；
9:33 佇遐抵著一人，名以尼雅，因為患著半𤻄，倒床八年。
9:34 彼得給伊講：「以尼雅，耶穌基督醫好你啦，起來！你的舖仔家己整頓。」伊連鞭起來。
9:35 見若住佇呂大及撒崙的人看見伊，就歸服主。
多加復活
9:36 佇約帕有一個女徒，名大比大，翻譯就是多加；行好事及賑濟滿滿。
9:37 當時，破病死，人洗伊的身屍，下佇樓頂。
9:38 呂大近約帕；學生聽見彼得佇遐，就差二人去尋伊，求講：「請來阮遮，通延迁。」
9:39 彼得就起身及𪜶去；已經到，導伊上樓。眾守寡人徛佇彼得的身邊啲哮，將多加及𪜶佇啲的時所做的衣服互伊看。
9:40 彼得就教眾人出去，跪落去祈禱，越轉身向身屍講：「大比大，起來！」伊的目睭展開，看見彼得，就起來坐。
9:41 彼得伸手扶伊起來，叫諸個聖徒及守寡人入來，將復活的多加交互𪜶。
9:42 通約帕攏知，就有多多人信主。
9:43 彼得佇約帕久久及一個礬皮師傅西門相及住。
上一章 下一章 [ 條列 | 表格 | 整段 ] 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。