上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
馬太福音
安息日的問題
12:1 ( 可 2:23-28 路 6:1-5 )
當彼時，耶穌佇安息日對麥園經過。伊的學生枵，就摘麥穗來食。
安息日的問題
12:1 ( 可2:23-28 路6:1-5 )
過無偌久，佇安息日耶穌對麥園經過。伊的門徒腹肚枵，就摘麥穗來食。
12:2 若是法利賽人看見，就給伊講：「你看，你的學生行安息日所應該行的事！」
12:2 法利賽派的人看著，對耶穌講：「你看，你的門徒佇安息日做𣍐用得做的代誌。」
12:3 耶穌就給𪜶講：「大衛及跟隨的人枵的時所行的，恁無讀著嗎？
12:3 耶穌給𪜶講：「恁豈無讀著大衛及隨伊的人腹肚枵的時所做的代誌？
12:4 就是伊入上帝的厝，食排列的餅，這是伊及跟隨的人所通食的，獨獨祭司通若定。
12:4 伊入去上帝的殿食獻祭的餅，此款餅只有祭司才通食，伊及隨伊的人攏𣍐用得食。
12:5 抑是，恁亦曾讀律法所記載，當安息日，祭司佇殿裡犯著安息亦是無罪嗎？
12:5 另外，恁豈無讀著律法的記載，就是安息日祭司佇聖殿犯著安息日的規矩嘛算無罪。
12:6 獨獨我給恁講，佇遮有比殿卡大的。
12:6 我給恁講，佇遮有一個比聖殿較重要的。
12:7 總是恁若知，『我愛憐憫，無愛祭祀。』此句的意義，就無責罪無罪的人。
12:7 聖經有講：『我愛憐憫，無愛祭物。』恁若了解此句話的意思，就𣍐給無罪的人定罪。
12:8 因為人子是安息日的主。」
12:8 因為人子是安息日的主。」
醫好一手枯焦的人
12:9 ( 可 3:1-6 路 6:6-11 )
耶穌離開遐，入𪜶的會堂。抵當有人一手枯焦。
耶穌醫好手瘸去的人
12:9 ( 可3:1-6 路6:6-11 )
耶穌離開彼所在，入去𪜶的會堂。
12:10 人問伊講：「安息日行醫通嗎？」意思愛欲告伊。
12:10 抵好有一個一支手瘸去的人佇遐。有一寡人想欲控告耶穌，就問伊講：「佇安息日醫病有合律法無？」
12:11 伊就給𪜶講：「恁中間甚麼人有一隻羊，若佇安息日跋落坑，無給伊掠起來嗎？
12:11 耶穌應講：「恁中間有人有一隻羊，抵好佇安息日跋落窟仔，伊豈𣍐給伊扭起來？
12:12 何況人比羊加偌貴氣啊！所以，安息日行好事是通。」
12:12 人比羊加偌仔呢貴重！所以，佇安息日做好事有合律法。」
12:13 就給彼人講：「伸你的手！」伊就伸，隨時好好，親像別支手。
12:13 耶穌就給彼個人講：「手伸出來！」
此個人手伸出來，就復原，完全好去，及另外彼支手仝款。
12:14 法利賽人出去，相及計謀攻擊耶穌，看通怎樣滅伊。
12:14 法利賽派的人出去，就計謀欲對付耶穌，看欲按怎給伊害死。
上帝所揀選的奴僕
12:15 耶穌知，就退去，離開遐，有多多人隨伊。就攏給𪜶醫；
上帝揀選的奴僕
12:15 耶穌知影𪜶的計謀就離開遐；有真多人隨伊去，伊就醫好𪜶中間所有的病人。
12:16 亦警戒𪜶，莫得將伊報揚。
12:16 伊命令𪜶通對人傳揚伊的代誌。
12:17 是欲應驗託先知以賽亞所講的，講：
12:17 這是欲應驗通過先知以賽亞所講的話：
12:18 你看，我的奴僕，
我所揀的、我所疼的、我的心所歡喜的，
我欲將我的神付互伊；
伊欲用判斷通知外邦。
12:18 恁看，我所揀選的奴僕，
我所疼，所意愛的。
我欲賜我的神互伊；
伊欲對萬民宣告我的公義。
12:19 伊無欲相爭，無欲喧嚷；
佇街市無人聽見伊的聲。
12:19 伊𣍐爭辯，𣍐喧嚷；
佇街路無人會聽著伊的聲。
12:20 受傷的蘆竹，伊無欲遏折；
欲熄的火星，伊無拍熄；
到互公義會得勝。
12:20 受傷的蘆葦，伊𣍐遏斷；
欲化的燈火，伊𣍐歕熄，
直到伊互公義得勝。
12:21 外邦亦欲靠伊的名來向望。
12:21 萬民攏會將向望交託伊。
耶穌及別西卜
12:22 ( 可 3:20-30 路 11:14-23 )
彼時，有導一個患著鬼、睛瞑掛啞口者來就近伊，伊就醫好伊，互啞口者講話，續會看見。
耶穌及別西卜
12:22 ( 可3:20-30 路11:14-23 12:10 )
彼時，有人導一個互鬼附身，失明閣𣍐講話的人來耶穌遐；耶穌給伊醫好，彼個𣍐講話的人就會講話，閣會看見。
12:23 眾人攏卬愕，講：「此個總無是大衛的後裔哦？」
12:23 群眾攏真著驚，講：「此個人敢是大衛的子乎？」
12:24 若是法利賽人聽見，就講：「此人趕鬼無是靠鬼王別西卜。」
12:24 法利賽派的人聽著就講：「此個人是靠鬼王別西卜啲趕鬼。」
12:25 耶穌知𪜶的意思，就給𪜶講：「見若國，家己爭拼，會致到拋荒；見若城抑是家家己爭拼，的確徛𣍐住；
12:25 耶穌知影𪜶的心思就給𪜶講：「國家家己紛爭，會荒廢；城市抑是家庭家己紛爭，徛𣍐牢。
12:26 若撒但趕撒但，是家己爭拼，伊的國豈可徛會住？
12:26 撒旦若趕撒旦，是家己紛爭，伊的國欲哪徛會牢？
12:27 設使我靠別西卜趕鬼，就恁的子弟趕鬼倚靠是誰啊？按呢，𪜶欲擬斷恁。
12:27 我若靠別西卜趕鬼，恁的子弟是靠什麼人趕鬼？按呢，恁家己的子弟會給恁判罪。
12:28 獨獨我若靠上帝的神趕鬼，就上帝的國已經到恁啦。
12:28 不過我若是靠上帝的神趕鬼，上帝的主權就已經佇恁中間實現啦。
12:29 人怎樣會入猛人的厝，劫伊的家伙？豈著代先縛猛人，然後劫伊的厝嗎？
12:29 「人按怎才會當入去勇士的厝搶伊的財物，豈是著先給伊縛起來？
12:30 無同我的，就是對敵我；無及我收拾的，就是啲拍散。」
12:30 「無為我的就是反對我；無及我做夥收集的就是啲拍散。
12:31 所以我給恁講：「見若罪惡謗瀆攏欲赦免伊，獨獨謗瀆聖神的，無欲赦免伊。
12:31 所以，我給恁講，人一切的罪及誹謗攏會得著赦免，拘褻瀆聖神𣍐得著赦免。
12:32 見若講話攻擊人子的，欲赦免伊；獨獨見若講話攻擊聖神的，不論今世來世，無欲赦免伊。」
12:32 無論什麼人講話攻擊人子，會得著赦免，拘無論什麼人講話攻擊聖神，佇現在及將來攏𣍐得著赦免。」
樹及果子
12:33 ( 路 6:43-45 )
「恁著掠彼個樹做好，伊的果子亦做好；或是掠彼個樹做歹，伊的果子亦做歹；因為對果子來識樹。
樹及果子
12:33 ( 路6:43-45 )
「好樹結好果子；歹樹結歹果子；對所結的果子通知樹的好歹。
12:34 毒蛇的類啊！恁已經是歹，豈會講好話？因為是對心所充滿的，嘴就講出。
12:34 恁諸個毒蛇，恁本來是歹的，欲哪會講好話？因為人心內充滿什麼，嘴就講什麼。
12:35 好人對所積聚的好，來發出諸個好；歹人對所積聚的歹，來發出諸個歹。
12:35 好人對所積聚的好發出好；歹人對所積聚的歹發出歹。
12:36 我給恁講，見若人所講的閒仔話，𪜶佇審判日，逐句著訴明；
12:36 「我給恁講，人所講一切的閒仔話，佇審判的日逐句攏著負責。
12:37 因為對你的話欲稱你做義，亦對你的話欲擬你有罪。」
12:37 因為上帝欲用你的話來判你無罪，嘛欲用你的話來定你有罪。」
欲求神蹟
12:38 ( 可 8:11-12 路 11:29-32 )
彼時，有經學士及法利賽幾若人應伊講：「先生啊，阮愛對你看一個神蹟。」
要求神跡
12:38 ( 可8:11-12 路11:29-32 )
彼時，有幾若個經學教師及法利賽派的人對耶穌講：「老師，阮愛你行一個神跡互阮看。」
12:39 若是伊應講：「惡毒姦淫的世代求神蹟，除先知約拿的神蹟以外，無欲神蹟互𪜶。
12:39 耶穌應講：「邪惡姦淫的世代要求神跡，拘先知約拿的神跡以外，𣍐閣有神跡互𪜶。
12:40 因為親像約拿三日三暝佇大魚的腹肚內，人子亦欲按呢三日三暝佇地內。
12:40 親像約拿三暝三日佇大魚的腹肚內，人子嘛會三暝三日佇地深的所在。
12:41 尼尼微人當審判的時，欲及此世代的人相及起來，續擬𪜶的罪，因為𪜶對約拿所傳來反悔。何況佇遮有比約拿卡大的！
12:41 佇審判的時，尼尼微人會及此世代的人做夥起來，給此世代的人定罪，因為尼尼微人聽著約拿的傳道了後攏有悔改。恁看，有比約拿閣較偉大的佇遮！
12:42 南方的女王當審判的時，欲及此世代的人相及起來，續擬𪜶的罪；因為伊對地的極頭來，欲聽所羅門智識的話。何況佇遮有比所羅門卡大的！」
12:42 佇審判的時，南方的女王會及此世代的人做夥起來，給此世代的人定罪，因為伊有對地的極頭來聽所羅門智慧的話。恁看，有比所羅門閣較偉大的佇遮！」
邪神倒來
12:43 ( 路 11:24-26 )
「邪神已經離開人，經過無水的地，求安息，亦無得著。
邪神倒轉去
12:43 ( 路11:24-26 )
「邪神離開所附身的人了後，佇無水的地區行透透，欲尋一個歇睏的所在，尋攏無，
12:44 就講：『我欲倒去所出來的厝。』到地，就看見空空，傾掃，修整，就去，閣帶七個神比家己卡歹的，入去徛起，
12:44 就講：『我欲轉去我出來彼間厝。』伊轉去，看著厝空空，掃甲真清氣，閣整理好勢。
12:45 彼人路尾的景況比起頭的卡慘。此個歹的世代亦欲親像按呢。」
12:45 後來，伊去導七個比伊較歹的邪神及伊做夥來，入去遐住。按呢，彼個人的結局比起頭閣較慘。此個邪惡的世代嘛會親像按呢。」
耶穌的老母及兄弟
12:46 ( 可 3:31-35 路 8:19-21 )
伊猶對眾人講話的時，抵當伊的老母及伊的兄弟徛佇外面，愛欲及伊講話。
耶穌的老母及兄弟
12:46 ( 可3:31-35 路8:19-21 )
耶穌猶啲對眾人講話的時，伊的老母及兄弟來徛佇外面，愛欲及伊講話。
12:47 有人給伊講：「你看，你的老母及你的兄弟徛佇外面，愛欲及你講話。」
12:47 有人給耶穌講：「你看，你的老母及兄弟徛佇外面，愛欲及你講話。」
12:48 就應彼個給伊講的講：「甚麼人是我的老母？甚麼人是我的兄弟啊？」
12:48 耶穌給彼個人講：「什麼人是我的老母？什麼人是我的兄弟？」
12:49 就伸手指伊的學生，講：「你看，我的老母及我的兄弟。
12:49 然後伊伸手指伊的門徒講：「恁看，我的老母，我的兄弟！
12:50 因為見若行我佇天裡的父的旨意的，就是我的兄弟姊妹及老母。」
12:50 實行我天父旨意的人就是我的兄弟、姊妹，及老母。」
上一章 下一章 [ 條列 | 表格 | 整段 ] 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。