上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
列王紀上
耶羅波安的子死
14:1 彼時，耶羅波安的子亞比雅破病。
耶羅波安的子死
14:1 彼時，耶羅波安的子亞比雅破病；
14:2 耶羅波安對伊的某講：「你起來改裝，互人知你是耶羅波安的某，去示羅，佇遐有先知亞希雅。伊論到我講，欲做此個百姓的王。
14:2 耶羅波安給伊的某講：「你起來變裝，去示羅；互人知你是耶羅波安的某。先知亞希雅住佇遐；伊曾預言講我欲做諸個人民的王。
14:3 今你的手著帶十塊麵包，及幾若塊冇冇的餅，及一矸蜜，去見伊，伊欲給你講，子會怎樣。」
14:3 今你著帶十塊麵包、一寡餅，及一罐蜜，去見伊；伊會給你講咱的子會按怎。」
14:4 耶羅波安的某就照按呢行，起來去示羅，來到亞希雅的家。亞希雅因為年老，目睭柴柴𣍐看見。
14:4 耶羅波安的某就照按呢出發去示羅，來到亞希雅𪜶兜。亞希雅因為年老，目睭柴柴無看見。
14:5 耶和華給亞希雅講：「看啊，耶羅波安的某來，欲為著伊的子來問你，因為伊有破病，你著按呢按呢給伊講。伊入來的時欲妝做別個婦仁人。」
14:5 上主給亞希雅講：「耶羅波安的某來，欲為著伊破病的子問你；你著按呢按呢給伊講。伊來的時，會裝做別個婦仁人。」
14:6 伊抵仔入門，亞希雅聽見伊的腳步聲，就講：「耶羅波安的某啊，入來！你啥事妝做別個婦仁人啊？我奉差報你歹消息。
14:6 伊抵仔入門，亞希雅聽著伊的腳步聲，就講：「耶羅波安的某，入來！你是按怎裝做別個婦仁人？我欲給你報一個歹消息。
14:7 你倒去給耶羅波安講：『耶和華──以色列的上帝按呢講：我既然對百姓中舉起你，設立你做我的百姓以色列的君王，
14:7 你倒去給耶羅波安講：『上主 — 以色列的上帝按呢講：我對人民中間提拔你，設立你做我子民以色列的統治者，
14:8 對大衛家拆裂國賞賜你，總是你無親像我的奴僕大衛，遵守我的誡命，一心隨我，專務行我看做正直的事。
14:8 對大闢家將王國分裂賞賜互你；毋拘你無親像我的僕人大闢遵守我的誡命，全心順趁我，做我看做正直的事。
14:9 你竟然行歹，贏過一切佇你以前的，因為你為家己造別個上帝，及鑄的偶像，激我的受氣，棄拺我佇你的尻脊後。
14:9 你竟然做歹超過所有你以前的人，為家己造別個神明，鑄偶像，激我受氣，將我擲佇你的尻脊後。
14:10 因為按呢，我欲互災禍臨到耶羅波安的家，我欲剪除屬耶羅波安的查甫丁，無論受拘束的、抑是自由的佇以色列，也欲一盡除耶羅波安的家，親像人除糞埽到一盡了。
14:10 因為按呢，我欲互災禍臨到耶羅波安的家，將以色列中屬耶羅波安的查甫人，無論自由的抑是無自由的，攏給𪜶消滅。我嘛欲將耶羅波安的家攏除滅，親像啲燒糞埽，給伊燒盡。
14:11 見屬耶羅波安的人，死佇城內的，狗欲食伊，死佇田野的，空中的鳥欲食伊。因為耶和華已經講啦。』
14:11 所有屬耶羅波安的人，死佇城內的，狗會給食；死佇野外的，空中的鳥會飛來食。上主按呢宣告。』
14:12 今你起來倒去你的家！你的腳一下入城，子就死。
14:12 「今你倒去恁兜；你的腳一下踏入城，你的子就會死。
14:13 以色列眾人欲啼哭伊，埋葬伊。因為屬耶羅波安的人，只有伊得著入墓；因為佇耶羅波安的家中，只有伊向耶和華──以色列的上帝顯出好事。
14:13 以色列人民會為著伊啼哭，給伊埋葬；屬耶羅波安的人，只有伊得著安葬，因為佇耶羅波安的家，只有伊曾做一寡事互上主 — 以色列的上帝歡喜。
14:14 耶和華欲為家己興起一個王管理以色列。佇彼日，伊欲剪除耶羅波安的家；甚麼時啊？此霎就是。
14:14 上主欲為著家己興起一個王，統治以色列；伊欲消滅耶羅波安的家。什麼時會發生？就是現在！
14:15 因為耶和華欲拍以色列人，親像水中的蘆葦啲搖一樣；閣欲拔出以色列的根佇伊所賞賜𪜶列祖的好地，四散𪜶佇大河彼旁；因為𪜶造𪜶的亞舍拉，激耶和華的受氣。
14:15 上主欲拍以色列，互𪜶搖動，親像水中的蘆葦；閣欲對伊賞賜𪜶列祖的好土地給𪜶拔出來，互𪜶四散佇幼發拉底河的彼旁，因為𪜶造亞舍拉女神的柱像，激上主受氣。
14:16 因為耶羅波安的罪，就是伊本身所犯的罪，閣互以色列人犯罪，所以耶和華欲棄拺以色列。」
14:16 耶羅波安本身犯罪，閣互以色列人陷落罪，所以上主欲棄拺以色列。」
14:17 耶羅波安的某起身倒去，到得撒，抵仔到厝的戶椗，子就死。
14:17 耶羅波安的某起身倒去得撒；抵仔到厝的戶橂，伊的子就死。
14:18 以色列眾人埋葬伊，為伊啼哭，照耶和華託伊的奴僕先知亞希雅所講的話。
14:18 以色列人民為著伊啼哭，給伊埋葬，抵抵照上主通過伊的僕人先知亞希雅所講的話。
耶羅波安去世
14:19 耶羅波安其餘的事，伊怎樣交戰，怎樣做王，攏寫佇以色列列王的記錄。
耶羅波安死
14:19 耶羅波安其他的事蹟，伊按怎交戰，按怎作王，攏記載佇《以色列列王史》。
14:20 耶羅波安做王共二十二年，就及伊的列祖相及睏。伊的子拿答續接伊做王。
14:20 耶羅波安作王共二十二年，就轉去伊的列祖遐；伊的子拿答續接伊作王。
猶大國的王羅波安
14:21 ( 代下 11:5—12:15 )
所羅門的子羅波安佇猶大做王。羅波安坐位的時四十一歲，佇耶路撒冷，就是耶和華對以色列眾支派中所揀安置伊的名的城，做王十七年。伊的老母名叫拿瑪，是亞捫人。
猶大王羅波安
14:21 ( 代下 11:5-12:15 )
所羅門的子羅波安佇猶大作王。羅波安坐位的時四十一歲。伊佇耶路撒冷作王十七年；耶路撒冷是上主對以色列眾支族中揀選互人來敬拜伊的城。羅波安的老母叫做拿瑪，是亞捫人。
14:22 猶大國行耶和華所看做歹的事，對伊所行的罪激動伊痛恨，比𪜶列祖所做閣卡歹。
14:22 猶大人民做上主看做歹的事，𪜶犯的罪比𪜶列祖所犯的閣較重，激動上主怨妒。
14:23 因為𪜶佇逐個高山，逐欉青翠的樹腳起壇，創柱像及亞舍拉。
14:23 因為𪜶佇逐個高的山崙仔，逐欉青翠的樹下面，起山頭壇，造石柱像及亞舍拉女神。
14:24 國內也有孌童。耶和華佇以色列人的面前所趕出的列國，𪜶就學許個國一切可惡的事來行。
14:24 國內閣有孌童；以色列人學上主佇𪜶面前趕出的外族人所做可惡的事。
14:25 羅波安王五年，埃及王示撒上來攻擊耶路撒冷，
14:25 羅波安王第五年，埃及王示撒上來攻擊耶路撒冷，
14:26 搶耶和華殿的寶物及王宮的寶物，攏帶去，閣搶所羅門所做許個金的屏牌。
14:26 將上主聖殿及王宮的寶物攏搶去，閣搶所羅門所做許個金的盾牌。
14:27 羅波安王做銅的屏牌來替伊，交互顧守王宮門的侍衛長顧守。
14:27 羅波安王做銅的盾牌代替許個金盾牌，交互顧王宮大門的侍衛長顧守。
14:28 王逐擺入耶和華的殿，侍衛就帶諸個屏牌，後來就帶倒轉，來下佇侍衛的厝。
14:28 王逐遍入上主的殿，侍衛就夯諸個盾牌，後來閣帶倒轉下佇侍衛室。
14:29 羅波安其餘的事，見伊所行的，豈無記佇猶大列王的記錄嗎？
14:29 羅波安其他的事蹟，及伊所做一切的事攏記載佇《猶大列王史》。
14:30 羅波安及耶羅波安常常交戰。
14:30 羅波安及耶羅波安常常交戰。
14:31 羅波安及伊的列祖同睏，及伊的列祖葬佇大衛的城。伊的老母名叫拿瑪，是亞捫人。羅波安的子亞比央續接伊做王。
14:31 羅波安轉去伊的列祖遐，及伊的列祖安葬佇大闢城。伊的老母叫做拿瑪，是亞捫人。羅波安的子亞比雅續接伊作王。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。