上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
列王紀下
7:1 以利沙講：「恁著聽耶和華的話，耶和華按呢講：明仔日約略到此時，佇撒瑪利亞的城門口，一細亞的幼麵粉值銀一舍客勒，二細亞大麥值銀一舍客勒。」
7:1 以利沙講：「恁著聽上主的話；上主按呢講：『明仔載大約此個時，佇撒馬利亞的市場，三公斤幼麵粉會干焦賣銀十一公克，六公斤大麥嘛才賣銀十一公克。』」
7:2 有一個軍長是王倚伊的手者，應上帝的奴僕講：「設使耶和華對天開窗仔，豈會按呢嗎？」以利沙講：「你欲親目看，總是食𣍐著。」
7:2 有一個王的侍衛官應上帝重用的人講：「上主就是開天窗降落五穀，此個代誌嘛無可能發生。」
以利沙講：「你欲親目看著，毋拘食𣍐著。」
亞蘭軍放拺布棚
7:3 佇城門遐有四個癩𰣻的，𪜶相及講：「咱啥事坐佇遮聽候死啊？
敘利亞軍隊逃走
7:3 佇城門外有四個痲瘋病人，𪜶講來講去：「咱哪著坐佇遮等死？
7:4 咱若講，入城去！城內有飢荒，咱欲死佇遐；若定定坐佇遮，也是著死。來啦，咱來去投降亞蘭的軍隊，𪜶若留咱的活命，咱就會活；若刣死咱，根抵也是死！」
7:4 咱若入城，城內有飢荒，咱會死佇遐；若恬恬坐𫢶遮，嘛是死。來，咱來去投降敘利亞的軍隊；𪜶若留咱的性命，咱就會活；𪜶若刣咱，咱仝款嘛是死。」
7:5 黃昏的時，𪜶起來欲去亞蘭人的營；已經到亞蘭人的營的邊角，看啊，無一人佇遐。
7:5 黃昏的時，𪜶出發去敘利亞人的軍營。𪜶到敘利亞人的軍營邊，竟然無人佇遐。
7:6 因為主互亞蘭的軍隊聽見車的聲、馬的聲，就是大軍隊的聲；𪜶就相及講：「看啊，這是以色列王買好赫人諸個王及埃及人諸個王，來攻擊咱。」
7:6 因為主互敘利亞的軍隊聽見戰車及戰馬的聲，以及大軍隊的聲。𪜶就互相講：「這一定是以色列王倩赫人諸王及埃及諸王來攻擊咱。」
7:7 所以，佇黃昏的時𪜶起來逃走，放拺𪜶的布棚、𪜶的馬、𪜶的驢，營盤照舊，走去保生命。
7:7 所以佇黃昏的時𪜶就放拺𪜶的布棚、馬、驢、軍營，拼命逃走。
7:8 許個癩𰣻的到營的邊角，入一個布棚，也食也飲，對遐提金銀及衣裳去收囥；閣來閣入一個布棚，對遐提出財物去收囥。
7:8 許個痲瘋病人來到軍營邊，入一個布棚，亦食亦飲，閣對遐提金銀及衣服去藏；後來閣入一個布棚，嘛對遐提財物去藏。
7:9 彼時，𪜶相及講：「咱所做的好！今仔日是有好消息的日，也咱靜靜！若聽候到天光，咱著受罪。來啊，咱著去報王家知。」
7:9 彼時，𪜶互相講：「咱按呢做毋著。今仔日是有好消息的日，毋拘咱煞恬恬；若聽候到天光，咱就有罪。行，咱來去報王家知。」
7:10 𪜶就去叫顧城門的，給𪜶講：「阮到亞蘭人的營，看見無一人佇遐，也無人的聲說，只有馬縛啲、驢縛啲，布棚攏照舊。」
7:10 𪜶就去叫顧城門的人，給𪜶講：「阮去敘利亞人的軍營，看著營內攏無人，無動無靜；只有馬、驢縛啲，布棚攏留啲。」
7:11 伊就去叫許個顧門者，𪜶就去報王家知。
7:11 許個顧城門的人大聲喝，消息就傳到王家。
7:12 王透暝起來，給伊的人臣講：「亞蘭人對佇咱所做的我給恁講。𪜶知咱枵餓，所以出營盤，埋伏佇田野，講：『𪜶出城的時，咱就活活掠𪜶，來得著入𪜶的城。』」
7:12 王透暝起來，給伊的人臣講：「我給恁講，這是敘利亞人的計謀。𪜶知咱枵餓，所以出軍營，埋伏佇野外，講：『𪜶出城的時，咱通活活掠𪜶，佔領此個城。』」
7:13 伊的人臣有一個應王講：「猶剩的馬，就是猶留佇城內的，求你差人牽五隻來（看啊，馬親像以色列眾人所留佇城內的，看啊，馬親像以色列眾人受滅的），咱通差人去看伊。」
7:13 有一個人臣對王講：「城內猶有賰馬，請你派人牽五隻來，咱通派人去探查；橫直城內的人緊慢攏會滅亡。」
7:14 就取二張車及馬，王差人去趇亞蘭的軍兵，講：「恁去看覓咧。」
7:14 𪜶選兩台戰車及馬，王就派𪜶去探敘利亞的軍隊，講：「恁去探查。」
7:15 𪜶就追趇𪜶到約但，看見滿路攏是亞蘭人緊走的時所㧒擲的衣服器具，使者就倒來回覆王。
7:15 𪜶追蹤敘利亞的軍隊到約旦河，看著沿路攏是敘利亞人逃走的時㧒确的衣服器具。使者就倒來回復王。
7:16 百姓就出去，搶亞蘭人的營盤。對按呢一細亞的幼麵粉值銀一舍客勒，二細亞大麥也值銀一舍客勒，照耶和華所講的。
7:16 撒馬利亞的住民出去搶敘利亞人的軍營；按呢，三公斤幼麵粉賣銀十一公克，六公斤大麥賣銀十一公克；抵照上主所講的話。
7:17 王派伊所倚手彼個軍長管理城門，百姓佇城門𧿬踏伊，伊就死，照上帝的奴僕所講的，就是王落來見伊的時所講的。
7:17 王派彼個侍衛官佇城門指揮，煞互眾人踏死佇遐；抵照上帝重用的人佇王落來見伊的時所講的話。
7:18 閣上帝的奴僕所對王講的：「明仔日約略到此時，佇撒瑪利亞的城門口，二細亞大麥值銀一舍客勒，一細亞的幼麵粉值銀一舍客勒。」
7:18 上帝重用的人有對王講：「明仔載大約此個時，佇撒馬利亞的市場，六公斤大麥會干焦賣銀十一公克，三公斤幼麵粉嘛才賣銀十一公克。」
7:19 閣彼個軍長對上帝的奴僕講：「設使耶和華對天開窗仔，豈會按呢嗎？」上帝的奴僕講：「你欲親目看見，總是食𣍐著。」
7:19 彼個侍衛官對上帝重用的人講：「上主就是開天窗降落五穀，此個代誌嘛無可能發生。」上帝重用的人講：「你欲親目看著，毋拘食𣍐著。」
7:20 此個話果然應驗佇伊的身上；因為百姓佇城門口𧿬踏伊，伊就死。
7:20 此句話果然發生佇彼個侍衛官身上，因為眾人佇城門給伊踏死。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。