上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
列王紀上
所羅門的王宮
7:1 所羅門起家己的厝，十三年久厝才起好；
所羅門起造宮殿
7:1 所羅門起家己的宮殿，起十三年才完成。
7:2 閣起黎巴嫩樹林的厝，長一百肘，闊五十肘，高三十肘，有柏香柴的柱四鑆，柱頂有柏香柴的楹。
7:2 伊閣起黎巴嫩林宮，長四十四公尺，闊二十二公尺，高十三公尺半；有柏香柴的柱四綴，柱頂有柏香柴的樑。
7:3 頂面用柏香柴蓋伊，蓋佇四十五支柱頂的楹，每鑆十五支柱。
7:3 內面有四十五支柱，每綴十五支，頂面用柏香柴蓋啲。
7:4 閣有窗門三鑆，窗及窗相對，三鑆攏是按呢。
7:4 閣有窗仔門三綴，窗仔及窗仔相對；攏總有三層。
7:5 諸個門及門竪是用柴做的攏是四方，有窗門三鑆，窗及窗相對，三鑆攏是按呢。
7:5 所有的門及門徛攏是四方；有窗仔門三綴，窗仔及窗仔相對；三層攏是按呢。
7:6 閣起有柱的兩廊，長五十肘，闊三十肘；佇𪜶的頭前閣有兩廊，佇𪜶的頭前有柱及戶椗。
7:6 伊閣起有柱的大廳，長二十二公尺，闊十三公尺半；柱的頭前有走廊，走廊有用柱托啲的天篷。
7:7 閣起座位的廊就是審判的廊，通佇遐審判，此個廊對地板到天羅板用柏香柴蓋。
7:7 閣起王位的廳，就是審判廳，王佇遐審判案件；此個廳的地板對此旁到彼旁攏鋪柏香柴。
7:8 所羅門家己所欲徛的厝；另外有一間院佇廊的內面起造的法相同。所羅門娶法老的查某子，也給伊起一間厝，及此個廊相同。
7:8 所羅門佇廳後面的埕起一間家己住的宮殿，起造的方法像款。所羅門另外為伊的某法老的查某子起一間及此個廳像款的宮殿。
7:9 起諸個攏是用寶貝的石，照寸尺來拍好的石，內外用鋸仔鋸的；對地基到簾簷，對外面到大院，攏是按呢。
7:9 諸個宮殿，對地基到壁頂，對外面到大埕，攏是用貴重的石起的；諸個石照寸尺拍好，四面用鋸仔修整過。
7:10 地基是貴氣的石是大塊石，有十肘的石，有八肘的石；
7:10 地基是用大塊貴重的石，長有的三公尺半，有的四公尺。
7:11 頂面有貴氣的石照寸尺拍好的石，也有柏香柴。
7:11 頂面有照寸尺拍好貴重的石，嘛有柏香柴。
7:12 大院周圍有拍好的石三勻、柏香柴一勻，攏親像耶和華殿的內院及殿的廊。
7:12 大埕周圍有拍好的石三層、柏香柴一層，攏及上主聖殿的內埕以及殿的走廊像款。
戶蘭的工作
7:13 所羅門王差人對推羅帶戶蘭來。
戶蘭的工作
7:13 所羅門王派人對泰爾請戶蘭來。
7:14 伊是拿弗他利支派中一個守寡人的子，伊的老父是推羅人，是拍銅師傅。戶蘭有智慧、聰明、本事滿滿，𠢕拍逐項的銅器。伊來所羅門王遐，做伊一切的工。
7:14 伊是拿弗他利支族一個寡婦的子；伊的老父是泰爾人，是拍銅師傅。戶蘭真有智慧、聰明，及技術，𠢕拍逐項銅器。伊來所羅門王遐，做王交代伊一切的工。
兩支銅柱
7:15 ( 代下 3:15-17 )
伊製造二支銅柱，每支高十八肘，柱的周圍十二肘；
銅柱
7:15 ( 代下 3:15-17 )
戶蘭鑄造兩支銅柱，逐支高八公尺，柱的周圍五公尺三十公分。
7:16 閣用銅來鑄二個柱枓下佇柱頂，此個柱枓高五肘，彼個柱枓高也五肘。
7:16 閣用銅鑄兩個柱斗下佇柱頂；逐個柱斗高兩公尺二十公分。
7:17 柱頂的柱枓有刺一目一目的網仔及一環一環的鍊仔，此個柱枓有七個，彼個柱枓也有七個。
7:17 兩支銅柱頂面的柱斗，攏有掛七組一目一目的網仔及一環一環的鍊仔。
7:18 伊造柱佇一個網仔的頂面的四圍有石榴二鑆，用伊來遮蓋柱頂的柱枓，彼個柱枓也是按呢。
7:18 閣造兩綴石榴圍佇網仔的周圍，來妝飾柱頂的柱斗；兩旁柱斗攏是按呢。
7:19 廊的內面柱頂的柱枓，有刻百合花四肘。
7:19 走廊柱頂的柱斗高一公尺八十公分，有刻百合花。
7:20 二支柱頂近網仔邊肨圓的所在有柱枓，閣有石榴二百粒佇第二個柱枓，逐鑆圍伊。
7:20 兩旁銅柱的柱斗，倚網仔邊椪圓的所在，攏有石榴兩百粒圍啲。
7:21 伊徛二支柱佇殿的兩廊：徛佇正旁的，名叫雅斤；徛佇倒旁的，名叫波阿斯。
7:21 伊徛兩支柱佇聖殿的走廊；正旁彼支叫做雅斤，倒旁彼支叫做波阿斯。
7:22 佇柱頂刻百合花。按呢，造柱的工就明白。
7:22 柱頂有刻百合花；按呢，造柱的工程就完成。
銅海
7:23 ( 代下 4:2-5 )
伊閣鑄一個銅海，款式是圓的，高五肘，對此旁到彼旁十肘，周圍三十肘。
銅海
7:23 ( 代下 4:2-5 )
戶蘭閣鑄一個圓形的銅海，深兩公尺二十公分，直徑四公尺四十公分，周圍十三公尺二十公分。
7:24 佇伊的墘的下面，有匏仔的款圍伊；每肘十粒，來圍彼個銅海，匏仔有二鑆，鑄銅海的時續鑄的。
7:24 銅海的唇下面有匏仔圍啲，每四十五公分十粒，有兩排，是鑄銅海的時像時鑄的。
7:25 銅海靠佇十二隻銅牛的頂面：三隻向北，三隻向西，三隻向南，三隻向東；銅海下佇牛的頂面，牛尾向內面。
7:25 銅海安佇十二隻銅牛的頂面；三隻向北，三隻向西，三隻向南，三隻向東；牛尾向內面。
7:26 銅海厚一巴掌的闊，伊的墘親像杯的墘，親像百合花，通貯二千罷特。
7:26 銅海的厚度七公分半；伊的唇親像杯的唇，形親像百合花；會當貯四萬公升。
銅座
7:27 伊用銅創十個座，每座長四肘，闊四肘，高三肘。
銅座
7:27 戶蘭閣用銅製造十個盆座；逐個座長一公尺八十公分，闊一公尺八十公分，高一公尺三十公分。
7:28 逐個座的款式是按呢：攏有隔堵，伊的堵佇角的所在相接，
7:28 逐個座四圍攏有堵枋鬥佇架裡。
7:29 佇伊的角相接的所在，堵的頂面有獅及牛，及𠼻𡀔兵；佇角相接的所在的頂面有小座，獅及牛的下面有垂古簷窗的鬚。
7:29 堵枋有獅、牛，及基路伯；獅及牛的頂面及下面，攏有浮出來的花環雕刻。
7:30 逐個座有四個銅輪及銅的軸心。伊的四腳各有架，架鑄佇盆的下面，逐個邊仔有古簷窗的鬚。
7:30 逐個座有四個銅輪及銅的車輪心；座的四腳攏有架；架鑄佇盆的下面，四邊有花環的雕刻。
7:31 伊的嘴佇枓的內面向頂一肘，伊的嘴是圓的，親像小座的款式，一肘半，佇伊的嘴有雕刻，伊的堵是四方的，是圓的。
7:31 座對內面到頂面深四十五公分；伊的嘴是圓的，直徑六十六公分，閣有雕刻。座的堵是四方的，毋是圓的。
7:32 四個輪佇堵的下面，輪的軸心及座相連，逐個輪高一肘半。
7:32 四個輪佇堵的下面；車輪心及座相連；逐個輪高六十六公分。
7:33 輪的款親像車輪的款；伊的軸心、伊的外環、伊的軹、伊的內環攏是鑄的。
7:33 輪的形狀親像戰車輪；伊的車輪心、外環、軹，及內環，攏是鑄的。
7:34 座的四角有四個架，架及座連做一個。
7:34 座的四角有四個架，架及座連做一個。
7:35 座的頂面有圓的緣，高半肘；座的頂面有伊的托及伊的堵，攏及座連做一個。
7:35 座的頂面有圓的箍，高二十二公分；座的頂面有托柺及堵枋，攏及座連做一個；
7:36 伊的托的板及伊的堵的頂面，伊刻𠼻𡀔兵、及獅，及棗樹，照伊的空位，四圍有結古簷窗的鬚。
7:36 托柺及堵枋頂面的空位，有刻基路伯、獅，及棕樹；四圍有刻花環。
7:37 伊照按呢創十個座，𪜶的鑄法、寸尺、款式，攏相同。
7:37 伊照仝款的作法鑄十個座；寸尺，形狀攏像款。
7:38 閣造銅盆十個，每盆通貯四十罷特。逐個盆直徑四肘，十個座的頂面，逐個座下一個盆。
7:38 戶蘭閣造十個銅盆，逐個盆直徑一公尺八十公分，通貯八百公升，十個盆座的頂面，每一個座下一個盆。
7:39 許個座五個下佇殿的正旁，五個下佇殿的倒旁；閣用銅海下佇殿的正旁，佇東勢的南旁。
7:39 許個座，五個下佇聖殿的南旁，五個下佇北旁；銅海下佇聖殿的東南旁。
聖殿設備的清單
7:40 ( 代下 4:11—5:1 )
戶蘭閣創盆、托仔，及盤。對按呢，戶蘭為著所羅門王做完耶和華殿一切的工。
聖殿的用具
7:40 ( 代下 4:11-5:1 )
戶蘭閣造盆、托仔，及碗。按呢，戶蘭為著所羅門王完成上主聖殿一切的工：
7:41 就是：二支柱及柱頂的柱枓的二粒球；以及蓋佇柱頂柱枓的球二個網；
7:41 兩支柱、柱頂碗形的柱斗、蓋碗形柱斗的網仔；
7:42 為著二個網做四百粒石榴，一個網有二鑆的石榴，來蓋柱頂柱枓的二粒球；
7:42 四百粒石榴，分做兩旁，一旁兩排，安佇兩領蓋碗形柱斗的網仔；
7:43 十個座及座頂十個盆；
7:43 十個盆座及座頂十個盆；
7:44 銅海一個及銅海下面十二隻牛；
7:44 一座銅海，銅海下面十二隻牛；
7:45 盆、托仔、盤。諸個一切攏是戶蘭為所羅門王做耶和華殿的器具攏用光明的銅來做的，
7:45 盆、托仔，及碗；
以上諸個器具攏是戶蘭為著所羅門王起上主聖殿用光亮的銅做的。
7:46 王佇約但的平洋、佇疏割及撒拉但的中間佇粘土的地鑄成的。
7:46 諸個器具是王佇約旦平原，用疏割及撒拉旦中間的黏土做模鑄造的。
7:47 諸個一切的器具所羅門攏無過秤；因為極其多，銅的輕重也𣍐得通知。
7:47 因為銅做的器具傷多，所羅門就攏無過秤，銅的重量無法度計算。
7:48 所羅門也做耶和華殿內一切的器具，就是金壇及排列餅的桌用金做的；
7:48 所羅門閣造上主殿內所有的器具：金壇、排獻祭的餅的金桌；
7:49 後殿的頭前的燈台：正旁五個，倒旁五個，攏用好金做的，伊的花、伊的燈、伊的鉗，用金做的，
7:49 內殿頭前的燈台，正旁五個，倒旁五個，攏用純金做；燈台的花、燈、鑷仔，嘛用金做；
7:50 伊的杯、伊的剪刀、伊的碗、伊的匙、伊的火鼎，是用好金做的，閣有門臼，就是後殿、至聖所的門臼，及彼個厝，前殿的門臼，攏用金做的。
7:50 燈台的杯、燈心的剪刀、盤、囥香的𥐵仔，及囥火炭的盆是純金做的；上內面至聖所的門及前殿的門的門鈕，攏是金的。
做完殿一切的工
7:51 按呢，所羅門王做完耶和華殿一切的工，所羅門將伊的老父大衛所獻的物帶入去，銀金及器具下佇耶和華殿的府庫。
7:51 按呢，所羅門王完成上主聖殿一切的工。所羅門將伊的老父大闢所獻的金、銀，及器具攏帶入去下佇上主聖殿的府庫。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。