上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
列王紀下
猶大國的王約阿施
12:1 ( 代下 24:1-16 )
耶戶第七年，約阿施坐位，佇耶路撒冷做王歷過四十年。伊的老母名叫西比亞，是別是巴人。
猶大王約阿施
12:1 ( 代下 24:1-16, 23-27 )
耶戶第七年，約阿施作王，佇耶路撒冷作王四十年；伊的老母叫做西比亞，是別是巴人。
12:2 約阿施得著祭司耶何耶大教示，一生行耶和華看做好的事；
12:2 約阿施因為祭司耶何耶大的教導，一生做上主看做好的事。
12:3 總是山頭廟無廢無，百姓猶獻祭燒香佇山頭廟。
12:3 毋拘山頭壇猶未廢除，人民猶原佇遐獻祭燒香。
12:4 約阿施給眾祭司講：「見若獻佇耶和華的殿分別做聖的物所值的銀就是通用的銀，抑是逐人應該納的身價銀，抑是心所願獻佇耶和華殿的銀，
12:4 約阿施對眾祭司講：「所有獻佇上主的聖殿分別作聖的錢，無論是逐個人應該獻的，抑是自願獻的錢，
12:5 祭司逐人著對所識的人收來，修理殿破壞的所在。無論甚麼所在破壞，攏著修理。」
12:5 抑是逐個祭司對伊所識的人收集的奉獻，著用來修理聖殿所有損壞的所在。」
12:6 總是約阿施王二十三年，祭司猶未修理殿破壞的所在。
12:6 毋拘到約阿施王第二十三年，祭司猶未修理聖殿損壞的所在。
12:7 所以約阿施王召祭司耶何耶大，及其餘的祭司來，給𪜶講：「恁怎樣無修理殿破壞的所在啊？今恁通閣對所識的人收銀，著交出彼個銀，修理殿破壞的所在。」
12:7 所以約阿施王召集祭司耶何耶大及其他的祭司，對𪜶講：「恁是按怎到今猶未修理聖殿損壞的所在？恁毋通閣對人收錢，著將錢交出來，通修理聖殿損壞的所在。」
12:8 眾祭司答應閣收百姓的銀，也無修理殿破壞的所在。
12:8 眾祭司答應無欲閣對人民收錢，嘛無欲負責修理聖殿損壞的所在。
12:9 祭司耶何耶大取一個櫃，佇櫃蓋鑿一孔，下佇壇邊，佇入耶和華殿的正旁；把門的祭司將帶入耶和華殿的銀下佇櫃內。
12:9 祭司耶何耶大提一個櫃，佇頂面挖一孔，下佇祭壇邊，上主聖殿入口的正旁；守門的祭司給來敬拜的人所獻的錢攏落入去櫃內。
12:10 𪜶看見櫃內的銀已經多，王的書記及大祭司上來，將耶和華殿內所得著的銀款佇袋仔內來算秤伊。
12:10 祭司看著櫃內的錢有夠多的時，就請王的書記及大祭司來，將上主聖殿得著的錢點算了包起來。
12:11 將所秤的銀交互做工的，就是耶和華殿內辦事的人；𪜶就將伊發互修理耶和華殿的木匠及建築的人，
12:11 𪜶就將點算過的錢交互監督整修上主聖殿的人。監督的人將錢發互修理上主聖殿的作木師傅及建築工人，
12:12 及土匠、石匠，也欲買柴料及過拍的石，修理耶和華殿破壞的所在，以及修理殿的雜費。
12:12 土水師傅及拍石師傅；閣買柴料及拍好的石，修理上主聖殿損壞的所在，以及支付修理聖殿逐款的開銷。
12:13 總是彼個帶來入耶和華殿的銀，無用伊來做耶和華殿內的銀杯、剪刀、碗、號頭，及逐號金器銀器，
12:13 毋拘奉獻佇上主聖殿的錢無用來做上主聖殿的銀杯、燈心的剪刀、盤、喇叭，及逐款金器銀器。
12:14 就將彼個銀交互做工的人修理耶和華的殿；
12:14 𪜶將錢攏交互作工的人修理上主的聖殿。
12:15 閣將銀交互所經手的人互伊發互做工人，無及𪜶算數，因為𪜶做代誌誠實。
12:15 𪜶毋免及發工錢的人對賬，因為許個人做代誌誠實。
12:16 獨獨補過失祭的銀、贖罪祭的銀無帶入耶和華的殿，是歸祭司。
12:16 毋拘賠罪祭及贖罪祭的錢，無帶入上主的聖殿，攏歸互祭司。
12:17 彼時，亞蘭王哈設上去攻擊迦特，提伊，就定著意思上去攻擊耶路撒冷。
12:17 彼時，敘利亞王哈薛上去攻打迦特，給伊攻取。哈薛就決定欲進攻耶路撒冷。
12:18 猶大王約阿施將伊的列祖猶大王約沙法、約蘭、亞哈謝所獻做聖的物及伊本身所獻做聖的物，以及耶和華的殿及王宮府庫所有的金攏送互亞蘭王哈設；伊就無上來耶路撒冷。
12:18 猶大王約阿施將伊的祖先猶大王約沙法、約蘭、亞哈謝，及伊本身所獻聖化歸上主的物，以及上主聖殿及王宮的府庫所有的金，攏送互敘利亞王哈薛。哈薛就無進攻耶路撒冷。
12:19 約阿施其餘的事，見伊所行的豈無攏記佇猶大列王的記錄嗎？
12:19 約阿施其他的事蹟，伊的所做，攏記載佇《猶大列王史》。
12:20 伊的人臣起來背叛，刣死約阿施佇落去悉拉米羅的厝。
12:20 約阿施的人臣起來背叛，佇落去悉拉路中的伯‧米羅給伊刣死。
12:21 伊的人臣就是示米押的子約撒甲及朔默的子約薩拔刣死伊。人埋葬伊佇大衛的城及伊的列祖像位；伊的子亞瑪謝續接伊做王。
12:21 許個刣死約阿施的人臣是示米押的子約撒甲，及朔默的子約薩拔。約阿施及伊的列祖做夥安葬佇大闢城。伊的子亞瑪謝續接伊作王。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。