上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
馬太福音
耶穌受試探
4:1 ( 可 1:12-13 路 4:1-13 )
彼時，耶穌互聖神導到曠野，欲受魔鬼試。
耶穌受試探
4:1 ( 可1:12-13 路4:1-13 )
後來，耶穌互聖神導去曠野，佇遐受魔鬼試探。
4:2 已經禁食四十日暝，後來就枵。
4:2 耶穌禁食四十暝日，後來就枵。
4:3 試者倚來，給伊講：「你若是上帝的子，就教諸個石變做餅。」
4:3 試探者倚來對伊講：「既然你是上帝的子，命令諸個石頭變做餅！」
4:4 若是伊應講：「有記載講：
人的活，若倚靠餅，
就是倚靠對上帝的嘴所出攏總的話。」
4:4 耶穌應講：「聖經有記載：
人啲活若倚靠餅，
是倚靠對上帝的嘴所出逐句話。」
4:5 魔鬼就導伊到聖城，互伊徛佇殿的尾溜，
4:5 然後，魔鬼導耶穌入去聖殿，互伊徛佇聖殿厝頂上高的所在，
4:6 給伊講：「你若是上帝的子，著家己趒落去，因為有記載講：
伊欲為著你命令伊的天使，
𪜶欲用手扶你，
免得你的腳觸著石。」
4:6 對伊講：「既然你是上帝的子，跳落去！因為聖經有記載：
上帝會為著你命令伊的天使，
𪜶會用手扶你，
互你的腳𣍐磕著石頭。」
4:7 耶穌給伊講：「閣有記載講：『莫得試主──你的上帝。』」
4:7 耶穌應講：「聖經閣有記載：
通試探主—你的上帝。」
4:8 魔鬼閣導伊上極高的山，用天下萬國及𪜶的榮光互伊看，
4:8 魔鬼閣導耶穌上一個真高的山，將世上萬國及𪜶的榮華互伊看，
4:9 給伊講：「你若仆落拜我，諸個我攏互你。」
4:9 對伊講：「你若仆落來拜我，諸個一切我攏互你。」
4:10 耶穌就給伊講：「撒但，退去！因為有記載講：
著拜主──你的上帝，
獨獨服事伊若定。」
4:10 耶穌應講：「撒旦，走！聖經有記載：
著拜主—你的上帝，
只有服事伊。」
4:11 對按呢，魔鬼離開伊，有天使到來伺候伊。
4:11 然後魔鬼離開耶穌；有天使來給伊伺候。
開始佇加利利傳道
4:12 ( 可 1:14-15 路 4:14-15 )
耶穌聽見約翰關監，就退去加利利；
耶穌佇加利利開始傳道
4:12 ( 可1:14-15 路4:14-15 )
耶穌聽著約翰互人掠去就退去加利利。
4:13 離開拿撒勒，去迦百農徛起。此所在佇海邊，佇西布倫及拉大利的交界。
4:13 伊離開拿撒勒去住佇西布倫及拿弗他利地區，加利利湖邊的迦百農。
4:14 是欲應驗早託先知以賽亞所講的，
4:14 這是欲應驗通過先知以賽亞所講的話：
4:15 講：
西布倫的地，拉大利的地，
沿海墘的路，約但的河外，
外邦的加利利──
4:15 西布倫的地，拿弗他利的地，
沿海的路，約旦河東岸，
外邦人的加利利，
4:16 坐佇黑暗的百姓曾看見大光；
坐佇死蔭的地的有光起來照𪜶。
4:16 𫢶佇烏暗中的人有看見大光；
𫢶佇死蔭的地的有光照𪜶。
4:17 對彼時，耶穌起頭宣傳，講：「恁著反悔，因為天國近啦！」
4:17 對彼時，耶穌開始宣揚講：「著悔改，因為天國啲欲實現啦！」
呼召四個討漁人
4:18 ( 可 1:16-20 路 5:1-11 )
耶穌行佇加利利的海墘，看見二個兄弟仔，就是西門叫做彼得及伊的兄弟安得烈，拋網佇海裡；因為是討魚人。
耶穌呼召四個掠魚的
4:18 ( 可1:16-20 路5:1-11 )
耶穌佇加利利湖邊啲行的時，看著兩個兄弟，叫做彼得的西門及伊的小弟安得烈，佇湖裡啲拋網，因為𪜶是掠魚的。
4:19 伊就給𪜶講：「來隨我，我欲互恁得著人親像討魚的。」
4:19 伊對𪜶講：「來隨我，我欲互恁得著人親像掠魚的得著魚。」
4:20 𪜶連鞭離開網，來隨伊。
4:20 𪜶隨時給網放咧，去隨耶穌。
4:21 對遮進前，閣看見二個兄弟仔，就是西庇太的子雅各及伊的兄弟約翰，及𪜶老父西庇太佇船裡啲補網，耶穌招𪜶，
4:21 耶穌行進前，看著另外兩個兄弟，西庇太的子雅各及伊的小弟約翰。𪜶及老父西庇太佇船頂啲整理網，伊就呼召𪜶。
4:22 𪜶連鞭離開船，拜別𪜶的老父，來隨伊。
4:22 𪜶隨時將船及老父放咧，去隨耶穌。
耶穌向大陣的群眾傳道
4:23 ( 路 6:17-19 )
耶穌遍行加利利，佇𪜶的會堂教示，宣傳天國的福音，醫好百姓間逐樣的症頭及逐樣的病疼。
耶穌佇加利利傳道
4:23 ( 路6:17-19 )
耶穌到加利利逐所在，佇𪜶的會堂教示人，傳天國的福音，醫好民間逐款的病症。
4:24 伊的名聲報揚到通敘利亞。凡有致病的，抵著多多樣的症頭及痛疼的、患著鬼的、羊眩的、半𤻄的，導𪜶攏來就近伊，伊就醫好𪜶。
4:24 伊的名聲傳到敘利亞的逐所在。人將所有的病人，就是邪神附身、羊眩，及半身不遂等，患著逐款症頭及病疼的人攏導來伊遐，伊就給𪜶醫好。
4:25 彼時，對加利利、低加波里、耶路撒冷、猶太，及約但外，有多多陣的人來隨伊。
4:25 有一大陣人對加利利、低加坡里、耶路撒冷、猶太，及約旦河東岸來隨伊。
上一章 下一章 [ 條列 | 表格 | 整段 ] 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。