上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
馬太福音
耶穌受交互彼拉多
27:1 ( 可 15:1 路 23:1-2 約 18:28-32 )
到天光，眾祭司頭及百姓的長老相及計謀攻擊耶穌愛互伊死，
耶穌互人押去見彼拉多
27:1 ( 可15:1 路23:1-2 約18:28-32 )
透早，所有的祭司長及民間的長老鬥陣參詳欲陷害耶穌，給伊處死刑。
27:2 已經縛伊，就帶去，交互總督彼拉多。
27:2 𪜶給耶穌縛起來，押去交互羅馬總督彼拉多。
猶大的死
27:3 ( 徒 1:18-19 )
彼時，賣伊的猶大看見耶穌受定罪，就退悔，將許個三十銀還諸個祭司頭及長老，講：
猶大的死
27:3 ( 徒1:18-19 )
出賣耶穌的猶大看著耶穌已經受定罪，就後悔，提彼三十個銀仔去還互許個祭司長及長老，
27:4 「我賣無罪者的血有罪啦。」𪜶講：「及阮啥干涉？你家己打算。」
27:4 講：「出賣無辜的人，我有罪啦！」
𪜶應講：「無阮的代誌，你家己負責！」
27:5 猶大㧒許個銀佇殿裡，退去家己吊死。
27:5 猶大將許個銀仔㧒佇聖殿的內面就離開，去吊死。
27:6 許個祭司頭提彼個銀，講：「這是血的價，通橐佇庫房。」
27:6 許個祭司長將銀仔拾起來，講：「這是血錢，無應該囥入聖殿的金庫。」
27:7 𪜶就參詳，將彼個銀去買燒磁人的園，通埋葬出外人。
27:7 𪜶參詳了決定用諸個錢去買燒瓷人的園，通埋葬出外人。
27:8 所以彼區園到今稱做「血園」。
27:8 所以彼個園到今仔日猶叫做血園。
27:9 對按呢應驗早託先知耶利米所講的，講：「𪜶提受估者的價銀三十，就是以色列的子孫中有人所估的，
27:9 此個代誌應驗上帝通過先知耶利米所講的話：「𪜶提彼三十個銀仔，就是以色列人為著伊估計的價錢，
27:10 用伊來買燒磁者的園；照主所命令我的。」
27:10 照主所命令我的，去買彼區燒瓷人的園。」
耶穌佇彼拉多面前受審
27:11 ( 可 15:2-5 路 23:3-5 約 18:33-38 )
耶穌徛佇總督的面前；總督問伊講：「你是猶太人的王嗎？」耶穌給伊講：「你講就是。」
耶穌佇彼拉多面前受審
27:11 ( 可15:2-5 路23:3-5 約18:33-38 )
耶穌徛佇總督的面前，總督問伊講：「你是猶太人的王是無？」
耶穌應講：「這是你講的。」
27:12 伊互許個祭司頭長老告，伊也無應。
27:12 許個祭司長及長老控告耶穌的時，伊攏無應。
27:13 彼時彼拉多給伊講：「許個人干證你到許多項，你無聽見嗎？」
27:13 後來彼拉多對伊講：「𪜶給你控告即多項代誌，你豈無聽見？」
27:14 耶穌無應伊一句話，致到總督大奇怪。
27:14 耶穌猶原無給伊應，連一句嘛無，總督煞感覺非常奇怪。
耶穌受判死刑
27:15 ( 可 15:6-15 路 23:13-15 約 18:39—19:16 )
到節期總督照例放一個犯人互眾人，是照𪜶所愛的。
耶穌受判死刑
27:15 ( 可15:6-15 路23:13-25 約18:39-19:16 )
逐年的𨃟過節，照慣例總督攏有放一個群眾愛放的犯人。
27:16 彼時有出名的犯人名叫巴拉巴。
27:16 彼時抵好有一個大家攏識的犯人，名叫做耶穌巴拉巴。(127.16有的抄本無「耶穌」此個名。)
27:17 𪜶已經聚集，彼拉多給𪜶講：「恁愛我放是誰互恁？是巴拉巴？抑是稱做基督的耶穌？」
27:17 所以，群眾聚集的時，彼拉多問𪜶講：「恁愛我放叨一個互恁？耶穌巴拉巴，抑是稱做基督的耶穌？」
27:18 因為知𪜶為著怨妒才解送耶穌。
27:18 彼拉多知𪜶是因為怨妒才將耶穌交互伊。
27:19 伊坐堂的時，伊的某差人給伊講：「此個義人，你通干涉著，因為我今仔日佇眠夢中為著伊多多艱苦。」
27:19 彼拉多開庭審問的時，伊的夫人差人來給伊講：「彼個義人的代誌，你千萬通插；昨暗我佇眠夢中因為伊受真多苦。」
27:20 諸個祭司頭及長老教唆眾人，求放巴拉巴，滅耶穌。
27:20 許個祭司長及長老煽動民眾，教𪜶著要求放巴拉巴，給耶穌處死刑。
27:21 總督應講：「此二人，恁愛我放叨落一個互恁？」𪜶講：「巴拉巴。」
27:21 總督閣問𪜶：「此兩個人恁愛我放叨一個互恁？」
𪜶應：「巴拉巴！」
27:22 彼拉多給𪜶講：「按呢，就稱做基督的耶穌我著怎樣辦伊？」𪜶攏講：「釘伊十字架！」
27:22 彼拉多問𪜶：「按呢，彼個稱做基督的耶穌，恁愛我按怎處理？」
群眾攏應：「給釘十字架！」
27:23 總督講：「怎樣？伊有行甚麼歹？」𪜶大聲喝講：「釘伊十字架！」
27:23 彼拉多講：「是按怎？伊有做什麼歹代誌？」
𪜶閣較大聲喝：「給釘十字架！」
27:24 彼拉多看見無採工，反轉愈擾亂，就捧水佇眾人的面前洗手，講：「佇此個義人的血，我無罪，恁家己打算。」
27:24 彼拉多看已經無採工，強欲引起暴動，就提水佇群眾面前洗手，講：「恁家己負責。」(227.24有的抄本是「流此個義人的血，恁家己負責。」)
27:25 百姓攏應伊講：「伊的血歸佇阮及阮的子孫。」
27:25 民眾攏應講：「此個人的血債，阮及阮的子孫來擔當。」
27:26 伊就放巴拉巴互𪜶，已經鞭拍耶穌，就發交去釘十字架。
27:26 彼拉多就放巴拉巴互𪜶，閣命令人用鞭拍耶穌，然後交伊去釘十字架。
兵丁戲弄耶穌
27:27 ( 可 15:16-20 約 19:2-3 )
彼時總督的兵帶耶穌入公堂，聚集通營圍伊。
兵士戲弄耶穌
27:27 ( 可15:16-20 約19:2-3 )
總督的兵士押耶穌入去總督府，召集全隊的兵給伊圍起來。
27:28 褪伊的衫，將紅袍給伊穿，
27:28 𪜶將耶穌的衫褪起來，給伊穿朱紅色的長袍，
27:29 用莿仔編冕旒，戴佇伊的頭殼，用蘆竹下佇伊的正手，跪佇伊的面前，戲弄伊，講：「猶太人的王，平安！」
27:29 閣用刺仔編一頂王冠給戴佇頭殼頂，將一支蘆竹仔互伊攑佇正手。𪜶閣跪佇伊的面前戲弄，講：「猶太人的王萬歲！」
27:30 就給伊呸涎，攑彼枝蘆竹來捽伊的頭殼。
27:30 𪜶閣給伊呸嘴涎，攑彼支蘆竹仔捽伊的頭殼。
27:31 戲弄息，彼領袍就給伊褪起來，將伊家己的衫給伊穿，帶伊去，釘十字架。
27:31 𪜶給伊戲弄了後，將彼領長袍給褪起來，閣將伊家己的衫給穿倒轉去，然後交伊去釘十字架。
耶穌受釘十字架
27:32 ( 可 15:21-32 路 23:26-43 約 19:17-27 )
出來的時，抵著一個古利奈人，名西門，勉強伊相及去，互伊夯耶穌的十字架。
耶穌受釘十字架
27:32 ( 可15:21-32 路23:26-43 約19:17-27 )
𪜶出去的時抵著一個古利奈人，名叫做西門。𪜶強迫伊夯耶穌的十字架。
27:33 到一所在名各各他，就是「頭殼碗」的所在。就用苦膽所調和的酒互伊飲；
27:33 𪜶到一個所在叫做各各他，就是「頭殼碗嶺」，
27:34 伊試看，就飲。
27:34 就用摻苦膽的酒互耶穌飲；伊啖一下，飲。
27:35 已經釘伊佇十字架，就做鬮分伊的衣服，
27:35 兵士釘耶穌佇十字架了後抽籤分伊的衫，
27:36 閣坐佇遐顧守伊。
27:36 然後坐佇遐顧守。
27:37 就下斬條佇伊頭殼的頂面，寫講：「此個是猶太人的王耶穌。」
27:37 𪜶佇伊的頭殼頂釘一個罪狀，寫講：「此個是猶太人的王耶穌。」
27:38 彼時，有二個賊及伊同釘佇十字架，一個佇正旁，一個佇倒旁。
27:38 有兩個強盜及耶穌做夥釘十字架，一個佇正旁，一個佇倒旁。
27:39 經過的人譏刺伊，搖頭，講：
27:39 對遐經過的人給伊侮辱，搖頭，
27:40 「你毀壞殿，三日閣起的，著救家己！你若是上帝的子，著對十字架落來！」
27:40 講：「你此個人，講欲拆毀聖殿三日內閣起起來，著救你家己。你若是上帝的子，著對十字架落來！」
27:41 許個祭司頭及經學士以及長老也是按呢戲弄伊，講：
27:41 祭司長、經學教師，及長老嘛攏按呢給伊恥笑，講：
27:42 「伊曾救別人，𣍐會救家己。伊做以色列的王，今著對十字架落來，阮就欲信伊。
27:42 「伊救別人，無法度救家己。伊是以色列的王，現在著對十字架落來，咱就信伊。
27:43 伊倚靠上帝，上帝若歡喜伊，今就著救伊；因為伊講：『我就是上帝的子。』」
27:43 伊信靠上帝；上帝若欲救伊，現在著救伊，因為伊講：『我是上帝的子。』」
27:44 及伊同釘彼二個賊也是按呢罵伊。
27:44 及耶穌做夥釘十字架彼兩個強盜嘛仝款給伊侮辱。
耶穌的死
27:45 ( 可 15:33-41 路 23:44-49 約 19:28-30 )
對日中晝到三點，遍地黑暗。
耶穌的死
27:45 ( 可15:33-41 路23:44-49 約19:28-30 )
對中晝起續到下晡三點，全地攏烏暗。
27:46 差不多三點，耶穌大聲喉叫講：「以利！以利！拉馬撒卜大尼？」就是講：「我的上帝！我的上帝！你啥事放離我？」
27:46 下晡三點左右，耶穌大聲喝：「以利，以利，拉馬撒北大尼？」意思是「我的上帝，我的上帝，你是按怎放拺我？」
27:47 邊頭徛的有人，聽見就講：「伊啲叫以利亞！」
27:47 有一寡徛佇遐的人聽著，講：「此個人啲叫以利亞。」
27:48 中間一人即時走去，提海絨浸醋，縖佇蘆竹仔尾，互伊吸。
27:48 其中有一個人隨時走去提海綿，浸酸酒，縛佇蘆竹仔尾，㧣去互耶穌𠲿。
27:49 其餘的講：「且慢，看以利亞來救伊抑無。」
27:49 其他的人講：「等一下！看以利亞會來給伊救𣍐。」
27:50 耶穌閣大聲喉叫，就斷氣。
27:50 耶穌閣大聲喝一聲，氣就斷。
27:51 忽然，殿內的帳對頂到下裂做二旁，地動，石磐裂，
27:51 忽然，聖殿內的帳簾對頂到下裂做兩旁；地大震動，石磐爆裂；
27:52 墓開，已經啲睏的聖徒，𪜶的身軀多多起來，對𪜶的墓出。
27:52 墓嘛開；有真多已經死去的上帝子民的屍體攏復活起來。
27:53 到耶穌復活了後，𪜶入聖城，出現佇多多人。
27:53 耶穌復活以後許個人對墓出來，入去聖城，出現互真多人看見。
27:54 百總及相同顧守耶穌的看見地動及所經過的事，不止驚，講：「此個果然是上帝的子！」
27:54 彼個軍官及做夥顧守耶穌的兵士看著地動及所發生的代誌，非常驚惶，講：「此個確實是上帝的子！」
27:55 有多多婦仁人佇遐，遠遠啲看；𪜶就是對加利利跟隨耶穌來服事伊的。
27:55 佇遐有真多婦仁人對遠遠啲看；𪜶是對加利利隨耶穌來伺候伊的，
27:56 從中有抹大拉的馬利亞，雅各、約西的老母馬利亞，及西庇太的子的老母。
27:56 其中有抹大拉的馬利亞、雅各及約瑟的老母馬利亞、閣有西庇太兩個子的老母。
耶穌的安葬
27:57 ( 可 15:42-47 路 23:50-56 約 19:38-42 )
已經暗，有亞利馬太的好額人來，名做約瑟，伊也是耶穌的學生。
耶穌的安葬
27:57 ( 可15:42-47 路23:50-56 約19:38-42 )
黃昏的時，有一個亞利馬太的好額人來，伊名叫做約瑟，嘛是耶穌的門徒。
27:58 彼人去見彼拉多，求耶穌的身屍；彼拉多吩咐著互伊。
27:58 此個人去見彼拉多，請求將耶穌的遺體互伊。彼拉多就吩咐人將遺體互伊。
27:59 約瑟收彼個身屍，用清氣的幼布包伊，
27:59 約瑟給耶穌的遺體收落來以後，用清氣的幼麻布包起來，
27:60 下佇伊家己的新墓，就是伊佇石磐所拍的。就翱大塊石佇墓門，才去。
27:60 然後給伊安葬佇家己的新墓，就是約瑟拍佇石壁裡的墓。伊閣翱一塊大塊石來塞佇墓口才離開。
27:61 有抹大拉的馬利亞及別個馬利亞佇遐，坐佇墓的對面。
27:61 彼時，有抹大拉的馬利亞及別的馬利亞佇遐，坐佇墓的對面。
封石及設兵
27:62 隔日，就是備辦節後的一日，許個祭司頭及法利賽人聚集見彼拉多，講：
派衛兵顧墓
27:62 隔日，就是備辦日後彼日，許個祭司長及法利賽派的人做夥去見彼拉多，
27:63 「大人啊，阮記得彼個迷惑人的，活啲的時曾講：『三日後我欲復活。』
27:63 講：「大人，阮會記得彼個諞仙仔猶活啲的時曾講：『三日後，我會復活。』
27:64 所以，請你命令顧守彼個墓，到第三日，驚了伊的學生來，偷伊去，亦給百姓講：『伊對死人中復活。』按呢，就後來的差謬比代先卡利害！」
27:64 所以，請你下令嚴守墳墓到第三日，才𣍐互伊的門徒來偷提伊的身屍，煞給民眾講『伊已經對死人中復活』。若按呢，此個最後的欺騙會比頭一遍的閣較嚴重。」
27:65 彼拉多給𪜶講：「恁領兵去，照恁所知影的去顧守。」
27:65 彼拉多給𪜶講：「恁導衛兵去，盡所會嚴密顧守彼個墓。」
27:66 𪜶就去，封石及設兵，來顧守彼個墓。
27:66 𪜶就去，用封條封彼塊石頭，留衛兵佇遐顧守。
上一章 下一章 [ 條列 | 表格 | 整段 ] 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。