上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
列王紀上
及亞蘭人爭戰
20:1 亞蘭王便‧哈達聚集伊的全軍，有三十二個王及伊去，有馬有車上去圍撒瑪利亞來攻伊；
及敘利亞人交戰
20:1 敘利亞王便‧哈達召集伊的全軍，有三十二個王及伊去，有馬，有戰車，上去圍攻撒馬利亞。
20:2 閣差使者入城見以色列王亞哈，給伊講：「便‧哈達按呢講：
20:2 閣派使者入城去見以色列王亞哈，對伊講：「便‧哈達按呢講：
20:3 你的銀你的金攏是我的，你許個某你許個子兒第一媠的也是我的。」
20:3 『你的金銀攏著交互我，你許個某及子兒上媠的嘛攏是我的。』」
20:4 以色列王應講：「我的主我的王啊，照你的話，我及我所有的攏是你的。」
20:4 以色列王應講：「我的主，我的王，照你的話，我及我所有的攏是你的。」
20:5 使者閣來講：「便‧哈達按呢講：我卻有差人去見你，愛你將你的銀金、某、子兒攏交互我。
20:5 使者閣來講：「便‧哈達按呢講：『我已經有派人去給你講，愛你將你的金、銀、某、子兒，攏交互我。
20:6 總是明仔日約略此時，我欲差我的使者到你遐，搜尋你的厝及你的奴僕的厝，見若你所看做好的，𪜶欲親手帶去。」
20:6 明仔載此個時，我欲閣派我的人臣來你遮，抄你及你的人臣的厝，所有你合意的，𪜶攏欲提去。』」
20:7 以色列王召國內的長老攏來，給𪜶講：「恁看，此個人刁持尋縫欲害我，伊曾差人來我遮，欲我的某、子兒、及金銀，我無推辭伊。」
20:7 以色列王召集國內的長老，對𪜶講：「恁看，此個人刁持尋縫欲害我；伊有派人來我遮，欲愛我的某、子兒，及金銀，我攏無拒絕。」
20:8 長老及眾百姓攏給王講：「通聽伊，也通允伊。」
20:8 長老及眾人民攏給王講：「聽伊，嘛毋通答應伊。」
20:9 所以，王給便‧哈達的使者講：「恁給我的主我的王講：你代先差人對你的奴僕所討的，我有允；總是此個，我𣍐行得。」使者就倒去回覆。
20:9 所以王給便‧哈達的使者講：「恁給我的主我的王講：『你頭一遍派人對你的僕人要求的我會互你；毋拘此遍的要求我做𣍐到。』」使者就倒去回復。
20:10 便‧哈達閣差人講：「撒瑪利亞的土粉若有夠額互隨我的人逐人搣一把，就願許個上帝加倍責罰我！」
20:10 便‧哈達閣派人來，講：「撒馬利亞的土粉，若有夠互隨我的人逐個搣一把，願神明加倍責罰我。」
20:11 以色列王應講：「恁給伊講，穿盔甲者，通親像褪盔甲者來誇口。」
20:11 以色列王應講：「恁給伊講：『抵仔穿戰甲的，毋通親像褪戰甲的誇口。』」
20:12 便‧哈達及許個王佇布棚內飲酒，聽見諸個話，就給伊的人臣講：「通排陣！」𪜶就排陣攻城。
20:12 便‧哈達及許個王佇布棚內飲酒，聽著諸個話，就給伊的人臣講：「排陣進攻！」𪜶就排陣攻城。
20:13 有一個先知來見以色列王亞哈，講：「耶和華按呢講：『你有看見此大陣的人無？看啊，今仔日我欲將𪜶交佇你的手，你就知我是耶和華。』」
20:13 有一個先知來見以色列王亞哈，講：「上主按呢講：『你有看著此大陣人無？看咧，今仔日我欲將𪜶交佇你的手，你就知我是上主。』」
20:14 亞哈講：「欲用是誰啊？」伊應講：「耶和華按呢講，用諸個省長的少年人。」亞哈講：「甚麼人欲排陣啊？」伊應講：「就是你。」
20:14 亞哈講：「欲派什麼人？」
伊應講：「上主按呢講：『用諸個省長的少年軍兵。』」
亞哈講：「什麼人欲導頭進攻？」
伊應講：「就是你。」
20:15 伊就算許個省長的少年人，共有二百三十二名，後來伊閣算眾百姓就是以色列人，共七千名。
20:15 亞哈就點算省長的少年軍兵，有兩百三十二名；後來伊閣點算以色列的軍兵，共七千名。
20:16 日中晝的時，𪜶就出去；便‧哈達及許個王就是幫助伊的三十二個王佇布棚內食酒醉。
20:16 日中晝，𪜶就出戰。便‧哈達及許個來幫贊伊的三十二個王，佇布棚內飲酒醉。
20:17 許個省長的少年人做頭出去；便‧哈達差人去探覓，𪜶回覆講：「有人對撒瑪利亞出來。」
20:17 許個省長的少年軍兵做頭出去。便‧哈達派人去探查，𪜶回復講：「有人對撒馬利亞出來。」
20:18 伊講：「𪜶若為著講和出來，著活活掠𪜶；若為著交戰出來，也著活活掠𪜶。」
20:18 伊講：「不管是出來欲講和，抑是欲交戰，攏給𪜶活活掠起來。」
20:19 許個省長的少年人出城，軍兵隨𪜶；
20:19 許個省長的少年軍兵出城，軍兵隨𪜶；
20:20 逐人刣伊的對敵。亞蘭人逃走，以色列人趇𪜶；亞蘭王便‧哈達騎馬及許個馬兵逃脫。
20:20 逐個人刣死伊的對敵。敘利亞人逃走，以色列人趇𪜶。敘利亞王便‧哈達騎馬，及許個馬兵逃走。
20:21 以色列王出城，拍許個車及馬，大大刣死亞蘭人。
20:21 以色列王出城，攻擊許個戰車及戰馬，刣死真多敘利亞人。
20:22 彼個先知來見以色列王，給伊講：「你著家己強壯，謹慎著怎樣做；因為明年此時，亞蘭王欲上來攻擊你。」
20:22 彼個先知來見以色列王，對伊講：「你著加強軍力，欲做什麼著好好計劃；明年春天，敘利亞王會閣來攻擊你。」
亞蘭人第二擺來犯
20:23 亞蘭王的人臣給伊講：「以色列人的上帝是山頭的上帝，所以𪜶卡贏咱；總是咱若佇平洋及𪜶交戰，就會卡贏𪜶。
敘利亞人閣來侵犯
20:23 敘利亞王的人臣對伊講：「以色列人的上帝是山神，所以𪜶刣贏咱；毋拘若佇平原及𪜶交戰，咱一定會刣贏。
20:24 著按呢行：許個王逐個著免職，立軍長來替𪜶，
20:24 請你按呢做；解除許個王的職務，派省長代替𪜶。
20:25 閣招募一隊軍兵，照你所失落的軍兵，用馬補馬，用車補車，咱佇平洋及𪜶交戰，穩當會贏。」王就聽𪜶的話去行。
20:25 閣照你損失的數目招募一隊軍兵，戰馬補戰馬，戰車補戰車。咱佇平原及𪜶交戰，穩當贏。」王就聽𪜶的建議去做。
20:26 隔年，便‧哈達點算亞蘭人上去亞弗，欲及以色列人交戰。
20:26 隔年春天，便‧哈達點算敘利亞人，上去亞弗，欲及以色列人交戰。
20:27 以色列人也點算𪜶的數額，備辦軍糧，出去抵敵伊，紮營佇𪜶的對面，親像二小群的山羊仔；總是亞蘭人滿地面。
20:27 以色列人嘛召集軍兵，準備軍糧，出去欲及𪜶交戰，佇𪜶的對面紮營。以色列人親像兩隊小群的山羊仔；毋拘敘利亞人遍滿地面。
20:28 有上帝的奴僕來見以色列王，講：「耶和華按呢講：『因為亞蘭人講──耶和華是山頭的上帝，是山谷的上帝，所以我欲將此大陣的人攏交佇你的手，恁就知我是耶和華。』」
20:28 有一個上帝重用的人來見以色列王，講：「上主按呢講：『因為敘利亞人講上主是山神，毋是平原的神，所以我欲將此大陣的人攏交佇你的手；恁就知我是上主。』」
20:29 就紮營大家相對面七日，到第七日雙旁軍兵交戰；佇此日以色列人刣死亞蘭人步兵十萬，
20:29 以色列人及敘利亞人相對紮營七日；到第七日，雙旁軍兵交戰。佇彼一日，以色列人刣死敘利亞人步兵十萬。
20:30 其餘的走入亞弗城；彼個城牆倒，壓死所剩的二萬七千人。
便‧哈達走入城，匿佇內房。
20:30 其他的軍兵逃走入去亞弗城；彼個城的城牆倒，硩死所賰的兩萬七千人。便‧哈達走入城，匿佇一間厝的密房。
20:31 伊的人臣給伊講：「看啊，阮聽見以色列家的列王是仁慈的王，求你准阮縖麻布佇阮的腰，頭殼披索，出去投降以色列王，豈採伊欲饒你的生命。」
20:31 伊的人臣給伊講：「阮聽講以色列家的王攏真仁慈；求你允准阮腰縖麻布，頷頸套索，出去投降以色列王；豈採伊會留你的性命。」
20:32 𪜶就腰縖麻布，頭殼披索，去見以色列王，講：「你的奴僕便‧哈達講，求你饒我的生命。」亞哈講：「伊猶活啲嗎？伊是我的兄弟。」
20:32 𪜶就腰縖麻布，頷頸套索，去見以色列王，講：「你的僕人便‧哈達講：『求你留我的性命。』」
亞哈講：「伊猶活啲噢？伊是我的兄弟。」
20:33 許個人斟酌聽伊的口氣，連鞭順伊的話尾講：「你的兄弟便‧哈達！」伊講：「恁去導伊來。」便‧哈達出來見王，王就互伊坐車。
20:33 許個人斟酌聽伊的口氣，連鞭順伊的話尾講：「是，便‧哈達是你的兄弟。」
亞哈講：「恁去導伊來。」便‧哈達出來見王，王就請伊坐王的車。
20:34 便‧哈達給伊講：「我的父對你的父所搶許個城，我欲還你。閣你通佇大馬色設街市，親像我的父佇 撒瑪利亞所設的一樣。」亞哈講：「我照此個約，放你倒去」，就及伊立約，放伊倒去。
20:34 便‧哈達對亞哈講：「我的老父對你的老父搶來的城，我攏欲還你；閣你通佇大馬士革設商場，親像我的老父佇撒馬利亞設的仝款。」
亞哈講：「我照此個約放你倒去。」亞哈就及伊定條約，放伊倒去。
先知責備亞哈放對敵倒去
20:35 有先知的學生的一人用耶和華的話給伊的同伴講：「請你拍我！」彼人肯拍伊。
先知責備亞哈
20:35 有一個人，是先知的學生，奉上主的話給伊的同伴講：「拍我！」彼個人毋肯給伊拍。
20:36 伊就給伊講：「因為你趁耶和華的話，你一下離開我，欲有獅咬死你。」伊一下離開伊去，果然有獅抵著，來咬死伊。
20:36 伊就給伊的同伴講：「因為你毋聽上主的話，你一下離開我，會互獅咬死。」彼個人一下離開，果然抵著獅，互獅咬死。
20:37 伊閣抵著一人，給伊講：「請你拍我！」伊就拍伊，拍到著傷。
20:37 伊閣抵著一個人，給伊講：「拍我！」彼個人就給伊拍，拍到著傷。
20:38 先知就去，佇路裡聽候王，改伊的容貌，用巾罩目睭。
20:38 先知就將頭巾蓋到目睭，改裝，佇路裡聽候王。
20:39 王對遐經過的時，伊叫王講：「你的奴僕出陣，有一人越來邊仔，閣導一人來，交我講：『你顧守此個人，若伊失落，你的生命著替伊的生命；若無，你著交出一他連得的銀。』
20:39 王對遐經過的時，伊大聲對王講：「你的僕人出戰的時，有一個人掠一個俘虜來交我，講：『你著顧守此個人；伊若走去，你的性命著替伊的性命；若無，你著交出三十四公斤的銀。』
20:40 你的奴僕顧此項彼項的時，彼人續無去。」以色列王給伊講：「你的案件按呢，你已經家己判斷。」
20:40 你的僕人無閒此項彼項的時，彼個俘虜續走去。」
以色列王給伊講：「你的話已經給家己判罪啊。」
20:41 伊趕緊除去罩目睭的巾，以色列王就認得伊是先知的一個。
20:41 伊趕緊將蓋目睭的頭巾提掉；以色列王就認出伊是一個先知。
20:42 伊給王講：「耶和華按呢講：『因為你將我所定著欲滅的人放互伊去，你的生命就著替伊的生命，你的百姓就著替伊的百姓。』」
20:42 伊給王講：「上主按呢講：『因為你將我決定欲毀滅的人放互去，所以你的性命著替伊的性命，你的人民著替伊的人民受毀滅。』」
20:43 以色列王就鬱悶無歡喜到撒瑪利亞，倒去伊的厝。
20:43 以色列王就鬱卒無歡喜，倒去撒馬利亞伊的王宮。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。