上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
列王紀下
亞哈的眾子受刣
10:1 亞哈有七十個子佇撒瑪利亞。耶戶寫批寄去撒瑪利亞，互耶斯列許個首領，長老及許個撫養亞哈的眾子的，
亞哈的後代受刣死
10:1 亞哈有七十個子孫佇撒馬利亞。耶戶寫批去撒馬利亞，互遐的首領、長老，及亞哈子孫的監護人，
10:2 批講：「恁的主人許個子及恁佇遐，恁閣有車馬、及堅固的城、及器械，
10:2 講：「既然恁主人的子孫及恁做夥，恁閣有戰車、戰馬、堅固的城，及武器，此張批送到恁遐的時，
10:3 此張批到恁遐的時，就著佇恁主人許個子的中間揀一個𠢕閣妥當的，互伊坐𪜶老父的位，恁也通為恁主人的家交戰。」
10:3 恁著佇恁主人子孫的中間，揀一個上好上適合的，互伊續接伊的老父作王，恁嘛通為著恁主人的家交戰。」
10:4 𪜶真驚，相及講：「看啊，二個王佇伊的面前尚且徛𣍐住，咱豈可徛會住？」
10:4 𪜶非常驚，講：「連約何蘭及亞哈謝兩個王都𣍐當對抗伊，咱哪有法度？」
10:5 管家者、及城守、及許個長老，及撫養許個子者，差人去見耶戶，講：「阮是你的奴僕，見你所給阮講的，阮欲行，阮無欲設立人做王，你所看做好的，通行伊。」
10:5 王宮總管、市長，及長老，以及王子孫的監護人，派人去見耶戶，講：「阮是你的僕人，你給阮講的，阮攏欲照按呢做。阮無欲設立人作王；請照你的意思去做。」
刣死亞哈的眾子
10:6 伊閣寫批互𪜶講：「恁若為我，聽趁我的話，著取恁的主人許個子的頭殼，明仔日此時來耶斯列我遮。」王的子七十人及城內尊貴的人，就是撫養𪜶的相及住。
10:6 耶戶閣寫批互𪜶，講：「恁若歸順我，欲聽趁我的話，著取恁主人子孫的頭殼，明仔載此個時帶來耶斯列互我。」彼時，王的子孫七十人攏住佇城內給𪜶養育的尊貴的人𪜶兜。
10:7 批一下到，𪜶就掠王的子七十人，一盡刣死，將頭殼下佇筐裡，送到耶斯列、耶戶遐。
10:7 耶戶的批一下到，𪜶就將王的子孫七十人全部刣死，將許個頭殼下佇籃仔內，送去耶斯列 耶戶遐。
10:8 有一個使者來給伊講：「𪜶帶王許個子的頭殼來。」耶戶講：「將𪜶疊做二堆下佇城門口，到明仔早起。」
10:8 有一個使者來給耶戶講：「𪜶帶王許個子孫的頭殼來。」耶戶講：「將𪜶疊做兩堆，下佇城門口，到明仔早起。」
10:9 隔早起，耶戶出來，徛啲，給眾百姓講：「恁攏是公義，看啊，我背叛我的主人，刣死伊；總是刣死諸個眾人的是是誰啊？
10:9 隔早起，耶戶出來，徛啲，對眾人民講：「恁攏無罪。是我反叛約何蘭王，給伊刣死，毋拘諸個人是啥人給𪜶刣死的？
10:10 今通知耶和華的話，就是耶和華論亞哈的家所講的無一句拍磕落，因為耶和華託伊的奴僕以利亞所講的話攏有做成。」
10:10 對按呢通知，上主有關亞哈家所講的話，無一句落空；因為上主通過伊的僕人以利亞講的話，攏有實現。」
10:11 屬亞哈的家佇耶斯列所剩的人及伊的大臣、親密的朋友、祭司，耶戶一盡刣𪜶，無留一個。
10:11 屬亞哈家佇耶斯列賰的人，以及伊的人臣、親密的朋友、祭司，耶戶攏給𪜶刣死，連一個都無留啲。
亞哈謝的親族受刣
10:12 耶戶起來去到撒瑪利亞。佇路裡、到牧者剪羊毛的厝，
亞哈謝的親屬受殺害
10:12 耶戶出發，去撒馬利亞。佇中途，伊到牧者剪羊毛的厝，
10:13 抵著猶大王亞哈謝的兄弟，問𪜶講：「恁是甚麼人？」應講：「阮是亞哈謝的兄弟，今落去欲請安王的子及王后的子。」
10:13 抵著猶大王亞哈謝的親屬，問𪜶講：「恁是什麼人？」
𪜶應講：「阮是亞哈謝的親屬，抵欲落去訪問王及王后的子。」
10:14 伊講：「活活掠𪜶！」𪜶就活活掠𪜶，佇剪羊毛的厝的坑仔邊刣死𪜶，共四十二人，無留一個。
10:14 耶戶講：「活活給𪜶掠起來。」耶戶的部下就給𪜶掠起來，佇剪羊毛的厝的井邊刣死𪜶，共四十二人，連一個都無留。
亞哈謝其餘的親族受刣
10:15 耶戶對遐去，抵著利甲的子約拿達來接伊，耶戶請安伊，對伊講：「你的心正直向我，親像我的心向你的心抑無？」約拿達應講：「是。」耶戶講：「若是按呢，伸你的手互我。」伊就伸手互伊；伊就牽伊上車。
10:15 耶戶繼續進前，抵著利甲的子約拿達來迎接伊；耶戶給伊請安，對伊講：「我誠心對待你，你豈嘛按呢對待我？」
約拿達應講：「是。」
耶戶講：「若是按呢，你的手伸出來。」約拿達就伸手互伊。伊就牽約拿達上車。
10:16 耶戶講：「你及我相及去，看我為著耶和華的熱心」；就互伊坐佇伊的車，
10:16 耶戶講：「及我做夥來去，看我按怎為著上主熱心做代誌。」伊就互約拿達坐伊的車。
10:17 到撒瑪利亞，就刣死見若屬亞哈所剩佇撒瑪利亞的，一盡滅伊，照耶和華對以利亞所講的話。
10:17 到撒馬利亞，耶戶刣死所有屬亞哈家留佇撒馬利亞的人，連一個都無留啲，抵照上主通過以利亞所講的話。
拜巴力的人受刣
10:18 耶戶招集眾百姓，給𪜶講：「亞哈服事巴力猶是小可，耶戶欲大大服事伊。
拜巴力的人受殺害
10:18 耶戶召集眾人民，給𪜶講：「亞哈服事巴力猶無夠，耶戶欲閣較熱心服事伊。
10:19 所以著召巴力眾先知及一切服事巴力的，及伊攏總的祭司，來我遮，通減一人；因為我欲獻大的祭祀互巴力。見若無來的𣍐得著活。」耶戶按呢行，是用詭計欲一盡刣死拜巴力的人。
10:19 所以著召集巴力所有的先知、祭司，及攏總拜巴力的人來我遮，一個都𣍐當無來，因為我欲為巴力舉行大祭祀；無來的，欲互伊死。」這是耶戶的詭計，欲刣死所有拜巴力的人。
10:20 耶戶講：「著為巴力宣佈嚴肅會！」𪜶就宣佈。
10:20 耶戶講：「著為巴力召集嚴肅會。」𪜶就宣布。
10:21 耶戶差人遍行以色列地；拜巴力的人攏齊到，無一個無來。𪜶就入巴力的廟，巴力的廟內對此旁到彼旁人滿滿。
10:21 耶戶派人去以色列逐所在宣告此個消息；拜巴力的人攏齊到，無一個無來。𪜶就進入巴力的廟；巴力的廟內，人揢甲滿滿滿。
10:22 耶戶吩咐掌禮服的人講：「提禮服出來互一切拜巴力的人穿。」伊就提禮服出來互𪜶。
10:22 耶戶吩咐管理禮服的人講：「禮服提出來互所有拜巴力的人穿。」彼個人就提禮服出來互𪜶。
10:23 耶戶及利甲的子約拿達入巴力的廟，給拜巴力的人講：「恁著查看，佇恁的中間通有服事耶和華的人，干單拜巴力的人若定。」
10:23 耶戶及利甲的子約拿達入巴力的廟，給拜巴力的人講：「恁著詳細搜查，恁中間毋通有拜上主的人，只有拜巴力的人會當佇遮。」
10:24 𪜶入去欲獻祭祀燒祭。
耶戶代先安置八十人佇外面，講：「我將諸個人交佇恁的手，若一人走去，放伊走的人伊的命著賠命！」
10:24 𪜶就入去欲獻祭祀及燒化祭。耶戶已經有安排八十個人佇廟的外面，閣對𪜶講：「我將諸個人交互恁，若有人逃走，放伊走的人著賠命。」
10:25 耶戶獻燒祭明白就給護衛兵及許個軍長講：「恁入去刣𪜶，通容允一人出來！」𪜶就用刀刣𪜶，護衛兵及軍長㧒身屍出去，就去到巴力廟的城，
10:25 耶戶獻燒化祭了後，對護衛兵及軍官講：「入去，總刣！一個都毋通互走去。」𪜶就用刀刣死所有的人，將身屍擲佇遐。然後閣去到巴力廟的內殿，
10:26 𪜶將巴力廟內的柱像提出來燒；
10:26 將柱像攏提出來燒。
10:27 𪜶毀壞巴力的柱像，毀壞巴力的廟用伊做廁池，到今仔日。
10:27 𪜶毀壞巴力的柱像，拆毀巴力的廟，給伊改做便所，到今仔日。
10:28 按呢，耶戶佇以色列中滅無巴力。
10:28 按呢，耶戶對以色列消滅巴力崇拜。
10:29 總是耶戶無離開尼八的子耶羅波安的罪，就是伊所用互以色列犯罪的，就是拜伯特利及但所有金的牛仔。
10:29 毋拘耶戶及尼八的子耶羅波安仝款，互以色列人陷落罪，就是去拜伯特利及但的金牛。
10:30 耶和華給耶戶講：「因為你行好成我所看做好的，照我的心意款待亞哈的家，你的子孫欲坐以色列的國位，歷過四代。」
10:30 上主給耶戶講：「因為你有完成我看做好的事，照我的心意對待亞哈家，你的子孫欲續接你做以色列的王到第四代。」
10:31 總是耶戶無專心遵守來行耶和華──以色列的上帝的律法，無離開耶羅波安的罪，就是所用來互以色列人犯罪的。
10:31 毋拘耶戶無專心遵守上主 — 以色列的上帝的律法，及耶羅波安仝款，互以色列人陷落罪。
耶戶去世
10:32 彼霎耶和華起頭割以色列國互伊卡細，哈設攻擊以色列的四境，
耶戶死
10:32 彼時，上主互以色列國開始衰微；敘利亞王哈薛拍敗以色列，
10:33 對約但河東勢、基列的全地，迦得人、流便人、瑪拿西人的地，對近亞嫩山谷的亞羅珥，就是基列及巴珊。
10:33 佔領約旦河東旁基列全地，對亞嫩山谷附近的亞羅珥起，到基列及巴珊，就是迦得人、呂便人、瑪拿西人的地區。
10:34 耶戶其餘的事，見伊所行的及伊的能力豈無攏記佇以色列諸個王的記錄嗎？
10:34 耶戶其他的事蹟、伊的所做，及伊的成就，攏記載佇《以色列列王史》。
10:35 耶戶及伊的列祖同睏，𪜶埋葬伊佇撒瑪利亞；伊的子約哈斯續接伊做王。
10:35 耶戶轉去伊的列祖遐了後，安葬佇撒馬利亞。伊的子約哈斯續接伊作王。
10:36 耶戶佇撒瑪利亞做以色列王的時歷過二十八年。
10:36 耶戶佇撒馬利亞做以色列王總共二十八年。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。