上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
列王紀下
猶大國的王后亞他利雅
11:1 ( 代下 22:10—23:15 )
亞哈謝的老母亞她利雅看見伊的子已經死，就起來剿滅一盡的王親。
亞她利雅篡位
11:1 ( 代下 22:10-23:15 )
亞哈謝的老母亞她利雅一下知伊的子受殺害，就起來剿滅猶大王室所有的後代。
11:2 總是約蘭王的查某子，亞哈謝的姊妹約示巴，將亞哈謝的子約阿施對許個受刣的王子中偷抱出來，將伊及伊的奶母囥佇睏房裡，𪜶對亞她利雅蓋密伊，互伊無受刣。
11:2 毋拘約蘭王的查某子，亞哈謝的小妹約示芭，將亞哈謝的子約阿施，對許個受刣的王子中偷抱出來，將伊及伊的奶母藏佇聖殿的睏房，無互亞她利雅知，互約阿施免受殺害。
11:3 後來及伊相及囥佇耶和華的殿歷過六年久；亞她利雅管理彼個地方。
11:3 亞她利雅治理猶大國的時，約阿施及伊的奶母做夥匿佇上主的殿六年久。
11:4 到第七年，耶何耶大差人叫迦利族及護衛兵的百總，導𪜶入耶和華的殿到伊遐，就及𪜶立約，互𪜶佇耶和華的殿咒誓，閣用王的子互𪜶看，
11:4 到第七年，耶何耶大派人召集迦利人及所有護衛兵的官長，導𪜶入上主的聖殿來到伊遐；伊及𪜶立約，互𪜶佇上主的殿咒誓，閣互𪜶看王的子。
11:5 閣吩咐𪜶講：「恁著按呢行：見若恁佇安息日入來的三份一著顧守王宮，
11:5 閣吩咐𪜶講：「恁著按呢做：恁佇安歇日值班的時，著三分一顧守王宮，
11:6 三份一著佇蘇珥的門，三份一著佇護衛兵後面的門。按呢顧守王宮，阻止人出入。
11:6 三分一顧守蘇珥門，三分一顧守護衛兵院的後門；按呢輪流顧守王宮。
11:7 見若恁佇安息日出去的二份著顧守耶和華的殿佇王的四圍；
11:7 恁佇安歇日無值班的兩隊人員著顧守上主的殿，保護王。
11:8 恁逐人手攑家私，四圍保護王。見若人入恁的班列的著互伊死，王出王入的時，恁著跟隨伊。」
11:8 恁逐個人著帶軍器，佇王的四圍保護；若有人強欲入來，著互伊死；王無論佇叨位，恁攏著跟隨保護伊。」
11:9 許個百總照祭司耶何耶大一切所命令的去行，逐人帶𪜶輪著安息日入來的人及𪜶輪著安息日出去的人來到祭司耶何耶大遐。
11:9 所有的官長攏照祭司耶何耶大的命令去做；逐個官長攏帶𪜶的部下，無論安歇日有值班抑是無值班，攏來祭司耶何耶大遐。
11:10 祭司就將耶和華殿內所囥大衛王的槍及屏牌交互許個百總。
11:10 祭司就將囥佇上主殿內大闢王的槍及盾牌交互許個官長。
11:11 護衛兵手裡攑家私，佇壇及殿遐，對殿的正旁到殿的倒旁，徛佇王的四圍。
11:11 護衛兵手攑武器，佇祭壇及聖殿遐，對殿的南旁到北旁，徛佇王的四圍保護。
11:12 祭司導王的子出來，給伊戴冕旒，將律法的冊互伊，用油抹伊設立伊做王；𪜶就拍手掌講：「願王萬歲！」
11:12 祭司導約阿施出來，給伊戴王冠，將有關王權的約書交互伊，給伊抹油，設立伊作王；𪜶就拍噗仔，喝講：「願王萬歲！」
11:13 亞她利雅聽見護衛兵及百姓的聲，就到百姓遐，入耶和華的殿，
11:13 亞她利雅聽著護衛兵及人民的聲，就去聚集佇上主聖殿的人民遐，
11:14 看見王照例徛佇柱邊，軍長及歕號頭的徛佇王的左右，國內眾百姓歡喜歕號頭；亞她利雅就拆裂伊的衫，喝講：「反叛啊！反叛啊！」
11:14 看著王照規例徛佇聖殿入口的柱邊，官長及歕喇叭的人徛佇王的邊仔，國內的人民攏歡喜，歕喇叭。亞她利雅就拆裂伊的衫，喝講：「造反啦，造反啦！」
11:15 祭司耶何耶大吩咐管轄軍隊的百總，對𪜶講：「對班列的中間趕伊出去，見若隨伊的著用刀刣死伊！」因為祭司講「通佇耶和華的殿刣伊。」
11:15 因為祭司耶何耶大毋愛有人佇上主的聖殿互人刣死，就命令管軍隊的官長，講：「給伊對隊伍的中間趕出去；欲隨伊的，著互伊死。」
11:16 𪜶閃開雙旁互伊去；伊對上到王宮的馬路去，佇遐受刣。
11:16 𪜶閃開雙旁互亞她利雅過去；伊到進入王宮的馬門，就佇遐互人刣死。
耶何耶大的改革
11:17 ( 代下 23:16-21 )
耶何耶大就佇耶和華及王及百姓的中間立約，互𪜶做耶和華的百姓；閣佇王及百姓的中間立約。
耶何耶大的改革
11:17 ( 代下 23:16-21 )
耶何耶大互王以及人民及上主立約，做上主的子民；閣互王及人民立約。
11:18 對按呢國內的眾百姓到巴力的廟，拆毀伊，拍碎許個壇及偶像，閣佇壇前拍死巴力的祭司瑪坦。祭司設官員來顧守耶和華的殿，
11:18 對按呢，全國的人民攏給巴力的廟拆毀，拍碎祭壇及偶像，閣佇壇前拍死巴力的祭司馬坦。
耶何耶大派官員顧守上主的聖殿。
11:19 閣導百總及迦利族及護衛兵，以及國內眾百姓，𪜶對耶和華的殿導王落來，對護衛兵的門路入王宮，伊就坐王位。
11:19 伊及官長、迦利人、護衛兵，以及全國人民，請王對上主的聖殿落來，對護衛兵院的門進入王宮。約阿施就坐王位。
11:20 國內的百姓攏歡喜，通城攏安靜。𪜶佇王宮遐用刀刣死亞她利雅。
11:20 全國人民攏歡喜快樂，全城攏平靜；亞她利雅已經佇王宮互人刣死。
11:21 約阿施坐位的時七歲。
11:21 約阿施坐位的時才七歲。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。