上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
列王紀上
以利亞及巴力的先知
18:1 過多多日，佇第三年，耶和華的話臨到以利亞講：「你去互亞哈看見你；我欲落雨佇地上。」
以利亞及巴力的先知
18:1 經過一段時間，到第三年，上主的話臨到以利亞講：「你去見亞哈；我欲落雨佇地面上。」
18:2 以利亞就去，欲互亞哈看見。彼時，撒瑪利亞飢荒真大；
18:2 以利亞就去，欲見亞哈；彼時撒馬利亞飢荒真嚴重。
18:3 亞哈就叫伊的管家者俄巴底來。（俄巴底不止敬畏耶和華，
18:3 亞哈就叫伊的管家俄巴底亞來。(俄巴底亞不止敬畏上主。
18:4 因為耶洗別滅耶和華諸個先知的時，俄巴底用先知一百人囥佇洞內，五十人做一組，用餅及水養飼𪜶。）
18:4 耶洗碧啲刣上主的先知的時，俄巴底亞將先知一百人藏起來，每五十人藏佇一個洞內，用餅及水供給𪜶。)
18:5 亞哈給俄巴底講：「遍行此個地，到一切的水泉邊及一切的溪邊；豈採咱會得著青草，通互馬騾活啲，免得精牲一盡失落。」
18:5 亞哈給俄巴底亞講：「你著四界去尋，到所有的水泉邊及溪邊，看會當尋著青草𣍐，通互馬、騾活啲，才免牲生死去。」
18:6 對按呢𪜶分地欲遍行，亞哈家己行一條路，俄巴底也家己行一條路。
18:6 𪜶就分區域去尋。亞哈行一條路，俄巴底亞家己行另外一條路。
18:7 俄巴底佇路裡，以利亞抵著伊，俄巴底認得伊，就仆落去，講：「你是我的主以利亞嗎？」
18:7 俄巴底亞佇路裡抵著以利亞；俄巴底亞認著伊，就仆落去，講：「你是我的主以利亞是無？」
18:8 應講：「是。你去給你的主講，以利亞佇遮。」
18:8 伊應講：「是。去給你的主人講，以利亞佇遮。」
18:9 俄巴底講：「我有犯甚麼罪，你竟然欲將你的奴僕交佇亞哈的手，來害死我嗎？
18:9 俄巴底亞講：「你的僕人有犯什麼罪，你竟然欲害我互亞哈刣死？
18:10 我指永活的耶和華──你的上帝來講，無一族無一國，我的主無差人到遐尋你。𪜶若講伊無佇遮，就教彼國彼族的人咒誓講，𪜶實在無抵著你。
18:10 我指永活的上主 — 你的上帝咒誓：逐族，逐國，我的主攏派人去啲尋你；𪜶若講『伊無佇遮』，就叫彼國彼族的人咒誓講，𪜶實在尋𣍐著你。
18:11 今你講，去給你的主講，以利亞佇遮；
18:11 今你講：『去給你的主人講：以利亞佇遮。』
18:12 我一下離開你，耶和華的神欲帶你到我所知的所在。我去給亞哈講，也伊尋你𣍐著，就欲刣死我；總是你的奴僕對少年是敬畏耶和華。
18:12 我一下離開，上主的神毋知欲給你帶去什麼所在。我若去給亞哈講你佇遮，伊來若尋無你，就會給我刣死。毋拘你的僕人對少年就敬畏上主。
18:13 當耶洗別刣耶和華眾先知的時，我所做豈無人給我的主講嗎？就是我將耶和華的先知一百人囥佇洞裡，五十人做一組，用餅及水養伺𪜶。
18:13 當耶洗碧啲刣上主的先知的時，我所做的豈無人給我的主講？我有將一百個上主的先知藏起來，每五十人藏佇一個洞內，用餅及水供給𪜶。
18:14 今你講，去給你的主講，以利亞佇遮，伊的確會刣死我。」
18:14 今你講：『去給你的主人講：以利亞佇遮。』伊一定會給我刣死。」
18:15 以利亞講：「我指永活萬軍的耶和華，就是我徛佇伊的面前者，來講，今仔日我的確欲互亞哈看見我。」
18:15 以利亞講：「我指我所服事的上主 — 萬軍的統帥咒誓講，今仔日我一定欲互亞哈看著我。」
18:16 俄巴底就去見亞哈，給伊講：亞哈就來見以利亞。
18:16 俄巴底亞就去見亞哈，給伊報告。亞哈就來見以利亞。
18:17 亞哈看見以利亞的時，亞哈就給伊講：「你此個陷害以色列者啊？」
18:17 亞哈看著以利亞就給伊講：「你此個害以色列悽慘落魄的！」
18:18 以利亞應講：「陷害以色列者是我，是你及你的老父的家；因為恁棄拺耶和華的誡命，去隨許個巴力。
18:18 以利亞應講：「害以色列悽慘落魄的毋是我，是你及你的老父的家；因為恁棄拺上主的誡命，去隨巴力。
18:19 今你著差人，聚集以色列眾人及巴力的先知四百五十人，以及亞舍拉的先知四百人食佇耶洗別的桌者，攏去迦密山到我遐。」
18:19 今你著派人去召集以色列眾人，以及食耶洗碧的飯的巴力先知四百五十人，及亞舍拉的先知四百人，叫𪜶攏去迦密山我遐。」
18:20 亞哈就差人去以色列眾人遐，招集諸個先知到迦密山。
18:20 亞哈就派人去以色列眾人遐，召集先知去迦密山。
18:21 以利亞就近眾百姓講：「恁存二樣心無決斷欲到甚麼時啊？若耶和華是上帝，就著趁耶和華；若巴力是上帝就著趁巴力。」百姓無應一句話。
18:21 以利亞行倚眾人，對𪜶講：「恁心存兩意無欲決斷，欲到什麼時？若上主是上帝，就著順趁上主；若巴力是上帝，就著順趁巴力。」眾人一句話都無應。
18:22 以利亞給百姓講：「耶和華的先知只有剩我一人；總是巴力的先知有四百五十人。
18:22 以利亞閣給眾人講：「上主的先知只有賰我一個，毋拘巴力的先知有四百五十人。
18:23 今著用二隻牛牨仔互阮，巴力的先知通為家己揀一隻牛仔，切歸塊，下佇柴頂，下面通橐火；我料理彼隻牛仔，下佇柴頂，下面也無橐火。
18:23 給阮牽兩隻牛仔來，巴力的先知先揀一隻，切歸塊歸塊，下佇柴頂，毋通起火；我嘛會準備另外彼隻牛，下佇柴頂，嘛𣍐起火。
18:24 恁求叫恁的上帝的名，我求叫耶和華的名。彼個用火顯應的上帝，就是上帝。」眾百姓應講：「此個話真好。」
18:24 互巴力的先知求叫𪜶神明的名，我求叫上主的名。叨一個用火回應祈禱，彼個就是上帝。」眾人攏贊成。
18:25 以利亞對巴力的先知講：「恁為家己揀一隻牛牨仔，代先料理伊，因為恁人額卡多，恁求叫恁上帝的名，獨獨通橐火佇下面。」
18:25 以利亞對巴力的先知講：「恁揀一隻牛仔，先去準備，因為恁人較多，恁求叫恁的神明的名，毋拘毋通起火。」
18:26 𪜶就將所互𪜶的牛牨仔去料理伊，對早起到日晝，求叫巴力的名講：「巴力啊，著聽阮！」總是無聲說，也無應答。𪜶佇所起的壇周圍趒跳。
18:26 許個先知將互𪜶的牛仔攢好勢；對早起到日晝求叫巴力的名，講：「巴力啊，著應阮。」毋拘無聲無說，攏無應答；𪜶佇所起的壇周圍趒跳。
18:27 到中晝，以利亞譏刺𪜶，講：「大聲求叫啦！因為伊是上帝，伊豈採靜靜啲想，抑是退去偏僻的所在，抑是行路，抑是啲睏，恁著叫伊醒。」
18:27 到中晝，以利亞譏刺𪜶講：「喝較大聲咧！伊是神明，可能伊是啲默想，抑是啲無閒，抑是出外去旅遊，抑是啲睏，恁著給伊叫醒。」
18:28 𪜶大聲求叫，照𪜶的例，用刀用槍家己割，致到𪜶的身軀流血。
18:28 𪜶大聲求叫，照𪜶的儀式，用刀刜，用槍鑿家己，致到歸身軀流血。
18:29 對日過晝到獻下昏祭的時，𪜶啲講𪜶的先知話；總是無聲說，無應答也無插𪜶的。
18:29 對過晝到獻下昏祭的時，𪜶大聲嚷，烏白喝；毋拘攏無應答，無動靜，嘛無什麼回應。
18:30 以利亞給眾百姓講：「恁來近倚我。」眾百姓就近倚伊。伊就閣修理耶和華倒壞的壇。
18:30 以利亞給眾人講：「恁倚來我遮。」眾人就近倚來伊遐；伊就整修倒壞的上主的祭壇。
18:31 以利亞取十二塊石，照雅各的子的支派的數額（此個雅各就是前耶和華的話曾臨到伊講：「以色列欲做你的名者」），
18:31 以利亞照雅各子孫十二支族的數目提十二塊石；上主曾對雅各講：「你的名欲叫做以色列。」
18:32 以利亞用諸個石頭，奉耶和華的名起一座壇，佇壇的周圍開溝，會貯得種子二細亞，
18:32 以利亞用諸個石頭，奉上主的名起一座壇，佇壇的周圍開會貯得十四公升種籽的溝。
18:33 閣排列柴，將牛仔切歸塊下佇柴頂，講：「恁用四個桶貯水滿滿，傾佇燒祭及柴的頂面」；
18:33 閣排柴，將牛切一塊一塊，下佇柴頂；講：「用四桶貯淀淀的水，摒佇燒化祭及柴的頂面。」
18:34 閣講：「傾第二擺。」𪜶就傾第二擺；閣講：「傾第三擺。」𪜶就傾第三擺。
18:34 閣講：「摒第二遍。」𪜶就摒第二遍；閣講：「摒第三遍。」𪜶就摒第三遍。
18:35 水流佇壇的四圍，溝也有水滿滿。
18:35 水流佇壇的四圍，溝嘛有水滿滿。
18:36 到獻下昏祭的時，先知以利亞近前來，講：「亞伯拉罕、以撒、以色列的上帝，耶和華啊，求你今仔日互人知你佇以色列做上帝，也知我是你的奴僕，閣是照你的話來行這一切的事。
18:36 到獻下昏祭的時，先知以利亞行倚祭壇，講：「上主 — 亞伯拉罕、以撒、雅各的上帝，求你今仔日互人知你是以色列的上帝，嘛知我是你的僕人，閣照你的話做諸個一切的代誌。
18:37 耶和華啊，著聽我，著聽我！互此國的百姓知你──耶和華就是上帝，你互𪜶的心越倒轉。」
18:37 上主啊，著應我，著應我，互諸個人民知上主你就是上帝，互𪜶的心越倒轉。」
18:38 耶和華的火就降落，一盡燒伊的燒祭、及柴、及石、及土，閣燒乾溝內的水。
18:38 上主就降火，將燒化祭、柴、石頭，及土燒了了，溝內的水攏燒甲焦焦。
18:39 眾百姓看見，就仆佇地裡，講：「耶和華伊是上帝！耶和華伊是上帝！」
18:39 眾人看著，就仆佇土腳講：「上主，伊是上帝！上主，伊是上帝。」
18:40 以利亞給𪜶講：「掠巴力的先知，無容允一個逃走！」𪜶就掠𪜶。以利亞帶𪜶落去到基順溪邊，佇遐刣𪜶。
18:40 以利亞給𪜶講：「給巴力的先知掠起來，連一個都毋通互走去。」眾人就掠𪜶；以利亞就帶𪜶落去基順溪邊，佇遐給𪜶刣死。
旱災停止
18:41 以利亞給亞哈講：「你今通上去飲食，因為有大雨的聲。」
旱災結束
18:41 以利亞給亞哈講：「今你通去飲食；因為有聽著大雨的聲。」
18:42 亞哈就上去飲食。以利亞上去迦密山頂，屈身佇地裡，面仆佇二個腳頭窩的中間；
18:42 亞哈就去飲食。以利亞上去迦密山頂，跪佇土腳，面俯佇兩個腳頭窩的中央。
18:43 對伊的奴僕講：「你上去，向海看。」奴僕就上去看，講：「攏無甚麼。」伊講：「你閣去。」著到七擺。
18:43 以利亞對伊的僕人講：「你上去，看海彼旁。」
僕人就上去看，講：「無看著什麼。」
以利亞講：「你閣去。」伊連續叫伊去看七遍。
18:44 到第七擺伊講：「看見有雲對海裡起來，細細親像人的手。」以利亞講：「你上去給亞哈講，著備辦車落去，免得互雨阻擋。」
18:44 到第七遍，僕人給伊講：「有看著雲對海裡起來，親像手盤赫細。」
以利亞講：「你去對亞哈講：『著準備車落去，才免互雨阻擋。』」
18:45 霎仔久的中間，遍天因為風及雲黑暗，落大雨。亞哈就坐車去耶斯列。
18:45 一時仔久，天因為風及雲變烏暗，落大雨。亞哈就坐車去耶斯列。
18:46 耶和華的手靠佇以利亞的身上，伊就縖腰，佇亞哈的頭前走到耶斯列的城門。
18:46 上主的氣力臨到以利亞，伊就腰帶縛好勢，歸綴路走佇亞哈的頭前，直到耶斯列的城門。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。