| 章節 | 台語漢字本聖經 請按此下載安裝Open Han 2024版字型，免得漏掉造字 | 現代台語漢字2013版經文 |
| 3:1 | 行洗禮約翰 ( 可 1:1-8 路 3:1-18 約 1:19-28 ) 當彼時，行洗禮的約翰來，佇猶太的曠野宣傳，講： | 施洗者約翰的洗禮及傳道 ( 可1:1-8 路3:1-18 約1:19-28 ) 當時，施洗者約翰來猶太的曠野啲傳道。 |
| 3:2 | 「恁著反悔！因為天國近啦！」 | 伊宣揚講：「恁著悔改，因為天國啲欲實現啦！」 |
| 3:3 | 此人就是主託先知以賽亞所指的。講：「有啲叫佇曠野的，伊的聲講：
備辦主的路， 修直伊的小路！」 | 此個人就是先知以賽亞所啲講的：
有聲佇曠野啲喝： 著為主準備道路， 為伊修直小路。 |
| 3:4 | 此個約翰穿駱駝毛的衫，腰縖皮帶，伊所食是草蜢及山野的蜜。 | 約翰穿駱駝毛的衫，腰縖皮帶，所食的是草蜢及野蜜。 |
| 3:5 | 彼時，耶路撒冷及通猶太，以及約但四方的眾人，出來就近伊， | 有真多人對耶路撒冷、猶太逐所在，及約旦河一帶來伊遐， |
| 3:6 | 佇約但河對伊受洗禮，認𪜶的罪。 | 認罪，佇約旦河對伊領受洗禮。 |
| 3:7 | 約翰看見法利賽及撒都該人多多就近伊的洗禮，就給𪜶講：「毒蛇的類啊！是誰仔指示恁閃避將來的受氣啊？ | 約翰看著真多法利賽派及撒都該派的人嘛來領受洗禮，就對𪜶講：「恁諸個毒蛇，什麼人警告恁閃避上帝啲欲發的受氣？ |
| 3:8 | 所以恁著結彼號合佇反悔的果子。 | 著用行為證明恁有悔改。 |
| 3:9 | 莫得家己拍算講：『有亞伯拉罕做阮的父。』因為我給恁講，上帝會對諸個石頭出子孫互亞伯拉罕。 | 恁通家己想講『亞伯拉罕是阮的祖先』，我給恁講，上帝會當用諸個石頭造子孫互亞伯拉罕。 |
| 3:10 | 今斧頭已經下佇樹頭，見若樹無結好果子的。就剉伊，㧒落火。 | 斧頭已經靠佇樹頭；所有無結好果子的樹攏欲給剉起來，㧒落火。 |
| 3:11 | 我用水給恁行洗禮，欲互恁反悔。若是隨尾我來的，比我卡有權能，伊的鞋我亦𣍐堪得提。伊欲用聖神及火給恁洗。 | 我用水給恁洗禮，表示恁已經有悔改；拘佇我後面啲來彼位比我較有權能，我連給伊捾鞋都𣍐堪得；伊欲用聖神及火給恁洗禮。 |
| 3:12 | 伊的手提簸箕，欲將伊彼場一盡簸，收伊的麥入倉，若是麥香就用𣍐熄的火燒伊。」 | 伊的手提簸箕，(13.12「簸箕」是一種農具，用來分開麥仔及麥芒。*)欲將麥埕簸清氣，麥仔收入倉庫，麥芒(23.12「麥芒」是麥稿較幼的部份。麥稿是麥仔摔了的麥欉。*)就用𣍐化的火給伊燒掉。」 |
| 3:13 | 耶穌受洗 ( 可 1:9-11 路 3:21-22 ) 彼時，耶穌對加利利到約但，就近約翰，欲對伊受洗禮。 | 耶穌領受洗禮 ( 可1:9-11 路3:21-22 ) 彼時，耶穌對加利利來約旦河約翰遐，欲對伊領受洗禮。 |
| 3:14 | 若是約翰阻止伊，講：「我合該對你受洗禮，你反轉就近我嗎？」 | 約翰欲給伊阻止，講：「我應該對你領受洗禮，你反轉來尋我？」 |
| 3:15 | 耶穌應伊講：「今請允我，因為咱合宜著按呢來盡攏總的義。」就允伊。 | 耶穌應講：「咱現在按呢做才合上帝一切的要求。」約翰就同意。 |
| 3:16 | 耶穌已經受洗禮，連鞭對水上來。天忽然為著伊開，伊就看見上帝的神親像鴿仔降臨，佇伊的頂面。 | 耶穌領受洗禮以後隨時對水裡起來；忽然天為著伊開，伊看見上帝的神親像粉鳥降落來，歇佇伊身上。 |
| 3:17 | 閣對天有聲講：「此個是我疼的子，我所歡喜的。」 | 閣對天有聲講：
此個是我所疼的子， 伊，我真意愛。 |