上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
馬太福音
耶穌復活
28:1 ( 可 16:1-10 路 24:1-12 約 20:1-10 )
安息日後，七日的頭一日，天昲光，抹大拉的馬利亞及別個馬利亞來欲看彼個墓。
耶穌的復活
28:1 ( 可16:1-10 路24:1-12 約20:1-10 )
安息日過了，禮拜日(128.1「禮拜日」原文是「七日的頭一日」，就是猶太曆逐禮拜的第一日。*)天欲光的時，抹大拉的馬利亞及別的馬利亞去探墓。
28:2 忽然，地大振動；因為主的天使對天落來，翱開彼塊石，來坐佇頂面。
28:2 忽然，有大地動，因為主的一個天使對天降臨，將彼塊石頭翱開，坐佇彼頂面。
28:3 伊的面貌親像閃爁，衫白親像雪。
28:3 伊的面貌親像熠爁，伊的衫親像雪赫呢白。
28:4 顧守的人因為驚就愕愕惙，變親像死。
28:4 許個顧守的衛兵驚甲皮皮惙，煞變做親像死人。
28:5 天使應許個婦仁人講：「恁免驚！因為我知恁啲尋釘十字架的耶穌。
28:5 彼個天使給許個婦仁人講：「免驚；我知恁啲尋互人釘十字架的耶穌。
28:6 伊無佇遮，因為伊已經復活，照伊所講的。恁來看主所倒的所在。
28:6 伊無佇遮，照伊所講，伊已經復活。來，來看伊倒的所在。
28:7 也著緊緊去給伊的學生講，伊對死人中復活，也欲代先恁去加利利，佇遐恁欲看見伊。我已經給恁講啦。」
28:7 恁趕緊去給伊的門徒講：『伊已經對死人中復活啦。伊比恁先去加利利，佇遐恁會見著伊。』著會記得我已經有給恁講啦。」
28:8 𪜶緊緊離開墓，也驚，也大歡喜，走去報伊的學生。
28:8 𪜶就趕緊離開墓，也驚也大歡喜，走去給耶穌的門徒講。
28:9 忽然，耶穌抵著𪜶，講：「平安！」𪜶進前抱伊的腳，拜伊。
28:9 忽然，耶穌出現，對𪜶講：「大家平安！」𪜶行進前攬伊的腳，給伊拜。
28:10 耶穌就給𪜶講：「免驚！去報我的兄弟，教𪜶去加利利，佇遐欲看見我。」
28:10 耶穌給𪜶講：「免驚！去給我的兄弟講，叫𪜶去加利利，佇遐𪜶會見著我。」
顧守的兵報告祭司頭
28:11 婦仁人去的時，顧守的兵有的入城，用所經過的事一盡報諸個祭司頭。
衛兵的報告
28:11 許個婦仁人離開的時，有一寡顧守墓的衛兵入去城內，將所發生的代誌攏給祭司長報告。
28:12 𪜶就及長老聚集相及參詳，用多多銀互兵，講：
28:12 祭司長及長老聚集參詳了後，提真多銀仔互許個兵，
28:13 「恁著講：『阮啲睏的時，伊的學生，暝時來偷去。』
28:13 講：「恁著按呢講：『伊的門徒暗時來，佇阮啲睏的時將伊的身屍偷提去。』
28:14 設使此個代誌互總督聽見，阮就欲勸伊，互恁無事。」
28:14 萬一總督聽著此個代誌，阮會去給伊安搭，包恁無代誌。」
28:15 𪜶提許個銀，照所教𪜶的去行。此個話就遍傳猶太人中。到佇今仔日。
28:15 衛兵就提許個銀仔照𪜶所吩咐的去做。此個代誌到今仔日猶佇猶太人的中間啲流傳。
學生受差遣
28:16 ( 可 16:14-18 路 24:36-49 約 20:19-23 徒 1:6-8 )
若是十一個學生去加利利，到耶穌所曾給𪜶定著的山。
差遣門徒
28:16 ( 可16:14-18 路24:36-49 約20:19-23 徒1:6-8 )
十一個門徒去加利利，到耶穌指定𪜶去彼座山頂。
28:17 看見伊就拜伊，總是有的僥疑。
28:17 𪜶見著耶穌就給伊拜，不過有人猶啲憢疑。
28:18 耶穌近倚來對𪜶講話，講：「天頂地下的權已經攏總互我。
28:18 耶穌行倚去給𪜶講：「上帝已經將天頂地下一切的權柄攏互我。
28:19 所以，恁著去招萬百姓來做學生，給𪜶行洗禮，互𪜶歸佇父、子，聖神的名。
28:19 所以，恁著去招萬民來做門徒，給𪜶洗禮，互𪜶歸佇父、子、聖神的名，(228.19「給𪜶…的名」嘛通譯做「奉父、子、聖神的名給𪜶洗禮」。)
28:20 見若我所有命令恁的，著教示𪜶守，閣我日日及恁佇啲，到世間的路尾。」
28:20 教示𪜶遵守我所互恁一切的命令。著會記得，我逐日及恁同在，直到今世的結束。」
上一章 下一章 [ 條列 | 表格 | 整段 ] 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。