上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
列王紀上
所羅門起造聖殿
6:1 以色列人出埃及地了後四百八十年，所羅門做以色列王第四年西弗月，就是二月，動工起耶和華的殿。
所羅門起造聖殿
6:1 ( 代下 3:2-4 )
以色列人出埃及了後四百八十年，所羅門做以色列王第四年二月，就是西弗月，伊動工起造上主的聖殿。
6:2 所羅門王為耶和華所起的殿，長六十肘，闊二十肘，高三十肘。
6:2 所羅門王為上主起的殿，長二十七公尺，闊九公尺，高十三公尺半。
6:3 彼塊厝殿前的廊長二十肘，及伊的厝的闊平，佇厝的頭前伊的闊十肘；
6:3 殿前的走廊深四公尺半，闊九公尺，及殿平闊。
6:4 閣為著厝做窗，有關死的窗仔子。
6:4 伊為著聖殿做內面闊外面狹的窗仔。
6:5 倚佇厝的牆，四圍起樓，就是倚佇厝的牆的四圍，前殿後殿攏是按呢，起邊房佇四圍；
6:5 伊佇倚聖殿，包括前殿及內殿的外壁四圍起廂房；
6:6 樓的下層闊五肘，中層闊六肘，三層闊七肘。佇厝的外面做幫牆佇伊的四圍，互楹仔無插入殿的牆。
6:6 第一層闊兩公尺二十公分，第二層闊兩公尺七十公分，第三層闊三公尺十公分；佇聖殿的外壁四圍閣做幫牆，才免互楹仔插入殿的壁。
6:7 殿啲起的時，是用山中拍好的石。起殿的時，鎚、斧頭，及別號鐵器的聲音攏無聽見。
6:7 起造聖殿的石材已經攏佇石場拍好，所以起造的時就無槌、斧頭，及逐種鐵器的聲。
6:8 邊仔中房的門，就是佇殿的正旁，對捲螺梯上中層，對中層上到第三層。
6:8 廂房第一層的入口佇聖殿的南旁；對第一層有捲螺梯上第二層，對第二層上到第三層。
6:9 對按呢起殿到好，就用柏香柴的楹，柏香柴的板遮蓋殿。
6:9 伊用柏香柴做樑，用柏香柴板做厝頂；按呢，聖殿就起好。
6:10 閣倚佇歸間的殿有起樓，各高五肘，諸個攏用柏香柴靠佇殿裡。
6:10 倚聖殿的壁起的廂房，逐層高兩公尺二十公分；柏香柴的樑攏靠佇殿的幫牆。
耶和華的約
6:11 耶和華的話臨到所羅門講：
6:11 上主對所羅門講：
6:12 「論到你所起此間殿，你若行我的律例，趁我的法度，守我一切的誡命，照按呢行，我就欲照我所應允你的父大衛的話應驗佇你。
6:12 「關係你所起此間聖殿，你若切實遵行我的規例、命令，及誡命，我就欲對你實現我應允你的老父大闢的話。
6:13 我欲𫢶佇以色列人的中間，也無放拺我的百姓以色列。」
6:13 我欲𫢶佇以色列人的中間，一定𣍐放拺我的子民以色列。」
殿內的設備
6:14 ( 代下 3:8-14 )
所羅門起殿已經明白。
聖殿內部的設備
6:14 ( 代下 3:8-14 )
所羅門完成起造聖殿的工作。
6:15 用柏香柴的板起做殿的內重牆，對殿的土腳到楹仔，攏用柴蓋伊的內重，閣用松樹板舖殿的土腳。
6:15 伊用柏香柴板貼聖殿內面的壁，對土腳到壁頂；閣用松樹板鋪殿的土腳。
6:16 閣佇殿的後面，用柏香柴板起二十肘，對土腳到楹仔給伊做佇內面做後殿，就是至聖所。
6:16 閣佇殿內面的後旁隔一間內殿做至聖所，長九公尺；對土腳到壁頂用柏香柴板隔起來。
6:17 後殿前的殿，深四十肘。
6:17 前殿長十八公尺。
6:18 殿內的柏香柴攏有刻匏仔及花蕊；殿內攏是柏香柴，無看見一塊石。
6:18 聖殿內面的柏香柴板攏有刻匏仔及花蕊；殿內攏用柏香柴包啲，連一塊石頭都看𣍐著。
6:19 厝的內面有備辦後殿，欲佇遐安置耶和華的約櫃。
6:19 內殿準備欲安置上主的約櫃。
6:20 後殿的內面長二十肘，闊二十肘，高二十肘，攏用好金安伊；也用柏香柴蓋壇。
6:20 內殿，長、闊、高攏九公尺，內面貼純金；香壇用柏香柴蓋啲。
6:21 厝內所羅門攏用好金安伊，後殿的頭前牽金鍊仔，也用好金安伊。
6:21 所羅門用純金貼聖殿的內部，嘛用純金貼內殿的入口，閣牽金鍊仔。
6:22 全殿攏安金，到彼間殿攏起好；倚佇後殿的壇，也攏安金。
6:22 聖殿的內部及內殿前的香壇攏貼金，到歸間聖殿攏貼滿。
做二個𠼻𡀔兵
6:23 佇後殿的內面，伊用橄欖柴做二個𠼻𡀔兵，逐個高十肘。
造兩個基路伯
6:23 佇內殿的內面，所羅門用橄欖柴造兩個天使基路伯，逐個高四公尺四十公分。基路伯兩旁的翼逐旁長兩公尺二十公分；對此旁的翼尾到彼旁的翼尾，約四公尺四十公分。另外一個基路伯嘛像款。
6:24 𠼻𡀔兵此旁的翅五肘，𠼻𡀔兵彼旁的翅五肘，對此旁的翅尾到彼旁的翅尾共十肘；
6:24 併於上節
6:25 彼個𠼻𡀔兵也是十肘，二個𠼻𡀔兵的寸尺、款式攏相同。
6:25 併於上節
6:26 此個𠼻𡀔兵高十肘，彼個𠼻𡀔兵也是按呢。
6:26 併於上節
6:27 將𠼻𡀔兵下佇後殿的內面；𠼻𡀔兵的翅展開，此個𠼻𡀔兵一個翅到此旁的牆，彼個𠼻𡀔兵一個翅到彼旁的牆，佇殿內𪜶二個翅相接；
6:27 伊將基路伯下佇內殿的內面；基路伯的翼搋開，第一個基路伯一旁的翼抵著此旁的壁，第二個一旁的翼抵著彼旁的壁；𪜶另外兩支翼佇殿的中央相磕。
6:28 伊閣用金安許個𠼻𡀔兵。
6:28 伊閣用金貼許個基路伯。
殿的妝飾
6:29 彼個殿四圍的牆，內外攏有雕刻，就是雕刻𠼻𡀔兵、棗樹，及花蕊的款式。
聖殿的妝飾
6:29 聖殿的前殿及內殿四圍的壁，攏有刻基路伯、棕樹，及花蕊的形狀。
6:30 殿的地板，內外攏安金。
6:30 前殿及內殿的地板攏貼金。
6:31 閣用橄欖柴做入後殿的門、伊的門楣、門竪；鎮牆的五份一。
6:31 所羅門閣用橄欖柴做入內殿的門；門楣及門徛攏是五角形的柱。
6:32 用橄欖柴所造二個門扇頂面刻𠼻𡀔兵、棗樹，及花蕊的款式，攏安金，閣用金鑲𠼻𡀔兵及棗樹的頂面。
6:32 佇用橄欖柴造的兩個門扇刻基路伯、棕樹，及花蕊，攏貼金；閣用金鑲佇基路伯及棕樹頂面。
6:33 閣用橄欖柴做入殿的門竪，鎮牆的四份一。
6:33 閣佇前殿的入口用橄欖柴做四角形的門徛。
6:34 用松樹柴做雙旁的門扇。此旁門的二扇，會拗得；彼旁門的二扇，也會拗得。
6:34 用松樹柴做雙旁的門扇；兩旁的門扇各有兩片，會拗得；
6:35 頂面刻𠼻𡀔兵、棗樹，及花蕊的款式，攏安金，閣用金鑲佇雕刻的工的頂面。
6:35 頂面刻基路伯、棕樹，及花蕊，攏貼金；閣將金拍平，鑲佇雕刻物的頂面。
6:36 伊閣用拍好的石三勻、柏香柴一勻來起內院。
6:36 伊閣用拍好的石三排及柏香柴一排來起內埕。
6:37 第四年西弗月，下耶和華殿的地基。
6:37 所羅門作王第四年二月，就是西弗月，下上主聖殿的地基。
6:38 到十一年布勒月，就是八月，殿堂所有一切照伊的款式造成。伊起造共七年久。
6:38 到十一年八月，就是布勒月，聖殿所有的工程攏照計劃完成；起造共七年久。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。