上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
列王紀上
先知米該雅警戒亞哈
22:1 ( 代下 18:2-27 )
以色列及亞蘭三年久無交戰。
米該雅警告亞哈
22:1 ( 代下 18:2-27 )
以色列及敘利亞三年久無交戰。
22:2 到第三年，猶大王約沙法落去以色列王遐。
22:2 到第三年，猶大王約沙法落去以色列王遐。
22:3 以色列王對伊的奴僕講：「恁豈知基列的拉末是咱的？咱竟然恬恬，無對亞蘭王的手搶來嗎？」
22:3 以色列王對伊的人臣講：「基列的拉末是咱的，恁知無？咱哪無欲採取行動，對敘利亞王的手提倒來？」
22:4 亞哈給約沙法講：「你欲及我去基列的拉末交戰嗎？」約沙法給以色列王講：「我親像你，我的百姓親像你的百姓，我的馬親像你的馬。」
22:4 亞哈對約沙法講：「你欲及我做夥去攻打基列的拉末無？」
約沙法對以色列王講：「我的就是你的，我的人民就是你的人民，我的馬就是你的馬。」
22:5 約沙法給以色列王講：「請你今仔日問耶和華的意思。」
22:5 約沙法閣對以色列王講：「請你先問上主的意思。」
22:6 以色列王就聚集先知，約略四百人，問𪜶講：「我著上去基列的拉末來交戰抑是著息啊？」𪜶講：「通上去，因為主欲將伊交佇王的手。」
22:6 以色列王就召集先知大約四百人，問𪜶講：「我通去攻打基列的拉末，抑是毋通？」
𪜶應講：「通去攻打；主欲將此個城交佇王的手。」
22:7 約沙法講：「佇遮豈無猶有耶和華的先知，互咱通對伊來問嗎？」
22:7 約沙法講：「遮豈無閣有上主的先知互咱通問？」
22:8 以色列王給約沙法講：「猶有一人，是音拉的子米該雅，咱通對伊來問耶和華。總是我怨恨伊；因為伊所讖語我的，攏無好話，只有災禍若定。」約沙法講：「請王莫得按呢講。」
22:8 以色列王給約沙法講：「猶有一個人，是音拉的子米該雅，咱通對伊請問上主；毋拘我怨恨伊，因為伊對我講的預言無一項好，只有講災禍。」
約沙法講：「請王毋通按呢講。」
22:9 以色列王就召一個官員來，講：「你去叫音拉的子米該雅緊緊來。」
22:9 以色列王就召一個官員來，講：「你趕緊去叫音拉的子米該雅來。」
22:10 以色列王及猶大王約沙法，逐個坐伊的座位，穿禮服，佇撒瑪利亞城門口闊的所在，眾先知逐個佇𪜶的面前讖語。
22:10 以色列王及猶大王約沙法佇撒馬利亞城門口的五穀場，穿禮服，坐佇𪜶的寶座；所有的先知攏佇𪜶的面前講預言。
22:11 基拿拿的子西底家做鐵角，講：「耶和華按呢講：『你欲用諸個觸亞蘭人，到𪜶滅無。』」
22:11 基拿拿的子西底家做鐵的角，講：「上主按呢講：『你欲用諸個鐵角觸敘利亞人，觸甲𪜶攏消滅。』」
22:12 眾先知攏按呢讖語講：「通上去基列的拉末，欲得勝，因為耶和華欲將伊交佇王的手。」
22:12 所有的先知攏按呢預言講：「通去攻打基列的拉末，一定得勝，上主欲將此個城交佇王的手。」
22:13 彼個去叫米該雅的使者給伊講：「看啊，眾先知攏講一樣話，對王講好事，求你所講的及𪜶相同，平平講好話。」
22:13 彼個去叫米該雅的使者給伊講：「你看，所有的先知攏對王講好話，請你嘛及𪜶像款講好話。」
22:14 米該雅講：「我指永活的耶和華來講，耶和華對我講甚麼，我欲講伊。」
22:14 米該雅講：「我指永活的上主咒誓，上主對我講什麼，我就對王講什麼。」
22:15 米該雅到王的面前，王問伊講：「米該雅啊，阮通上去基列的拉末來交戰抑是著息啊？」伊應講：「通上去，欲得勝，耶和華欲將伊交佇王的手。」
22:15 米該雅來到王的面前，王問伊講：「米該雅，阮通去攻打基列的拉末，抑是毋通？」
伊應講：「好啊，做你去攻打，一定會勝利；上主欲將此個城交佇王的手。」
22:16 王對伊講：「我著幾擺教你咒誓，你託耶和華的名只有著用真實給我講？」
22:16 王對伊講：「我著叫你咒誓幾遍，你才會奉上主的名對我講實在話？」
22:17 米該雅講：「我看見以色列眾百姓四散佇山裡，親像無牧者的羊一般。耶和華按呢講：『諸個無主人，𪜶逐個通平安倒去𪜶的家。』」
22:17 米該雅講：「我看見以色列眾人親像無牧者的羊四散佇山裡；上主按呢講：『諸個人無主人；逐個人通平安倒去𪜶兜。』」
22:18 以色列王給約沙法講：「我豈無給你講，此人所欲讖語我的，無講好話只有災禍若定。」
22:18 以色列王對約沙法講：「我豈無給你講，此個人對我講的預言攏無好話，只有講災禍。」
22:19 米該雅講：「所以你著聽耶和華的話！我看見耶和華坐佇寶座，天頂的萬軍徛佇伊的左右。
22:19 米該雅繼續講：「所以，著聽上主的話！我看見上主坐佇寶座，天頂的萬軍徛佇伊的正旁倒旁。
22:20 耶和華講：『是誰欲引誘亞哈互伊上去基列的拉末死佇遐啊？』此個講按呢，彼個講按呢。
22:20 上主講：『什麼人欲引誘亞哈，互伊去基列的拉末，死佇遐？』此個講按呢，彼個講按呢。
22:21 後來有一個神出來，徛佇耶和華的面前，講：『我欲引誘伊。』
22:21 後來有一個神出來，徛佇上主的面前，講：『我去給伊引誘。』
22:22 耶和華問伊講：『你欲用甚麼法度？』伊講：『我欲出去，做白賊的神佇伊眾先知的嘴。』耶和華講：『你欲引誘伊，也欲成伊，出去來做按呢！』
22:22 上主問伊講：『你欲按怎給引誘？』伊應講：『我欲出去做白賊的神，互許個先知講白賊。』上主講：『你給伊引誘，一定會成功。你去，照按呢做。』
22:23 今耶和華用白賊的神入佇你諸個先知的嘴，耶和華論到你有講災禍。」
22:23 現在上主有互白賊的神入佇你諸個先知的嘴；上主宣布欲降災禍互你。」
22:24 基拿拿的子西底家進前，搧米該雅的嘴䩃，講：「耶和華的神對叨落一條路離開我來及你講啊？」
22:24 基拿拿的子西底家行進前，搧米該雅的嘴䩃，講：「上主的神什麼時離開我來對你講話？」
22:25 米該雅講：「看啊，你入內房家己匿，彼日就欲看見。」
22:25 米該雅講：「你去匿佇密房彼日就會知。」
22:26 以色列王講：「著帶米該雅去，交城守亞捫及王的子約阿施，講，
22:26 以色列王講：「將米該雅掠起來，交互市長亞們及王的子約阿施，
22:27 王按呢講，用此人關佇監裡，用艱苦的餅，艱苦的水互伊食，聽候我平安倒來。」
22:27 給𪜶講：『王交代：將此個人關落監，互伊一屑仔餅及水就好，聽候我平安倒來。』」
22:28 米該雅講：「你若真正平安倒來，就是耶和華無託我講」；閣講：「諸個百姓啊，恁攏著聽！」
22:28 米該雅講：「你若真正平安倒來，就是上主無託我講話。」閣講：「恁大家，著會記得我講的話！」
亞哈陣亡
22:29 ( 代下 18:28-34 )
以色列王及猶大王約沙法上去基列的拉末。
亞哈戰死
22:29 ( 代下 18:28-34 )
以色列王亞哈及猶大王約沙法去進攻基列的拉末。
22:30 以色列王給約沙法講：「我欲改裝上陣，你通穿王服。」以色列王就改裝上陣。
22:30 以色列王對約沙法講：「我欲改裝上戰場，你通穿你的王服。」以色列王就改裝上陣。
22:31 亞蘭王有吩咐伊的戰車的官長三十二個講：「無論大細，通及𪜶交戰，只有及以色列王交戰。」
22:31 敘利亞王有吩咐伊三十二個戰車長，講：「毋通及𪜶的士兵抑是官長交戰，只有及以色列王交戰。」
22:32 戰車的官長看見約沙法，就講：「這必定是以色列王！」就越轉欲及伊交戰，約沙法就哮救。
22:32 戰車長看著約沙法就講：「此個一定是以色列王！」𪜶就斡去欲攻擊伊。約沙法就喝救命。
22:33 戰車的官長看見是以色列王，就越轉去無追伊。
22:33 戰車長一下看著伊毋是以色列王，就越走無閣追伊。
22:34 有一人偶然開弓，射入以色列王戰甲的合叕。王給趕車者講：「你越轉手，帶我出陣，因為我著重傷。」
22:34 有一個敘利亞的兵仔開弓，無拍算射入以色列王戰甲的敆綴。王給駛車的講：「我著重傷。緊踅翻頭，帶我離開戰場。」
22:35 彼日，交戰的勢面愈猛烈，有人扶王佇車裡，抵當亞蘭人。到日暗，王就死，血對著傷的所在流到車底。
22:35 彼日，交戰非常猛烈。有人扶王互伊徛佇車裡，面向敘利亞人；到黃昏王就死，血對著傷的孔嘴流到車底。
22:36 日欲落的時，有號令遍傳佇軍營中，講：「逐人倒去本城，逐人倒去本地。」
22:36 日欲落的時，有聲傳遍軍營，講：「逐個人倒去家己的本城，倒去家己的本地。」
22:37 王死，帶伊到撒瑪利亞，𪜶埋葬王佇撒瑪利亞；
22:37 王死，人將伊帶倒去撒馬利亞；𪜶將王安葬佇遐。
22:38 有人洗伊的車佇撒瑪利亞的池邊，狗來舐伊的血，抵照耶和華所講的話（娼妓也佇遐洗身軀）。
22:38 有人佇撒馬利亞的水池邊洗伊的車 (娼妓嘛佇遐洗身軀)，狗來舐伊的血，抵照上主所講的話。
22:39 亞哈其餘的事，見伊所行的及伊所起象牙的厝，以及所起攏總的城，豈無記佇以色列諸個王的記錄嗎？
22:39 亞哈其他的事蹟，及伊的所做，以及伊起造象牙宮及城，攏記載佇《以色列列王史》。
22:40 亞哈及伊的列祖同睏。伊的子亞哈謝續接伊做王。
22:40 亞哈轉去伊的列祖遐；伊的子亞哈謝續接伊作王。
猶大國的王約沙法
22:41 ( 代下 20:31—21:1 )
以色列王亞哈第四年，亞撒的子約沙法坐位做猶大王。
猶大王約沙法
22:41 ( 代下 20:31-21:1 )
以色列王亞哈第四年，亞撒的子約沙法做猶大王。
22:42 約沙法坐位的時三十五歲，佇耶路撒冷做王二十五年。伊的老母名叫阿蘇巴，就是示利希的查某子。
22:42 約沙法坐位的時三十五歲，佇耶路撒冷作王二十五年；伊的老母叫做阿蘇芭，是示利希的查某子。
22:43 約沙法行伊的老父亞撒許個路，無越轉離開伊，行耶和華看做好的事；總是山頭壇猶未廢無，百姓猶原獻祭燒香佇山頭壇。
22:43 約沙法行伊老父亞撒的路，攏無偏離，做上主看做好的事；毋拘山頭壇猶未廢除，人民猶原佇遐獻祭燒香。
22:44 約沙法及以色列王立約和好。
22:44 約沙法及以色列王和平相處。
22:45 約沙法其餘的事及伊所顯出的能力，及伊怎樣交戰，豈無攏記佇猶大列王的記錄嗎？
22:45 約沙法其他的事蹟、伊的成就，以及按怎交戰，攏記載佇《猶大列王史》。
22:46 伊的老父亞撒的時所留落來的孌童，約沙法對國內除去。
22:46 伊的老父亞撒留落來的孌童，約沙法攏對國內除去。
22:47 彼時以東無王，有委員管理伊。
22:47 彼時以東無王，約沙法派總督治理。
22:48 約沙法造他施的船隻，欲去俄斐運金來；總是無去，因為船拍破佇以旬‧迦別。
22:48 約沙法造他施的船隊欲去俄斐運金來；毋拘去無成，因為船佇以旬‧迦別失事。
22:49 亞哈的子亞哈謝給約沙法講：「容允我的奴僕及你的奴僕坐船相及去！」總是約沙法肯。
22:49 亞哈的子亞哈謝對約沙法講：「請互我的部下及你的部下坐船做夥去。」毋拘約沙法毋肯。
22:50 約沙法及列祖同睏。及伊的列祖葬佇伊的祖大衛的城。伊的子耶和南續接伊做王。
22:50 約沙法轉去伊的列祖遐，及伊的列祖安葬佇大闢城；伊的子約蘭續接伊作王。
以色列國的王亞哈謝
22:51 猶大王約沙法十七年，亞哈的子亞哈謝佇撒瑪利亞坐位做以色列王，做王佇以色列歷過二年。
以色列王亞哈謝
22:51 猶大王約沙法十七年，亞哈的子亞哈謝佇撒馬利亞做以色列王，統治以色列兩年。
22:52 伊行耶和華看做歹的事，行伊的父的路，及伊的老母的路，及互以色列犯罪的尼八的子耶羅波安的路。
22:52 伊做上主看做歹的事，行伊的老父及老母的路，就是行尼八的子耶羅波安的路，互以色列人陷落罪。
22:53 伊照𪜶老父一切所行的，服事巴力來敬拜伊，激耶和華──以色列上帝的受氣。
22:53 伊及伊的老父仝款服事敬拜巴力，激上主 — 以色列的上帝受氣。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。