上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
馬太福音
行洗禮約翰的死
14:1 ( 可 6:14-29 路 9:7-9 )
當彼時，分封的人君希律聽見耶穌的名聲，
施洗者約翰的死
14:1 ( 可6:14-29 路9:7-9 )
彼時，加利利分封的王希律聽著耶穌的名聲，
14:2 就給伊的差用講：「此個就是行洗禮的約翰，伊是對死人中復活，所以有諸個權能對伊顯出。」
14:2 就對伊的部下講：「此個人是施洗者約翰，伊已經對死人中復活，所以才有權能行諸個神跡。」
14:3 因為前，希律為著伊的兄弟腓力的某希羅底的緣故，有掠約翰縛伊，關落監。
14:3 原來，希律為著伊的小弟腓力的某希羅底的緣故有掠約翰，給伊鍊起來，關落監。
14:4 因為約翰曾給伊講：「你接納此個婦仁人是不法。」
14:4 因為約翰定定對伊講：「你娶此個婦仁人做某無合法。」
14:5 希律愛刣伊，獨獨驚百姓，因為𪜶掠約翰做先知。
14:5 希律想欲給伊刣，不過驚群眾，因為𪜶攏想講伊是先知。
14:6 抵著希律做生日，希羅底的查某子跳舞佇𪜶中間，來互希律歡喜。
14:6 希律作生日的時，希羅底的查某子佇來賓面前跳舞；希律真歡喜，
14:7 對按呢咒誓，允欲照伊所愛求的攏互伊。
14:7 就宣誓答應彼個查某囝仔無論求什麼攏欲互伊。
14:8 伊互𪜶老母使唆，就講：「將行洗禮約翰的頭殼貯佇盤裡，就遮互我。」
14:8 查某囝仔互老母使弄，就講：「請將施洗者約翰的頭殼囥佇盤裡互我。」
14:9 王真憂悶，總是為著所咒的誓，閣有同桌的人佇啲，就命令互伊；
14:9 王的心真艱苦，不過因為已經佇貴賓的面前宣誓，就命令照所求的互伊。
14:10 差人去監裡刣約翰。
14:10 王差人去監裡斬約翰的頭，
14:11 將伊的頭殼貯佇盤裡，來互查某囝仔；伊就捧去互伊的老母。
14:11 將頭殼下佇盤裡，交互查某囝仔，查某囝仔就捧去互伊的老母。
14:12 伊的學生來，收伊的身屍去埋葬，就去給耶穌講。
14:12 約翰的門徒來收伊的身屍去埋葬，然後去給耶穌報告。
耶穌互五千人食飽
14:13 ( 可 6:30-44 路 9:10-17 約 6:1-14 )
耶穌聽見，就上船對遐退去曠野，家己住。眾人聽見，就對諸個城步行隨伊。
耶穌互五千人食飽
14:13 ( 可6:30-44 路9:10-17 約6:1-14 )
耶穌聽著此個消息就離開遐，干單家己坐船退去偏僻無人住的所在。一大陣人聽著就對逐城市行路隨伊。
14:14 伊出去，看見歸大陣的人，就憐憫𪜶，醫好𪜶中間有病的。
14:14 耶穌上岸，看著一大陣人就可憐𪜶，醫好𪜶的病。
14:15 日晚晡，學生就近伊，講：「遮是曠野，閣時已經過，著互眾人四散，通去鄉社買食。」
14:15 黃昏暗，門徒倚來給伊講：「遮是偏僻的所在，天嘛啲暗啊；請給群眾解散，互𪜶通家己去附近的庄社買食物。」
14:16 耶穌給𪜶講：「𪜶免去，恁互𪜶食！」
14:16 耶穌應講：「𪜶免去，恁互𪜶食。」
14:17 𪜶給伊講：「阮佇遮只有五個餅，二尾魚。」
14:17 門徒對伊講：「咱遮只有五個餅，兩尾魚。」
14:18 伊講：「提來互我。」
14:18 耶穌講：「提來遮互我。」
14:19 就吩咐眾人坐佇草埔，就提彼五個餅，二尾魚，向天來祝謝，擘餅互學生，學生互眾人。
14:19 伊就叫眾人坐佇草埔，然後提彼五個餅及兩尾魚，向天感謝；餅擘開，提互門徒，門徒就分互眾人。
14:20 攏食到飽，拾所剩的屑仔，滿十二筐。
14:20 大家攏食，食到飽。門徒拾食賰的碎屑仔，滿十二籃。
14:21 食的人，婦仁人囝仔以外，約略五千。
14:21 食的人，婦仁人及囝仔無算，約有五千個查甫人。
耶穌行海面
14:22 ( 可 6:45-52 約 6:15-21 )
伊隨時迫學生上船，代先過去彼旁，聽候伊四散眾人。
耶穌佇湖的頂面行
14:22 ( 可6:45-52 約6:16-21 )
耶穌隨時迫門徒上船先過去對面岸，伊家己留啲解散群眾。
14:23 四散眾人了後，就家己上山祈禱。已經暗，只有伊家己佇遐。
14:23 群眾四散了後，伊家己上山祈禱。天暗的時，伊猶家己一個佇遐。
14:24 彼時船佇海中，互湧搖泏，因為是對頭風。
14:24 彼時，船已經離岸真遠，因為搢風互湧撥來撥去。
14:25 暝時四更，耶穌對海面行，就近𪜶。
14:25 天欲光的時，耶穌佇湖的頂面向門徒遐行去。
14:26 學生看見伊行佇海面，就生驚，講：「是怪物！」因為驚，就喉叫。
14:26 門徒看著伊佇湖的頂面啲行，真著驚，講：「是鬼！」𪜶驚甲大聲喝出來。
14:27 耶穌連鞭及𪜶講話，講：「安恁的心，是我，免驚！」
14:27 耶穌隨時給𪜶講：「安心，是我，免驚！」
14:28 彼得應伊講：「主啊！果然是你，就命令我行水面就近你。」
14:28 彼得應講：「主啊，若真正是你，命令我行水面去你遐。」
14:29 伊講：「來。」彼得就對船裡落去，行水面，欲就近耶穌；
14:29 耶穌講：「來！」彼得就對船頂落來，行水面去耶穌遐。
14:30 總是看見風，就驚，啲欲沈落去，就喉叫講：「主啊，救我！」
14:30 伊一下看著風赫呢大就驚，煞欲沉落去，大聲喝：「主啊，救咧噢！」
14:31 耶穌隨時伸手牽伊，講：「小信的人，啥事僥疑？」
14:31 耶穌隨時伸手給伊扭啲，講：「小信的人，是按怎啲憢疑？」
14:32 𪜶上船，風就定。
14:32 𪜶上船，風就恬去。
14:33 船裡的人拜伊，講：「你真正是上帝的子。」
14:33 船頂的人跪落去拜伊，講：「你真正是上帝的子！」
醫好革尼撒勒的病人
14:34 ( 可 6:53-56 )
已經過去，就到革尼撒勒地。
耶穌醫好革尼撒勒的病人
14:34 ( 可6:53-56 )
耶穌及門徒過湖了後，佇革尼撒勒上岸。
14:35 彼位的人識伊，差人去四方，導一切有病的來就近伊，
14:35 彼所在的人一下認出耶穌，就派人去四周圍給所有病人攏導來伊遐。
14:36 求伊若使互𪜶摸伊的衫仔裾的鬚；見若摸的人齊全好。
14:36 𪜶懇求耶穌互病人干單摸伊衫仔裾的鬚就好；所有摸著的人攏得著醫好。
上一章 下一章 [ 條列 | 表格 | 整段 ] 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。