上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
列王紀下
耶戶受抹油做以色列王
9:1 先知以利沙叫先知的學生一個，給伊講：「你縖腰，提一瓶油去基列的拉末。
選立耶戶做以色列王
9:1 先知以利沙叫一個先知的學生來，給伊講：「你著準備出發，提此瓶油，去基列的拉末。
9:2 到遐，著尋寧示的孫、約沙法的子耶戶，入去，互伊對伊的兄弟中起來，導伊入內房，
9:2 到遐，著尋寧示的孫，約沙法的子耶戶，對伊同伴的中間請伊出來，導伊入內房；
9:3 將瓶內的油斟佇伊的頭殼，講：『耶和華按呢講：我用油抹你做以色列的王。』你就著開門逃走，通延迁。」
9:3 將瓶內的油倒佇伊的頭殼，講：『上主按呢講：我選立你做以色列的王。』了後你著開門，趕緊逃走。」
9:4 此個少年人就是少年的先知去基列的拉末。
9:4 此個少年的先知就去基列的拉末。
9:5 到遐，看見眾軍長啲坐，伊就講：「軍長啊，我有代誌欲給你講。」耶戶講：「欲給阮中間甚麼人講？」應講：「軍長啊，就是你。」
9:5 伊到遐，看著眾軍官做夥坐佇遐；伊就講：「將軍，我有代誌欲給你講。」
耶戶講：「你欲給阮叨一個講？」
少年人應講：「將軍，就是你。」
9:6 伊就起來，入去厝內，少年人用油斟佇伊的頭殼，給伊講：「耶和華──以色列的上帝按呢講：『我用油抹你做耶和華的百姓以色列的王。
9:6 耶戶就起來，入去厝內；少年人用油倒佇伊的頭殼，對伊講：「上主 — 以色列的上帝按呢講：『我選立你做上主的子民以色列的王。
9:7 你著拍滅你的主人亞哈的家，互我通報應我的奴僕諸個先知的血，以及耶和華眾奴僕的血，就是佇耶洗別的手所做的。
9:7 你著刣死你的主人亞哈全家，互我通報復耶洗碧流上主的僕人眾先知及其他所有僕人的血。
9:8 因為亞哈全家欲攏滅無，我欲剪除屬亞哈的查甫丁，無論受拘束的抑是自由的，佇以色列中，
9:8 亞哈全家攏著滅亡；所有佇以色列中屬亞哈的查甫人，無論是自由的抑是無自由的，我攏欲給𪜶消滅。
9:9 我欲互亞哈的家親像尼八的子耶羅波安的家，也親像亞希雅的子巴沙的家。
9:9 我欲互亞哈的家及尼八的子耶羅波安的家仝款，嘛及亞希雅的子巴沙的家仝款。
9:10 佇耶斯列的園，狗欲食耶洗別，無人埋葬伊。』」少年人就開門逃走。
9:10 狗欲佇耶斯列的田園食耶洗碧，嘛無人給伊埋葬。』」少年人就開門逃走。
9:11 耶戶出去，到伊的主人的奴僕遐，有一人問伊講：「攏平安無？此個𤞚者來尋你甚麼代誌啊？」伊給𪜶講：「恁識彼個人，也知伊所講的。」
9:11 耶戶出去，來到伊主人的軍官遐；有一個問伊講：「豈有什麼代誌？是按怎此個𤞚的來尋你？」
伊給𪜶講：「恁識彼個人，嘛知伊會講什麼。」
9:12 𪜶講：「無影，你著給阮講。」應講：「伊按呢按呢給我講。伊講：『耶和華按呢講：我用油抹你做以色列的王。』」
9:12 𪜶講：「騙阮，你著給阮講。」
耶戶應講：「伊給我講：『上主按呢講：我選立你做以色列的王。』」
9:13 𪜶趕緊逐人用家己的衫舖佇崎仔的頂層，下佇耶戶的下面；𪜶歕哨角講：「耶戶做王啦！」
9:13 𪜶逐個人趕緊用家己的外衫鋪佇崎仔的頂層，互耶戶徛佇頂面。𪜶歕哨角宣布講：「耶戶作王啦！」
以色列王約蘭受刣
9:14 按呢，寧示的孫、約沙法的子耶戶背叛約蘭。約蘭及以色列眾人曾把守基列的拉末，因為亞蘭王哈設的緣故；
以色列王約何蘭受殺害
9:14 按呢寧示的孫，約沙法的子耶戶背叛約何蘭。約何蘭及以色列軍兵曾防守基列的拉末，因為敘利亞王哈薛攻擊以色列。
9:15 總是約蘭王倒去耶斯列，醫治伊的傷，就是伊佇及亞蘭王哈設交戰的時，亞蘭人拍著伊的。耶戶講：「恁的意思若是按呢，就通容允人走出城去耶斯列報消息。」
9:15 後來，約何蘭王倒去耶斯列，欲醫治伊及敘利亞王哈薛交戰的時受的傷。耶戶對許個軍官講：「既然恁擁護我作王，著毋通互人逃走去耶斯列報消息。」
9:16 耶戶就坐車去耶斯列，因為約蘭倒佇遐。猶大王亞哈謝已經落去覓約蘭。
9:16 耶戶就駛戰車去耶斯列，因為約何蘭猶倒佇床裡。猶大王亞哈謝已經去佇遐探訪約何蘭。
9:17 有一個守望者徛佇耶斯列的樓頂，看見耶戶的軍隊來，就講：「我看見一陣軍隊。」約蘭講：「差一個騎馬者去接伊，續問伊講：平安嗎？」
9:17 有一個守望的徛佇耶斯列城牆頂的守望台，看著耶戶的軍隊來，就講：「我看著一陣軍隊。」
約何蘭講：「派一個馬兵去接伊，續問伊講：『有平安無？』」
9:18 騎馬者去接伊，講：「王按呢講，是平安嗎？」耶戶講：「平安抑無及你甚麼干涉？你越來隨我的後面！」守望者閣講：「使者到𪜶遐，總是無倒轉來。」
9:18 彼個馬兵去迎接耶戶，講：「王啲問，有平安無？」
耶戶講：「平安無平安，無你的代誌。隨我後面！」
守望的報告王，講：「使者到𪜶遐，煞無倒轉來。」
9:19 王閣差一個騎馬者去。伊到𪜶遐，講：「王按呢講，是平安嗎？」耶戶講：「平安抑無及你甚麼干涉？你越來隨我的後面！」
9:19 王閣派一個馬兵去。伊到𪜶遐，講：「王啲問，有順利無？」
耶戶講：「順利無順利，無你的代誌。隨我後面！」
9:20 守望者閣講：「伊到𪜶遐，也無倒轉來；趕車的款親像寧示的孫耶戶啲趕，因為伊趕真狂。」
9:20 守望的報告王講：「伊去𪜶遐，嘛無倒轉來；駛車的衝真雄，看起來若親像是寧示的孫耶戶。」
9:21 約蘭講：「套車！」就套伊的車。以色列王約蘭及猶大王亞哈謝出去逐個坐家己的車出去接耶戶，佇耶斯列人拿伯的園抵著伊。
9:21 約何蘭就講：「準備戰車。」𪜶就給伊準備。以色列王約何蘭及猶大王亞哈謝坐家己的戰車，出去見耶戶；𪜶佇耶斯列人拿伯的園抵著伊。
9:22 約蘭見著耶戶就講：「耶戶啊，是平安嗎？」伊應講：「你的老母耶洗別的淫行邪術許多猶佇啲，豈會平安？」
9:22 約何蘭看著耶戶就講：「耶戶，有平安無？」
耶戶應講：「你的老母耶洗碧的淫行邪術猶赫多，哪會平安？」
9:23 約蘭就越轉伊的車走，給亞哈謝講：「亞哈謝啊，有謀反啦！」
9:23 約何蘭就給車踅翻頭逃走，對亞哈謝喝講：「亞哈謝，反啦，反啦。」
9:24 耶戶盡力開弓，射著約蘭的飯匙骨中，箭對伊的心𥦁出去。伊就慄落車內。
9:24 耶戶出力開弓，射著約何蘭的尻脊骿，箭對伊的心臟迵出去。伊就慄落去，死佇車內。
9:25 耶戶給伊的軍長畢甲講：「你將伊㧒佇耶斯列人拿伯的園裡。你著記得，你我相及坐車隨伊的老父亞哈的時，耶和華對伊所讖語的，
9:25 耶戶對伊的軍官畢甲講：「給伊㧒佇耶斯列人拿伯的園裡。你著會記得你及我做夥坐車隨伊的老父亞哈的時，上主對亞哈的預言。
9:26 耶和華講：『我昨日有看見拿伯的血及伊的子的血』，耶和華閣講：『佇此區園我欲報應你。』今著將伊㧒佇彼區園，照耶和華所講的。」
9:26 上主有講：『我昨昏有看見拿伯及伊的子兒的血。我立誓，我欲佇此坵園報應亞哈。』今著照上主的話將約何蘭㧒𫢶此坵園。」
猶大王亞哈謝受刣
9:27 猶大王亞哈謝看見按呢，就對園的厝的路逃走。耶戶趇伊，講：「也著拍死伊佇車內。」到倚近以伯蓮上姑珥的山坪拍傷伊。伊走到米吉多，就死佇遐。
猶大王亞哈謝受殺害
9:27 猶大王亞哈謝看著按呢，就向伯‧哈干的路逃走。耶戶趇伊，喝講：「嘛著給拍死。」接近以伯蓮上姑珥的山坪的時，亞哈謝佇車內受拍傷。伊逃走去米吉多，就死佇遐。
9:28 伊的奴僕用車載伊到耶路撒冷，葬佇伊的墓及伊的列祖，佇大衛的城。
9:28 伊的人臣用車給伊的屍體載去耶路撒冷，給伊安葬佇大闢城伊家己的墓，及伊的列祖做夥。
9:29 佇亞哈的子約蘭十一年，亞哈謝起頭做猶大王。
9:29 亞哈謝做猶大王的時，是佇亞哈的子約何蘭十一年。
耶洗別王后受刣
9:30 耶戶到耶斯列；耶洗別聽見就畫目眉、梳頭，俯佇窗仔啲看。
耶洗碧王后受刣死
9:30 耶戶到耶斯列，耶洗碧聽見，就梳粧打扮，對窗仔看外面。
9:31 耶戶入門的時，耶洗別講：「刣死主人的心利啊，平安嗎？」
9:31 耶戶入城的時，耶洗碧對伊講：「刣死主人的心利，你有平安無？」
9:32 耶戶攑頭向窗仔看，講：「是誰為我，是誰啊？」有二三個太監俯落看伊。
9:32 耶戶攑頭向窗仔看，講：「擁護我的人佇叨位？」有兩三個太監對窗仔俯啲看伊。
9:33 耶戶講：「給伊捙落來！」𪜶就捙伊落來。伊的血濺著牆壁及馬；就用腳踏伊。
9:33 耶戶講：「給伊㧒落來。」𪜶就將耶洗碧㧒落去；伊的血噴著牆壁及馬；耶戶駛戰車給伊的屍體軋過。
9:34 耶戶入去，也食也飲，講：「恁去看彼個受咒詛的婦仁人續埋葬伊，因為伊是王的查某子。」
9:34 耶戶入去，亦食亦飲，講：「恁去處理彼個受咒詛的婦仁人，續給伊埋葬，因為伊嘛是王的查某子。」
9:35 𪜶去欲葬伊，干單尋著伊的頭殼骨及腳，及手掌若定。
9:35 毋拘𪜶去欲給伊埋葬，干焦尋著伊的頭殼及腳手的骨頭。
9:36 𪜶倒來回覆伊，耶戶就講：「這就是耶和華託伊的奴僕提斯比人以利亞所講的話，講：『佇耶斯列的園，狗欲食耶洗別的肉；
9:36 𪜶倒來給耶戶報告，伊就講：「這抵抵照上主通過伊的僕人提斯比人以利亞所講的話：『狗欲佇耶斯列的田園食耶洗碧的肉。
9:37 閣耶洗別的身屍欲佇耶斯列的園親像糞佇土面，致到人無欲講這是耶洗別。』」
9:37 耶洗碧的身屍佇耶斯列的田園會及糞像款，無人認會出。』」
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。