上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
撒母耳記下
大衛點算百姓
24:1 ( 代上 21:1-27 )
耶和華閣受氣以色列人，激動大衛來害𪜶，就講著去算以色列及猶大人。
大闢調查戶口
24:1 ( 代上 21:1-17 )
上主閣對以色列人受氣，激動大闢來對付𪜶，講：「去調查以色列及猶大的人口。」
24:2 王吩咐及伊佇啲的軍長約押，講：「你今去遍行以色列眾支派，對但到別是巴，點算百姓，互我知百姓的數額。」
24:2 王吩咐伊身邊的元帥約押講：「你去以色列逐個支族，對但到別是巴，點算人口，互我知全國人民的數目。」
24:3 約押給王講：「無論百姓偌多，願耶和華──你的上帝加添百倍，閣互我的主我的王親目看見。總是我的主我的王啥事歡喜此個事啊？」
24:3 約押對王講：「願上主 — 你的上帝互全國人民增加百倍，閣互我的主我的王親目看見；毋拘我的主我的王是按怎愛欲做此個代誌？」
24:4 總是王的話贏過約押及許個軍長。約押及許個軍長就對王的面前出去，點算以色列的百姓。
24:4 王堅持伊的命令。約押及許個軍長就奉命出去，點算以色列的人口。
24:5 𪜶過約但，紮營佇亞羅珥、佇迦得山谷中的城的正旁，及雅謝相近，
24:5 𪜶過約旦河，佇迦得山谷中亞羅珥城的南旁紮營，對遐去雅謝；
24:6 閣到基列及他停‧合示的地，閣到但‧雅安，踅到西頓，
24:6 經過基列，到他停‧合示地區，閣到但‧雅安，踅到西頓；
24:7 閣到推羅堅固的城，及希未人以及迦南人一切的城，閣出去到猶大南方的別是巴。
24:7 閣到泰爾堅固的城，及所有希未人以及迦南人的城；最後到猶大南旁的別是巴。
24:8 𪜶遍行全地，歷過九月日閣二十日，就倒轉到耶路撒冷。
24:8 𪜶行透全國，經過九個月閣二十日，倒轉來耶路撒冷。
24:9 約押用算百姓的數額晉互王知；以色列人攑刀的勇士八十萬；猶大人有五十萬。
24:9 約押將點算的人數報告互王知。以色列人攑刀的戰士有八十萬，猶大人有五十萬。
24:10 大衛算百姓的數額了後，心就家己責備，大衛給耶和華講：「我行此個事大大有犯罪。耶和華啊，求你除去你的奴僕的過失，因為我所行的真戇。」
24:10 大闢點算人民的數目了後，心內自責。大闢對上主講：「我做此個代誌犯真大的罪。上主啊，求你除去你奴僕的罪，因為我按呢做真戇。」
24:11 大衛天光早起來的時，耶和華的話臨到先知迦得，就是大衛的先見者，講：
24:11 大闢透早起來，上主的話臨到大闢的先見迦得先知，講：
24:12 「你去給大衛講，耶和華按呢講：『今我用三項互你，你揀一項，我通行佇你。』」
24:12 「你去給大闢講，上主按呢講：『我用三項災禍互你揀一項，我就照按呢做。』」
24:13 迦得就來通知大衛，對伊講：「你愛你的地飢荒七年久嗎？抑是愛你的對敵追趇你，你逃走佇伊的面前三月日久啊？抑是愛瘟疫佇你的地三日久啊？今你著斟酌想看唧，我通用甚麼話回覆差我的。」
24:13 迦得來給大闢講：「你愛你的國飢荒七年？抑是互你的對敵追殺三個月？抑是愛你的國有瘟疫三日久？你著斟酌想，互我通回復差我來彼位。」
24:14 大衛給迦得講：「我真為難！咱寧可陷落佇耶和華的手，因為伊有豐盛的憐憫。我願陷落佇人的手。」
24:14 大闢給迦得講：「我真為難，毋拘咱寧可互上主家己給咱刑罰，因為伊有豐盛的憐憫；我毋願陷落佇人的手。」
24:15 耶和華就降瘟疫互以色列，對清早到所定著的時；對但到別是巴，百姓間死七萬人。
24:15 上主就降瘟疫佇以色列，對但到別是巴，對清早到預定的時，人民總共死七萬人。
24:16 當天使伸手佇耶路撒冷欲滅伊的時，耶和華就退悔降落此個災禍，就給滅百姓的天使講：「夠額啦！勼你的手！」彼時耶和華的使者佇耶布斯人亞勞拿的五榖場。
24:16 當天使伸手欲滅耶路撒冷的時，上主改變心意，無欲繼續降此個災禍，就給啲執行毀滅的天使講：「停手！夠額啦！」彼時，上主的使者抵佇耶布斯人亞勞拿的五穀場。
24:17 大衛看見拍百姓的天使，就給耶和華講：「看啊，犯罪的是我，悖逆的也是我；總是諸個歸群的羊有做甚麼啊？願你的手攻擊我及我父的家。」
24:17 大闢看見殺害人民的天使，就對上主講：「上主啊，我有犯罪，背逆的是我；毋拘諸個無辜的人民有做什麼毋著？求你的手刑罰我及我的家族。」
24:18 彼日，迦得來見大衛，給伊講：「你上去，佇耶布斯人亞勞拿的五榖場給耶和華起一座壇。」
大闢為上主起一座祭壇
24:18 ( 代上 21:18-27 )
仝彼日，迦得來見大闢，對伊講：「你去耶布斯人亞勞拿的五穀場，佇遐為上主起一座祭壇。」
24:19 大衛照迦得的話上去，照耶和華的命令。
24:19 大闢就照上主吩咐迦得的話上去。
24:20 亞勞拿啲看，看見王及伊的人臣對面來，亞勞拿就出去，仆佇地裡拜王。
24:20 亞勞拿看著對面有王及伊的人臣啲來，就出去，仆佇土腳拜王。
24:21 亞勞拿講：「我的主我的王來奴僕遮啥事？」大衛講：「我來欲買你此個五榖場，給耶和華起一座壇，互百姓間的瘟疫息。」
24:21 亞勞拿講：「我的主我的王來僕人遮有什麼貴事？」
大闢講：「我來是欲買你此個五穀場，為上主起一座祭壇，互全國的瘟疫停止。」
24:22 亞勞拿給大衛講：「我的主我的王，照你所看做好的提來獻伊。看啊，遮有牛通做燒祭，有拍五榖的器具及套牛的枷車通做柴。
24:22 亞勞拿對大闢講：「我的主我的王，照你所看做好的攏提去獻。遮有牛，通做燒化祭，有拍五穀的器具及牛軛通做柴燒。
24:23 王啊，亞勞拿用這一切送互王」；亞勞拿閣給王講：「願耶和華──你的上帝接納你。」
24:23 王啊，亞勞拿將諸個攏送互王。」亞勞拿閣對王講：「願上主 — 你的上帝接納你。」
24:24 王給亞勞拿講：「通啊。我欲照價錢給你買；我肯用白白得著的物做燒祭獻互耶和華──我的上帝。」大衛就用五十舍客勒的銀買彼個五榖場及牛。
24:24 王對亞勞拿講：「毋通，我欲照價錢給你買。我無愛用白白得著的物做燒化祭獻互上主 — 我的上帝。」大闢就用五百七十公克的銀買彼個五穀場及牛。
24:25 大衛佇遐給耶和華起一座壇，獻燒祭及謝恩祭。按呢，耶和華聽𪜶為地方所求的，瘟疫佇以色列中就息。
24:25 大闢佇遐為上主起一座祭壇，獻燒化祭及平安祭。按呢，上主聽𪜶為著全國的祈禱，瘟疫就佇以色列中停止。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。