上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
列王紀上
耶和華閣向所羅門顯現
9:1 ( 代下 7:11-22 )
所羅門已經起耶和華的殿及王宮，及所羅門一切所愛做的攏明白，
上主閣對所羅門顯現
9:1 ( 代下 7:11-22 )
所羅門完成上主的聖殿、王宮，及伊所愛起的建築了後，
9:2 耶和華第二擺對所羅門顯現，親像前佇基遍對伊顯現一樣，
9:2 上主第二遍對所羅門顯現，親像以前佇基遍對伊顯現仝款。
9:3 耶和華對伊講：「你佇我的面前所祈禱懇求的，我攏有聽見。我已經將你所起此間殿分別做聖，互我的名永遠佇遐；我的目睭、我的心也欲常常佇遐。
9:3 上主對伊講：「你佇我的面前祈禱懇求的，我攏有聽著。我已經將你所起此間殿分別作聖，做永遠敬拜我的所在。我的目睭、我的心嘛欲不時佇遐。
9:4 論到你若誠實心，閣正直行佇我的面前，親像你的父大衛所行的，遵趁我一切所命令你的，執守我的律例，我的法度，
9:4 你若親像你的老父大闢，佇我的面前心純全，所行所做正直，遵趁我的誡命，執守我的規例及命令，
9:5 我就欲堅固你的國位佇以色列中，到永遠，親像我應允你的父大衛講：『你的後裔坐以色列的國位永無斷。』
9:5 我就欲堅固你佇以色列國的王位到永遠；親像我有應允你的老父大闢講：『你的後代會坐以色列的王位永無斷。』
9:6 設使恁抑是恁的子孫越轉無隨我，無守我賞賜恁的誡命律例，去服事別個上帝來敬拜伊，
9:6 恁及恁的子孫若越走離開我，無執守我頒布互恁的誡命及規例，去服事敬拜別個神明，
9:7 我就欲對我賞賜𪜶的地剪除以色列，閣我為家己的名所分別做聖此間殿也欲對我的面前棄拺伊，互以色列人佇萬國中做話柄，受譏刺。
9:7 我就欲將以色列人對我賞賜𪜶的地給𪜶消滅，嘛欲棄拺此間分別作聖用來敬拜我的殿，互以色列人佇萬國中做笑談，受人恥笑。
9:8 此間殿雖然真高，將來經過的人欲卬愕、恥笑，講：『耶和華啥事按呢款待此個地此間殿啊？』
9:8 此間聖殿現在雖然堂皇，到彼時，經過的人會著驚恥笑，講：『上主哪會按呢對待此個地及此間殿？』
9:9 就欲應講：『是因為𪜶棄拺耶和華──𪜶的上帝就是導𪜶的列祖出埃及地的，去結聯別個上帝，服事敬拜伊，所以耶和華互這一切的災禍臨到𪜶。』」
9:9 有人會應講：『是因為𪜶棄拺導𪜶的列祖出埃及地的上主 — 𪜶的上帝，去信奉別個神明，敬拜服事𪜶，所以上主互諸個一切的災禍臨到𪜶。』」
所羅門及希蘭訂約
9:10 ( 代下 8:1-2 )
到二十年尾，就是所羅門起耶和華的殿及王宮，此二間厝完工的時。
所羅門及希蘭的協約
9:10 ( 代下 8:1-2 )
所羅門用二十年起上主的聖殿及王宮，此兩間完工的時，
9:11 所羅門王就將加利利地二十個城互希蘭；是推羅王希蘭曾照所羅門一切所愛的，用柏香柴、松柴，及金互伊。
9:11 所羅門王將加利利地二十個城互泰爾王希蘭；因為希蘭有照所羅門的請求，用柏香柴、松樹柴，及金互伊。
9:12 希蘭對推羅出來，看所羅門所互伊的城，看了無合意，
9:12 希蘭對泰爾出來，去看所羅門互伊的城，看了無合意，
9:13 就講：「我的兄啊，你所互我許個城是甚麼？」伊就叫伊迦步勒的地，到今仔日。
9:13 就講：「我的兄弟，你互我此款的城噢？」伊就叫許個城做迦步勒地，到今仔日。
9:14 希蘭就寄金一百二十他連得互王。
9:14 希蘭曾送金大約四千公斤互所羅門王。
所羅門其他的政績
9:15 ( 代下 8:3-18 )
所羅門王派人工的因端就是按呢，是欲起耶和華的殿、家己的王宮、及米羅、耶路撒冷的城牆、及夏瑣、米吉多，及基色。
所羅門其他的事蹟
9:15 ( 代下 8:3-18 )
所羅門王派強制勞工起造上主的聖殿、家己的王宮、米羅、耶路撒冷的城牆，及夏瑣、米吉多，以及基色諸個城。
9:16 前埃及王法老上來取基色，用火燒伊，刣死城內徛起的迦南人，將城互伊的查某子所羅門的某做嫁妝。
9:16 (早前埃及王法老上來攻取基色，放火燒城，刣死城內的迦南人，將城互伊的查某子，所羅門的某，做嫁妝。)
9:17 所羅門起基色、及下面的伯‧和崙、
9:17 所羅門重建基色，下‧伯‧和崙；
9:18 及巴拉，及國內曠野裡的達莫，
9:18 巴拉，及猶大曠野的達莫。
9:19 及所羅門所有府庫的城，及下車的城及馬兵的城，及所羅門佇耶路撒冷、佇黎巴嫩，及佇伊所治理的全地，為家己的快樂所愛起的攏起伊。
9:19 所羅門嘛起造真多城，囤積軍用品、戰車及戰馬；閣佇耶路撒冷、黎巴嫩，及伊治理的全地，起造伊所愛起的建築。
9:20 論到所剩的百姓亞摩利人、赫人、比利洗人、希未人、耶布斯人，是屬佇以色列的，
9:20 所有住佇境內的亞摩利人、赫人、比利洗人、希未人、耶布斯人賰落來的後代，毋是屬佇以色列，
9:21 就是佇此地方𪜶所剩的後裔，以色列人𣍐會一盡滅者，所羅門派𪜶做苦工，到今仔日。
9:21 無互以色列人消滅的，所羅門強制𪜶做苦工，到今仔日。
9:22 總是以色列人，所羅門無互𪜶做奴僕，是做伊的戰士、人臣首領、軍長、車長、馬兵長。
9:22 毋拘所羅門無互以色列人做奴隸；互𪜶做伊的戰士、人臣、首領、軍長、戰車長、馬兵長。
9:23 所羅門督工的頭人共五百五十人，𪜶管理做工的百姓。
9:23 所羅門的督工有五百五十人，管理作工的人。
9:24 法老的查某子對大衛的城上去所羅門所給伊起的厝。彼時，所羅門起米羅。
9:24 法老的查某子對大闢城搬入去所羅門為著伊起的宮殿。所羅門閣起米羅。
9:25 所羅門逐年三擺佇伊給耶和華所起的壇獻燒祭及謝恩祭，閣佇耶和華的面前燒香佇壇頂。對按呢，伊起殿的工明白。
9:25 所羅門逐年三遍佇伊為上主起的祭壇獻燒化祭及平安祭；閣佇上主的面前燒香。按呢，伊完成起造聖殿的工程。
9:26 所羅門王佇以東地紅海邊，倚近以祿的以旬‧迦別造一陣的船隻。
9:26 所羅門王佇以東地區的紅海海邊，倚近以祿的以旬‧迦別造船。
9:27 希蘭差伊的奴僕，就是知影過海的行船人，及所羅門的奴僕像船去。
9:27 希蘭派伊的部下，就是經驗豐富的船員，及所羅門的部下做夥行船。
9:28 𪜶到俄斐，對遐得著四百二十他連得的金，運到所羅門王遐。
9:28 𪜶去俄斐，對遐運送金一萬四千公斤到所羅門王遐。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。