上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
列王紀上
大衛王的年老
1:1 大衛王歲多年老，雖然給伊蓋被，猶原𣍐燒。
大闢王的晚年
1:1 大闢王年老歲數多，蓋被嘛蓋𣍐燒。
1:2 伊許個奴僕就給伊講：「著給我的主我的王尋一個在室女，互伊徛佇王的面前來奉承伊，閣睏佇你的胸前，通互我的主我的王得著燒。」
1:2 伊的人臣對伊講：「請阮的主阮的王准阮尋一個少年的在室女，來奉待照顧你，睏佇你的身軀邊，互阮的主阮的王得著溫暖。」
1:3 就佇以色列的四境尋媠的查某囝仔，尋著書念一個女子名亞比煞，帶到王遐。
1:3 𪜶就佇以色列全國尋媠的查某囝仔；尋著書念一個女子，叫做雅比莎，導來王遐。
1:4 此個查某囝仔媠到極，伊奉承王，伺候伊，總是王無親近伊。
1:4 此個查某囝仔真媠；伊奉待侍候王，毋拘王無及伊同房。
亞多尼雅篡王位
1:5 彼時，哈及的子亞多尼雅自高，講：「我欲做王」，就為家己備辦車、馬兵，閣五十人走佇伊的頭前。
亞多尼雅計謀篡位
1:5 彼時，大闢及哈及生的子亞多尼雅想欲作大，講：「我欲作王。」伊為家己準備戰車及馬兵，閣有五十個兵佇伊頭前開路。
1:6 伊的老父平時曾互伊憂悶，曾對伊講：「你怎樣按呢做？」伊生做不止好，伊出世佇押沙龍的尾後。
1:6 伊的老父毋曾給伊責備講：「你是按怎按呢做？」伊佇押沙龍尾後出世，生做不止英俊。
1:7 伊及洗魯雅的子約押，及祭司亞比亞他參詳；𪜶就隨亞多尼雅，來幫助伊。
1:7 亞多尼雅及洗璐雅的子約押，閣及祭司亞比亞他參詳，𪜶就支持伊。
1:8 總是祭司撒督，及耶何耶大的子比拿雅、先知拿單、及示每、利以，及大衛的勇士攏無為亞多尼雅。
1:8 毋拘祭司撒督，及耶何耶大的子比拿雅、先知拿單，及示每、利以，及大闢的勇士，攏無擁護亞多尼雅。
1:9 亞多尼雅佇近隱‧羅結、瑣希列的石磐邊刣羊、牛，及肥的精牲，請伊的眾兄弟，就是王的子，以及猶大所有做王的人臣的眾人；
1:9 有一日，亞多尼雅佇隱‧羅結附近的瑣希列石磐遐，刣牛、羊，及肥的牲生獻祭，嘛請伊的眾兄弟，就是王的子，以及猶大所有王的人臣。
1:10 獨獨先知拿單及比拿雅以及勇士，及伊的小弟所羅門，伊攏無請𪜶。
1:10 毋拘伊無請先知拿單、比拿雅，及勇士，以及伊的小弟所羅門。
所羅門受設立做王
1:11 拿單給所羅門的老母拔示巴講：「哈及的子亞多尼雅做王啦，你無聽見嗎？咱的主大衛也知。
所羅門受選立做王
1:11 拿單給所羅門的老母拔示芭講：「哈及的子亞多尼雅作王啦，你豈無聽著？咱的主大闢嘛毋知。
1:12 今你來，我替你打算，通保全你的生命及你的子所羅門的生命。
1:12 今你來，我替你拍算，通保全你及你的子所羅門的性命。
1:13 你入去見大衛王，給伊講：『我的主我的王啊，你豈曾對你的女婢咒誓講：你的子所羅門欲續接我做王，伊欲坐我的位嗎？怎樣亞多尼雅做王啊？』
1:13 你入去見大闢王，對伊講：『我的主我的王啊，你豈毋是曾對你的女婢咒誓講，我的子所羅門欲續接你作王，欲坐你的位？是按怎亞多尼雅啲作王？』
1:14 你佇遐及王講話的時，我也隨你的尻脊後入去，來干證你的話是實。」
1:14 你佇遐及王講話的時，我會隨你的後面入去，來證實你的話。」
1:15 拔示巴入去房內見王，王真老，書念的查某囝仔亞比煞啲伺候王。
1:15 拔示芭入去房間見王；王真老，書念的女子雅比莎啲給伊侍候。
1:16 拔示巴鞠躬拜王；王講：「你欲甚麼？」
1:16 拔示芭鞠躬拜王；王講：「你愛什麼？」
1:17 伊給伊講：「我的主啊，你曾指耶和華──你的上帝來對你的女婢咒誓講：『你的子所羅門欲續接我做王，伊欲坐佇我的位。』
1:17 伊給王講：「我的主啊，你曾指上主 — 你的上帝對你的女婢咒誓講：『你的子所羅門欲續接我作王，伊欲坐我的位。』
1:18 看啊，今亞多尼雅做王，我的主我的王你也知。
1:18 今亞多尼雅已經自稱作王，我的主我的王你猶毋知。
1:19 伊有刣多多牛、肥的精牲，及羊，請王的眾子及祭司亞比亞他，及軍長約押；獨獨你的奴僕所羅門，伊無請。
1:19 伊有刣真多隻牛、羊，及肥的牲生獻祭，閣請王的眾子、祭司亞比亞他，及元帥約押；毋拘伊無請你的子所羅門。
1:20 我的主我的王啊，以色列眾人的目睭攏啲看你，聽候你給𪜶講，是誰欲續接我的主我的王來坐伊的位。
1:20 我的主我的王啊，以色列人民的目睭攏啲看你，啲聽候你給𪜶宣布，什麼人欲續接我的主我的王坐王位。
1:21 若無，到我的主我的王及列祖相及睏了後，我及我的子所羅門欲算做有罪的人。」
1:21 若無，我的主我的王轉去你的列祖遐了後，我及我的子所羅門一定會互人看做叛徒。」
1:22 看啊，伊猶啲及王講話的時，先知拿單也入來。
1:22 拔示芭猶啲及王講話的時，先知拿單入來。
1:23 有人給王講：「先知拿單佇遮。」拿單入去王的面前，仆佇地裡拜王。
1:23 有人給王報告：「先知拿單佇遮。」拿單到王的面前，仆佇土腳拜王。
1:24 拿單講：「我的主我的王，你豈有講『亞多尼雅欲續接我做王，欲坐我的位』嗎？
1:24 拿單講：「我的主我的王，你豈曾講『亞多尼雅欲續接我作王，欲坐我的位』？
1:25 因為今仔日伊落去，刣多多牛、及肥的精牲，及羊，請王的眾子及諸個軍長，及祭司亞比亞他；看啊，𪜶佇伊的面前飲食，就講：『願亞多尼雅王萬歲！』
1:25 伊今仔日落去，刣真多牛、羊，及肥的牲生獻祭，閣請王的眾子，及諸個軍長，以及祭司亞比亞他。𪜶及亞多尼雅做夥飲食，講：『亞多尼雅王萬歲！』
1:26 獨獨我，就是你的奴僕及祭司撒督，及耶何耶大的子比拿雅，以及你的奴僕所羅門，伊攏無請。
1:26 毋拘伊無請我，嘛無請祭司撒督，及耶何耶大的子比拿雅，以及王的僕人所羅門。
1:27 這是我的主我的王所做？也無給你的奴僕講，是誰欲續接我的主我的王，坐伊的位嗎？」
1:27 這豈是我的主我的王的意思？王你猶毋曾對你的眾人臣宣布，什麼人欲續接我的主我的王坐你的位。」
1:28 大衛王應講：「給我叫拔示巴來。」伊就入來王的面前，佇王的面前徛啲。
1:28 大闢王應講：「給我叫拔示芭來。」拔示芭就入來，佇王的面前徛啲。
1:29 王咒誓講：「我指救我的生命脫離一切的患難、永活的耶和華來講。
1:29 王咒誓講：「我指救我的性命脫離一切患難，永活的上主講：
1:30 我既然指耶和華──以色列的上帝對你咒誓講：你的子所羅門欲續接我做王，伊欲坐我的位來替我。我今仔日欲照按呢行。」
1:30 『我既然有指上主 — 以色列的上帝對你咒誓，你的子所羅門欲續接我作王坐我的位，我今仔日一定欲照按呢做。』」
1:31 拔示巴就鞠躬仆佇地裡，拜王，講：「願我的主大衛王萬萬歲！」
1:31 拔示芭就鞠躬仆落去拜王，講：「願我的主大闢王萬萬歲！」
1:32 大衛王閣講：「給我叫祭司撒督、先知拿單、及耶何耶大的子比拿雅來！」𪜶就攏來王的面前。
1:32 大闢王閣講：「召祭司撒督、先知拿單，及耶何耶大的子比拿雅來。」𪜶就攏來王的面前。
1:33 王給𪜶講：「著導恁的主許個奴僕及恁去，互我的子所羅門騎我的騾，互伊落去到基訓；
1:33 王給𪜶講：「著導宮廷的官長及恁去，互我的子所羅門騎我的騾落去基訓。
1:34 佇遐祭司撒督及先知拿單著用油抹伊做以色列王；恁也著歕哨角，講：『願所羅門王萬歲！』
1:34 佇遐，祭司撒督及先知拿單著用油抹伊做以色列王。恁嘛著歕哨角宣布：『所羅門王萬歲！』
1:35 然後隨伊上來，伊欲來坐我的位，續接我做王。因為我設立伊做以色列及猶大的君王。」
1:35 然後恁隨伊上來，互伊來坐我的位，續接我作王；我選立伊統治以色列及猶大。」
1:36 耶何耶大的子比拿雅應王講：「阿們！願耶和華──我的主我的王的上帝也按呢講。
1:36 耶何耶大的子比拿雅應王講：「阿們！願上主 — 我的主我的王的上帝嘛按呢宣布。
1:37 耶和華怎樣及我的主我的王佇啲，願伊照按呢及所羅門佇啲，閣互伊的國位比我的主大衛王的國位閣卡大。」
1:37 上主按怎及我的主我的王同在，願伊嘛按呢及所羅門同在，閣互伊的王權比我的主大闢王的王權閣較偉大。」
1:38 對按呢，祭司撒督、先知拿單、耶何耶大的子比拿雅，及基利提人、比利提人攏落去，互所羅門騎大衛王的騾，送伊到基訓。
1:38 祭司撒督、先知拿單、耶何耶大的子比拿雅、基利提人及比利提人，就攏落去，互所羅門騎大闢王的騾，送伊到基訓。
1:39 祭司撒督就對布棚內提貯油的角，用油抹所羅門。人就歕哨角，眾百姓攏講：「願所羅門王萬歲！」
1:39 祭司撒督就對會幕提貯油的角，用油抹所羅門；𪜶就歕哨角，人民攏喝講：「所羅門王萬歲！」
1:40 眾百姓隨伊上來，閣歕笛仔，大大歡喜，致到地因為𪜶的聲到欲裂開。
1:40 人民隨伊上來，閣歕𥰔仔，非常歡喜，歡呼的聲大甲地強欲裂開。
1:41 亞多尼雅以及及伊佇啲許個人客抵仔食桌息，聽見；約押聽見哨角的聲就講：「城內怎樣有嘩嘩哮的聲啊？」
1:41 亞多尼雅以及及伊做夥的人客抵仔食桌煞，聽見歡呼的聲。約押聽著哨角的聲就問：「城內是按怎有嘩嘩哮的聲？」
1:42 伊猶啲講的時，看啊，祭司亞比亞他的子約拿單來。亞多尼雅給伊講：「入來！你是妥當人，必定是報好消息。」
1:42 伊猶啲講的時，祭司亞比亞他的子約拿單來。亞多尼雅給伊講：「入來，你是忠實的人，一定是欲報好消息。」
1:43 約拿單應亞多尼雅講：「有影咱的主大衛王已經設立所羅門做王。
1:43 約拿單應亞多尼雅講：「咱的主大闢王已經設立所羅門作王。
1:44 王差祭司撒督、先知拿單、耶何耶大的子比拿雅，及基利提人、比利提人及所羅門去，𪜶互伊騎王的騾。
1:44 王派祭司撒督、先知拿單、耶何耶大的子比拿雅、基利提人及比利提人，及所羅門做夥去；𪜶互所羅門騎王的騾。
1:45 祭司撒督及先知拿單佇基訓已經抹伊做王。𪜶攏對遐上來真歡喜，致到城應聲，這就是恁所聽見的聲；
1:45 祭司撒督及先知拿單，已經佇基訓給伊抹油互伊作王；𪜶攏對遐護送伊入城，歸城大聲歡呼；這就是恁所聽著的聲。
1:46 閣所羅門已經坐國位。
1:46 閣所羅門嘛已經坐王位。
1:47 王的人臣也來給咱的主大衛王祝福，講：『願你的上帝互所羅門的名比你的名卡贏；互伊的國位比你的國位卡大。』王就佇床裡俯落去拜。
1:47 王的人臣攏來給咱的主大闢王祝福，講：『願你的上帝互所羅門的名比你的名閣較尊貴，互伊的王權比你的王權閣較偉大。』王佇床裡俯落去敬拜，
1:48 王也按呢講：『耶和華──以色列的上帝是應該謳咾的；因為伊賞賜我有一人今仔日坐我的位，我也親目看見。』」
1:48 祈禱講：『上主 — 以色列的上帝應該受稱讚，因為伊有賞賜一個人今仔日坐我的位，互我親目看著。』」
1:49 許個及亞多尼雅佇啲的人客攏驚惶起來，逐人行𪜶的路。
1:49 所有及亞多尼雅做夥的人客攏驚甲皮皮惙，隨人逃走。
1:50 亞多尼雅為著所羅門就驚，起來，去擒壇角。
1:50 亞多尼雅因為非常驚所羅門，就去擒祭壇的角。
1:51 有人給所羅門講：「看啊，亞多尼雅驚所羅門王，因為伊擒壇角，講：『願所羅門王今仔日對我咒誓，的確無用刀刣死伊的奴僕。』」
1:51 有人給所羅門講：「亞多尼雅驚所羅門王，去擒佇祭壇的角，講：『求所羅門王今仔日對我咒誓，一定無欲用刀刣死伊的僕人。』」
1:52 所羅門講：「伊若欲做好人，一支頭毛也𣍐磕落佇地裡；若看伊有歹，就的確著死。」
1:52 所羅門講：「伊若對我盡忠，連一支頭毛嘛𣍐落佇土腳；伊若作惡，一定著死。」
1:53 所羅門王就差人去，𪜶就帶伊對壇裡落來，伊就來，拜佇所羅門王的面前；所羅門給伊講：「你倒去你的厝！」
1:53 所羅門王就差人對祭壇給伊導落來，亞多尼雅就來佇所羅門王面前跪拜。所羅門給伊講：「你倒去恁兜。」
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。