| 章節 | 台語漢字本聖經 請按此下載安裝Open Han 2024版字型，免得漏掉造字 | 現代台語漢字2013版經文 |
| 8:1 | 清氣癩𰣻的人 ( 可 1:40-45 路 5:12-16 ) 耶穌已經落山，歸大陣的人隨伊。 | 耶穌醫好痲瘋病人 ( 可1:40-45 路5:12-16 ) 耶穌對山頂落來的時，有歸大陣的人隨伊。 |
| 8:2 | 抵當有一個癩𰣻的就近來拜伊，講：「主啊，你若肯，就會互我清氣。」 | 抵彼時，有一個痲瘋病人行倚來，跪落去伊的面前，講：「主啊，你若肯，會當互我清氣。」 |
| 8:3 | 伊就伸手摸伊，講：「我肯，你通清氣！」伊的癩𰣻連鞭清氣。 | 耶穌伸手給伊摸，講：「我肯，互你清氣！」伊的痲瘋病隨時清氣。 |
| 8:4 | 耶穌閣給伊講：「謹慎莫得給人講，獨獨去將本身互祭司驗，亦著獻摩西所吩咐的禮物，來做證據佇人。」 | 耶穌給伊講：「著注意，攏通給人講。不過著去互祭司驗，閣照摩西的規定獻禮物，通對眾人證明。」 |
| 8:5 | 醫好百總的奴僕 ( 路 7:1-10 ) 已經入迦百農，有百總就近伊，來求伊講： | 耶穌醫好軍官的奴僕 ( 路7:1-10 ) 耶穌入去迦百農的時，有一個羅馬軍官行倚來給伊懇求， |
| 8:6 | 「主啊，我的奴僕半𤻄，倒佇厝內艱苦到極。」 | 講：「主啊，我的奴僕半身不遂倒佇厝內，非常艱苦。」 |
| 8:7 | 伊就給伊講：「我來去醫伊。」 | 耶穌給伊講：「我來去給伊醫治。」 |
| 8:8 | 百總應講：「主啊，你到我兜，我當𣍐起；你干單講一句話，我的奴僕就會好。 | 軍官應講：「主啊，你來阮兜，我𣍐堪得。你干單講一句話，我的奴僕就會好。 |
| 8:9 | 因為我亦是互人管的人，也有兵互我管；給此個講：『去！』伊就去；給彼個講：『來！』伊就來；給我的奴僕講：『行按呢！』伊就行按呢。」 | 因為我是互人管的人，嘛有兵互我管。我給此個講『去』，伊就去；給別的講『來』，伊就來；給我的奴僕講『你做此個』，伊就去做。」 |
| 8:10 | 耶穌聽見就奇怪，給隨伊的人講：「我實在給恁講，親像此號的深信，連以色列中，我未曾抵著。 | 耶穌聽了感覺真意外，就對許個隨伊的人講：「我實在給恁講，連佇以色列人的中間，我都猶曾看著此款的信心。 |
| 8:11 | 我閣給恁講，對東對西，有多多人欲到，及亞伯拉罕、以撒、雅各坐桌佇天國； | 我給恁講，有真多人會對東對西來及亞伯拉罕、以撒、雅各佇天國坐桌。 |
| 8:12 | 若是國的子民欲抵著趕出佇外面的黑暗，佇遐欲有啼哭咬牙切齒。」 | 不過許個本來是天國的子兒的，反轉會受趕出去外面烏暗的所在，佇遐啼哭，咬牙切齒。」 |
| 8:13 | 耶穌就給百總講：「去啊！照你的信，給你成。」抵抵彼時，伊的奴僕就好。 | 然後耶穌對彼個軍官講：「你去，互你所信的實現！」 抵抵彼時，奴僕的病就好去。 |
| 8:14 | 醫好多多破病人 ( 可 1:29-34 路 4:38-41 ) 耶穌入彼得的家，看見伊的丈姆患著熱病倒啲。 | 耶穌醫好真多病人 ( 可1:29-34 路4:38-41 ) 耶穌入去彼得𪜶兜，看著伊的丈姆發熱，倒佇眠床。 |
| 8:15 | 就摸伊的手，熱就退；婦仁人就起來伺候伊。 | 耶穌摸伊的手，熱退去，伊就起來伺候伊。 |
| 8:16 | 到黃昏暗，有人導多多患著鬼者就近伊，伊用一句話趕出許個神，閣醫好一切有病的人。 | 黃昏的時，有一寡人導真多互邪神附身的人來耶穌遐。伊用一句話就給邪神攏趕出去，閣醫好所有的病人。 |
| 8:17 | 就是欲應驗先知以賽亞所講的，講：
伊本身替受咱的軟弱， 擔當咱的病症。 | 這是欲應驗通過先知以賽亞所講的話：
伊承受咱的軟弱， 擔當咱的病疼。 |
| 8:18 | 欲跟隨耶穌的人 ( 路 9:57-62 ) 耶穌看見歸大陣的人圍伊，就吩咐過去彼旁岸。 | 欲隨耶穌的人 ( 路9:57-62 ) 耶穌看著一大陣人圍佇伊周圍，就吩咐門徒過去湖的彼旁岸。 |
| 8:19 | 有一個經學士來，給伊講：「先生啊，你無論叨落去，我欲隨你。」 | 有一個經學教師行倚來給伊講：「老師，你無論去叨位，我攏欲隨你。」 |
| 8:20 | 耶穌就給伊講：「狐狸有孔，天中的飛鳥有巢，獨獨人子無靠頭殼的所在。」 | 耶穌應講：「狐狸有空，空中的鳥有巢，不過人子連靠頭殼的所在都無。」 |
| 8:21 | 閣一個學生給伊講：「主啊，互我先倒去埋葬我的老父。」 | 另外一個門徒給伊講：「主啊，互我先轉去埋葬我的老父。」 |
| 8:22 | 獨獨耶穌給伊講：「你隨我；出在死人去埋葬𪜶的死人！」 | 耶穌應講：「來隨我，互死人去埋葬𪜶家己的死人！」 |
| 8:23 | 平定風及海 ( 可 4:35-41 路 8:22-25 ) 已經落船，伊的學生隨伊。 | 耶穌平靜風湧 ( 可4:35-41 路8:22-25 ) 耶穌上船，伊的門徒隨伊去。 |
| 8:24 | 忽然海裡起大風湧，致到船互湧蓋；若是耶穌啲睏。 | 忽然，湖起大風湧，船煞互湧蓋甲欲沉落去，拘耶穌啲睏。 |
| 8:25 | 學生就近來叫伊起來，講：「主啊，救哦，欲無命啦！」 | 門徒去給伊叫醒，講：「主啊，救咧噢，咱啲欲無命囉！」 |
| 8:26 | 伊就給𪜶講：「小信的人啊，怎樣許無膽？」就起來，責備風及海，就大平定。 | 耶穌對𪜶講：「小信的人，恁哪即無膽？」伊就起來，責備風及湧，湖就靜靜靜。 |
| 8:27 | 許個人奇怪，講：「此個是甚麼號人？風及海亦順伊！」 | 許個人著驚講：「此個是什麼款人，連風及湧都順服！」 |
| 8:28 | 醫好加大拉患著鬼的 ( 可 5:1-20 路 8:26-39 ) 已經過去彼旁岸，到加大拉人的地，有患著鬼者，二人，對塚墓出來抵著伊，勢面雄介介，致到無人敢對彼條路過。 | 兩個互鬼附身的人 ( 可5:1-20 路8:26-39 ) 耶穌過去湖的彼旁岸，到加大拉人的地區，有兩個互鬼附身的人對墓仔埔出來，抵著伊。𪜶兇介介，所以無人敢對彼條路經過。 |
| 8:29 | 𪜶忽然喉叫講：「上帝的子啊，阮及你有甚麼干涉？時未到，你來遮是欲苦楚阮嗎？」 | 𪜶忽然大聲喝：「上帝的子，你插阮！時猶未到，你就來欲給阮苦楚是無？」 |
| 8:30 | 離𪜶遠遠，有大群的豬啲討食。 | 彼時，離𪜶有赫遠啊的所在，有一大群豬啲討食。 |
| 8:31 | 許個鬼求伊，講：「你若趕阮，就差阮入豬群！」 | 鬼求耶穌講：「你若欲給阮趕出去，著差阮進入彼群豬。」 |
| 8:32 | 伊就給𪜶講：「去啊！」鬼就出來，去入豬。忽然全群𧽵落山崁，入海死佇水裡。 | 耶穌給𪜶講：「恁去！」鬼就出去，進入豬群；忽然歸群豬攏對山坪闖落去湖裡，死佇水內。 |
| 8:33 | 顧豬者走去入城；將諸個事以及患著鬼的人所抵著的攏給人講。 | 飼豬的人就逃走，走入去城內，將一切所發生以及互鬼附身的人所抵著的代誌攏報人知。 |
| 8:34 | 通城的人出去尋著耶穌，已經見著，就求伊離開𪜶的地界。 | 全城的人攏出來欲看耶穌；𪜶一下看著伊，就懇求伊離開𪜶的地區。 |