上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
馬太福音
耶穌改變形狀
17:1 ( 可 9:2-13 路 9:28-36 )
過六日，耶穌另外帶彼得、雅各，及雅各的兄弟約翰，導𪜶絔上高山，
耶穌改變形像
17:1 ( 可9:2-13 路9:28-36 )
六日後，耶穌導彼得、雅各，及雅各的小弟約翰，干單𪜶家己𬦰上一座高山。
17:2 當𪜶的面前形狀變換，伊的面光映映親像日，伊的衫白親像光。
17:2 佇𪜶面前，耶穌的形像改變：伊的面親像日頭發光；伊的衫變甲親像光赫呢白。
17:3 忽然，有摩西、以利亞對𪜶顯現，及伊講話。
17:3 忽然間，摩西及以利亞對𪜶顯現，及伊講話。
17:4 彼得應耶穌講：「主啊，咱佇遮真好！你若愛，我欲佇遮搭三間寮仔，一間互你，一間互摩西，一間互以利亞。」
17:4 彼得對耶穌講：「主啊，咱佇遮真好！你若欲，我佇遮搭三間寮仔，一間互你，一間互摩西，一間互以利亞。」
17:5 伊猶啲講話的時，忽然有光光的雲罩𪜶，閣有聲對雲裡出，講：「此個是我疼的子，我所歡喜的。恁著聽伊！」
17:5 伊猶啲講的時，忽然有一片燦爛的雲給𪜶罩咧，有聲對雲出來，講：「此個是我所疼的子，伊，我真意愛，恁著聽趁伊。」
17:6 學生聽見，就仆落去，盡在驚。
17:6 門徒一下聽著就趴落去，非常驚惶。
17:7 耶穌進前，摸𪜶，講：「起來，莫得驚！」
17:7 耶穌行倚去，給𪜶摸，講：「起來，免驚！」
17:8 𪜶攑目無看見一人，只有耶穌若定。
17:8 𪜶一下攑目看，只有看著耶穌，以外無別人。
17:9 落山的時，耶穌命令𪜶講：「人子猶未對死人中復活，莫得用所看見的給人講。」
17:9 𪜶落山的時，耶穌命令𪜶講：「人子對死人中復活以前，恁通給人講起所看見的異象。」
17:10 伊的學生問伊講：「按呢就經學士講以利亞著先來，是怎樣？」
17:10 門徒問伊，講：「若按呢，是按怎經學教師講以利亞一定著先來？」
17:11 伊應講：「以利亞果然來，欲興起萬項事；
17:11 耶穌應講：「以利亞一定著來重新整理一切。
17:12 若是我給恁講，以利亞已經來，也𪜶識伊，照𪜶所愛來款待伊。親像按呢人子亦欲受𪜶的陷害。」
17:12 我給恁講，以利亞已經來啦，拘人識伊，反轉照𪜶的意思對待伊。親像按呢，人子嘛啲欲佇𪜶的手下受苦。」
17:13 學生才會曉得伊所給𪜶講的，是指行洗禮約翰。
17:13 彼時門徒才明白伊對𪜶講的是指施洗者約翰。
醫好互鬼附身的囝仔
17:14 ( 可 9:14-29 路 9:37-43 )
已經到眾人遐，有一人就近伊，跪伊，
耶穌醫好邪神附身的囝仔
17:14 ( 可9:14-29 路9:37-43 )
𪜶來到群眾遐，有一個人來，跪佇耶穌的腳前，
17:15 講：「主啊，憐憫我的子！因為伊羊眩真艱苦，沓沓跋落火，沓沓跋落水。
17:15 對伊講：「主啊，憐憫我的子！因為伊致著羊眩，非常艱苦，不時跋落火，嘛不時跋落水。
17:16 我導伊就近你的學生，𪜶𣍐會醫好伊。」
17:16 我導伊到你的門徒遐，𪜶無法度給伊醫好。」
17:17 耶穌應講：「嗐啊！信閣悖逆的世代啊，我欲及恁住偌久？我欲吞愞恁偌久？帶伊來遮就近我！」
17:17 耶穌應講：「唉啊，信閣腐敗的世代，我著及恁住偌久？我著閣忍耐恁偌久？給伊導來我遮。」
17:18 耶穌責備鬼，鬼就對伊出；對彼一時囝仔就好。
17:18 耶穌責備鬼，鬼就對囝仔出去；伊的病隨時好去。
17:19 彼時學生暗靜就近耶穌，講：「阮怎樣𣍐趕伊？」
17:19 後來，門徒私下來問耶穌：「是按怎阮無法度給鬼趕出去？」
17:20 伊給𪜶講：「是為著恁的小信。我實在給恁講，恁若有信，親像一粒芥菜子，恁就欲給此個山講：『對遮徙去遐亦欲徙去；閣恁啲欲無一項𣍐。』」
17:20 耶穌給𪜶講：「是因為恁小信。我實在給恁講，恁的信心若有芥菜籽赫大，恁對此座山講『對遮徙去遐』，山嘛會徙去；無一項事恁做𣍐到。」(117.20有的抄本有21節「此款鬼，若無用祈禱及禁食𣍐當趕伊出去。」*)
耶穌第二擺預言受害死及復活
17:22 ( 可 9:30-32 路 9:43-45 )
𪜶猶住加利利的時，耶穌給學生講：「人子欲受送交佇人的手。
耶穌閣預告家己的死及復活
17:22 ( 可9:30-32 路9:43-45 )
門徒聚集佇加利利的時，耶穌給𪜶講：「人子啲欲互人出賣。
17:23 𪜶欲刣伊，第三日復活。」學生真憂悶。
17:23 𪜶會給伊害死，第三日上帝會互伊復活。」門徒就非常傷心。
納丁稅
17:24 𪜶到迦百農，有收丁稅的就近彼得，講：「恁先生豈無納丁稅嗎？」
納聖殿稅
17:24 耶穌及門徒來到迦百農的時，有一寡收聖殿稅的人去問彼得：「恁老師有納聖殿稅無？」
17:25 伊講：「有。」已經入厝，耶穌代先給伊講：「西門啊，你拍算怎樣？世上諸個王對是誰收餉及抽丁稅？是對家己的子兒？抑是對外面人啊？」
17:25 伊講：「有。」
彼得入去厝內的時，耶穌先問伊講：「地上的君王是對什麼人收關稅抑是人頭稅？是對本國人抑是外國人？西門，你想按怎？」
17:26 伊一下講：「對外面人。」耶穌就給伊講：「若是按呢，就子兒通免。
17:26 彼得應講：「對外國人。」
耶穌給伊講：「按呢，本國人就免納稅囉。
17:27 總是免致塞礙𪜶，你去海裡放釣，掠代先上釣的魚，開伊的嘴，欲得著銀一個，提來，為著我及你納互𪜶。」
17:27 不過，咱為著無愛得罪諸個人，你去湖裡釣魚，釣起來的頭一尾，給魚的嘴擘開就會看著一個銀仔，提去互𪜶，替我及你納聖殿稅。」
上一章 下一章 [ 條列 | 表格 | 整段 ] 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。