上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
列王紀上
大衛互所羅門的遺訓
2:1 大衛欲死的期近啦，就吩咐伊的子所羅門講：
大闢互所羅門的遺言
2:1 大闢臨終的時，交代伊的子所羅門講：
2:2 「我啲欲行世間眾人所著行的路。所以，你著勇敢，做大丈夫，
2:2 「我啲欲行世間人攏著行的路；你著堅強，做大丈夫。
2:3 守耶和華──你上帝所交代你守的，行伊的道路，守伊的律例、伊的誡命、伊的法度、伊干證的話，照所寫佇摩西律法的冊裡的。按呢，你無論做甚麼，無論對叨落去，攏會亨通。
2:3 你著遵守上主 — 你的上帝所吩咐的，行伊的道路；照摩西律法所記載，遵守伊的規例、誡命、命令，及教示。按呢，你無論做什麼，無論去叨位，攏會亨通；
2:4 也互耶和華應驗伊所應允我的話講：『你的子孫若謹慎伊的路，盡心盡意誠實行佇我的面前，就你的後裔坐以色列的國位永無斷。』
2:4 上主嘛會實現伊對我的應允：『你的子孫若謹慎生活，盡心盡意真誠佇我的面前行做，你的後代就會坐以色列的王位永無斷。』
2:5 你也知洗魯雅的子約押對我所行的，伊對以色列二個軍長所行的：就是尼珥的子押尼珥及益帖的子亞瑪撒，伊刣死𪜶。伊佇太平的時流𪜶的血，親像佇交戰的時一樣，將此個交戰的血染著伊的腰所縖的帶及伊的腳所穿的鞋。
2:5 「你嘛知洗璐雅的子約押按怎對待我。伊有刣死尼珥的子押尼珥及益帖的子亞瑪撒此兩個以色列的元帥；伊佇太平的時用交戰的手段刣死𪜶，流𪜶的血，互血沐著伊的腰帶及鞋。
2:6 所以你著照你的智慧來行，通容允伊白頭毛安然落陰間。
2:6 所以你應該知著按怎做，毋通互伊白頭毛安然落陰間。
2:7 你著好款待基列人巴西萊許個子，互𪜶常常佇你的桌食；因為我閃避你的兄押沙龍的時，𪜶按呢款待我。
2:7 你著好款待基列人巴西萊許個子，互𪜶常常及你做夥食；因為我逃避你的兄哥押沙龍的時，𪜶有好款待我。
2:8 看啊，及你佇啲的有巴戶琳的便雅憫人，基拉的子示每；我去瑪哈念的日，伊用重的咒詛咒詛我，總是伊有落約但迎接我，我就指耶和華對伊咒誓講：『我無欲用刀刣你。』
2:8 著會記得巴戶琳的便雅憫人基拉的子示每；我去瑪哈念的時，伊有用惡毒的話咒詛我。毋拘伊後來有落去約旦河迎接我，我就指上主對伊咒誓講：『我無欲用刀刣你。』
2:9 今你莫得算伊無罪。因為你是聰明的人，也會知著怎樣款待伊，著互伊白頭毛，流血落陰間。」
2:9 今你毋通放伊煞。你是聰明的人，應該知著按怎做；著給伊刣死，互伊的白頭毛沐著血落陰間。」
大衛及伊的列祖相及睏
2:10 大衛及伊的列祖相及睏，埋葬佇大衛的城。
大闢的死
2:10 大闢轉去伊的列祖遐了後，安葬佇大闢城。
2:11 大衛做以色列王共四十年；佇希伯崙做王七年，佇耶路撒冷做王三十三年。
2:11 大闢作王統治以色列共四十年：佇希伯崙七年，佇耶路撒冷三十三年。
2:12 所羅門坐伊的老父大衛的位，伊的國堅固到極。
2:12 所羅門坐伊老父大闢的王位；伊的國非常穩固。
亞多尼雅的死
2:13 哈及的子亞多尼雅去見所羅門的老母拔示巴，伊問伊講：「你來是平安嗎？」應講：「平安」；
亞多尼雅的死
2:13 哈及的子亞多尼雅去見所羅門的老母拔示芭；拔示芭問伊講：「你有帶平安來無？」
亞多尼雅應講：「有帶平安。」
2:14 閣講：「我有代誌欲對你講。」伊講：「做你講。」
2:14 閣講：「我有代誌欲對你請求。」
拔示芭講：「請講。」
2:15 亞多尼雅講：「你知國本是我的，以色列眾人也攏意向我，愛我做王，總是，國反轉歸我的小弟，因為是對耶和華互伊。
2:15 亞多尼雅講：「你知此個國本來是我的，以色列眾人嘛攏愛我作王；毋拘國煞歸互我的小弟，因為這是上主的意思。
2:16 今我有一件事求你，向望你莫得推辭我。」伊講：「做你講。」
2:16 今我有一件事請求你，向望你毋通給我推辭。」
拔示芭講：「什麼代誌？」
2:17 伊講：「求你對所羅門王講，互伊將書念的查某子亞比煞賞賜我做某，因為王的確無推辭你。」
2:17 伊講：「請你對所羅門王講：將書念的女子雅比莎賜我做某，因為王一定會聽你的話。」
2:18 拔示巴講：「好，我替你給王講。」
2:18 拔示芭講：「好，我替你給王講。」
2:19 對按呢，拔示巴去見所羅門王，欲為著亞多尼雅給伊講；王起來迎接伊，對伊鞠躬，閣坐伊的位，吩咐人為王的老母設座位，伊就坐佇王的正旁。
2:19 拔示芭就去見所羅門王，欲替亞多尼雅請求。王起來迎接伊，對伊鞠躬；王閣倒轉去坐伊家己的位，吩咐人為伊的老母安排坐位。拔示芭就坐佇王的正旁，
2:20 伊就講：「我有一件小可事求你，請你莫得推辭我。」王給伊講：「我的老母啊，做你講，我無欲推辭你。」
2:20 講：「我有一件小事欲請求你，請毋通給我推辭。」
王給伊講：「阿母，請你講；我𣍐給你推辭。」
2:21 伊講：「願用書念的查某囝仔亞比煞互你的兄亞多尼雅做某。」
2:21 伊講：「請將書念的女子雅比莎互你的兄哥亞多尼雅做某。」
2:22 所羅門王應伊的老母講：「你啥事為著亞多尼雅求書念的查某囝仔亞比煞啊？也著替伊求國，因為伊是我的兄，就是著為伊及祭司亞比亞他及洗魯雅的子約押來求。」
2:22 所羅門王應伊的老母講：「你是按怎替亞多尼雅求書念的女子雅比莎？伊是我的兄哥，你歸氣替伊求王位；伊閣有祭司亞比亞他，及洗璐雅的子約押啲給擁護。」
2:23 所羅門王就指耶和華來咒誓講：「亞多尼雅講這話是害家己的生命，若無，願上帝加倍責罰我。
2:23 所羅門王就指上主咒誓講：「亞多尼雅講諸個話，我若無互伊死，願上帝加倍責罰我。
2:24 耶和華堅固我，互我坐我的父大衛的位，照伊所應允的話給我建立家；我指伊的永活來咒誓，亞多尼雅今仔日的確死。」
2:24 上主選立我，互我坐我的老父大闢的王位，照伊的應允建立我的家；我指此位永活的上主咒誓，亞多尼雅今仔日一定著死。」
2:25 所羅門王就差耶何耶大的子比拿雅去，伊就拍伊互伊死。
2:25 所羅門王就派耶何耶大的子比拿雅去給亞多尼雅刣死。
亞比亞他受革逐及約押的死
2:26 王給祭司亞比亞他講：「你著倒去亞拿突你的田園遐！你應該著死，總是今仔日我互你死，因為你佇我的父大衛的面前有扛主耶和華的櫃，閣我的老父所受一切的患難，你也及伊受患難。」
亞比亞他及約押的結局
2:26 王給祭司亞比亞他講：「你著倒去亞拿突你的家鄉。你應該著死，毋拘我今仔日無欲刣你，因為你曾佇我的老父大闢的面前扛至高上主的約櫃，閣及我的老父同受患難。」
2:27 所羅門就革逐亞比亞他，准伊做耶和華的祭司。按呢，就應驗耶和華佇示羅論以利的家所講的話。
2:27 所羅門就剝亞比亞他的職位，不准伊做上主的祭司；按呢就應驗上主佇示羅所講有關以利的家的話。
2:28 此個消息傳到約押，約押就走入耶和華的布棚，擒壇角。因為約押雖然無隨押沙龍，總是隨亞多尼雅。
2:28 此個消息傳到約押，約押就逃走，入去上主的會幕，擒佇祭壇的角；因為約押雖然無隨押沙龍，毋拘有擁護亞多尼雅。
2:29 有人給所羅門王講：「約押走到耶和華的布棚，今佇壇邊。」所羅門就差耶何耶大的子比拿雅，講：「你去拍伊。」
2:29 有人給所羅門王報告，約押走去上主的會幕，擒佇祭壇的角；所羅門就派耶何耶大的子比拿雅欲去給伊刣死。
2:30 比拿雅到耶和華的布棚，給約押講：「王按呢講，你著出來！」伊應講：「啊，我欲死佇遮。」比拿雅去回覆王，講約押按呢講按呢應我。
2:30 比拿雅到上主的會幕，給約押講：「王叫你出來。」
約押應講：「毋，我欲死佇遮。」
比拿雅去給王回復講：「約押按呢講，按呢應我。」
2:31 王給伊講：「你通照伊的話行，拍死來埋葬伊，通互約押無因端流人的血彼個罪無歸佇我及我老父的家。
2:31 王給伊講：「你通照伊的話給伊刣死，閣給伊埋葬，互約押流無辜的人的血彼個罪無歸佇我及我的老父的家。
2:32 耶和華欲用伊的血歸佇伊家己的頭殼；因為伊拍比伊卡義比伊卡好的二人，用刀刣死伊，就是以色列的軍長尼珥的子押尼珥及猶大的軍長益帖的子亞瑪撒，也我的老父大衛知。
2:32 上主欲互伊家己擔謀殺人的罪，因為伊無互我的老父大闢知，就去刣死比伊較好較正直的兩個人，尼珥的子以色列的元帥押尼珥，及益帖的子猶大的元帥亞瑪撒。
2:33 對按呢，𪜶的血欲歸佇約押的頭殼及伊的後裔的頭殼，到永遠；獨獨大衛及伊的後裔，伊的家，伊的位，欲對耶和華得著平安，到永遠。」
2:33 願約押謀殺人的罪永遠歸佇伊及伊的後代；毋拘大闢及伊的後代、伊的家，以及伊的位，欲永遠對上主得著平安繁榮。」
2:34 耶何耶大的子比拿雅就上去，拍死伊，就埋葬伊佇曠野佇伊家己的厝。
2:34 耶何耶大的子比拿雅就上去，刣死約押；人給伊埋葬佇曠野附近伊家己的厝。
2:35 王就設立耶何耶大的子比拿雅，替約押做軍長，閣設立祭司撒督來替亞比亞他。
2:35 王就設立耶何耶大的子比拿雅代替約押做元帥；閣設立祭司撒督代替亞比亞他。
示每的死
2:36 王差人叫示每來，就給伊講：「你著為家己起厝佇耶路撒冷，徛起佇遐，通出遐去別位。
示每的死
2:36 王派人叫示每來，給伊講：「你著佇耶路撒冷起厝，住佇遐，𣍐用得出去別位。
2:37 因為你著確實知，你出去過汲淪溪，彼日著死！你的血欲歸你家己的頭殼。」
2:37 你著會記得，你過汲淪溪谷彼日一定著死，這是你家己做得來的。」
2:38 示每應王講：「此個話真好！我的主我的王所講的，你的奴僕欲按呢行。」對按呢示每𫢶佇耶路撒冷多多日。
2:38 示每應王講：「按呢好。我的主我的王所講的，你的僕人遵命。」示每就住佇耶路撒冷真久。
2:39 過三年，示每二個奴僕走到迦特王瑪迦的子亞吉遐。有人給示每講：「你看，你的奴僕佇迦特。」
2:39 過三年，示每兩個奴隸逃走去瑪迦的子迦特王亞吉遐。有人給示每講：「你的奴隸偷走去迦特。」
2:40 示每起來，備辦驢，去迦特到亞吉王遐尋伊的奴僕，示每就去迦特帶伊的奴僕倒來。
2:40 示每就準備驢，去迦特王亞吉遐，尋伊的奴隸。示每去迦特導伊的奴隸倒來。
2:41 有人給所羅門講：「示每出耶路撒冷去迦特倒來。」
2:41 有人給所羅門報告，講：「示每出耶路撒冷去迦特閣倒轉來。」
2:42 王就差人叫示每來，對伊講：「我豈是叫你指耶和華咒誓，閣警戒你講『你著確實知，你出來去外面無論去叨落，彼日你著死』嗎？你應我講：『我聽此個話真好。』
2:42 王就派人叫示每來，對伊講：「我豈毋是叫你指上主咒誓，閣警戒你講：『你著會記得，你離開耶路撒冷彼日一定著死。』你應我講：『按呢好，遵命。』
2:43 今你啥事無執守指耶和華所咒誓的及我所警戒你的命令啊？」
2:43 今你是按怎無遵守對上主所咒的誓，以及我警戒你的命令？」
2:44 王閣給示每講：「你的心所存的歹就是你對阮老父大衛所行的，你家己攏知，所以耶和華欲將你的歹歸你家己的頭殼；
2:44 王閣給示每講：「你真清楚，你對我的老父大闢所做一切的歹，上主欲因為你的歹給你刑罰。
2:45 總是所羅門王欲得著福氣，閣大衛的國位欲佇耶和華的面前堅固，到永遠。」
2:45 毋拘上主欲祝福我，閣大闢的王位會永遠穩固。」
2:46 王就命令耶何耶大的子比拿雅。伊就出去拍互伊死。對按呢，國位堅固佇所羅門的手。
2:46 王下令，耶何耶大的子比拿雅就出去，刣死示每。對按呢所羅門的王國就真穩固。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。