上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
馬太福音
榮光入耶路撒冷
21:1 ( 可 11:1-11 路 19:28-40 約 12:12-19 )
𪜶行近耶路撒冷，到伯法其及橄欖山的時。
耶穌光榮進入耶路撒冷
21:1 ( 可11:1-11 路19:28-40 約12:12-19 )
耶穌及門徒啲欲到耶路撒冷，來到橄欖山附近的伯法其。彼時伊差兩個門徒，
21:2 耶穌差二個學生，給𪜶講：「恁去對面的鄉社，連鞭會抵著一隻驢縛啲，有驢仔及伊佇啲；解開，牽伊來我遮。
21:2 給𪜶講：「恁去對面的庄社，到遐隨時會看著一隻驢縛啲，閣有一隻驢仔子及伊佇遐；恁給𪜶解開，牽來我遮。
21:3 若有人給恁講甚麼，就著講：『主欠用伊。』伊連鞭欲送伊來。
21:3 若有人對恁講什麼，恁就講：『主欲用𪜶。』彼個人會隨時准恁牽來。」
21:4 此個事成是欲應驗早託先知所講的，講：
21:4 此個代誌發生是欲應驗上帝通過先知所講的話：
21:5 著給郇的查某子講：
你的王來就近你，
溫柔，閣騎驢，
及驢所生的驢仔。」
21:5 著給錫安的婦仁人講：
看咧，恁的王欲來恁遮；
伊謙遜騎驢仔，
騎驢仔子。
21:6 學生去照耶穌所吩咐𪜶的去行，
21:6 門徒就去，照耶穌的指示去做。
21:7 牽驢及驢仔來，將家己的衫舒佇𪜶頂面，耶穌就上去騎。
21:7 𪜶牽驢仔及驢仔子來，將外衫披佇𪜶頂面，耶穌就𬦰去騎。
21:8 眾人中卡多將家己的衫舖佇路裡，有的剉樹枝舖佇路裡。
21:8 大部份的群眾將𪜶家己的外衫鋪佇路裡，嘛有人剉樹椏鋪佇路裡給伊歡迎。
21:9 前行後隨的眾人喝講：
大衛的後裔和散那！
佇主的名來的得著謳咾！
佇至高的和散那！
21:9 前行後隨的群眾喝講：
大衛的子，和散那！
奉主的名來彼位應該受稱讚！
至高的上帝，和散那！
21:10 伊入耶路撒冷，通城搖泏，講：「此個是誰？」
21:10 耶穌一下進入耶路撒冷，全城攏喊起來，講：「此個是啥人？」
21:11 眾人講：「此個是先知耶穌，對加利利的拿撒勒來的。」
21:11 眾人講：「此個是對加利利的拿撒勒來的先知耶穌。」
清潔聖殿
21:12 ( 可 11:15-19 路 19:45-48 約 2:13-22 )
耶穌入上帝的殿，趕出殿內一切買賣的人，捙倒換錢的人的桌，及賣鴿仔的人的椅，
耶穌潔淨聖殿
21:12 ( 可11:15-19 路19:45-48 約2:13-22 )
耶穌入去聖殿，將殿內所有啲買賣的人攏趕出去，閣捙倒換錢的人的桌及賣粉鳥的人的椅。
21:13 給𪜶講：「有記載講：
我的厝欲稱做祈禱的厝，
若是恁諸個互伊做賊巢。」
21:13 伊對𪜶講：「聖經有記載：
我的厝欲叫做祈禱的殿，
恁煞給伊變做土匪仔窟。」
21:14 睛瞑的、跛腳的佇殿裡就近耶穌，伊就醫好𪜶。
21:14 有盲人及腳跛的人來聖殿尋耶穌，伊就給𪜶醫好。
21:15 獨獨諸個祭司頭及經學士看見伊所行的奇事，閣看見囝仔佇殿裡喝講：「大衛的後裔和散那！」就受氣，給伊講：「𪜶啲講的，你聽見無？」
21:15 祭司長及經學教師看著耶穌所行的奇事，閣聽見細漢囝仔佇聖殿大聲喝「大衛的子，和散那」，就真受氣，
21:16 耶穌給𪜶講：「有。恁豈曾讀著彼句，講『對囝仔及食奶者的嘴，你互謳咾的話齊備』嗎？」
21:16 給耶穌講：「你有聽著𪜶啲喝什麼無？」
耶穌應講：「有。恁豈無讀著聖經的話：
你互囝仔及嬰仔的嘴大聲唱出謳咾。」
21:17 就離開𪜶，出城到伯大尼，佇遐歇暝。
21:17 後來耶穌離開𪜶，出城去伯大尼，佇遐過暝。
咒詛無花果
21:18 ( 可 11:12-14,20-24 )
隔早起倒來城裡的時，耶穌枵，
耶穌咒詛無花果樹
21:18 ( 可11:12-14，20-24 )
隔早起，欲倒去耶路撒冷的時，耶穌腹肚枵。
21:19 看見路邊一欉無花果樹，就倚近去，挽攏無，只有葉若定，就給樹講：「今了後，你永永無閣結果子。」彼欉無花果樹連鞭枯焦。
21:19 伊看著路邊有一欉無花果樹，就行倚去，拘樹頂攏無看著半項，只有葉若定。伊對彼欉樹講：「你永遠𣍐閣結果子。」彼欉無花果樹隨時焦去。
21:20 學生看了，就奇怪講：「無花果樹怎樣連鞭枯焦？」
21:20 門徒看著，真著驚，講：「此欉無花果樹哪會忽然間焦去？」
21:21 耶穌應講：「我實在給恁講，恁若有信，無僥疑，若此號行佇無花果樹的事恁會行，就若對此個山講：『著徙去，㧒落海！』亦欲成。
21:21 耶穌應講：「我實在給恁講，恁若有信心，無憢疑，若會當做我對此欉無花果樹所做的代誌，甚至命令此座山講『起來，去填海』嘛一定會實現。
21:22 閣祈禱的時，見若恁所求的，信就得著。」
21:22 祈禱的時，恁所求的一切，有信就會得著。」
質問耶穌的權柄
21:23 ( 可 11:27-33 路 20:1-8 )
耶穌入殿，教示人的時，諸個祭司頭及百姓的長老就近伊講：「你用甚麼權行諸個事？閣是誰互你此個權？」
質問耶穌的權柄
21:23 ( 可11:27-33 路20:1-8 )
耶穌入去聖殿啲教示人的時，祭司長及民間的長老來伊遐，對伊講：「你靠什麼權柄做諸個代誌？什麼人互你此個權柄？」
21:24 耶穌應講：「我亦有一句話欲問恁，恁若給我講，我才欲給恁講我用甚麼權行諸個事。
21:24 耶穌應講：「我嘛欲問恁一句話，恁若給我應，我才給恁講我靠什麼權柄做諸個代誌。
21:25 約翰的洗禮是對叨落來？是對天？抑是對人？」𪜶私奇議論講：「若講『對天』，伊欲給咱講：『按呢，恁啥事信伊？』
21:25 約翰給人洗禮的權柄對叨位來，是對天抑是對人？」
𪜶互相議論講：「咱若講『對天』，伊會給咱講『按呢，恁是按怎無信約翰？』
21:26 若講『對人』，咱又驚百姓，𪜶攏掠約翰做先知。」
21:26 咱若講『對人』，恐驚群眾反感，因為𪜶攏想講約翰是先知。」
21:27 就應耶穌講：「阮知。」伊就給𪜶講：「我亦無欲給恁講我是用甚麼權行諸個事，總是恁拍算怎樣？」
21:27 𪜶就應耶穌：「阮知。」
耶穌給𪜶講：「按呢，我嘛給恁講我靠什麼權柄做諸個代誌。」
二個子的譬喻
21:28 「人有二個子。就近彼個頭一個講：『子啊，今仔日去葡萄園做工。』
兩個子的譬喻
21:28 耶穌講：「恁想按怎？有一個人有兩個子；伊去給大子講：『子啊，你今仔日去葡萄園做工。』
21:29 應講：『我』，後來反悔，就去。
21:29 大子應講『我去』，後來改變心意有去。
21:30 閣就近第二個亦按呢講。應講：『主啊，我欲』，就竟然無去。
21:30 老父嘛去給第二子講像款的話。第二子應講『阿爸，我來去』，後來無去。
21:31 此二個叨落一個行老父的意思啊？」𪜶講：「頭一個。」耶穌給𪜶講：「我實在給恁講，諸個抽餉的及娼妓代先恁入上帝的國。
21:31 此兩個子叨一個有照老父的意思去做？」
𪜶講：「大子。」
耶穌給𪜶講：「我實在給恁講，貿稅的及娼妓會比恁先進入上帝國。
21:32 因為約翰佇義的路就近恁，恁無信伊；抽餉的及娼妓就信伊，閣恁看了亦無反悔去信伊。」
21:32 因為施洗者約翰來恁遮，指示恁行正路，恁無信伊，拘貿稅的及娼妓有信。甚至恁看著了後嘛無悔改來信伊。」
歹佃戶的譬喻
21:33 ( 可 12:1-12 路 20:9-19 )
「閣聽一個譬喻：有一個家主栽一園葡萄，用籬笆圍伊，內面開酒窟，起一個守更樓租互佃戶，就去別所在。
歹佃農的譬喻
21:33 ( 可12:1-12 路20:9-19 )
耶穌給𪜶講：「恁閣聽一個譬喻。有一個園主開墾一區葡萄園，四面圍籬笆，內面挖一個酒窟，起一個守望台，將此區園租互佃農，後來出外去真遠的所在。
21:34 收果子時欲到，就差伊的奴僕就近佃戶收伊的果子。
21:34 收成果子的時到，園主差奴僕去佃農遐，欲對𪜶收果子。
21:35 佃戶掠伊的奴僕，一個拍，一個刣，一個用石頭擲。
21:35 佃農給諸個奴僕掠起來，一個給伊拍，一個給伊刣死，一個用石頭給伊抌死。
21:36 閣差別個奴僕，比前卡多；𪜶猶原按呢款待𪜶。
21:36 園主閣差另外一寡奴僕去，比頭一遍較多人。佃農嘛照按呢對待𪜶。
21:37 後來差伊的子就近𪜶，想講：『𪜶欲尊敬我的子。』
21:37 最後，園主差家己的子去𪜶遐，想講『𪜶會尊重我的子』。
21:38 若是佃戶看見彼個子，就相及講：『此個是伊的後嗣。來，給伊刣死，通得伊的業。』
21:38 拘佃農一下看著伊的子就參詳講：『此個是伊的繼承人。來，咱來給伊刣死，通得伊的財產！』
21:39 就掠伊，捙伊出園外，害死伊。
21:39 𪜶就給伊掠起來，㧒出去葡萄園的外面，給伊刣死。
21:40 今園主若到欲怎樣來辦諸個佃戶？」
21:40 「按呢，葡萄園的主人倒來的時會按怎處理許個佃農？」
21:41 𪜶給伊講：「伊欲用惡報來滅諸個惡人，將葡萄園租別個佃戶就是照時納果子的。」
21:41 𪜶給耶穌講：「伊一定會將許個歹人徹底消滅，將葡萄園租互別的會照季節納果子租的佃農。」
21:42 耶穌對𪜶講：「經裡所記載：
師傅所棄拺的石
成做厝角頭的石。
這是主所成的
咱的目睭看做奇怪。
恁豈未讀嗎？
21:42 耶穌給𪜶講：「恁豈曾讀著聖經有記載：
起厝師傅所棄拺的石，
已經成做上重要的基石。
這是主的作為，
對咱來看實在真奇妙！
21:43 所以我給恁講，上帝的國欲對恁搶去，來賞賜結伊的果子的百姓。
21:43 「所以，我給恁講，上帝會將上帝國對恁搶起來，交互會結果子的人。
21:44 閣跋倒佇此塊石頂的，啲欲破糊糊；互此塊石壓佇伊頂面的，欲幼末末。」
21:44 彼個摔落去此塊石頭頂的人，會摔甲碎骨分屍；互彼塊石頭硩著的人，會硩甲碎糊糊。」(121.44有抄本無44節。)
21:45 諸個祭司頭及法利賽人聽見伊的譬喻，知伊所講的是指𪜶。
21:45 諸個祭司長及法利賽派的人聽著耶穌的譬喻，知影伊是啲講𪜶。
21:46 就愛欲掠伊，若是驚眾人，因為眾人掠伊做先知。
21:46 𪜶就尋孔縫欲給伊掠，拘驚群眾，因為𪜶看伊是先知。
上一章 下一章 [ 條列 | 表格 | 整段 ] 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。