上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
列王紀下
以色列及摩押戰爭
3:1 猶大王約沙法十八年，亞哈的子耶和南佇撒瑪利亞坐位做以色列王共十二年。
以色列及摩押交戰
3:1 猶大王約沙法十八年，亞哈的子約何蘭佇撒馬利亞做以色列王十二年。
3:2 伊行耶和華所看做歹的事，總是無親像伊的老父伊的老母所做的，因為𪜶老父所創巴力的柱像，伊有除去。
3:2 伊做上主看做歹的事，毋拘無親像伊的父母所做的赫呢歹，因為伊有將伊的老父所造巴力的柱像除去。
3:3 總是，伊擒住尼八的子耶羅波安互以色列犯罪彼號罪，攏無離開。
3:3 猶久伊及尼八的子耶羅波安仝款，互以色列人陷落罪，攏無停止。
3:4 摩押王米沙飼多多羊，年年用十萬隻羊仔的毛，十萬隻綿羊牨的毛進貢以色列王。
3:4 摩押王米沙飼真多羊，曾用十萬隻羊仔，十萬隻綿羊的毛，向以色列王進貢。
3:5 亞哈死了，摩押王背叛以色列王。
3:5 亞哈死了後，摩押王背叛以色列王。
3:6 彼時耶和南王出撒瑪利亞，點算以色列眾人。
3:6 彼時約何蘭王對撒馬利亞出發，召集以色列軍兵。
3:7 起身的時，差人去見猶大王約沙法，講：「摩押王背叛我，你肯及我去攻擊摩押嗎？」伊講：「我欲上去，我親像你，我的百姓親像你的百姓，我的馬親像你的馬。」
3:7 像時，伊嘛派人去見猶大王約沙法，講：「摩押王背叛我，你豈欲及我做夥去攻打摩押？」
約沙法講：「我願意及你做夥去；我的就是你的，我的人民就是你的人民，我的馬就是你的馬。
3:8 伊講：「咱欲對叨落一條路上去啊？」伊講：「對以東曠野的路。」
3:8 今咱欲對叨一條路去攻打？」
約何蘭講：「對以東曠野的路。」
3:9 以色列王及猶大王，及以東王就去，行踅七日的路站；軍隊及隨𪜶的精牲無水通飲。
3:9 以色列王及猶大王，以及以東王做夥出發；𪜶踅一大輪行七日的路站，軍隊及隨𪜶的牲生無水通飲。
3:10 以色列王講：「慘啊！耶和華聚集此三個王，欲將𪜶交佇摩押人的手。」
3:10 以色列王講：「慘啊，上主聚集咱三個王，原來是欲將咱交佇摩押人的手。」
3:11 約沙法講：「佇遮豈無耶和華的先知，咱通託伊來問耶和華嗎？」以色列王一個奴僕應講：「前傾水佇以利亞的手者，沙法的子以利沙佇遮。」
3:11 約沙法講：「遮豈無上主的先知互咱通請問上主？」
以色列王一個人臣應講：「以前啲服事以利亞，沙法的子以利沙佇遮。」
3:12 約沙法講：「伊有耶和華的話。」以色列王及約沙法，及以東王就落去見伊。
3:12 約沙法講：「伊一定有上主的話。」以色列王、約沙法，及以東王就落去見伊。
3:13 以利沙給以色列王講：「我及你甚麼干涉？通去尋你的老父的先知，及你的老母的先知。」以色列王給伊講：「是按呢，耶和華聚集此三個王，欲交佇摩押人的手。」
3:13 以利沙對以色列王講：「我及你有什麼關係？你去尋恁老父老母的先知。」
以色列王給伊講：「按呢講。上主聚集阮三個王，是欲將阮交佇摩押人的手是無？」
3:14 以利沙講：「我指永活萬軍的耶和華，就是我徛佇伊的面前的來講，我若是看猶大王約沙法的面，就看你，插你。
3:14 以利沙講：「我指我所侍奉永活的上主 — 萬軍的統帥咒誓，我若毋是尊重猶大王約沙法，就毋見你，毋插你。
3:15 今著給我叫一個樂師來遮。」樂師彈的時，耶和華的手就到以利沙。
3:15 今著給我叫一個琴師來遮。」
琴師彈的時，上主的氣力臨到以利沙。
3:16 伊就講：「耶和華按呢講：『此個山谷恁著遍遍開溝；
3:16 伊就講：「上主按呢講：『恁著佇此個山谷逐所在挖溝。
3:17 因為耶和華按呢講：恁欲無看見風，無看見雨，猶久此個山谷水欲滿滿，互恁通飲就是恁及恁的精牲恁的獸飲伊。』
3:17 因為上主按呢講：雖然恁無看見風，無看見雨；猶久此個山谷欲有水滿滿，通互恁及恁的牛羊牲生飲。』
3:18 在耶和華猶看此個做小可，伊也欲用摩押人交佇恁的手。
3:18 此個事對上主來講猶是小事；伊欲閣將摩押人交佇恁的手。
3:19 恁欲攻破逐個堅固的城及逐個媠的城，剉逐欉好的樹，塞住攏總的水泉，用石頭拍歹攏總好的田。」
3:19 恁欲攻破𪜶逐個堅固的城及媠的城，剉逐欉好的果子樹，塞牢攏總的水泉，用石頭毀壞所有好的田園。」
3:20 隔早起，獻祭的時，看啊，有水對以東的路來，遍地就有水滿滿。
3:20 隔早起獻祭的時，忽然有水對以東流來，逐所在有水滿滿。
摩押人敗走
3:21 摩押眾人聽見此三個王上來欲及𪜶交戰，就聚集見若會攑家私的以上，攏徛佇邊界。
摩押人戰敗
3:21 摩押人聽著此三個王上來，欲及𪜶交戰，所有會當攑武器的，對老到少年，攏來邊界防守。
3:22 隔早起，𪜶早早起來，日照佇水裡，摩押人看對面的水紅親像血，
3:22 隔早起𪜶早早起來，日頭照佇水面，𪜶對遠遠看，水紅親像血。
3:23 就講：「這就是血啊！許個王的確攏死，是相攻擊。摩押啊，著來去搶伊啦！」
3:23 摩押人就講：「歸個攏是血！許個王互相攻擊，一定攏死啊。摩押人啊，咱著來去搶戰利品。」
3:24 𪜶到以色列人的營，以色列人就起來攻擊摩押人，互𪜶走佇𪜶的面前。以色列人入𪜶境界，拍死摩押人，
3:24 摩押人來到以色列的軍營，以色列人起來攻擊𪜶，𪜶就逃走。以色列人追殺𪜶，
3:25 毀𪜶的城，逐人㧒石填滿攏總好的地，塞住攏總的水泉，剉𪜶逐欉好的樹，只有剩吉珥‧哈列設的石牆；甩石者四圍攻擊伊。
3:25 毀壞𪜶的城；用石頭填滿所有好的田園，塞牢攏總的水泉，閣剉𪜶逐欉好的果子樹；只有賰吉珥‧哈列設的石牆；挕石的兵四圍攻擊此個城。
3:26 摩押王看見交戰的勢面抵敵𣍐住，就帶攑刀者七百，欲衝過陣到以東王遐，總是𣍐會；
3:26 摩押王看著交戰對伊不利，就帶七百個攑刀的兵欲衝出包圍，去敘利亞王遐，毋拘無法度。
3:27 就取應該續接伊的位的大子，佇城頂獻伊做燒祭。有大痛恨到佇以色列，𪜶就離開伊，倒去𪜶本國。
3:27 伊就將欲續接伊作王的大子，佇城頂獻做燒化祭；有大受氣臨到以色列。彼三個王就離開摩押，倒去𪜶本國。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。