上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
列王紀下
猶大國的王亞哈斯
16:1 ( 代下 28:1-27 )
利瑪利的子比加十七年，猶大王約坦的子亞哈斯坐位。
猶大王亞哈斯
16:1 ( 代下 28:1-27 )
利瑪利的子以色列王比加第十七年，約坦的子亞哈斯開始做猶大王。
16:2 亞哈斯坐位的時二十歲，佇耶路撒冷做王十六年；無親像伊的祖大衛行耶和華──伊的上帝所看做好的事，
16:2 亞哈斯坐位的時二十歲，佇耶路撒冷作王十六年；伊無親像伊的祖先大闢做上主 — 伊的上帝看做好的事，
16:3 就是行以色列諸個王的路，閣互伊的子經過火，照耶和華對以色列人的面前趕出外邦人所行可惡的事，
16:3 顛倒去行以色列許個王的路，甚至燒伊家己的子獻做祭，學上主佇𪜶面前趕出的列國所做可惡的事；
16:4 閣佇山頭壇、佇山的頂面、佇逐欉青翠的樹腳獻祭燒香。
16:4 閣佇山頭壇、逐個山崙仔、逐欉青翠的樹下面獻祭燒香。
16:5 彼時亞蘭王利汛及以色列王利瑪利的子比加上來攻擊耶路撒冷，圍困亞哈斯，總是𣍐贏伊。
16:5 彼時，敘利亞王利汛及利瑪利的子以色列王比加上來攻擊耶路撒冷，圍困亞哈斯，毋拘拍𣍐贏伊。
16:6 當時亞蘭王利汛收回以拉他互亞蘭，就趕猶大人出以拉他。亞蘭人就來以拉他，徛起遐，到今仔日。
16:6 當時敘利亞王利汛收回以拉他歸屬敘利亞，趕猶大人出以拉他。以東人就來以拉他徛起，到今仔日。
16:7 亞哈斯差使者去見亞述王提革拉‧毗列色，講：「我是你的奴僕、你的子。今亞蘭王及以色列王攻擊我，求你上來救我脫離𪜶的手。」
16:7 亞哈斯派使者去見亞述王提革拉‧比列色，講：「我是你的僕人，你的子。敘利亞王及以色列王攻擊我，請來救我脫離𪜶的手。」
16:8 亞哈斯將耶和華殿內及王宮府庫所有的金銀做禮物送互亞述王。
16:8 亞哈斯將上主殿內及王宮府庫所有的金銀，做禮物送互亞述王。
16:9 亞述王聽伊，亞述王就上去攻擊大馬色，取伊，掠伊的百姓到吉珥，刣死利汛。
16:9 亞述王答應，就去攻打大馬士革，攻取此個城，掠許個住民去吉珥，閣刣死利汛。
16:10 亞哈斯王去大馬色欲迎接亞述王提革拉‧毗列色，佇大馬色看見一座壇，亞哈斯王將彼個壇的款式、規模、制度，寄互祭司烏利亞。
16:10 亞哈斯王去大馬士革欲迎接亞述王提革拉‧比列色；伊佇大馬士革看著一座壇。亞哈斯王將彼個壇的款式，詳細的圖樣及作法，寄互祭司烏利亞。
16:11 祭司烏利亞就起一座壇，照亞哈斯王對大馬色所寄來一切的圖，照按呢祭司烏利亞造伊，聽候亞哈斯王對大馬色來。
16:11 祭司烏利亞就佇亞哈斯王猶未對大馬士革轉來以前，照亞哈斯王對大馬士革寄來的圖樣起一座壇。
16:12 王對大馬色倒來，王看見壇，王近倚壇，獻祭佇彼頂面；
16:12 王對大馬士革倒來，看著壇，行倚去，佇彼頂面獻祭。
16:13 燒伊的燒祭、及素祭，閣灌奠，將謝恩祭的血灑佇壇裡，
16:13 伊獻燒化祭、素祭，及奠酒祭，將平安祭的血灑佇壇頂。
16:14 閣將耶和華頭前的銅壇對殿的頭前，就是對伊的壇及耶和華殿的中間徙來下佇伊的壇的北勢。
16:14 伊閣將上主面前的銅壇，就是佇新的壇及聖殿中間的銅壇，對殿的頭前徙去下佇新的壇的北旁。
16:15 亞哈斯王命令祭司烏利亞講：「早起時的燒祭、下昏時的素祭，王的燒祭、素祭，國內眾百姓的燒祭、素祭、及灌奠，攏著燒佇大壇的頂面。燒祭及祭祀的血也著灑佇此個壇頂，總是銅壇我欲做問的路用。」
16:15 亞哈斯王命令祭司烏利亞講：「早起時的燒化祭、下昏時的素祭、王的燒化祭及素祭、國內人民的燒化祭、素祭，及奠酒祭，攏著佇大壇的頂面獻；燒化祭及其他牲禮的血著灑佇大壇的頂面。銅壇我欲做求問的路用。」
16:16 祭司烏利亞就照亞哈斯王所命令的去行。
16:16 祭司烏利亞就照亞哈斯王的命令去做。
16:17 亞哈斯王剉斷許個座的墘，將盆對許個座徙落來，閣將銅海對載海的銅牛頂搬落來，下佇舖灰石的所在；
16:17 亞哈斯王拆許個盆座的堵枋，將盆對許個盆座徙落來；閣將銅海對十二隻銅牛頂面搬落來，下佇鋪石板的地面。
16:18 閣因為亞述王的緣故，將殿內為著安息日所起的廊及王對外面入來的廊，對耶和華的殿移徙。
16:18 伊閣因為亞述王的緣故，將聖殿安歇日的走廊，及王專用入來聖殿的外門，攏拆掉。
16:19 亞哈斯其餘所行的事豈無攏記佇猶大列王的記錄嗎？
16:19 亞哈斯其他的所做攏記載佇《猶大列王史》。
16:20 亞哈斯及伊的列祖同睏，及伊的列祖葬佇大衛的城。伊的子希西家續接伊做王。
16:20 亞哈斯轉去伊的列祖遐，安葬佇大闢城，伊的祖先的墓。伊的子希西家續接伊作王。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。