上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
列王紀上
所羅門的人臣
4:1 所羅門王做以色列眾人的王。
所羅門的人臣
4:1 所羅門王做全以色列的王。
4:2 伊所有的人臣記佇下面：撒督的子亞撒利雅做祭司，
4:2 伊的人臣記佇下面：撒督的子亞撒利雅做祭司；
4:3 示沙二個子以利何烈、亞希亞做秘書，亞希律的子約沙法做史官，
4:3 示沙兩個子以利何烈及亞希雅做書記；亞希律的子約沙法做史官；
4:4 耶何耶大的子比拿雅做軍長，撒督及亞比亞他做祭司，
4:4 耶何耶大的子比拿雅做元帥；撒督及亞比亞他做祭司；
4:5 拿單的子亞撒利雅做眾官長，拿單的子撒布得做祭司，也做王的朋友，
4:5 拿單的子亞撒利雅做總督長；拿單的子撒布得做祭司，及王的顧問；
4:6 亞希煞做管家的，亞比大的子亞多尼蘭做督工的。
4:6 亞希煞做宮廷總管；押大的子亞多尼蘭做強制勞工的監督。
4:7 所羅門佇以色列全地設立十二個官員，𪜶為著王及伊的家備辦食物，每年逐人一月日備辦食物。
4:7 所羅門佇以色列全地設立十二個總督，為著王及王的家族備辦食物，每年逐個人供給一個月。
4:8 𪜶的名記佇下底：佇以法蓮山地有便‧戶珥；
4:8 𪜶的名記佇下面：便‧戶珥佇以法蓮山區；
4:9 佇瑪迦斯、沙賓、伯‧示麥、以倫‧伯‧哈南有便‧底甲；
4:9 便‧底甲佇瑪加斯、沙賓、伯‧示麥、以倫‧伯‧哈南；
4:10 佇亞魯泊有便‧希悉，伊也佇梭哥及希弗全地；
4:10 便‧希悉佇亞魯泊，嘛管理梭哥及希弗全地；
4:11 佇多珥的全山地有便‧亞比拿達，伊娶所羅門的查某子他法做某；
4:11 便‧亞比拿達佇多珥的全山地；伊娶所羅門的查某子她法做某；
4:12 佇他納及米吉多，及倚近撒拉他拿、耶斯列下旁的伯‧善全地，對伯‧善到亞伯‧米何拉到約念的外面，有亞希律的子巴拿；
4:12 亞希律的子巴拿佇他納、米吉多，及倚近撒拉旦、耶斯列下旁的伯‧善全地，對伯‧善到亞伯‧米何拉，到約緬彼旁；
4:13 佇基列的拉末有便‧基別，伊也佇基列的瑪拿西子孫睚珥許個城，巴珊的亞珥歌伯地的大城六十座城，攏有城牆及銅的門楗；
4:13 便‧基別佇基列的拉末城，伊嘛佇基列的瑪拿西子孫睚珥許個城，巴珊的亞珥歌伯地的大城，共六十座城，攏有城牆及銅的門閂；
4:14 佇瑪哈念有易多的子亞希拿達；
4:14 易多的子亞希拿達佇瑪哈念；
4:15 佇拿弗他利有亞希瑪斯，伊也娶所羅門一個查某子巴實抹做某；
4:15 亞希瑪斯佇拿弗他利；伊娶所羅門另外一個查某子芭實抹做某；
4:16 佇亞設及亞祿有戶篩的子巴拿；
4:16 戶篩的子巴拿佇亞設及比亞綠；
4:17 佇以薩迦有帕路亞的子約沙法；
4:17 帕路亞的子約沙法佇以薩迦；
4:18 佇便雅憫有以拉的子示每；
4:18 以拉的子示每佇便雅憫；
4:19 佇基列地，有烏利的子基別，伊也佇亞摩利王西宏及巴珊王噩的地，獨獨伊一人佇遐做官。
4:19 烏利的子基別佇基列地；就是以前亞摩利王西宏及巴珊王噩的地。
另外有一個總督長管理所有的地區。
所羅門的富強
4:20 猶大及以色列眾人真多，親像海邊的沙許多，也食也飲也真快樂。
所羅門的富強
4:20 猶大及以色列的人口多甲親像海邊的沙；𪜶糧食充足，嘛真快樂。
4:21 對大河到非利士地，直到埃及邊界許個國，所羅門攏管轄𪜶。所羅門活啲的日，𪜶攏進貢服事伊。
4:21 所羅門管轄對幼發拉底河到非利士人的地，直到埃及邊界許個國；所羅門在生的日，𪜶攏進貢歸順伊。
4:22 所羅門逐日所用來食的：幼的麵粉三十歌珥，粗的麵粉六十歌珥，
4:22 所羅門逐日需要的糧食：幼麵粉五千公升，粗麵粉一萬公升；
4:23 肥的牛十隻，草場的牛二十隻，羊一百隻，猶有鹿、羚羊、赤鹿，及肥的雞。
4:23 牛椆內飼的肥牛十隻，草埔的牛二十隻，羊一百隻，猶有鹿、羚羊、赤鹿，及肥的禽鳥。
4:24 因為伊管轄大河此旁的全地，對提弗薩到迦薩，就是彼個河此旁諸個王，閣佇伊四圍的四方攏享受太平。
4:24 伊統治幼發拉底河西旁所有地區，就是對提弗薩到迦薩諸個王國；伊所管轄的全地攏享受太平。
4:25 所羅門活啲的日，對但到別是巴的猶大人及以色列人攏安然徛起，逐人佇伊的葡萄樹腳及無花果樹腳。
4:25 所羅門活啲的日，對但到別是巴的猶大人及以色列人，攏佇𪜶的葡萄樹及無花果樹腳安然徛起。
4:26 所羅門有四萬間套車的馬房，有馬兵一萬二千。
4:26 所羅門有四萬間拖戰車的馬的馬椆，閣有一萬兩千個馬兵。
4:27 許個官員逐個照伊的月份給所羅門王，及見若坐所羅門王的桌的備辦食物，攏無欠一項。
4:27 許個總督，逐個照𪜶負責的月分，為著所羅門王及王宮內的人準備食物，連一項都無欠。
4:28 各人盡伊的職，為著馬及𠢕跑的馬帶大麥及草料到𪜶的所在。
4:28 𪜶閣照𪜶的職責，為著戰馬及其他用途的馬運送大麥及草料去需要的所在。
所羅門的智慧
4:29 上帝賞賜所羅門智慧聰明極大，心也開闊，親像海邊的沙。
所羅門的智慧
4:29 上帝賞賜所羅門極大的智慧聰明，互伊的理解力親像海邊的沙𣍐量得。
4:30 所羅門的智慧𨃟過東方的人的智慧及埃及一切的智慧。
4:30 所羅門的智慧超過所有東方人的智慧及埃及人一切的智慧。
4:31 伊的智慧贏過萬人，贏過以斯拉人以探，及瑪曷的子希幔、甲各、達大。伊的名聲報揚佇四圍列國。
4:31 伊的智慧贏過所有的人，贏過以斯拉人以探，及瑪曷的子希幔、甲各、達大；伊的名聲傳到四圍逐國。
4:32 伊做箴言三千句，詩歌一千連五首。
4:32 伊做箴言三千句，詩歌一千空五首。
4:33 伊講論草木，對黎巴嫩的柏香樹到牆頂發起來的牛膝草，閣講論走獸、飛鳥、蟲𧒴水族。
4:33 伊講論草木，對黎巴嫩的柏香樹到牆仔頂發起來的牛膝草；嘛講論走獸、飛鳥、蟲𧒴、魚類。
4:34 有人對列邦來聽所羅門智慧的話，天下列王聽見所羅門的智慧，也有差人來。
4:34 列國的王聽著所羅門王的智慧，就攏派人去聽所羅門智慧的話。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。