上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
列王紀上
運約櫃入殿
8:1 ( 代下 5:2—6:2 )
彼時，所羅門聚集以色列的長老及逐支派的首領，以及以色列人許個族長，到耶路撒冷所羅門王遐，欲將耶和華的約櫃對大衛城──就是錫安──運上來。
迎接約櫃入聖殿
8:1 ( 代下 5:2-6:2 )
彼時，所羅門召集以色列的長老、逐支族的首領，以及逐宗族的族長來耶路撒冷，欲迎接上主的約櫃，對錫安的大闢城運起來聖殿。
8:2 以他念月，就是七月的節期，以色列人攏聚集到所羅門王遐。
8:2 以他念月，就是七月，搭寮節的時，以色列人攏聚集佇所羅門王遐。
8:3 以色列的長老攏來，許個祭司扛約櫃，
8:3 以色列的長老攏來，許個祭司就扛約櫃起來。
8:4 𪜶就扛耶和華的櫃，及會幕以及布棚內一切聖的器具上來，祭司及利未人攏扛伊上來。
8:4 祭司及利未人將上主的約櫃、會幕，以及布棚內一切聖的器具扛入聖殿。
8:5 所羅門王及聚集到伊遐以色列的全會，佇約櫃前獻羊牛做祭祀，多到𣍐算得，也算𣍐了。
8:5 所羅門王及聚集佇伊遐的以色列全會眾，佇約櫃前獻牛、羊做祭物，祭物多甲𣍐算得。
8:6 祭司扛耶和華的約櫃到伊的所在入彼間厝的後殿，到至聖所，下佇𠼻𡀔兵的翅下。
8:6 祭司扛上主的約櫃入內殿，就是至聖所，下佇指定的所在，天使基路伯翼股下面。
8:7 因為𠼻𡀔兵展開𪜶的翅，佇櫃的所在的頂面，閣𠼻𡀔兵佇彼頂面遮蓋櫃，及伊的槓。
8:7 基路伯佇下約櫃所在的頂面搋開𪜶的翼，遮蓋約櫃及扛約櫃的槓。
8:8 許個槓真長，槓尾佇後殿前的聖所通看見，佇外面就𣍐看見，到今仔日猶佇遐。
8:8 槓真長，槓尾佇內殿前的聖所看會著，對外面就𣍐當看著；到今仔日槓猶佇遐。
8:9 櫃內只有二塊石碑，就是以色列人出埃及地，耶和華及𪜶立約的時摩西佇何烈山所下的。這以外，無別項物。
8:9 約櫃內面只有兩塊石版，以外攏無別項物；石版是以色列人出埃及地，上主佇何烈山及𪜶立約的時摩西所下的。
8:10 當祭司對聖所出來的時，有雲充滿耶和華的殿；
8:10 當祭司對聖所出來的時，有雲充滿上主的殿，
8:11 致到祭司為著雲的緣故𣍐會徛啲服事，因為耶和華的榮光充滿耶和華的殿。
8:11 因為按呢，祭司𣍐當徛啲服事；上主的榮光充滿上主的殿。
8:12 彼時所羅門講：
耶和華曾講，
伊欲𫢶佇黑黑暗暗的所在。
8:12 彼時所羅門講：
「上主曾講，
伊欲𫢶佇密雲的所在。
8:13 我已經起此間殿互你徛起，
做你永遠住的所在。
8:13 我已經起一間堂皇的殿，
做你永遠徛起的所在。」
所羅門向百姓講話
8:14 ( 代下 6:3-11 )
王越轉伊的面祝福以色列會眾，以色列會眾攏徛起來。
所羅門對人民講話
8:14 ( 代下 6:3-11 )
以色列會眾攏徛啲，所羅門王越過來給𪜶祝福。
8:15 伊講：「耶和華──以色列的上帝是應該謳咾的！因為伊親嘴對我的父大衛所應允的，也親手應驗伊。
8:15 伊講：「上主 — 以色列的上帝應該得著謳咾！伊親嘴對我的老父大闢應允的，攏親手實現。
8:16 講：『對我導我的百姓以色列出埃及以來，我未曾佇以色列眾支派中揀一個城起殿互──我的名佇遐，獨獨揀大衛治理我的百姓以色列。』
8:16 上主有講：『對我導我的子民以色列出埃及以來，我毋曾佇以色列眾支族中間揀一個城為我的名起聖殿；毋拘我有選立大闢來治理我的子民以色列。』
8:17 我的父大衛心內有意思，欲為耶和華──以色列的上帝的名起殿。
8:17 「我的老父大闢心內有意思欲為上主 — 以色列的上帝的名起聖殿。
8:18 總是耶和華對我的父大衛講：『你的心有意思欲為我的名起殿，你此個意思真好。
8:18 總是上主對我的老父大闢講：『你有意思欲為我的名起聖殿，你此個心意真好；
8:19 獨獨你通起殿，你所親生的子欲為我的名起殿。』
8:19 毋拘你毋通起，你親生的子會為我的名起聖殿。』
8:20 今耶和華應驗伊所講的話，我照耶和華的話起來續接我的父大衛坐以色列的國位，閣為耶和華──以色列上帝的名起殿。
8:20 「今上主實現伊所講的話；我照上主的話起來續接我的老父大闢坐以色列的王位，閣為上主 — 以色列上帝的名起聖殿。
8:21 我也佇遐為約櫃備辦一所在。櫃內有耶和華的約，就是伊導咱的列祖出埃及的時，及𪜶所立的約。」
8:21 我嘛佇遐為約櫃準備一個所在；櫃內有上主的約，就是伊導咱的列祖出埃及的時及𪜶立的約。」
所羅門的祈禱
8:22 ( 代下 6:12-42 )
所羅門當以色列會眾的面前，徛佇耶和華的壇前，攑起手向天講：
所羅門的祈禱
8:22 ( 代下 6:12-42 )
所羅門當以色列會眾的面前，徛佇上主的祭壇前，攑雙手向天，講：
8:23 「耶和華──以色列的上帝啊，佇天頂佇地下無有上帝親像你！守約行仁愛佇你許個奴僕，就是盡心行佇你的面前的；
8:23 「上主 — 以色列的上帝，天頂地下無一個神明親像你；你對許個一心一意順服你的僕人守約施慈愛。
8:24 你對你的奴僕──我的父大衛所應允的你有守伊。你親嘴講的，親手應驗伊，照今仔日的款。
8:24 你有執守對你的僕人我的老父大闢的應允；你親嘴應允的，今仔日攏親手實現。
8:25 耶和華──以色列的上帝啊，你所應允你的奴僕──我的父大衛講：『你的子孫若謹慎𪜶的所做，行佇我的面前親像你行佇我的面前，就屬佇你的欲佇我的面前坐以色列的國位，永無斷。』今求你應驗伊。
8:25 上主 — 以色列的上帝，求你實現對你的僕人我的老父大闢的應允；你有講：『你的子孫若親像你佇我的面前謹慎生活，你的後代就會永遠坐以色列的王位。』
8:26 以色列的上帝啊，你對你的奴僕──我的父大衛所講的，求你互伊成做實事。
8:26 以色列的上帝，你對你的僕人我的老父大闢所講的，求你實現。
8:27 「上帝真正欲徛起地上嗎？看啊，天及諸個天的天尚且無夠額互你徛起，何況我所起此間殿啊？
8:27 「上帝啊，你豈真正住佇地上？天及天頂的天都無夠通互你住，何況我所起此間聖殿？
8:28 耶和華──我的上帝啊，願你俯落數念你的奴僕的祈禱懇求，來聽你的奴僕今仔日所祈禱佇你面前的求叫祈禱。
8:28 上主 — 我的上帝，求你俯落聽你的僕人的祈禱懇求，聽你的僕人今仔日佇你面前的求叫祈禱。
8:29 願你日暝看顧此個殿，就是你所講起我的名欲佇遐的所在；來聽你的奴僕所欲向此所在祈禱的祈禱。
8:29 願你暝日看顧此個聖殿，就是你講你欲臨在的所在。你的僕人向此個所在祈禱的時，求你聽。
8:30 你的奴僕及你的百姓以色列向此所在祈禱的時，願你聽𪜶的祈求，願你佇天裡，你徛起的所在來聽𪜶，你聽見的時就赦免。
8:30 你的僕人及你的子民以色列向此所在祈禱的時，願你佇天頂，你住的所在，聽阮的祈求，赦免阮。
8:31 「人若得罪伊的厝邊，也有人用一個咒誓教伊咒誓，伊若來此間殿佇你的壇前咒誓，
8:31 「人若得罪厝邊，受迫著咒誓，伊來此間殿佇你的壇前咒誓伊是無辜的，
8:32 求你佇天裡聽，來辦理伊，審判你諸個奴僕：定歹人的罪，照伊所行的報應佇伊的頭殼；定義人做義，照伊的義來互伊。
8:32 求你佇天頂俯落聽來辦理，審判你諸個僕人：定歹人做有罪，照伊的所做給伊報應；定無辜的做無罪，照伊的正直給伊報賞。
8:33 「設使你的百姓以色列因為得罪你，才刣輸佇對敵的面前，𪜶若歸向你，認你的名，閣佇此間殿祈禱懇求你，
8:33 「你的子民以色列若得罪你，互對敵拍敗，𪜶若反悔歸向你，宣認你的名，閣佇此間聖殿對你祈禱懇求，
8:34 求你佇天裡聽𪜶，來赦免你的百姓以色列的罪，互𪜶倒來你所賞賜𪜶的列祖的地。
8:34 求你佇天頂俯落聽，赦免你的子民以色列的罪，互𪜶倒來你所賞賜𪜶列祖的地。
8:35 「設使𪜶得罪你，致到天關密無落雨，你刑罰𪜶的時；𪜶若向此所在祈禱，認你的名，離開𪜶的罪，
8:35 「𪜶若得罪你，你給天關密無落雨；你刑罰𪜶的時，𪜶若向此所在祈禱，宣認你的名，離開𪜶的罪惡，
8:36 求你佇天裡聽𪜶，赦免你的奴僕及你的百姓以色列的罪，佇你教示𪜶所著行的好路的時，閣落雨佇你的地，就是你賞賜你的百姓做業的。
8:36 求你佇天頂俯落聽𪜶的祈禱，赦免你的僕人及你的子民以色列的罪，教示𪜶行正直的路，閣落雨佇你賞賜𪜶做產業的地。
8:37 「此個地若有飢荒、瘟疫、枯焦、朽爛、草蜢、剪蟲，抑是𪜶的對敵佇𪜶許個城的地圍困𪜶，無論有甚麼災禍甚麼破病，
8:37 「此個地若有飢荒、瘟疫、火燒風、病害、草蜢、草蜢公，抑是對敵圍困𪜶的城，無論有什麼災禍，什麼大病，
8:38 或是一人，或是你的百姓以色列的眾人，逐個知家己心內的災禍，向此間殿攑起手，無論怎樣懇求，怎樣祈禱，
8:38 你的子民以色列中若有人為家己的災禍心艱苦，向此個聖殿攑手迫切懇求，
8:39 願你佇天裡你所徛起的所在來聽伊，來赦免來施行。你知𪜶的心，照𪜶逐人的行做來款待𪜶（因為世間逐人的心只有你知），
8:39 求你佇天頂，你徛起的所在，俯落聽來赦免𪜶，幫贊𪜶；因為你知𪜶的心，嘛只有你知世間人的心，願你照𪜶逐個人的行做對待𪜶，
8:40 互𪜶佇你賞賜阮列祖的地一世人敬畏你。
8:40 互𪜶佇你賞賜阮列祖的地，一世人敬畏你。
8:41 「論到外邦人是屬你的百姓以色列，伊為著你的名對遠遠的所在來的，
8:41 「若有外國人，毋是屬你的子民以色列的，因為聽著你的大名、大權能的作為，及你救助的手骨，對真遠的所在來，向此個殿祈禱，
8:42 （因為𪜶聽見你的大名大權能的手，伸出的手）若來向此個殿祈禱，
8:42 併於上節
8:43 願你佇天裡你徛起的所在來聽𪜶，照外邦人一切所對你求的來行，互天下萬百姓攏識你的名，敬畏你親像你的百姓以色列一樣；閣互𪜶知我所起此間殿是用你的名來稱的。
8:43 求你佇天頂，你徛起的所在，聽𪜶的祈求，照外國人一切對你懇求的來做，互天下萬民攏會親像你的子民以色列像款，識你的名，敬畏你；閣互𪜶知此個聖殿是敬拜求叫你的所在。
8:44 「你的百姓若出去你所差𪜶去的路，及對敵交戰，也向你所揀的城及我為著你的名所起的殿來祈禱耶和華，
8:44 「你的子民奉你的命令，無論出去什麼所在及對敵交戰的時，若向你所揀選的城，及我為著你的名起的殿，對上主祈禱，
8:45 願你佇天裡來聽𪜶的祈禱懇求，來給𪜶判斷。
8:45 求你佇天頂聽𪜶的祈禱懇求，互𪜶得勝。
8:46 「你的百姓若得罪你（因為無有無犯罪的人），你受氣𪜶，將𪜶交互對敵致到對敵掠𪜶到對敵的地，或是遠或是近，
8:46 「世間無一個人無犯罪，毋拘你的子民若得罪你，你對𪜶受氣，將𪜶交互對敵，給𪜶掠去對敵的地，無論遠抑是近，
8:47 𪜶若佇所掠去的地心內倒轉想，來反悔，閣佇掠𪜶的人的地，懇求你講：『阮有罪，阮有悖逆，阮有做歹』；
8:47 𪜶若佇互人掠去的地回心轉意，閣佇𪜶受掠的地悔改，對你哀求：『阮有罪，阮背逆，阮做歹。』
8:48 𪜶若佇受掠去的地就是對敵掠𪜶去的地，盡心盡性歸服你，閣向本地，就是你賞賜𪜶列祖的地及你所揀的城，以及我為著你的名所起的殿來祈禱你，
8:48 𪜶若佇對敵掠𪜶去的地，全心全意歸順你，閣向你賞賜𪜶列祖的地，及你所揀選的城，以及我奉你的名起的殿，對你祈禱，
8:49 願你佇天裡你所徛起的所在聽𪜶的祈禱懇求，給𪜶判斷；
8:49 求你佇天頂，你徛起的所在，聽𪜶的祈禱懇求，照公道對待𪜶，
8:50 閣赦免你的百姓得罪你的，以及𪜶一切得罪你的罪過，互𪜶得著憐憫佇掠𪜶的人的面前，致到掠𪜶的人憐憫𪜶。
8:50 閣赦免許個得罪你的子民，以及𪜶一切的罪過，互𪜶對掠𪜶的人得著憐憫。
8:51 因為𪜶是你的百姓，你的產業，是你導𪜶出埃及對鑄鐵的爐中出來者。
8:51 因為𪜶是你的子民，你的產業，是你對埃及，對鑄鐵的火爐中救出來的。
8:52 願你的目睭開看顧你的奴僕的祈禱，及你的百姓以色列的祈禱，來聽𪜶一切對你求的。
8:52 「至高的上主啊，求你開目睭看顧；你的僕人及你的子民以色列無論什麼時對你懇求，求你聽。你曾對地上萬民的中間分別阮的列祖做你的產業，是照你導𪜶出埃及的時，通過你的僕人摩西所應允的。」
8:53 主耶和華啊，因為你曾對地上眾百姓的中間分別𪜶，來做你的產業，是照你導阮的列祖出埃及的時，託你的奴僕摩西所講的。」
8:53 併於上節
為百姓祝福
8:54 所羅門佇耶和華的壇前腳頭窩跪啲，手伸向天，所對耶和華祈禱懇求的已經祈禱明白，就起來，
所羅門為人民祝福
8:54 所羅門雙腳跪佇上主的壇前，攑雙手向天，對上主祈禱懇求煞，就起來。
8:55 伊就徛啲，大聲祝福以色列全會眾，講：
8:55 伊徛啲，大聲祝福以色列全會眾，講：
8:56 「耶和華是應該著謳咾者！因為伊一切所應允的賞賜平安互伊的百姓以色列，見若託伊的奴僕摩西所應允的好話，無一句落空。
8:56 「上主應該受稱讚！伊有照應允賜太平互伊的子民以色列；伊通過伊的僕人摩西所應允恩典的話，無一句無實現。
8:57 願耶和華──咱的上帝及咱佇啲，親像伊及咱的列祖佇啲一樣，願伊無離開咱，無放拺咱，
8:57 願上主 — 咱的上帝及咱同在，親像伊及咱的列祖同在像款。願伊無離開咱，無放拺咱，
8:58 互咱的心歸向伊，來行伊一切的道路，守伊所命令咱的列祖的誡命、伊的律例、伊的法度。
8:58 互咱的心歸向伊，遵行伊一切的道路，守伊所互咱列祖的誡命、規例，及命令。
8:59 我今佇耶和華的面前所祈求諸個話，願諸個話日暝近佇咱的上帝──耶和華，閣日日照代誌所合宜的為伊的奴僕判斷，及伊的百姓以色列判斷，
8:59 願我佇上主的面前所祈求諸個話，暝日透到上主 — 咱的上帝面前；閣照逐日的需要幫贊伊的僕人及伊的子民以色列。
8:60 互地上萬百姓知耶和華是上帝，伊以外無別個。
8:60 互地上萬民知上主以外無別個上帝。
8:61 所以恁的心著純全向耶和華──咱的上帝，遵趁伊的律例，守伊的誡命，親像今仔日的款。」
8:61 所以恁著對上主 — 咱的上帝存純全的心，遵趁伊的規例，守伊的誡命，及今仔日仝款。」
奉獻聖殿
8:62 ( 代下 7:4-10 )
王及以色列眾百姓相及佇耶和華的面前獻祭。
奉獻聖殿
8:62 ( 代下 7:4-10 )
王及以色列人民做夥佇上主面前獻祭。
8:63 所羅門獻謝恩的祭就是獻互耶和華的，牛二萬二千隻，羊十二萬隻。按呢，王及以色列眾百姓為耶和華的殿行獻殿的禮。
8:63 所羅門向上主獻平安祭，牛兩萬兩千隻，羊十二萬隻。按呢，王及以色列人民為著上主的殿舉行奉獻禮。
8:64 當彼日，王分別耶和華殿前院中的所在，佇遐獻燒祭、素祭，及謝恩祭的油，因為耶和華頭前的銅壇甚細，𣍐容允得許個燒祭、素祭，及謝恩祭的油。
8:64 彼日，王因為聖殿頭前的銅壇傷細，無夠通佇遐獻燒化祭、素祭，及平安祭的油，就將上主殿前的埕中央的所在分別作聖，佇遐獻燒化祭、素祭，及平安祭的油。
8:65 彼時，所羅門及以色列眾人，就是對哈馬的路口到埃及的溪，攏及伊聚集做大會，佇耶和華──咱上帝的面前守節筵七日閣七日，共十四日。
8:65 彼時，所羅門及以色列人民佇上主 — 咱的上帝面前守節，七日，閣七日，共十四日；以色列人民對哈馬隘口到埃及的溪谷來參加，成做盛況的大會。
8:66 第八日，王差百姓去；𪜶就給王祝福。因為耶和華對伊的奴僕大衛及伊的百姓以色列所施出一切的恩惠，就歡喜心內快樂，逐個倒去𪜶的布棚。
8:66 節期煞隔日，王給人民解散，互𪜶倒去𪜶兜，𪜶就給王祝福。人民因為上主對伊的僕人大闢及伊的子民以色列所賞賜一切的恩惠，心內歡喜快樂。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。