上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
列王紀上
所羅門離開上帝
11:1 所羅門王佇法老的查某子以外，閣疼多多外邦的查某囝仔，就是摩押、亞捫、以東、西頓，赫人的查某囝仔。
所羅門離開上主
11:1 法老的查某子以外，所羅門王嘛愛真多外邦的查某囝仔，包含摩押、亞捫、以東、西頓，及赫人的查某囝仔。
11:2 論到諸個列國，耶和華曾吩咐以色列人講：「恁通去𪜶遐，𪜶也通來恁遮，因為𪜶會互恁的心偏歪去隨𪜶的上帝。」總是所羅門戀愛許個查某囝仔，及𪜶結聯。
11:2 上主曾命令以色列人，講：「恁毋通及許個外族人通婚，因為𪜶會引誘恁的心去隨別個神明。」毋拘所羅門貪戀許個查某囝仔。
11:3 伊有后妃七百，攏是貴族的；閣有嬪妃三百。諸個女子誘惑伊的心。
11:3 伊有娶七百個公主做某，閣有嬪妃三百；諸個女子誘惑伊的心。
11:4 因為所羅門年老的時，伊許個某誘惑伊的心去隨別個上帝，伊的心無純全向耶和華──伊的上帝，親像伊的父大衛的心。
11:4 所羅門年老的時，諸個某誘惑伊去隨別個神明；伊的心無親像伊的老父大闢的心完全順服上主 — 伊的上帝。
11:5 所羅門去隨西頓人的女神亞斯他錄及亞捫人可惡的物米勒公。
11:5 所羅門去隨西頓人的女神亞斯她錄，及亞捫人通厭惡的神明摩洛。
11:6 所羅門行耶和華所看做歹的事，無專心隨耶和華親像伊的老父大衛。
11:6 所羅門做上主看做歹的事，無親像伊的老父大闢全心順服上主。
11:7 彼時所羅門為著摩押可惡的物基抹及亞捫人可惡的物摩洛，佇耶路撒冷頭前的山起山頭壇。
11:7 彼時，所羅門為著摩押通厭惡的神明基抹，及亞捫人通厭惡的神明摩洛，佇耶路撒冷對面的山頂起山頭壇。
11:8 許個外邦的某攏燒香祭祀𪜶的上帝，伊也為著𪜶照按呢做。
11:8 許個外邦的某攏對𪜶的神明燒香獻祭；所羅門嘛為著𪜶按呢做。
11:9 耶和華受氣所羅門，因為伊的心離開耶和華──以色列的上帝，就是曾二擺對伊出現。
11:9 上主對所羅門受氣，因為伊的心離開曾兩遍對伊出現的上主 — 以色列的上帝；
11:10 也論到此個事曾命令伊，通隨別個上帝，總是伊無守耶和華所命令的。
11:10 上主曾命令伊毋通拜別個神明。毋拘所羅門無遵守上主的命令。
11:11 所以耶和華對所羅門講：「因為你已經行此個事，無守我所命令你守的約及我的律例，我欲對你來拆裂你的國，賞賜你的奴僕。
11:11 上主就對所羅門講：「因為你已經做此款代誌，無遵守我的約，及我命令你的規例，所以我一定欲拆裂你的王國，將伊賜互你的人臣。
11:12 總是，因為你的老父大衛的緣故，我無佇你活啲的日行此個事，獨獨欲對你的子的手拆裂伊。
11:12 毋拘因為你的老父大闢的緣故，我𣍐佇你活啲的時做此個代誌；我欲對你的子的手拆裂此個國。
11:13 總是我無將全國拆裂，欲帶著我的奴僕大衛及我所揀的耶路撒冷，猶留一支派互你的子。」
11:13 總是我無欲將全國拆裂，會因為我的僕人大闢及我所揀的耶路撒冷的緣故，留一支族互你的子。」
所羅門的對敵
11:14 耶和華興起一個對敵攻擊所羅門，就是以東人哈達；伊是以東王的後裔。
所羅門的對敵
11:14 上主興起一個對敵攻擊所羅門，就是以東人哈達，伊是以東王的後代。
11:15 前大衛拍以東，伊的軍長約押上去埋葬陣亡的人，將以東的查甫丁攏刣死。
11:15 早前大闢拍以東的時，元帥約押去埋葬戰死的以色列人。約押及以色列軍兵𫢶遐六個月的中間，刣死以東所有的查甫人。
11:16 約押及以色列眾人𫢶遐六月日，直到將以東的查甫丁一盡剪除。
11:16 併於上節
11:17 彼時哈達猶是細漢的囝仔；哈達及伊的老父人臣中，幾若個以東人走去埃及。
11:17 彼時哈達猶閣是囝仔。哈達及伊的老父人臣中幾若個以東人，走去埃及。
11:18 𪜶對米甸起來，到巴蘭；對巴蘭帶幾若人及𪜶去埃及到埃及王法老遐；法老就用厝互𪜶，派定著的米糧，閣用田地互𪜶。
11:18 𪜶對米甸出發去巴蘭；對巴蘭帶幾若人及𪜶去埃及，到埃及王法老遐。法老就供給厝、米糧，及土地互𪜶。
11:19 哈達佇法老的面前大得著恩惠，法老續用伊的某的小妹就是王后答比匿的小妹互伊做某。
11:19 哈達佇法老面前得著真大的恩惠；法老閣用王后答比妮的小妹互伊做某。
11:20 答比匿的小妹給伊生一個子，名叫基努拔。答比匿給伊斷奶佇法老的王宮，基努拔及法老的眾子相及𫢶佇法老的王宮。
11:20 答比妮的小妹給伊生一個子，號名叫做基努拔。答比妮佇法老的王宮給基努拔飼大漢，閣互伊及法老的子兒做夥住佇王宮。
11:21 哈達佇埃及聽見大衛及伊的列祖相及睏，軍長約押也已經死，哈達就對法老講：「容允我去，互我倒去本國。」
11:21 哈達佇埃及聽著大闢轉去伊的列祖遐，元帥約押嘛已經死。哈達就對法老講：「請准我離開，互我倒去我的本國。」
11:22 法老給伊講：「你佇我遮有甚麼欠缺，你竟然愛欲倒去本國啊？」伊應講：「我無欠缺甚麼，總是容允我倒去。」
11:22 法老給伊講：「你佇我遮豈有欠缺什麼，你哪想欲倒去你本國？」
伊應講：「我無欠什麼，毋拘請准我倒去。」
11:23 上帝閣興起一個對敵攻擊所羅門，就是以利亞大的子利遜。是對伊的主瑣巴王哈大底謝遐逃走來的。
11:23 上帝閣興起一個對敵攻擊所羅門，就是以利雅大的子利遜；伊是對伊的主瑣巴王哈大底謝遐逃走出來。
11:24 大衛刣瑣巴人的時，利遜招集人倚伊，做彼黨的頭，去大馬色𫢶佇遐，佇大馬色做王。
11:24 大闢刣瑣巴人的時，利遜招集一群人，做彼黨的頭目去住佇大馬士革，佇大馬士革作王。
11:25 所羅門活啲的時，哈達做災害以外，利遜也做以色列的對敵。伊怨恨以色列，也做亞蘭人的王。
11:25 所羅門活啲的時，利遜及哈達像款做以色列的對敵。利遜統治敘利亞；伊怨恨以色列。
上帝互耶羅波安的應允
11:26 尼八的子耶羅波安是以法蓮族洗利達人，伊是所羅門的奴僕也起手攻擊王。伊的老母是守寡人，名叫洗魯阿。
上帝對耶羅波安的應允
11:26 尼八的子耶羅波安嘛起來反叛王；伊是所羅門的人臣，是以法蓮支族的洗利達人；伊的老母是寡婦，叫做洗魯雅。
11:27 伊起手攻擊王的緣故照下底所記的，所羅門起米羅，修補伊的老父大衛城的破隙。
11:27 伊出手攻擊王的原因是按呢：
所羅門起造米羅，修補伊的老父大闢城的破隙。
11:28 耶羅波安是大勇士。所羅門看見此個少年人殷勤，就派伊管理約瑟的家一切的工。
11:28 耶羅波安真有才能。所羅門看著此個少年人殷勤，就派伊管理約瑟家所有的工程。
11:29 彼時，耶羅波安對耶路撒冷出來，示羅人先知亞希雅佇路裡抵著伊；彼時伊有穿一領新衫。𪜶二人佇田裡，以外無別人。
11:29 有一日耶羅波安離開耶路撒冷，示羅人先知亞希雅佇路裡抵著伊。彼時亞希雅穿一領新衫；𪜶兩人佇田裡，以外無別人。
11:30 亞希雅提伊所穿的新衫拆做十二塊，
11:30 亞希雅提伊穿的新衫，拆做十二塊，
11:31 給耶羅波安講：「你通提十塊。因為耶和華──以色列的上帝按呢講：『看啊，我欲對所羅門的手拆裂伊的國，將十支派互你。（
11:31 給耶羅波安講：「你通提十塊，因為上主 — 以色列的上帝按呢講：『你看，我欲對所羅門的手拆裂伊的王國，將十支族互你。
11:32 獨獨因為我的奴僕大衛的緣故，及我佇以色列眾支派中所揀的耶路撒冷的緣故，伊猶有一支派。）
11:32 毋拘因為我的僕人大闢，以及我佇以色列眾支族中所揀的耶路撒冷的緣故，伊猶有一支族。
11:33 因為𪜶棄拺我，去敬拜西頓人的上帝亞斯他錄、摩押的上帝基抹，及亞捫人的上帝米勒公，無行我的道路，做我看做正直的事，守我的律例法度，親像伊的老父大衛的所做。
11:33 因為𪜶棄拺我，去拜西頓人的神明亞斯她錄、摩押的神明基抹，及亞捫人的神明摩洛，無親像伊的老父大闢行我的道路，做我看做正直的事，守我的規例及命令。
11:34 總是我無欲對伊的手搶伊的全國；是欲互伊一世人做君王，是因為我的奴僕大衛的緣故，因為伊是我所揀選的，有守我的律例及法度。
11:34 毋拘，我無欲對伊的手收回伊全部的王國，猶原欲互伊一世人作王，攏是因為我的僕人大闢的緣故，伊是我所揀選的，有守我的誡命及規例。
11:35 總是我欲對伊的子的手搶伊的國，用十支派互你，
11:35 總是我欲對伊的子收回王國，用十支族互你；
11:36 用一支派互伊的子，互我的奴僕大衛佇我的面前常常有一葩燈佇耶路撒冷，就是我所揀，通佇遐安置我的名的城。
11:36 留一支族互伊的子，通互我的僕人大闢，佇我所揀選互人來敬拜我的城耶路撒冷，不時有一葩燈佇我的面前。
11:37 我欲取你，你欲做以色列的王，照你的心一切所愛的來管理。
11:37 我揀選你，照你所愛的互你做以色列的王。
11:38 你若聽我一切所命令你的，行我的道路，做我看做正直的事，守我的律例法度，親像我的奴僕大衛的所做，我就及你佇啲，給你建立堅固的家，親像我給大衛所建立的一樣，閣欲將以色列交互你。
11:38 你若親像我的僕人大闢，聽我所有的命令，行我的道路，做我看做正直的事，守我的規例及誡命，我就及你同在，將以色列交互你，給你建立穩固的王朝，親像我為大闢所做的像款。
11:39 因為這我欲困苦大衛的後裔，總是無到永遠。』」
11:39 我欲因為按呢刑罰大闢的後代，毋拘𣍐到永遠。』」
11:40 為著按呢所羅門愛欲刣死耶羅波安。耶羅波安就起來逃走去埃及；到埃及王示撒遐，就𫢶佇埃及，到所羅門死。
11:40 所羅門愛欲刣死耶羅波安，耶羅波安就逃走去埃及，到埃及王示撒遐；伊就𫢶佇埃及到所羅門死。
所羅門死
11:41 ( 代下 9:29-31 )
所羅門其餘的事，見伊所行的及伊的智慧豈無攏記佇所羅門的行傳。
所羅門死
11:41 ( 代下 9:29-31 )
所羅門其他的事蹟及伊的智慧，攏記載佇《所羅門記》。
11:42 所羅門佇耶路撒冷做以色列全國的王共四十年。
11:42 所羅門佇耶路撒冷做以色列全國的王，共四十年。
11:43 所羅門及伊的列祖相及睏，埋葬佇伊的老父大衛的城。伊的子羅波安續接伊做王。
11:43 所羅門轉去伊的列祖遐了後，埋葬佇伊的老父大闢的城。伊的子羅波安續接伊作王。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。