上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
列王紀下
乃縵得著醫治
5:1 亞蘭王的軍長乃縵佇伊的主人的面前做大做尊貴，因為耶和華曾用伊互亞蘭得勝；伊也是大權能的勇士，總是癩𰣻。
乃縵得著醫治
5:1 敘利亞王的元帥乃縵，佇伊的主人面前是重要人物，真受尊重，因為上主曾通過伊互敘利亞得勝。伊是強猛的勇士；毋拘致著痲瘋病。
5:2 前亞蘭人歸陣出去，對以色列地掠一個查某囝仔，伊就伺候乃縵的某。
5:2 有一遍，敘利亞人歸陣出去，對以色列地掠一個查某囝仔；伊就侍候乃縵的某。
5:3 伊給伊的主母講：「苦𣍐得著我的主及撒瑪利亞的先知相及佇啲，伊的確會醫好伊的癩𰣻
5:3 此個查某囝仔給伊的女主人講：「苦𣍐得我的主人會當去見撒馬利亞的先知；伊一定會當醫好主人的痲瘋病。」
5:4 有人入去給伊的主講，屬以色列地的查某囝仔按呢按呢講。
5:4 乃縵去對伊的主人講：「以色列的查某囝仔按呢按呢講。」
5:5 亞蘭王講：「你去啊，我也欲寄一張批互以色列王。」乃縵就去，帶銀十他連得，金六千，衣裳十套；
5:5 敘利亞王講：「你通去，我嘛欲寄你提一張批互以色列王。」乃縵就出發，帶三百公斤的銀、七十公斤的金、十套衣服。
5:6 帶批到以色列王遐，批內講：「批到你遐的時，看啊，我差人臣乃縵去見你，你著醫好伊的癩𰣻。」
5:6 伊閣將彼張批提互以色列王；批內按呢寫：「我派我的人臣乃縵提批去見你，你著醫好伊的痲瘋病。」
5:7 以色列王看批了，就拆裂伊的衫，講：「我豈是上帝，互人死，互人活嗎？此人竟然差人來我遮，教我醫好伊的癩𰣻。請恁斟酌想，看此人怎樣尋縫攻擊我？」
5:7 以色列王批看了，就拆裂伊的衫，講：「我豈是上帝，會當互人死，互人活？此個人竟然派人來我遮，叫我著醫好伊的人臣的痲瘋病；請恁斟酌想，看此個人按怎尋孔尋縫攻擊我。」
5:8 上帝的奴僕以利沙聽見以色列王拆裂伊的衫，就差人去見王，講：「你啥事拆裂衫啊？通互彼人到我遮，伊才知以色列中有先知。」
5:8 上帝重用的人以利沙聽見以色列王拆裂伊的衫，就差人去見王講：「你是按怎拆裂衫？互彼個人來我遮，伊就知以色列中有先知。」
5:9 乃縵就及伊的馬伊的車來徛佇以利沙的厝門口。
5:9 乃縵就帶伊的馬車隊來，停佇以利沙的厝門口。
5:10 以利沙差一個使者，給乃縵講：「你去約但河洗身軀七擺，你的肉就復原，你欲得著清氣。」
5:10 以利沙差一個使者對乃縵講：「你去約旦河洗身軀洗七遍，你的肉會復原，你就清氣。」
5:11 乃縵就受氣退去，講：「我本拍算伊的確欲出來見我，徛啲求叫耶和華──伊的上帝的名，搖手佇患著的所在，來醫好癩𰣻的。
5:11 乃縵就受氣，離開，講：「我本來想講伊一定會出來見我，徛啲求叫上主 — 伊的上帝的名，佇患著病的所在搖手，醫好我的痲瘋病。
5:12 大馬色的河亞罷拿及法珥法豈無比以色列一切的水卡好嗎？我佇遐洗身軀𣍐得著清氣嗎？」就越轉身受氣做伊去。
5:12 大馬士革的亞瑪拿河及法珥法河，豈無比以色列所有的水較好？我佇遐洗身軀豈𣍐得著清氣？」伊就受氣，越轉身做伊去。
5:13 伊的奴僕進前，給伊講：「我的父啊，先知若教你去做一件大事，你豈無欲做嗎？何況伊干單給你講洗就清氣啊？」
5:13 伊許個僕人進前，對伊講：「主人，先知若教你去做困難的代誌，你豈無欲做？何況伊干焦對你講，去洗就清氣？」
5:14 乃縵就落去，照上帝奴僕的話，佇約但河洗七擺；伊的肉復原，親像囝仔肉，伊就清氣。
5:14 乃縵就照上帝重用的人的話落去約旦河浸七遍；伊的肉復原親像囝仔的肉，伊就清氣。
5:15 伊及一切隨伊的人，倒轉來上帝的奴僕遐，徛佇伊的面前講：「看啊，我今知，除以色列以外，普天下無有上帝。今求你收你的奴僕的禮物。」
5:15 伊及所有隨伊的人轉來上帝重用的人遐，徛佇伊的面前講：「今我知，全世界以色列以外，無上帝。現在請你收你的僕人的禮物。」
5:16 伊講：「我指永活的耶和華就是我徛佇伊的面前的來咒誓，我的確收。」伊強迫伊收，伊決斷。
5:16 以利沙講：「我指我所服事永活的上主咒誓，我無收。」乃縵一再請伊收，伊攏毋肯。
5:17 乃縵講：「若，求你將二隻騾所會載的土互你的奴僕。因為對今以後，你的奴僕無閣用燒祭抑是別號的祭互別個上帝，只有獻互耶和華。
5:17 乃縵講：「你若無欲接受，請你將兩隻騾會當載的土互你的僕人。對現在起，你的僕人無欲閣對別個神明獻燒化祭抑是別款的祭，只有獻互上主。
5:18 獨獨有一項事，願耶和華赦免你的奴僕：就是我的主入臨門的廟佇遐敬拜，倚著我的手的時，閣我佇臨門的廟俯腰，就是我佇臨門的廟俯腰的時，願耶和華佇這此件事赦免你的奴僕。」
5:18 毋拘有一項事，願上主赦免你的僕人，就是我的主人入臨門廟仆拜的時，我著侍候伊，所以我嘛著佇臨門廟仆拜；願上主佇此項事赦免你的僕人。」
5:19 伊就給伊講：「你通平安去！」
伊就離開伊去；行一站仔，
5:19 以利沙就給伊講：「你通平安倒去。」
乃縵離開了，行一站路，
5:20 上帝的奴僕以利沙的差用基哈西心內講：「我的主人體貼此個亞蘭人乃縵無欲對伊的手收伊所帶來的，我指永活的耶和華來講，我欲走去趇伊，對伊提淡薄。」
5:20 上帝重用的人以利沙的僕人基哈西想講：「我的主人毋肯接受此個敘利亞人乃縵帶來的禮物；我指永活的上主咒誓，我欲走去趇伊，對伊提一寡。」
5:21 基哈西就去趇乃縵的後面。乃縵看見有人走來趇伊，就落車迎接伊，講：「攏平安嗎？」
5:21 基哈西就去趇乃縵。乃縵看著有人啲趇伊，就落車迎接伊，講：「豈有什麼代誌？」
5:22 講：「攏平安。我的主差我來講：『抵即有二個少年人，是先知的學生，對以法蓮山地來見我，請你用銀一他連得，衣裳二套互伊。』」
5:22 基哈西講：「無，無特別的代誌。毋拘我的主人差我來，講：『抵即有先知的兩個少年學生，對以法蓮山區來我遮；請你用銀三十公斤，衣服兩套互𪜶。』」
5:23 乃縵講：「通推，請收二他連得」；強迫伊，就將二他連得銀裝佇二個布袋，及二套衣裳交伊二個奴僕；二個奴僕背伊，行佇伊的頭前。
5:23 乃縵講：「請接受六十公斤。」乃縵一再請伊收。乃縵就將裝佇兩個袋仔彼六十公斤的銀，及兩套衣服，交互伊兩個僕人揹啲，行佇基哈西的頭前。
5:24 到山裡的時，基哈西對𪜶的手接來，下佇厝內，差𪜶去，𪜶就去。
5:24 𪜶到山崙仔，基哈西對𪜶的手接物件，下入去厝內；就差𪜶轉去，𪜶就倒去。
5:25 伊就入去，徛佇伊的主人的面前。以利沙問伊講：「基哈西，你對叨落來？」伊應伊講：「你的奴僕無去叨落。」
5:25 伊入去徛佇主人的面前。以利沙問伊講：「基哈西，你對叨位來？」
基哈西應講：「你的僕人無去叨位。」
5:26 以利沙給伊講：「彼人落車倒轉來迎接你的時，我的心豈無及你去嗎？這豈是受銀、受衣裳、橄欖園、葡萄園、牛、羊、奴僕、女婢的時嗎？
5:26 以利沙給伊講：「彼個人落車迎接你的時，我的心豈無及你佇遐？這豈是接受銀，接受衣服、橄欖園、葡萄園、牛、羊、僕人、女婢的時？
5:27 對按呢乃縵的癩𰣻欲傳互你及你的後裔，直到永遠。」基哈西對以利沙的面前退出去，就起癩𰣻，白親像雪。
5:27 因為按呢乃縵的痲瘋病欲傳互你及你的後代，直到永遠。」基哈西對以利沙的面前退出去，就致著痲瘋病，肉白甲親像雪。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。