上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
列王紀上
示巴女王拜訪所羅門
10:1 ( 代下 9:1-12 )
示巴的女王聽見所羅門的名聲，為著耶和華的名所得著的，就來欲用得解明的事試伊。
示巴女王來拜訪
10:1 ( 代下 9:1-12 )
示巴的女王聽見所羅門因為上主的名所得著的名聲，就來欲用難題給伊考。
10:2 伊到耶路撒冷隨伊的人真多，有駱駝載香料、及黃金真多，也有寶石。伊見所羅門的時，就將心內一切所存的及伊講。
10:2 伊導真多人臣來到耶路撒冷，閣有駱駝載香料、真多黃金及寶石。伊見所羅門的時，就將心內所有的難題給伊問。
10:3 所羅門照伊所問的攏應伊，無一項王𣍐曉得通給伊講。
10:3 所羅門照伊所問的一一給伊回答，無一項困難甲王𣍐曉應。
10:4 示巴女王看見所羅門一切的智慧，及伊所起的厝，
10:4 示巴女王見識著所羅門所有的智慧，看著伊起的宮殿、
10:5 桌頂的食物，人臣排列啲坐，奴僕跟隨服事，以及𪜶的衣服及伊的酒政，閣看見伊上耶和華殿的崎仔，就魂不附體；
10:5 桌頂的食物、排列坐啲的人臣、跟隨服事的奴僕，及𪜶的衣服，以及斟酒的奴僕，閣看著伊佇上主的聖殿所獻的燒化祭，就歸個人攏愣去。
10:6 伊就對王講：「我佇本國聽見你的代誌及你的智慧攏是真實！
10:6 示巴女王就對王講：「我佇阮本國所聽著你的事蹟及你的智慧，攏是真的！
10:7 總是我信許個話，到我來親目看見才知人所給我講的猶無一半。你的智慧及你的亨通贏過我所聽見的名聲。
10:7 本來我毋信許個話，到我親目看著才相信。人給我講的猶無事實的一半；你的智慧及你的富足超過我所聽著的。
10:8 福氣啊！你的人，福氣啊！你的奴僕常常徛佇你的面前聽你的智慧。
10:8 你的部屬真有福氣！你的人臣真有福氣！𪜶不時佇你的面前聽你智慧的話。
10:9 耶和華──你的上帝是應該謳咾的！伊歡喜你，互你坐以色列的國位；因為耶和華永遠疼以色列，所以設立你做王，互你秉公行義。」
10:9 上主 — 你的上帝應該受稱讚！伊意愛你，互你坐以色列的王位；因為上主永遠疼以色列，所以選立你作王，互你通秉公行義。」
10:10 伊用一百二十他連得的金，及多多的香料，及寶石，送王。以後所來的香料，曾閣親像示巴女王送所羅門王的許多。
（
10:10 示巴女王將大約四千公斤的金、真多香料，及寶石送互王；前到今毋曾有人親像示巴女王送赫多香料互所羅門王。
10:11 希蘭的船隻對俄斐帶金來的，閣對俄斐帶多多檀香柴，及寶石來。
10:11 希蘭的船對俄斐運金來，閣帶真多檀香柴及寶石來。
10:12 王用檀香柴為耶和華的殿及王宮做欄杆，閣為唱歌的人做琴瑟。以後曾閣有彼號檀香柴來，也無人看見，直到今仔日。）
10:12 王用諸個檀香柴做上主的殿及王宮的欄杆，嘛為唱歌的人做琴及瑟；前到今毋曾有人看見赫多檀香柴運來。
10:13 所羅門照王的禮用物送示巴的女王，以外閣用女王見所愛，見所求的，送伊。對按呢伊及伊的人臣倒轉去伊本國。
10:13 所羅門用真多禮物送示巴女王；以外閣照女王所意愛、所要求的攏送互伊。女王及伊的人臣就倒去𪜶本國。
所羅門的財富
10:14 ( 代下 9:13-28 )
所羅門逐年所得著的金共六百六十六他連得。
所羅門的財富
10:14 ( 代下 9:13-28 1:14-17 )
所羅門逐年收著的金共兩萬三千公斤，
10:15 以外有遊歷的及往來的生理人以及雜族諸個王，及國內諸個首領所納的。
10:15 以外猶有對生理人及貿易商收的稅金，以及對阿拉伯諸個王及國內諸個省長所收的。
10:16 所羅門王用過拍的金做大牌二百面，每面大牌的金六百舍客勒；
10:16 所羅門王拍大盾牌兩百面，每一面用金七公斤；
10:17 閣用過拍的金做屏牌三百面，每面用金三彌那，王下伊佇黎巴嫩樹林的厝。
10:17 閣拍小盾牌三百面，每一面用金兩公斤。王將諸個盾牌下佇黎巴嫩林宮。
10:18 王閣用象牙做一個大寶座，用好金安伊。
10:18 王閣用象牙做一個大寶座，用純金貼啲。
10:19 寶座有六層的崎仔，座位撐的頂面是圓的，雙旁有靠手，靠手邊有二隻獅徛啲。
10:19 寶座前有六層崎仔；座位撐的頂面是圓的，雙旁有手按，手按的邊仔各有一座獅徛啲；
10:20 閣有十二隻獅徛佇六層崎仔的此旁及彼旁；別國攏無製造親像按呢。
10:20 閣有十二座獅徛佇六層崎仔逐層的雙旁邊；別個王國攏毋曾按呢做。
10:21 所羅門王一切飲的器具攏是金的。黎巴嫩樹林的厝一切的器具也是好金的攏無銀的。所羅門的年間，人看銀做無物。
10:21 所羅門王所有飲的器具攏是金的；黎巴嫩林宮一切的器具嘛是純金的；佇所羅門的時代，銀無互人看做真有價值。
10:22 因為王有他施的船隻一陣及希蘭的船隻一陣相及過海，諸個他施歸陣的船載金銀、象牙、猴、孔雀，三年倒來一擺。
10:22 王有他施的船隊，及希蘭的船隊做夥航海；諸個他施的船隊運金、銀、象牙、猴、孔雀，每三年倒來一遍。
10:23 所羅門王的好額及智慧贏過天下列王。
10:23 所羅門王的財富及智慧贏過天下諸王。
10:24 天下的人攏來愛見所羅門的面，聽伊的智慧就是上帝賞賜佇伊的心的。
10:24 全世界的人攏想欲來見所羅門的面，聽上帝賜互伊的智慧。
10:25 𪜶逐個帶進貢的物，就是銀器、金器、衣服、軍器、香料、馬，及騾，逐年有定著的例。
10:25 𪜶逐個帶進貢的禮物，就是金器、銀器、衣服、軍器、香料、馬，及騾；逐年攏有一定的數量。
所羅門囤車的城
10:26 所羅門就聚集戰車馬兵，有戰車一千四百張，馬兵一萬二千名，安置𪜶佇許個囤車的城也及王佇耶路撒冷。
10:26 所羅門王有建立軍隊，戰車一千四百台，馬兵一萬兩千名；安置𪜶佇許個囤戰車的城，及耶路撒冷王遐。
10:27 王佇耶路撒冷互銀親像石頭，互柏香柴親像平洋的桑材樹，是因為真多。
10:27 王統治的期間，耶路撒冷的銀親像石頭赫多，柏香柴親像山埔的桑材樹赫多。
10:28 所羅門的馬是對埃及帶來的，是王的生理人一陣一陣照價錢得著的。
10:28 所羅門的馬攏對埃及及科威進口，是王的生理人對科威照市價買來的。
10:29 對埃及上來的車，每張價銀六百舍客勒，馬每匹一百五十。赫人諸個王及亞蘭諸個王，攏對𪜶經手照按呢帶出來。
10:29 對埃及進口的戰車，逐台大約七公斤的銀；戰馬逐隻大約兩公斤的銀。所羅門的生理人嘛經手將諸個出口賣互赫人及敘利亞人許個王。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。